Immannugot ti kompania iti parmaseutika a Sanofi Pasteur nga isublina ti 1.4-bilion a pisos a bayad ti saan a nausar a Dengvaxia, kas panangtungpal iti dawat ti Department of Health (DoH).
Segun iti pakaammo a naipatulod iti prensa iti katengngaan ti Enero, kuna ti Sanofi a bayadanna dagiti bakuna a saan a nausar iti programa ti gobierno iti panagbakuna.
Linawlawagan ketdi ti kompania a ti yaannugotda iti dawat ti DoH, dina kayat a sawen a mapagduaduaan ti kalidad ken kinatalged ti bakunada.
Mangnamnama ketdi ti Sanofi Pasteur a daytoy a pangngeddengda, dalan para iti nawaywaya ken nataltalged a pannakitinnulongda iti DoH tapno marisut ti negatibo a panagkita maipapan iti bakuna kontra iti dengue iti Filipinas.
Mamati ti Sanofi Pasteur a daytoy a panagkita ket gapu iti saan a panagkikinnaawatan maipanggep kadagiti benepisio ken risgo a mainaig iti bakuna kontra iti dengue ken kinakurang ti impormasion ti publiko, nangruna dagiti nagannak dagiti nabakunaan nga ubbing, a positibo latta ti pakabuklan a benepisio iti panagbakuna kontra iti dengue kadagiti pagilian a pagrarairaan ti dengue a kas iti Filipinas.
(Naipablaak iti Bannawag, Enero 29, 2018 a bilang.)
No comments:
Post a Comment