April 24, 2013

Urata, baro a presidente ti GUMIL Filipinas


Nabotosan a baro a presidente ti GUMIL Filipinas (Gunglo Dagiti Mannurat nga Ilokano iti Filipinas ken iti ballasiw-taaw) ni Arthur P. Urata, Sr. iti eleksion ti baro a grupo dagiti opisial ti gunglo bayat ti Maika-45 a Kombension Nasional ken Literary Seminar ti GF a naangay iti Gonzaga, Cagayan idi Abril 19-21, 2013.

Kadua ni A.P. Urata, Sr. a napili da Mario Tejada, bise-presidente; Roy V. Aragon, sekretario-heneral; Eden Cachola-Bulong, treasurer; Estela Bisquera-Guerrero, auditor; Benjamin P. Pacris, business manager; Reynaldo E. Andres, public relations officer; ken dagiti kameng ti hunta direktiba: Sherma E. Benosa, Emy Amadz Bucaneg, Eliseo B. Contillo, Freddie Pa. Masuli, Aileen R. Rambaud, Martin T. Rochina, Ariel S. Tabag, ken Vilmer V. Viloria.

Agpaay met nga ex-officio director ni Judge Vivencio S. Baclig (Ret.), pasado a presidente ti gunglo.

Nagpaay a kameng ti Comelec da Honor Blanco Cabie, chairman; kameng da Dionisio S. Bulong ken Jose A. Bragado.

Iti panagsaritana kalpasan ti pannakaiproklamana, agraman dagiti kakaduana a nangabak, impanamnama ni A.P. Urata ti ad-adda pay a pannakapabileg ti GF, kas mayataday iti tema ti kombension nga “Agkaykaysa, Pumigpigsa.”

Naipasngay ni A.P. Urata, Sr. iti Ballesteros, Cagayan idi Hulio 26, 1953 kada Silvestre Urata ken Felicidad dela Peña (agpada a pimmusayen). Agadi iti buridek iti sangapulo nga agkakabsat a pakairamanan da Antonio, Jose ken Roland (pimmusayen), agpapada a mannurat iti Bannawag. Nagturpos iti Bachelor of Arts in English, Master in Business Administration ken Master in Public Administration. Ti laeng dissertation-na ti kurang ti kinadoktorna iti Public Administration. Inrugina ngem dina naileppas ti kursona nga abogasia. Nagpaay iti nadumaduma nga ahensia ti gobierno. Agdama a hepe ti Department of Agrarian Reform iti probinsia ti Cagayan. Agserserbi pay a Part-time Professor iti Graduate Program iti University of Cagayan Valley (UCV) a pangisusuruanna iti Public Administration, Management, Economics, Cooperative, Public Fiscal Management ken dadduma pay nga asignatura.

Innem ti bungada ken ni sigud nga Elgie Tejada (uppat a babbai ken dua a lallaki) nga agpapadan a nagturpos ken addaan iti trabaho malaksid iti buridekda a mangal-ala ita iti Hospitality and Tourism Management iti University of St. Louis. Adda metten uppat a appokona. Nag-Board of Director iti namitlo a daras ken nag-Bise-Presidente ti GUMIL Filipinas. Agdama pay a Presidente ti GUMIL Cagayan manipud pay idi 2002.


(Naipablaak iti Bannawag, Mayo 6, 2013 a bilang.)

MAYO 6, 2013




SARITA
6 Panagtao
   Joel B. Manuel

NOBELA
26 Galiera Queen (9)
     Dionisio S. Bulong
30 Saan a Rosas Amin Nga Ayat, Maria Emmanuelle (12)
     Reynaldo A. Duque
34 Apo Baboy Partylist (28)
     Jose A. Bragado

DANIW
4 Agrakaya Met ti Kalsada
    Daniel L. Nesperos
17 Ti Pasala
    Rhea Rose D. Berroy
18 Ayat a Makaisalakan
     Efren A. Inocencio
28 Dilat’ Uleg
    Rolando A. Seguro, Jr.
48 Dandaniw a Para Ubbing
     Alegria T. Visaya/
     Gregorio T. Amano

SALAYSAY
8 Gapu Ta Daytoy ti Linteg (86)
    Hues Joven F. Costales (Ret.)
12 Eleksion 2013: Komusta iti Rehion Dos?
    Neyo Mario E. Valdez

KOMIKS
19 Tres Muchos (103)
22 Aritosan (27)
24 Miks & Tiks

KOLUM
14 Okeyka, Apong!
16 Dear Doc
36 TIPS
39 Kastoy, Kapid, Ditoy Hawaii
40 Ading Kosinera
42 Padasem Daytoy, Kailian

PAGLINGLINGAYAN
44 Showbiz
46 Wanted: Lady Borders
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
 2 Ti Makunami
15 Tao, Lugar, Pasamak
29 Ituloy nga Adalan Dagiti Ubbing
32 Siled ti Kararag
33 Ammom Met Laeng Dagiti Mapaspasamak iti Eskuela ti Anakmo?
35 Txtm8
37 Ti Gasatmo Ita a Lawas
38 Ammuem Pay Dagitoy
41 Dimo Itulok a Parigatennaka ti Maysa nga Eksaminasion

April 22, 2013

Dikay' Unay Aggargaraw, Inang



DIKAY’ UNAY AGGARGARAW, INANG. Kasla kastoy man ti ibagbaga ‘toy maysa nga ubing a mangtimtimon iti rakit a naglugananda nga agiina a mangballasiw iti Matalag River. Naggapuda iti Bario Dunggan ket bumangkagda iti Barangay Mauanan, agpada a barangay ti Rizal, Cagayan,  iti bangir. Daytoy a transportasion ti pangalistuanda a bumallasiw. Agarup dua a kilometro ngamin ti kaadayo ti atiddog a Mauanan Bridge a namagkamang iti nasao a dua a barangay. (Dexter Marin Fabito)


(Naipablaak iti Bannawag, Abril 29, 2013 a bilang.)

April 16, 2013

ABRIL 29, 2013




SARITA
6 Koris
   Virginia A. Duldulao

NOBELA
26 Saan a Rosas Amin Nga Ayat, Maria Emmanuelle (11)
     Reynaldo A. Duque
30 Galiera Queen (8)
     Dionisio S. Bulong
34 Apo Baboy Partylist (27)
     Jose A. Bragado

DANIW
4 Tuleng
   Mighty C. Rasing
17 2 a Soneto
    Honor Blanco Cabie
18 Iti Sirok ti Asul a Tangatang
     Rudy Ram. Rumbaoa
32 Pagturongan
     Rex C. Aquino
48 Dandaniw a Para Ubbing

SALAYSAY
8 Gapu Ta Daytoy ti Linteg (85)
    Hues Joven F. Costales (Ret.)
12 Eleksion 2013: Komusta iti Cordillera?
    Neyo Mario E. Valdez

KOMIKS
19 Tres Muchos (102)
22 Aritosan (26)
24 Miks & Tiks

KOLUM
14 Okeyka, Apong!
16 Dear Doc
36 TIPS
39 Kastoy, Kapid, Ditoy Hawaii
40 Ading Kosinera
42 Padasem Daytoy, Kailian

PAGLINGLINGAYAN
44 Showbiz
46 Push Bottom, Kdp.
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
 2 Ti Makunami
15 Tao, Lugar, Pasamak
28 Siled ti Kararag
29 Ania ti Bibiang ti Pamilia iti Sports, Kunam. Manong?
33 Kasanon No Nababa Dagiti Grado ti Anakmo?
35 Txtm8
37 Ti Gasatmo Ita a Lawas
38 Ammuem Pay Dagitoy
41 Kasano a Makainutka iti Koriente iti Kalgaw?

April 11, 2013

Dumadara ti Pasuquin



DUMADARA TI PASUQUIN. Saan a maliklikan dagiti biahero nga agpa-Ilokos wenno agpa-Cagayan ti dumagas iti Brgy. Davila, Pasuquin, Ilocos Norte tapno gumatangda iti yawidda a pangmalem wenno pangpulotan a kakalkalap a dumadara. Malaksid iti sadiwa, mailaklako met ti natuno a dumadara agraman laki (pusit). (Roy V. Aragon)


(Naipablaak iti Bannawag, Abril 22, 2013 a bilang.)

“Bulan ti Literatura Ilokana,” rambakan ti GUMIL Filipinas


Rambakan ti GUMIL Filipinas, ti gunglo dagiti mannurat nga Ilokano iti Filipinas, ti Abril a kas “Bulan ti Literatura Ilokana” babaen ti panangangayna iti Maika-45 a Kombension ken Literary Seminar ti gunglo iti Gonzaga, Cagayan iti daytoy nga Abril 19-21.

Manamnama nga atendaran ti ag-200 a mannurat nga Ilokano manipud iti Filipinas ken iti ballasiw-taaw ti nasao a pasken nga addaan iti tema, “Agkaykaysa, Pumigpigsa” ken iti panangidaulo ti agdama a presidente ti gunglo, ni retirado nga RTC Judge Vivencio S. Baclig.

Mairaman kadagiti maaramid iti agtallo-nga-aldaw ken agdua-a-rabii a pasken ti pannakaangay dagiti lektiur maipanggep iti panagsurat, pannakapadayaw dagiti nangabak a mannurat kadagiti nadumaduma a salip iti panagsurat, pannakapili ti Mutia ti GUMIL Filipinas 2013, eleksion ti baro a grupo dagiti opisial ti gunglo nga agtakem iti 2013-2015, kdp.

Dagiti mangsangaili iti pasken: GUMIL Cagayan nga idauluan ni Arthur P. Urata, GUMIL Gonzaga nga idauluan ni Herman Cardenas, ken ti gobierno lokal ti Gonzaga nga idauluan ni Mayor Carlito Pentecostes.
Naituding ti Abril a kas “Bulan ti Literatura Ilokana” babaen ti bileg ti Proclamation No. 26, s. 2001 nga impaulog ni Presidente Gloria Macapagal Arroyo.


(Naipablaak iti Bannawag, Abril 22, 2013 a bilang.)

Panagyaman


Agyaman ti Pamilia Bragado kadagiti nakipagrikna kadakuada iti ipupusay ni Dr. Crispina Balderas Bragado, 75, ti Bauang, La Union ken Caloocan City. Pimmusay ni Dr. Bragado, mannurat iti Bannawag, idi Marso 23 ken naidulin ti bangkayna iti Forest Park, Caloocan City idi Marso 27.

Inulilana ti kaingungotna, ni Jose A. Bragado, a padana met laeng a mannurat iti Bannawag, dagiti annakda nga agpapadan a propesional: Josefina (Cles), Jose Jr. (Youra), Alicia, Crispin (Tess), Eleanor, Concepcion (Leonardo), Ray (Malou) ken Jeamor (Joan); ken dagiti appokoda.

Sakbay a pimmusay, agpapaay ni Dr. Bragado a dean ti College of Education ti Child Jesus College iti Caloocan a binangonda nga agassawa idi 1990 kalpasan a nagretiro a prinsipal iti public schools iti Valenzuela ken panagpaayna a propesor iti Manila Central University.

Naipaay kenkuana ti Leona Florentino Award manipud iti GUMIL Filipinas idi 1994 ken Gawad Pambansang Alagad ni Balagtas manipud iti Unyon ng mga Manunulat sa Pilipinas (UMPIL) idi 2004.


(Naipablaak iti Bannawag, Abril 22, 2013 a bilang.)

ABRIL 22, 2013




SARITA
6 Rosas Para ken ni Adel
  Arnold C. Baxa

NOBELA
24 Saan a Rosas Amin Nga Ayat, Maria Emmanuelle (10)
     Reynaldo A. Duque
28 Galiera Queen (7)
     Dionisio S. Bulong
32 Apo Baboy Partylist (26)
     Jose A. Bragado

DANIW
4 Kalbit ti Abril
   Arnold P. Jose
30 Iliw
    Roselyn C. Campano
48 Dandaniw a Para Ubbing

SALAYSAY
8 Gapu Ta Daytoy ti Linteg (84)
    Hues Joven F. Costales (Ret.)
12 Eleksion 2013: Komusta iti Rehion Uno?
    Neyo Mario E. Valdez
40 Panguartaan Met Dagiti Bukel ti Sta. Rita a Paria
    Reynaldo E. Andres

KOMIKS
17 Tres Muchos (101)
20 Aritosan (25)
22 Miks & Tiks

KOLUM
14 Okeyka, Apong!
16 Dear Doc
34 TIPS
37 Kastoy, Kapid, Ditoy Hawaii
38 Ading Kosinera
42 Padasem Daytoy, Kailian

PAGLINGLINGAYAN
44 Showbiz
46 No Problem Store, Kdp.
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
 2 Ti Makunami
10 Iti Ilocos Sur: Ket Rinambakan ti ISPSC ti Maika-100 a Tawenna
15 Tao, Lugar, Pasamak
26 Siled ti Kararag
27 Saan a Gapu ta Bakasion: Agbalballog Lattan da Baby ken Balong
31 Wen, Saan Koma a ti La Mabuybuya Dagiti Ubbing
33 Txtm8
35 Ti Gasatmo Ita a Lawas
36 Ammuem Pay Dagitoy
39 Adut’ Maipaay ti Nalangto nga Aglawlaw

April 10, 2013

Reynaldo A. Duque, 67


Pimmusay idi Abril 8 ni mannurat iti Bannawag Reynaldo A. Duque, 67, tubo iti Bagani Ubbog, Siudad ti Candon ngem agnaeden iti Parañaque City ken Tagaytay City, gapu iti kidney failure.

Maibilang ni RAD a maysa kadagiti kangrunaan a mannurat iti panawenna, saan laeng nga iti Ilokano no di pay ket iti Filipino ken iti Ingles. Maibilang pay a kaaduan iti naawat a pammadayaw kadagiti amin a mannurat iti Filipinas iti ginasut a literary award a naipaay kenkuana a pakairamanan ti Hall of Fame manipud iti Carlos Palanca Memorial Awards for Literature ken ti Centennial Prize (Umuna a Gunggona) iti benneg ti epiko (“Candon”).

Nagpaay a presidente ti GUMIL Filipinas (1991-1993) ken umuna nga Ilokano a nagpaay nga Editor-in-Chief ti Liwayway, ti kangrunaan a magasin dagiti Tagalog. Naipaay kenkuana ti Gawad Pambansang Alagad ni Balagtas manipud iti UMPIL idi 2001 ken ti Pedro Bucaneg Award manipud iti GUMIL Filipinas idi 2003.

Mannurat agingga iti maudi nga angesna, imbatina a kas maudi a ruknoyna kadagiti padana nga Ilokano ti ababa a nobelana a “Saan a Rosas Amin nga Ayat, Maria Emmanuelle” a maipabpablaak ita iti Bannawag.


(Naipablaak iti Bannawag, Abril 22, 2013 a bilang.)

*Nakamassayag ti bangkay ni Apo Duque iti Holy Trinity Memorial Chapel, Sucat, Paranaque City. 

Maiwayat ti necrological service nga idaton ti GUMIL Filipinas, ti gunglo dagiti mannurat nga Ilokano, ken ti UMPIL, Unyon ng mga Manunulat sa Pilipinas, itoy Abril 13, 2013 iti alas 8:30 iti rabii. 

Maiwayat met ti cremation iti Abril 14, 2013.

April 9, 2013

2 a Soneto


2 a Soneto
(para ken ni reynaldo a. duque, 1945-2013)

1
garong napumpunnon baar inka
inserrek ‘di kapigpigsaam pay,
iti pasnek pammatim nga adda
maibatim a pamigsa awan sarday.

ita limnek ti initen iti
nagsursuratam ti nobela ken
dadduma pay, pagtangsit ti puli
agyaman ‘ti inka impempempen.

nagun-odmo a pammadayaw, ay!
iggem kapadam a nagsidsidat’
sinanglaw ken pakbet – ay! linglingay
pay kakailiam a managayat.

‘tay badangmo’t kultura, wen, dakkel,
agyamankam gapu’t matam, bael.

2
inkurkuribotmo saanmo man
binukbukodan ket ‘diay naganda
ken sudin ilokano a kadua
imbambandom inka nagnagnaan.
kadagiti inka inkurkur-it
immanges dagiti nakauldag
nga addaan pateg ditoy a biag,
rikna pagliplipiasan ‘tay sam-it.
iti wasnay kalgaw, nepnep sadiay
nakasaganat’ pontinpen kas man
imbudona’t panagrissik rikna,
inar-aramat a pangmurmuray.
‘iti insuratmo maiyaw-awan
awan, adda imbatim a pigsa.

--HONOR BLANCO CABIE

No Isut’ Pakatayak, Awatek…


No Isut’ Pakatayak, Awatek…
(ken ni aydol rad)

Iti pampannagnak met iti tugot ni Bucaneg
A nagtayaktakam, nagrimatan ti bituenmo
Nariknak ti kaadda ti pusom, ti kararuam
Kadagiti kas kaniak a saringit laeng.

Impatakdermo ti bukodmo a pedestal
Iti dayta a lubong; narigat a mapataran
Dagiti gapuanam ngem nagtalinaed
Dagiti dapanmo iti daga.

Mabilbilang iti ramay dagiti kanito
A nagtugmok dalanta kadagiti  innadal
Ngem limed a dinanonnak iti pagtaengak
Kadagiti naruay a sinuratmo.

Adda aripapa iti kaunggak iti pannakaikari
Dagitoy a binatog. Ngem ad-adda a malunagak
No uray sangkapirgis man laeng a daniw
Ket dika maisagutan…

Iti naudi a panagsarakta iti kombension
Ad-adda a bimmangon ti umel a panagraem
Idi inkarigatam nga insawang: no isut’ pakatayak
Awan maaramidak ta naikumitkon ti bagik…

Anian, ta uray saanen nga ipalubos ti salun-atmo
Ti agbiahe a mangibisik iti aglaplapusanan a sirib
Ngem impettengmo ti immay nagiburay
Ta isu gayamen ti maudi a panagdidinnakulap.

Napankan, ngem saanto a pulos nga agkudrep
Ti segden a ginangtam iti barukongmi;
Palubosandaka ngaruden, Dios ti mangkibin kenka
Ket agingga manen iti sumaruno a panagkikita.

--JOBERT M. PACNIS

*aydol rad = Reynaldo A. Duque, 1945-2013

Nakaranraniag Dagiti Tugot


Nakaranraniag Dagiti Tugot
(para ken ni RAD)

Diak man naisiray ti panagtubom
Iti kinelleng dagiti daniw
Ngem mariknak ti pudot panangisakitmo
Iti bukudko a dila
Kadagiti imparangkapmo a libro
Tapno sakduenmi ti sirib
A kinupikopam.

Tannawaganka iti napanayag a paraiso
Buyaek ti panagudongmo
Nga umadayo ditoy tapoktapok a plumak.

Diak sardayan nga idallang ken idaniw
Dagiti kutkutonen a balligim
Uray nagtabonen ti initmo
Sumingsingisingkami met
Nga adipen ti bukudmo a dila.

Ay, anian a naggasatka
Sika a bannuar ti panawen
Ta nakadardarang dagiti tugotmo.

--RONNIE ES. AGUINALDO

*RAD = Reynaldo A. Duque, 1945-2013

April 6, 2013

Nangabak iti 11th RFAAFIL ken 15th AMMAFLA, naammuan


Adtoy dagiti nangabak iti 11th Reynald F. Antonio Awards for Iluko Literature ken iti 11th AMMA Foundation Literary Awards, kas panagsaganadda, ken kas impadamag ti Secretariat ti RFAAFIL ken AMMAFLA.

Iti 11th RFAAFIL, benneg ti Sarita a Para Ubbing:

Umuna a Gunggona, Leah D. Manzano ti Siudad ti Candon City babaen ti saritana a "Ti Sagutko ken ni Tatang." Mangisursuro iti English ken Filipino iti Nagtablaan National High School, Sta. Lucia, Ilocos Sur.

Maika-2, Noli S. Dumlao ti Paoay, Ilocos Norte babaen ti saritana a "Da Meow ken Grr." Scriptwriter iti drama iti MBC-Radio DZRH ken nagpaay iti babaen ni dati nga Executive Director Cecile Guidote Alvarez ti National Commission for Culture and the Arts (NCCA) a kas media coordinator para iti radio.

Maika-3, Cles B. Rambaud ti Pinili, Ilocos Norte babaen ti saritana a "Ni Bi-o-bi-o, ni Cory, ni Erap, ken ni Marcos." Nagun-odna ti 2009 Writer’s Prize iti Ilokano poetry manipud iti NCCA ken agdama a Managing Editor ti Bannawag.

Maika-4, Crisostomo M. Ilustre ti Bauang, La Union babaen ti saritana nga "Once a Funny Time." Agdama nga Operations Consultant ti Century Broadcasting Network ken adda dua nga imatmatonanna nga FM station.

Maika-5, Ronelyn B. Ramones ti Bacarra, Ilocos Norte babaen ti saritana nga "Amy." Nagadal iti Midwifery iti Northwestern University, Laoag City, ken addan maysa a sarita ken sumagmamano a daniwna a naipablaak iti Bannawag.

Iti 11th RFAAFIL, benneg ti Daniw a Para Ubbing:

Umuna a Gunggona, Agustin DC. Rubin ti San Ildefonso, Ilocos Sur ngem agnaeden iti Zambales, babaen ti daniwna nga “A Ba Ka Da.” Retirado a mannursuro, napadayawan nga RFAAFIL Writer of the Decade iti selebrasion ti Maika-10 a tawen ti RFAAFIL.

Maika-2, Johmar R. Alvarez ti Ballesteros, Cagayan babaen ti daniwna a "Pidut." Mangisursuro iti Aparri West National High School-Aparri, Cagayan ken adviser ti The Beachcomber, ti opisial a pagiwarnak ti nasao a pagadalan.

Maika-3, Ronnie Es. Aguinaldo ti Calayan, Cagayan babaen ti daniwna a “Bullalayaw." Addan sumagmamano a pammadayaw a naawatna kadagiti salip iti panagsuratan.

Maika-4, Jobert M. Pacnis ti Ballesteros, Cagayan babaen ti daniwna a "Ti Perperroka." Nalpasna ti BSECE iti Cagayan State University-Tuguegarao. Maysa a mannursuro. Sumagmamanon dagiti pammadayaw a nagun-odna iti panagsuratan a pakairamanan ti RFAAFIL.

Maika-5, Benjamin P. Pacris ti Laoag City babaen ti daniwna a "Burburtia Dagiti Animal." Agdama a Chief Information Officer ti Philippine Information Agency (PIA) iti Ilocos Sur a kas moderator ti “Kapihan iti Amianan” Media Forum iti Iluko Heritage Channel (IHC) ken TV host ti “Issue ken Komentaryo” (Impormasyon Publiko) iti IHC ken anchor iti “’Niat’ Makunam, Kailian?” program iti DWRS Commando Radio.

Dagiti naghurado: Lorenzo G. Tabin, Sr., pangulo; kameng da Heman G. Tabin ken Sinamar R. Tabin.

Maidasar dagiti nangabak a sarita ken daniw kadagiti agbasbasa nga ubbing tapno pilienda ti mapadayawan iti 11th  RFAAFIL Reader’s Choice Award.

* * *

Iti 15th AMMAFLA, Salip iti Sarita Para Kadagiti Agdadamo a Mannurat:

Umuna a Gunggona, Marichel E. Suguitan ti Aggub, Solano, Nueva Vizcaya babaen ti saritana a “Kulibangbang.” Inaunaan iti lima nga agkakabsat nga annak da Domingo ken Sionita Suguitan, maysa nga OFW iti Hong Kong ni Marichel. Nakaipablaaken iti sumagmamano a daniw iti Bannawag ken maysa kadagiti mannaniw a nairaman iti Alimpatok, antolohia ti erotiko a dandaniw nga Ilokano. Aktibo met kadagiti gunglo dagiti OFW, maysa kadagiti opisial ti Taga-Nueva Vizcaya Ako (TNVA), organisasion dagiti taga-Nueva Vizcaya iti Hong Kong.

Maika-2, Ronelyn B. Ramones ti Brgy. Buyon, Bacarra, Ilocos Norte babaen ti saritana nga “Ina.” Fellow iti 3rd Pasnaan, ti literary workshop nga iwaywayat ti GUMIL Filipinas para kadagiti napili nga agdadamo a mannurat, nakaipablaaken ni Ronelyn iti sarita iti Bannawag (“Sabali ni Benson, Sabali ni Miguel”) ken sumagmamano a daniw a pakaibilangan ti “Uliek ti Kampanario ti Bacarra” a nangyalat iti Umuna a Gunggona iti On-the-Spot Poetry Writing Contest iti Pasnaan 2012.

Maika-3, Avelino B. Felicitas, Jr. ti San Juan, Abra ngem agindegen iti Waipahu, Hawaii babaen ti saritana nga “Ti Para Isuno.” Nangisuro iti 16 a tawen iti ISPSC, Santa Maria, Ilocos Sur sa immakar iti UNP Vigan a nagturposanna iti Doctor of Education ken nagretiruanna idi 2007. Ni dati a Teresita A. Imperial ti Santa Maria, I.S. ti asawana. Addaanda iti uppat nga annak. Agdama a Substitute Teacher-3 iti Leeward School District, Oahu,Hawaii ken Security Officer iti UPS Facility, Honolulu, International Airport, iti babaen ti Ali’I Security System.

Dagiti naghurado: Aida S. Tiama ti Unibersidad ti Filipinas-Diliman, chair; kameng da Ariel S. Tabag ti Bannawag ken Linda T. Lingbaoan ti University of the Philippines Press.

Dagiti isponsor ti salip: Amado & Gloria Yoro, Francis ken Aurora Ponce, ken Fred ken Cherry Quibol, agpapada nga agindegen iti Hawaii.

Mapadayawan dagiti nangabak iti RFAAFIL ken AMMAFLA bayat ti Maika-45 a Kombension Nasional kenLiterary Seminar ti GUMIL Filipinas inton Abril 19-21, 2013 iti Gonzaga, Cagayan.


(Naipablaak iti Bannawag, Abril 15, 2013 a bilang.)

April 3, 2013

ABRIL 15, 2013




SARITA
6 Ni One Direction
  Ariel S. Tabag

NOBELA
24 Saan a Rosas Amin Nga Ayat, Maria Emmanuelle (9)
     Reynaldo A. Duque
28 Galiera Queen (6)
     Dionisio S. Bulong
32 Apo Baboy Partylist (24)
     Jose A. Bragado

DANIW
4 Kaaspingmo Dagiti Bituen
   Francisco T. Ponce
8 Mawaswasen Dagiti Kukot
   Ronnie Es. Aguinaldo
48 Dandaniw a Para Ubbing

SALAYSAY
10 Gapu Ta Daytoy ti Linteg (83)
    Hues Joven F. Costales (Ret.)
12 Ania ti TPO?
    Neyo Mario E. Valdez
40 Kayatmo a Nasalun-at Dagiti Tarakenmo a Manok?
    Reynaldo E. Andres

KOMIKS
17 Tres Muchos (100)
20 Aritosan (24)
22 Miks & Tiks

KOLUM
14 Okeyka, Apong!
16 Dear Doc
34 TIPS
37 Kastoy, Kapid, Ditoy Hawaii
38 Ading Kosinera
42 Padasem Daytoy, Kailian

PAGLINGLINGAYAN
44 Showbiz
46 Libing Things Funeral Parlor, Kdp.
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
 2 Ti Makunami
15 Tao, Lugar, Pasamak
26 Siled ti Kararag
27 Wen, Napateg Kadagiti Ubbing ti Umno a Kapaut ti Pannaturog
31 No Adda Rikriknaen ti Ubing: Ibaon Kadi Wenno Saan iti Pagadalan?
33 Txtm8
35 Ti Gasatmo Ita a Lawas
36 Ammuem Pay Dagitoy
39 Apay a Nasken ti Iskediul Dagiti Trabaho iti Pagtaengan?