July 31, 2013

Umuna ti Benguet iti tay-ak ti panagdur-as; kutit ti Sulu

Mabalinen a palakpakan dagiti agindeg iti probinsia ti Benguet ti bagbagida.

Ti Benguet ti nabalangatan nga umun-una iti biang ti human development iti Philippine Human Development Report (PHDR) a nayalnag itay nabiit.

Ti PHDR ti mangireport iti progreso dagiti probinsia iti pagilian iti biang ti naganar, salun-at ken ammo (knowledge) dagiti residente.

Dadduma pay a probinsia a karaman iti Top 10: Batanes, Rizal, Cavite, Bulacan, Bataan, Laguna, Nueva Vizcaya, Ilocos Norte ken Pampanga.

Adda amin dagitoy iti Luzon.

Nainaganan ti Sulu a kas kutit iti listaan, sarunuen ti Maguindanao, Tawi-Tawi, Zamboanga, Agusan del Sur, Davao Oriental, Sarangani, Zamboanga del Norte, Masbate ken Lanao del Sur.

Adda met amin dagitoy a probinsia iti Mindanao, malaksid iti Masbate nga adda iti rehion ti Bikol.
Ti human development, kas inladawan ti United Nations Development Program (UNDP), ket wagas a panangipaay kadagiti umili iti ad-adu a pagpilian iti biag.

Tapno magun-od dagiti umili ti nasaysayaat a biag, masapul a nasalun-atda ken nakananama ti atiddog a biag, addaanda met iti ammo (knowledge) kas marukod iti kaadu wenno kabassit ti addaan adalna ken nakaenrol (agad-adal), addaan iti umdas a pagganaran tapno mapadasanda ti desente a panagbiag, ken kabaelanda ti nawaya a makitakunaynay iti komunidad ken dadduma pay a pasken ti gimong.


(Naipablak iti Bannawag, Agosto 12, 2013 a bilang

Apit a Repolio



APIT A REPOLIO. Siaanus daytoy a mannalon a mangbagbagkat iti apitna a repolio iti nagmulaanna a bakras ti Bantay Cabuyao iti Tuba, Benguet tapno ipanna iti tiendaan (trading post) iti La Trinidad, Benguet. (Rizaldy Comanda)


(Naipablak iti Bannawag, Agosto 12, 2013 a bilang

Baro a presidente ti GUMIL Cagayan

Nabotosan ni Dr. Freddie Padua Masuli ti Abulug ken Sanchez Mira, Cagayan a kas baro a presidente ti GUMIL Cagayan (Gunglo Dagiti Mannurat nga Ilokano iti Cagayan) iti naangay nga eleksion dagiti opisial ti gunglo itay Hulio 28 iti Siudad ti Tuguegarao.

Sinuktan ni Dr. Masuli, associate professor III ken agpapaay a dekano ti College of Information Technology iti Cagayan State University-Sanchez Mira, ni Arthur P. Urata Sr. a presidente itan ti GUMIL Filipinas.

Kadua ni Dr. Masuli, premiado a mannurat, a napili dagiti sumaganad nga agtakem iti 2013-2016: Vilmer V. Viloria, bise-presidente; Johmar R. Alvarez, sekretario; Jobert M. Pacnis, treasurer; Eva Agustin Mendoza, auditor; Derick Marcel F. Yabes, business manager, Roy V. Aragon, PRO;

Board of Directors: Ronnie E. Aguinaldo, Raquelito B. Cenal, Ferdinand N. Cortez, Francisco V. De la Cruz, Dexter M. Fabito, Bobby Luczon, Rolando A. Seguro Jr., Edison Tobias, ken Arthur P. Urata Sr. (ex-officio);

Advisers: Dionisio S. Bulong, Antonio P.N. Urata, Atty. Jessie B. Usita, Atty. Engelbert C. Caronan, Atty. Ederlino U. Tabilas, Atty. Rodrigo P. De Gracia, Engr. Rolando Torida, Winston Singun, Ariel S. Tabag, ken Alex V. Yadao. (RVA)


(Naipablak iti Bannawag, Agosto 12, 2013 a bilang

AGOSTO 12, 2013



SARITA
 6 Ni Bi-o-Bi-o, ni Cory, ni Erap ken ni Marcos
   Cles B. Rambaud

NOBELA
26 Kasera 101 (3)
N.M.E. Valdez
32 Galiera Queen (23)
   Dionisio S. Bulong

DANIW
4 Saan Met a Malmalday ti Rabii
    Vincent R. Raras
18 Agbalinak Koma a Pul-oy
   Elizabeth M. Raquel
28 Ditoy Igid ti Baybay
     Ronnie E. Aguinaldo
48 Dandaniw a Para Ubbing
    Leonora R. Melchor/ Eden Cachola Bulong

SALAYSAY
 8 Gapu Ta Daytoy ti Linteg (100)
     Hues Joven F. Costales (Ret.)
10 Apay nga Adda Agpakamatay a Nagpasngay?
     Virginia A. Duldulao, Ph.D.
12 Kasapulan Kadi Pay ti Pork Barrel?
     Neyo Mario E. Valdez
40 Naapgad ti Talonmo?
     Reynaldo E. Andres

KOMIKS
19 Tres Muchos (117)
22 Aritosan (41)
24 Miks & Tiks

KOLUM
14 Okeyka, Apong!
34 TIPS
37 Kastoy, Kapid, Ditoy Hawaii
38 Ading Kosinera
42 Padasem Daytoy, Kailian

PAGLINGLINGAYAN
44 Showbiz
46 All Others Will Be Toad, Kdp.
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
 2 Ti Makunami
15 Tao, Lugar, Pasamak
16 Siled ti Kararag
17 Kasano a Mapengdam ti Anakmo nga Aginum?
29 No Nailuod ni Balongmo iti “Games”
30 Maika-3 a Pasalip ti ALVIYA iti Sarita
31 Ammom ti “SPG”?
33 Txtm8
35 Ti Gasatmo Ita a Lawas
36 Ammuem Pay Dagitoy
39 Ilikliktayo Dagiti Ubbing iti Krimen

July 30, 2013

TB-Free Philippines Photography Contest 2013

Aw-awisen ti Philippine Business for Social Progress (PBSP), ti fund manager ti TB component ti “The Global Fund to Fights Aids, Tuberculosis and Malaria (TGFATM),” dagiti amin a Filipino iti uray ania nga edad ken agnaed iti uray sadino a paset ti Filipinas a makipartisipar iti TB-Free Philippines Photography Contest 2013.

Silulukat ti salip agingga iti Agosto 20, 2013. Umawat ti Umuna a Gunggona iti P20,000, idinto a ti Maikadua ken Maikatlo a Gunggona, umawatda iti P15,000 ken P10,000, kas panagsaganadda. Adda siam a konsolasion a gunggona nga agpateg iti P2,000.00 tunggal maysa a maipaay kadagiti maikari nga entry.

Masapul a mangipakita iti uray ania kadagiti sumaganad a tema/mensahe dagiti pakisalip a ladawan (retrato):

a. Maagasan ti TB.

b. Libre ken nakasagana a maipaay ti pannaripato para iti TB.

c. Dagiti dati a pasiente ti TB, addaan iti produktibo ken nasalsalun-at a biag kalpasan a naagasanda.

d. Uray asino man, posible a makapet ti TB, saan laeng a dagiti nakurapay.

e. Makatulong iti pannakaungaw ti TB ti napigpigsa a panagtitinnulong dagiti nadumaduma a sektor.

f. Ti umuna nga addang tapno aglaing manipud iti TB ket ti umno a pannakaawat no ania ti TB.
Makedngan dagiti pakisalip, kas maibatay kadagiti sumaganad a kriteria:

Relevance to the Theme: 35%
Creativity:               25%
Technique:              20%
Overall Impact:              20%
Total                     100%

Mabalin a mangidatag dagiti makisalip iti agingga iti tallo a ladawan/retrato, ngem maysa laeng ti mabalin a mangabak. Iti kanito a mangabak ti makisalip iti ad-adu ngem maysa a premio, maipaay kenkuana ti kangatuan kadagitoy a gunggona.

Saan a mapalubosan a makisalip dagiti empleado ti PBSP, Global Fund TB Grant, ken PBSP-GF Sub Recipients ken dagiti kakabagianda agingga iti maikadua a degree ti affinity ken consanguinity.
Mabasa ti kompleto a pagalagadan ti salip iti website ti PBSP-GF: http://www.pbsp.org.ph/globalfund/?p=598.

Para iti ania man a saludsod maipanggep iti salip, kontaken ni Sherma E. Benosa kadagiti numero ti telepono (02) 527-7741 agingga iti 48, wenno babaen ti e-mail: sherma.benosa@gmail.com.


(Naipablaak iti Bannawag, Agosto 5, 2013 a bilang.)

Salip iti Ababa a Sarita ti Mayor Carlito F. Pentecostes, Jr. Awards for Ilokano Literature (Mayor CFPJ Awards), naluktan

Naluktan ti umuna a panagpasalip iti panagsurat iti ababa a sarita ti kabbuangay a Mayor Carlito F. Pentecostes, Jr. Awards for Ilokano Literature wenno Mayor CFPJ Awards a  para kadagiti propesional ken agdadamo a mannurat nga Ilokano.

Esponsoran daytoy ni Mayor Carlito Fidel Pentecostes, Jr. ti Gonzaga, Cagayan ken ti kaingungotna a ni Mrs. Marilyn S. Pentecostes, babaen ti pannakitinnulong ti GUMIL Cagayan.

Dagiti pagannurotan:

1. Naluktan ti salip idi Hulio 1, 2013 ken aggibus daytoy iti Nobiembre 30, 2013.

2. Silulukat ti salip kadagiti amin a mannurat nga Ilokano ken uray pay kadagiti saan nga Ilokano ngem makasurat iti pagsasao nga Ilokano (Iluko wenno Iloko). Dua a kategoria ti salip: 1.) para kadagiti propesional wenno beterano a mannurat, ken 2.) para kadagiti agdadamo a mannurat. Maibilang nga agdadamo ti mannurat no awan pay nasursurok ngem tallo a naipablaakna nga ababa a sarita (short story), iti man Ilokano man wenno sabsabali pay a pagsasao, kadagiti naimaldit (printed) a pagbasaan a kas iti magasin wenno pagiwarnak nga addaan iti nasional a sirkulasion, kas koma iti Bannawag, agingga iti pannakalukat ti salip.

3. Nawaya ti makisalip a mangpili iti tema wenno topiko a kayatna a suraten.

4. Agatiddog ti ababa a sarita iti 10-25 a panid iti short bond paper, naikompiuter (MS Word document) iti doble espasio (agaramat iti Times New Roman font, size 12), ken addaan iti espasio wenno margin a maysa a pulgada iti amin nga igid ti papel wenno document file.

5. Maysa laeng a sarita ti mabalin nga isalip ti tunggal mannurat a makisalip.

6. Nasken a bukod a putar ti autor ti maisalip, saan pay a naipablaak iti ania man a printed a pablaakan, saan pay a nangabak iti ania man a kita ti pasalip, ken saan a naipatarus manipud iti ania man a lengguahe.

7. Ti parbo a nagan ti autor ti agparang a naganna a kas autor ti sarita. Ipatulod ti pakisalip iti uppat a nadalus a kopia ken pakuyogan iti narikpan a sobre a naglaon iti pudno ken parbo a nagan ti autor, paulo ti pakisalip, kaudian a ladawan ken ababa a pakasaritaan ti biag ti autor, adres ti agdama a pagnaedan, agraman e-mail address ken numero ti selpon wenno telepono a mabalin a pakakontakan iti autor. Iti rabaw ti sobre, isurat ti paulo ti sarita ken parbo a nagan ti autor. Mabalin met nga ipatulod ti pakisalip babaen ti e-mail (soft copy ti pakisalip a sarita ken bionote ti autor).

8. Ipatulod ti pakisalip iti daytoy nga adres: Salip iti Ababa a Sarita, Mayor CFPJ Awards, c/o Roy V. Aragon, Blk 34 Lot 5, Wonderland Homes, Iguig, 3504 Cagayan. No met iti email, ipatulod iti: mayor.cfpj.awards@gmail.com. Nasken a maawat ti contest secretariat ti pakisalip iti di naladladaw ngem 11:59 PM (oras iti Filipinas) iti Nobiembre 30, 2013.

9. Pinal ti pangngeddeng dagiti hurado ken maibabawi ti gunggona ti mangabak no maduktalan kalpasanna a sinalungasingna ti Pagannurotan Bilang 6. Awanto metten ti karbengan ti naglabsing nga autor a makisalip kadagiti sabali pay a pasalip ti Mayor CFPJ Awards.

10. Dagiti gunggona: Propesional: Umuna a Gunggona: P10,000; Maika-2 a Gunggona: P7,500; ken Maika-3 a Gunggona: P5,000. Agdadamo: Umuna a Gunggona: P7,000; Maika-2 a Gunggona: P5,000; Maika-3 a Gunggona: P3,000; ken dua a Consolation Prizes a sag-P2,000. Maikkan pay iti sertipiko ti pammadayaw amin a mangabak. Mabalin a makissayan ti bilang dagiti mangabak no iti biang dagiti hurado ket awan ti makapatar iti bukodda a pagbatayan iti panangpilida kadagiti mangabak. No kasapulan, mabalinda met ti mangparnuay iti sabali a gunggona.

11. Agbalin a makipagtagikua ti Mayor CFPJ Awards kadagiti mangabak a sarita. Ngarud, kas iti autor, maaddaan ti esponsor iti karbengan a mangipablaak kadagitoy mangabak a sarita iti ania man a wagas a kayatna karamanen ti elektroniko ken tradisional a wagas ti panagipablaak.

12. Mapakaammuanto dagiti mangabak no kaano ken sadino ti pakapadayawanda ken pakaitedan dagiti premioda.


(Naipablak iti Bannawag, Hulio 29, 2013 a bilang.)

July 29, 2013

Baliena A Naisadsad Iti Purok Silaw Iti Siudad Ti Laoag



BALIENA A NAISADSAD ITI PUROK SILAW ITI SIUDAD TI LAOAG. Umad-adu dagiti endangered species a kas iti daytoy a giant sperm whale a nasarakan dagiti lumugar kabayatan nga agpipinnalumbada (4x4 off-road driving) iti Laoag Sand Dunes idi malem ti Domingo, Hulio 21. Agatiddog ti baliena iti 20.3 a metro ken agdagsen iti 60 a metrika tonelada. Manipud pay idi Enero, addan innem a klase ti baliena ken dolphin ti naisadsad iti baybay a paset ti probinsia ngem ti laeng maysa a rough toothed dolphin kadagupan ti innem ti nagasat a nagbiag idi makita ti maysa a mangngalap a naipilet iti iketna ket naisubli met laeng a dagus iti tengnga ti taaw. Segun ken ni Arthur Valente, Fisheries Regulation Officer ti probinsia, makaalarman ti kaadu dagiti maisadsadsad a dolphin ken baliena iti Ilocos Norte a segun kenkuana, nalabit gapu iti nakaro a toxin (sabidong) a maipapaunegda manipud iti narugit a danum, illegal a panagkalap, wenno gapu iti nakaro a sakit ken bisin a puon ti panagsawarda iti kanenda ket mayaw-awan dagitoy iti takdang. (Leilanie G. Adriano)


(Naipablaak iti Bannawag, Agosto 5, 2013 a bilang.)

West Philippine Sea, asino ti akinkukua?

Mangnamnama ti gobierno ti Filipinas a bigbigen ken itandudo ti maysa a korte iti babaen ti United Nations ti panangtagikua ti Filipinas iti West Philippine Sea a tagtagikuaen met ti China.

Kinuna ni Presidential Spokesman Edwin Lacierda itay lawasna a nangrugin ti panagpapatang ti lima-ti-kamengna a tribunal iti babaen ti UN Convention on the Law of the Seas idiay The Netherlands. Ad-adalen ti nasao a tribunal no adda karbenganda a makibiang iti riri ti Filipinas ken ti China.

Sakbayna, kiniddaw ti Filipinas ti pannakibiang ti United Nations iti pannakarisut ti panagtagikua iti West Philippine Sea.

Iti laksid ti manamnama a panagsango ti Filipinas ken ti China iti sanguanan ti tribunal tapno ilabanda ti panagtagikuada iti West Philippine Sea, kinuna ni Lacierda a mangnamnama a saan a maapektaran ti napintas a relasion dagiti dua a pagilian.

Maysa laeng daytoy nga isyu idinto a nagadu dagiti rumbeng a pagkaduaan dagiti pagilian, kas koma iti kultura ken negosio, kinuna ni Lacierda.


(Naipablaak iti Bannawag, Agosto 5, 2013 a bilang.)

July 24, 2013

AGOSTO 5, 2013



SARITA
 6 Once a Funny Time: Ti Pannakigasanggasat da Kennedy ken Clinton
Crisostomo M. Ilustre

NOBELA
26 Kasera 101 (2)
N.M.E. Valdez
32 Galiera Queen (22)
  Dionisio S. Bulong

DANIW
4 Kansion ti Masikog
  Lilia Quindoza Santiago
8 No Agsarakta Manen
   Pearl Lovedyn A. Dacuag
17 Ibagak Daytoy
     Corazon F. Quiamas
28 Ti Pul-oy Ditoy
      Jobert M. Pacnis
48 Dandaniw a Para Ubbing
     Alegria T. Visaya/ Ryan A. Dulig

SALAYSAY
10 Gapu Ta Daytoy ti Linteg (99)
    Hues Joven F. Costales (Ret.)
12 SONA 2013: Ania, Agpatingga Laeng iti Numero?
    Neyo Mario E. Valdez
40 Parikutmo Kadi Dagiti Baot’ Talon?
     Reynaldo E. Andres

KOMIKS
19 Tres Muchos (116)
22 Aritosan (40)
24 Miks & Tiks

KOLUM
14 Okeyka, Apong!
34 TIPS
37 Kastoy, Kapid, Ditoy Hawaii
38 Ading Kosinera
42 Padasem Daytoy, Kailian

PAGLINGLINGAYAN
44 Showbiz
46 Crash ng Bayan, Kdp.
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
 2 Ti Makunami
15 Tao, Lugar, Pasamak
16 Siled ti Kararag
18 “Isabela, Yuyeng ni Kappia…”
29 Ania ti Korupsion?
31 Ay, Wen, Mangbangontayo iti Book Club!
33 Txtm8
35 Ti Gasatmo Ita a Lawas
36 Ammuem Pay Dagitoy
39 Kas Mangisursuro: Tumulong iti Pannakalapped ti Riribuk iti Uneg ti Eskuela

July 22, 2013

Pagpampannakkel ti Cordillera



PAGPAMPANNAKKEL TI CORDILLERA. Maysa kadagiti tribu iti Cordillera a nakiraman iti grand parade idi Hulio 15, 2013 a kas paset iti pannakarambak ti 26th Cordillera Founding Anniversary a naangay iti Siudad ti Baguio. (Rizaldy Comanda)


(Naipablaak iti Bannawag, Hulio 29, 2013 a bilang.)

Pito a sabali pay a lengguahe, nairaman a maaramat a pangisuro

Pito a sabali pay a lengguahe iti pagilian ti inraman ti Departamento ti Edukasion (DepEd) a mausar a pangisuro iti Kindergarten agingga iti Grado 3 iti babaen ti Mother Tongue-Based Multi-Lingual Education (MTB-MLE).

Kuna ti DepEd a mairamanen iti MTB-MLE ti Ibanag para kadagiti agad-adal iti Tuguegarao City, Cagayan ken iti Isabela; Ivatan iti Batanes; Sambal iti Zambales; Aklanon at Kinaray-a iti Aklan ken Capiz; Yakan iti Autonomous Region of Muslim Mindanao (ARMM); ken Surigaonon iti Surigao.

Iti panangikeddeng ti DepEd iti pannakausar dagitoy a lengguahe a kas medium of instruction, kinuna ni Sekretario Luistro a maibatay kadagiti panagadal, mapadaras ti panagsursuro dagiti ubbing no bukodda a lengguahe ti mausar kadagiti nasapa a paset ti biagda a kas agad-adal malaksid a masursuroda pay nga ipagpannakkel ti nakayanakanna a kultura.

Sakbayna, nainagananen dagitoy a lengguahe a kas medium of instruction: Tagalog, Kapampangan, Pangasinense, Ilokano, Bikol, Cebuano, Hiligaynon, Waray, Tausug, Maguindanaoan, Maranao ken Chavacano.


(Naipablaak iti Bannawag, Hulio 29, 2013 a bilang.)

Pinia ti Pamplona



PINIA TI PAMPLONA. Magustuan a sardengan dagiti biahero daytoy a paset ti igid ti kalsada iti Pamplona, Cagayan. Ditoy ngamin ti pakagatangan iti nalaka ken nasam-it a pinia no tiempona. Depende iti kadakkel, agbalor laeng daytoy iti sangapulo agingga iti beinte pisos ti maysa. Adda pay sampuakna no adu ti gatangem. (Leilanie G. Adriano)


(Naipablaak iti Bannawag, Hulio 29, 2013 a bilang.)

National Artist Award kada Caparas ken kakaduana, imbabawi ti Korte Suprema

Imbabawi ti Korte Suprema itay Hulio 16 ti kontrobersial a panangisaad ni dati a Presidente Gloria Macapagal-Arroyo iti National Artist Award kada comic strip artist ken film director Carlo J. Caparas, fashion designer Jose “Pitoy” Moreno, theater artist Cecile Guidote-Alvarez ken architect Francisco Mañosa idi 2009.

Babaen ti botos a 12-1-2, indeklara ti kangatuan a pangukoman nga imbalido dagiti Proklamasion Blng. 1826 agingga iti 1829 nga impaulog ni Arroyo idi Hulio 6, 2009, a nangideklara kada Guidote-Alvarez, Caparas, Mañosa ken Moreno kas National Artist gapu ta naipaulog dagitoy babaen ti nakaro a panangaburo iti diskresion wenno wayawaya a mangpili, ngarud, naibilin ti pannakaiwalin dagiti nasao a proklamasion.

Kuna ni Theodore Te, pannakangiwat ti Korte Suprema, a mainaig ti desision ti Korte iti petision nga impila ti grupo dagiti National Artist a da mannurat Virgilio Almario ken Bienvenido Lumbera, eskultor Napoleon Abueva ken pintor Arturo Luz.

Saan a nagbotos dagiti Associate Justice a da Mariano del Castillo ken Marvic Leonen. Kas ken ni Te, nagpaay ni Leonen a pannakaabogado dagiti nagpetision iti kaso. Saan met a nakadar-ay iti sesion ni Associate Justice Arturo Brion gapu iti parikut iti salun-at.

Kuna ti National Commission for Culture and the Arts (NCCA) a ti desision ti Korte Suprema, maibilang met a balligi ti NCCA ta saan a nakonsulta daytoy no asino dagiti mapili a National Artist.

Innayon ti NCCA a saanna a kuestionaren ti kredensial dagiti nadakamat nga artist a naibabawi ti award-da no di ket ti wagas ti pannakapilida.

Kuna pay ti NCCA a mabalin manen a mainominar da Caparas ken kakaduana tapno aglasatda iti umno a proseso ti pannakapili dagiti National Artist.


(Naipablaak iti Bannawag, Hulio 29, 2013 a bilang.)

July 17, 2013

HULIO 29, 2013



SARITA
 6 Amy
   Ronelyn B. Ramones

NOBELA
26 Kasera 101 (1)
N.M.E. Valdez
32 Galiera Queen (21)
  Dionisio S. Bulong

DANIW
4 Rabong
      Daniel L. Nesperos
30 Kantaak Ita ti Bagik
    Marianito F. Raquel
48 Dandaniw a Para Ubbing
   Leonora R. Melchor/ Ryan A. Dulig

SALAYSAY
 8 Gapu Ta Daytoy ti Linteg (99)
    Hues Joven F. Costales (Ret.)
12 Ania ti Pudno iti Black Sand Mining?
    Neyo Mario E. Valdez
24 Nangayed Latta Dagiti Payo iti Batad
      John B. Buhay ken Loreen M. Mangili

40 Addan Innem a Barayti ti Dragon Cactus
     Reynaldo E. Andres

KOMIKS
17 Tres Muchos (115)
20 Aritosan (39)
22 Miks & Tiks

KOLUM
14 Okeyka, Apong!
34 TIPS
37 Kastoy, Kapid, Ditoy Hawaii
38 Ading Kosinera
42 Padasem Daytoy, Kailian

PAGLINGLINGAYAN
44 Showbiz
46 Bus Top, Kdp.
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
 2 Ti Makunami
10 Asino Dagiti Nangsurat iti Linteg a Nangbangon iti NCCA?
15 Tao, Lugar, Pasamak
16 Siled ti Kararag
29 Napeggad ti Pannakailuod iti Video Games ken Internet
31 “Ay, Estudiantek Idi!”
33 Txtm8
35 Ti Gasatmo Ita a Lawas
36 Ammuem Pay Dagitoy
39 Ania, Aya, Daytoy Human Trafficking?

July 14, 2013

Dusa a bitay, saan a kayat ti Malakanyang

Ni GENALYN D. KABILING

Saan pay laeng a pabor ti Malakanyang a mangsuporta iti singasing a pannakaisubli ti dusa a bitay iti Filipinas kadagiti napaneknekan a nagbasol kadagiti kaso a maipanggep iti droga.

Kinuna ni Deputy Presidential Spokeswoman Abigail Valte a kaykayat ti gobierno nga agtalinaed dagitoy a tattao iti pagbaludan ngem ti maipatulodda iti pagbitayan.

“Awan ti nagbaliwan ti kapanunotan ti Presidente maipanggep iti pannakaipataw ti dusa a bitay para kadagiti dadduma a krimen,” kinuna ni Valte, a kayatna a sawen, ti pagtaktakderan ni Presidente Aquino maipanggep iti dusa a bitay.

“Agtalinaed ti pammati a ti sigurado a pannakaibalud dagiti agsalungasing iti linteg ti kasamayan pay laeng a panglapped iti pannakapasamak dagiti krimen,” innayon ni Valte.

Sakbayna, nangidatag ni Sen. Vicente Sotto III iti gakat a mangisubli iti dusa a bitay kadagiti kaso a mainaig iti droga.

Panggep ti Senate Bill No. 1 a sinurat ni Sotto ti pannakabukel ti espesial a korte a mangtaming kadagiti kaso a mainaig iti droga.

Nainaw ti gakat a mangisubli iti dusa a bitay a kas kanaig ti pannakabitay itay nabiit idiay China ti maysa a Filipino drug mule wenno nagkarga iti droga a maipan iti China.


(Naipablaak iti Bannawag, Hulio 22, 2013 a bilang,)

Miting ti GUMIL Cagayan, Hulio 28

Maangay ti miting ti GUMIL Cagayan, ti gunglo dagiti mannurat iti Cagayan, inton inton Hulio 28 iti alas-9:30 A.M. iti “Pakarso ti GUMIL” iti Brgy. Leonarda, Tuguegarao City, kas impakaammo ni GUMIL Filipinas President Arthur P. Urata, agpapaay pay a  presidente ti GUMIL Cagayan.

Maigunamgunam ti yaatendar dagiti amin a kameng, aktibo man ken saan, ken dagiti agtarigagay nga agbalin a miembro.

Mapagsasaritaanto pay iti miting ti panangangay ti GC kadagiti literary seminar, panagilibro ken dadduma pay a pakaseknan ti gunglo.

Kadagiti agtarigagay nga agkameng, mabalin a kaumanda ti asino man kadagiti sumaganad: Arthur P. Urata (09277927913), Vilmer V. Viloria (09159842149), Freddie P. Masuli (09489864481), Johmar R. Alvarez (09199358934), Roy V. Aragon (09217450499) ken Jobert M. Pacnis (09269486909).


(Naipablaak iti Bannawag, Hulio 22, 2013 a bilang.)

July 12, 2013

HULIO 22, 2013



SARITA
 6 Maysa nga Oras nga Ipupusay iti Gloria iti España
   Juan Al. Asuncion

NOBELA
28 Ay, ni Reberen! (9)
Ariel S. Tabag
32 Galiera Queen (20)
  Dionisio S. Bulong

DANIW
4 Ita a Malem ti Maudi a Malem Dagiti Malemko
   Arnold C. Baxa
30 Data ti Pakasaritaan
    Jake F. Ilac
48 Dandaniw a Para Ubbing
   Glayds Reyes/ Jobert M. Pacnis

SALAYSAY
 8 Gapu Ta Daytoy ti Linteg (98)
    Hues Joven F. Costales (Ret.)
12 Mayatka? Filipinas, Saan a Pilipinas
     Neyo Mario E. Valdez
40 Annadan ti Agkittib nga Igges ti Pagay
     Reynaldo E. Andres

KOMIKS
17 Tres Muchos (114)
20 Aritosan (38)
22 Miks & Tiks

KOLUM
14 Okeyka, Apong!
16 Dear Doc
34 TIPS
37 Kastoy, Kapid, Ditoy Hawaii
38 Ading Kosinera
42 Padasem Daytoy, Kailian

PAGLINGLINGAYAN
44 Showbiz
46 Photolaffs
47 Sinniriban
47 Social Welware, Kdp.
47 Sudoku
47 Agkatawa ti Mayat

DADDUMA PAY
 2 Ti Makunami
10 Adda, Aya, Agsakit a Maestra, Kunam?
15 Tao, Lugar, Pasamak
24 Ti Mammangi Festival iti Ilagan
26 Siled ti Kararag
27 Da Ma’am ken Sir ti Agbalin a Nanang ken Tatang ti Ubing
31 Diak Pay Babauten ‘Diay Anakko, ‘Diayto La Ketdin a Mistro, Kunam?
33 Txtm8
35 Ti Gasatmo Ita a Lawas
36 Ammuem Pay Dagitoy
39 Saanmo a Kaap-apa ti Maestram

July 7, 2013

"Thousand Fish"



"THOUSAND FISH." Naanus daytoy nga ina iti pagtaengan a mangbambantay iti tagilakona a babassit ngem nananam a lames a maawagan iti "thousand fish" (gapu iti kaadu dagitoy a lames a grupo nga aglalangoy) iti merkado publiko ti Bambang, Nueva Vizcaya. Karaman a lakona ti native a paltat, buntiek (attasi), ken bunog (birut). Naimas a malingta iti suka (matamales) ti "thousand fish" wenno mapaksiw iti kamatis wenno pias ken laya. (ROY V. ARAGON)


(Naipablaak iti Bannawag, Hulio 15, 2013 a bilang.)

Kapurpurawan, Pagudpud Beach, karaman kadagiti 25 a pakapilian ti “10 Philippine Gems"

Karaman ti Kapurpurawan Rock Formation iti Burgos, Ilocos Norte ken ti Pagudpud Beach iti Pagudpud iti Ilocos Norte met laeng kadagiti 25 a disso a daydaywen dagiti turista a pakapilian ti 10 a kabarbaro a Gameng ti Filipinas (Philippine Gems).

Inyusuat daytoy ti Isla Lipana & Co. iti pannakitinnulong ti Tourism Promotions Board ti Department of Tourism (DOT). Panggep daytoy a panagpili ti mangitandudo iti napintas a rupa ti pagilian iti sangalubongan.
Iti pannakapili dagitoy a “10 a gameng,” masapul nga addaan ti lugar iti naisangsangayan a kinapintas wenno iti kunada a “wow factor.”

Maikadua ti kasasaad daytoy iti tay-ak ti kappia ken talinaay.

Karaman kadagiti 25 a shortlisted wenno mapagpilpilian a “10 a Gameng ti Filipinas” ti Apo Island, Apo Reef Natural Park, Batanes, Biri Island Rock Formation, Bucas Grande Island, Busuanga and Coron, Cagayan de Oro, Calaguas Island, Camiguin, Camotes Islands, Caramoan Islands, Danjugan Island, Donsol, Lake Sebu, Mount Pulag, Mount Kanlaon, Mount Pinatubo, Panglao Island, Sagada (Sumaguing Caves), Siargao Island, Siquijor Island, Taytay iti Palawan ken Tubbataha Reefs Natural Park.


(Naipablaak iti Bannawag, Hulio 15, 2013 a bilang. Nabulod ti ladawan ti Kapurpurawan iti www.tripsiders.com)

“Balay ti GUMIL” iti Suso Beach, maituloy

Ituloy ti GUMIL Filipinas, ti gunglo dagiti mannurat nga Ilokano iti Filipinas ti pannakabangon ti “Balay ti GUMIL” iti Suso Beach, Sta. Maria, Ilocos Sur.

Daytoy ti napagnunumuan dagiti kameng ti GF Board nga idauluan ni GF President Arthur P. Urata, Sr. iti naangay nga special meeting ti gunglo idi Hunio 23 sadiay Narvacan, Ilocos Sur.

Maibatay iti napagnunumuan, agpaay a library ken agamang kadagiti gapuanan dagiti kameng ti gunglo. Maawaganto daytoy iti “Dr. Godofredo S. Reyes Memorial Hall” babaen ti pammalubos ni Dr. Dedicacion A. Reyes a kaingungot daydi Dr. Reyes.

Narugian a nabangon ti pasdek iti sakup ti 162 a metro kuadrado a lote nga indonar dagiti agassawa a Reyes.

Iti sabali a bangir, angayen ti gunglo ti maikadua a regular board meeting-na ita a tawen inton Agosto 24 babaen ti panangsangaili ni Estela Bisquera Guerrero iti pagtaenganda iti Tuding, Itogon, Benguet.
Iti daytoy a miting a maidatag iti GF ti tarigagay ti ania man a provincial chapter a mang-host iti sumaruno a kombension. (Rey Andres)


(Naipablaak iti Bannawag, Hulio 15, 2013 a bilang.)

July 4, 2013

HULIO 15, 2013



SARITA
 6 Ti Agsiuman
   Manuel S. Diaz

NOBELA
28 Ay, ni Reberen! (8)
Ariel S. Tabag
32 Galiera Queen (19)
  Dionisio S. Bulong

DANIW
4 Bukel ti Ling-et
   Mighty C. Rasing
30 Uray Marneb ti Lampitaw
   Angeluz Graciano Biz
48 Dandaniw a Para Ubbing
   Rosario A. Bingayen/ Rolando A. Seguro, Jr.

SALAYSAY
 8 Gapu Ta Daytoy ti Linteg (97)
    Hues Joven F. Costales (Ret.)
12 Iti Filipinas: No Apay a Saan a Mabalin nga Agkasa da Leo ken Nardo
     Neyo Mario E. Valdez
24 Kastoy Gayam ti Netherlands
     Francisco T. Ponce
40 Addan Baro a Wagas ti Dapog
     Reynaldo E. Andres

KOMIKS
17 Tres Muchos (113)
20 Aritosan (37)
22 Miks & Tiks

KOLUM
14 Okeyka, Apong!
16 Dear Doc
34 TIPS
37 Kastoy, Kapid, Ditoy Hawaii
38 Ading Kosinera
42 Padasem Daytoy, Kailian

PAGLINGLINGAYAN
44 Showbiz
46 We Proud of You, Kdp.
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
 2 Ti Makunami
15 Tao, Lugar, Pasamak
26 Siled ti Kararag
27 Di Baybay-an ti Ubing nga Awan Disiplinana
31 Ania ti Epektibo a Siled-Pagadalan Agraman Wagas ti Panagisuro?
33 Txtm8
35 Ti Gasatmo Ita a Lawas
36 Ammuem Pay Dagitoy
39 ‘Tay Ubing a Namigat, Utekna ti Narimat

Pasnaan 5, silulukaten para kadagiti maki-workshop

Ipakaammo ti Seminar-Workshop Committee ti GUMIL Filipinas (Gunglo Dagiti Mannurat nga Ilokano iti Filipinas ken iti Ballasiw-Taaw) nga agawaten iti aplikasion para iti 10 a mapili a fellow para iti Pasnaan 5.

Ti Pasnaan ti bersion ti GUMIL Filipinas iti dua a nalatak a literary workshop iti pagilian— ti U.P. National Writers Worshop ken ti Silliman Writers Workshop.

Kas iti Pasnaan 4, uppat a benneg ti literatura ti mapagiinnadalan iti Pasnaan 5: ti sarita (para nataengan ken para ubbing) ken daniw (para nataengan ken para ubbing).

Makiddaw a tunggal aplikante a fellow, pumili iti kayatna a benneg a pakiinnadalan. No sarita, mangidatag iti dua a sarita; no daniw, mangidatag met iti uppat a daniw.

Dua a fellow ti mapili a para iti benneg ti daniw a para ubbing, dua met iti sarita a para ubbing; tallo iti sarita ken tallo met iti daniw.

Idatag dagiti sinurat babaen ti e-mail iti: pasnaan.secretariat@gmail.com, cc: asseng.tabag@gmail.com. Iraman iti sinurat ti ababa a pakasaritaan ti biag ken kaudian a retrato. Maipaayan ti tunggal fellow iti libre a transportasion agraman board ken lodging.

Kinuna ni Arthur P. Urata, Sr., presidente ti GUMIL Filipinas, a mabalin nga iti Cagayan ti pakaangayan ti Pasnaan 5 ken sangailiento daytoy ti GUMIL Cagayan. Masirsirpat ti umuna a lawas ti Pebrero 2014 a pannakaiwayatna, kas panangrambak metten ti GUMIL Filipinas iti Nailian a Bulan ti Arte.

Para iti nayon nga impormasion, ag-e-mail kadagiti e-mail iti ngato.


(Naipablaak iti Bannawag, Hulio 8, 2013 a bilang.)