Mario A. Albalos Library, maluktan inton Pebrero 2

BIBLIOTEKA NI AYAT. Daytoy ti Mario A. Albalos Library
iti Cabaroan-Cabalangegan Elementary School iti Siudad
ti Vigan a pormal a maluktan inton Pebrero 2, 2018
bayat ti “Kannawidan Festival” ken pannakarambak
ti maika-200 a panagtawen ti Ilocos Sur.

Pormal a mayam-ammo iti publiko inton Pebrero 2 ti nabiit pay a nabangon a biblioteka iti Siudad ti Vigan a naipanagan iti maysa kadagiti mabigbig a mannurat nga Ilokano a patanor ti siudad, daydi Dios-ti-aluadna a Mario Abinsay Albalos.

Am-ammo pay a kas “Biblioteka ni Ayat,” mainaugoraran ti Mario A. Albalos Library a masarakan iti Cabaroan-Cabalangegan Elementary School bayat met ti pannakarambak ti “Kannawidan Festival ken maika-200 a panagtawen ti Ilocos Sur.

Tubo iti Cabaroan, Siudad ti Vigan ken nagturpos met iti elementaria iti CCES idi 1960 daydi MAA.

Mabigbig ni MAA a kas nalaing a mannurat iti ababa a sarita, nobela, daniw, salaysay ken kanta iti English, Filipino ken nangnangruna iti Ilokano. Nangab-abaken kadagiti nadumaduma a salip iti panagsuratan.

Iti panagkamengna iti US Navy, nagbalin a makipagili iti Amerika nga iti Hawaii ti pinilina a nagnaedan. Iti kaaddana iti nasao nga estado, binangonda ken kasinsinna a ni dati a Kongresista Felipe Abinsay Jr., ti Ilocos Surian’s Association of Hawaii tapno maaddaanda iti bileg a mangilaban kadagiti kalintegan ken pagimbaganda iti isla.

Gapu iti panangidaulona kadagiti kadaraanna iti Hawaii ken iti naidumduma a gapuananna iti gimong, impaay kenkuana ti gobierno ti America idi 1979 ti “Thomas Jeferson  Award,” kaunaan a Filipino a nakagun-od iti prestihioso a pammadayaw.

Ni Jenny Alcausin, agdama a nurse iti California, U.S.A., tubo iti Vigan met laeng ken mangibilang ken ni MAA a kas “first love” ti timmulong iti pannakabangon ti “Biblioteka ni Ayat.”

Manamnama nga itoy a biblioteka nga angayen ti GUMIL Ilocos Sur dagiti seminar-workshop iti panagsurat iti daniw, ababa a sarita, daniw ken salaysay para kadagiti agdadamo a mannurat, estudiante ken kameng ti media tapno ad-adda pay nga agrangpaya ti Literatura Ilokana. (Ben P. Pacris)


(Naipablaak iti Enero 22, 2018 a bilang ti Bannawag.)