February 27, 2017

Parabur ti Baybay



PARABUR TI BAYBAY. Kitkitaen dagiti daklisan ken dagiti nakipagguyod (iti daklis) ti bubo a napno iti bulong-unas (Trichiurus lepturus) wenno isdang espada iti Tagalog, a naisang-at iti aplaya ti Caroan, Gonzaga, Cagayan. Nupay adda dawdawelna ti baybay, natured dagiti daklisan a nagipakat iti iket ti daklis gapu ta segun iti amo wenno akinkukua iti daklis, adu ti pangen a nakita daytoy. Angkaten ti komprador iti PhP50 ti sangakilo ket mailako kadagiti merkado publiko dagiti agkaarruba nga ili ti Gonzaga ken Santa Teresita iti PhP90 agingga iti PhP100 ti sangakilo. (Roselyn C. Campano)


(Naipablaak iti Marso 6, 2017 a bilang.)

February 26, 2017

Educational tours, field trips, maiparit pay laeng—CHED

Imbilin ti Commission on Higher Education (CHED) itay lawasna ti pannakaiparit pay laeng ti pannakaiwayat dagiti educational tour ken field trip kadagiti amin a kolehio ken unibersidad ti gobierno ken pribado kalpasan ti aksidente iti bus iti Tanay, Rizal a nakatayan ti 15 nga estudiante ken nakadunoran ti adu pay a sabsabali.

Kinuna ni CHED Commissioner Prospero de Vera II nga inkeddeng ti CHED nga agpaut ti pannakaipawil dagiti educational tour ken field agingga iti di malpas ti imbestigasion iti aksidente iti Tanay, Rizal a napasamak idi Pebrero 20.

Napasamak ti aksidente bayat ti ipapan ti maysa kadagiti tourist bus a nakailuganan ti nasurok a 50 nga estudiante ti Bestlink College of the Philippines iti Quezon City iti Sacramento Adventure Camp iti Tanay, Rizal. Naidungpar ti bus iti maysa a poste ti koriente bayat ti isasalog daytoy iti Magnetic Hill.


(Naipablaak iti Bannawag, Marso 6, 2017 a bilang.)


Lima a mannurat, napili nga A.N.A.K. ti RFAAFIL

Lima nga agdadamo a mannurat dagiti maparaburan iti A.N.A.K. (Addang nga Agayab Kamannurat: Awis Nga Agpaay Kailokuan) ti RFAAFIL, ti tinawen a panagesponsorna kadagiti agdadamo a mannurat para iti libre a panagparehistro iti kombension ti GUMIL Filipinas tapno umadu dagiti mannurat a tumulong a mangpasantak iti Literatura Ilokana.

Dagiti agdadamo a mannurat a maisponsoran iti A.N.A.K. ti RFAAFIL iti 2017: Alma Dela Cruz (Allacapan, Cagayan); Rhea Anne B. Dominno (Salcedo, IS); Riaflor B. Rebolledo (Baguio City); Fidel L. Sambaoa (Gregorio del Pilar, IS); ken Derick A. Tong-alan (Salcedo, IS).

Pagyamanan unay ti RFAAFIL (Reynald F. Antonio Awards for Ilokano Literature) dagiti naayat nga isponsor a da Glenda A. Angel, Chery Joy A. Agbayani, Nancy G. Agacer-Batag, Arnel Mamotos, ken Febe R. Raposas.

Silulukat ti RFAAFIL kadagiti naayat a tumulong a kas isponsor iti daytoy a proyekto. (RFAAFIL)


(Naipablaak iti Bannawag, Marso 6, 2017 a bilang.)


NAT iti Grade 6 ken Grade 10, nayalud-od

Inyalud-od ti Department of Education (DepEd) ti pannakaiwayat ti 2017 Language and Assessment for Primary Grade (LAPG) ken National Achievement Test (NAT) a para iti Grade 6 ken Grade 10 a maiwayat koma iti daytoy a bulan.

Sakbayna, nayiskediul a maangay ti NAT a para iti Grade 10 iti Marso 2; ti NAT a para iti Grade 6 iti Marso 9; ken ti LAPG a nabalbaliwan ken napagbalin nga Early Language, Literacy and Numeracy Assessment (ELNA) iti Marso 7.

Ngem gapu iti limitasion dagiti masapsapul, kuna ni DepEd Secretary Leonor Briones a mayalud-od ti eksamen iti di pay naikeddeng a petsa.

Nadisenio ti NAT a pangammo iti pagpigsaan ken pagkapsutan dagiti estudiante iti benneg akademiko. Panggep met ti LAPG nga amirisen no nagbalin nga epektibo ti Mother Tongue-Based Multilingual Education (MTB-MLE) instruction kadagiti 19 a lengguahe.


(Naipablaak iti Bannawag, Marso 6, 2017 a bilang.)


February 23, 2017

MARSO 6, 2017



SARITA
4 “Mailuboka, Mistro!”
     Rolando A. Seguro, Jr.
12 Nakallalagip a Biag
     David D. CampaƱano

NOBELA
8 Oplan Maharlika (8)
     Norberto D. Bumanglag, Jr.
10 Kalinawa (10)
      Linda T. Lingbaoan

DANIW
6 Ullaw
   Ria Rebolledo
47 Daniw a Para Ubbing
    Wendelyn P. CastaƱeda

SALAYSAY
22 Agtarakenka Met iti Itik
     Villamor C. Visaya, Jr.
26 Natnateng ti Masetasmo iti Arubayan
     Reynaldo E. Andres

KOMIKS
35 Sweet Jazmine (25)
38 Don Clavio de Ylocos (27)
41 Miks & Tiks

KOLUM
15 Kastoy, Kapid, Ditoy Hawaii
17 Saludsodem ken ni Apo Hues
19 Dear Doc
24 Padasem Daytoy, Kailian
28 Okeyka, Apong
30 Tips
31 Ading Kosinera

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
11 Netizone
14 Biag ni Ilokano
16 Siled ti Kararag
20 Ania ti Langa ti Klasrum ti Nalaing a Mannursuro?
21 Adu ti Pagsayaatan ti Panagtaraken iti Nataengan nga Aso
29 Idi Un-unana a Panawen
32 Ammuem Pay Dagitoy
33 Haytek!
34 Tapno Dika Marigatan nga Agplantsa

43 Ti Gasatmo Ita a Lawas
46 Dagiti Pabula ni Aesop

February 19, 2017

Dap-ayan 2017, sangailien ti GUMIL La Union

Sangailien ti GUMIL La Union ti Dap-ayan 2017, ti nailian a kombension ti Gunglo Dagiti Mannurat nga Ilokano iti Filipinas ken Ballasiw-Taaw (GUMIL Filipinas) ken komperensia iti lengguahe ken literatura nga Ilokano.

Maibilang a kadakkelan a panagtataripnong dagiti mannurat, mannursuro ken estudiante nga Ilokano nga agiray iti lengguahe, literatura ken kannawidan dagiti Ilokano, maangay ti Dap-ayan 2017 inton Abril 21-23, 2017 iti Union Christian College, City of San Fernando, La Union, kas impakaammo ni Eddy Almodovar, presidente ti GUMIL La Union.

Addaan iti tema a “Ni Mannurat nga Ilokano ken ti Nakaparsuaan,” manamnama a dumar-ay ti sumurok-kumurang a tallo gasut a delegado ken paglektiuran dagiti mabigbigbig a nagan iti tay-ak ti lengguahe ken literatura nga Ilokano a da Dionisio S. Bulong, Bannawag Editor Cles B. Rambaud, Norberto D. Bumanglag, Jr., Linda T. Lingbaoan-Bulong, Sherma E. Benosa, Aileen R. Rambaud, Anna Liza M. Gaspar, Eliseo B. Contillo, Eddy Almodovar, Villamor Visaya Jr., Neyo Mario E. Valdez, Dr. Freddie Pa. Masuli, Junley L. Lazaga, Mario T. Tejada, Roy V. Aragon ken Joel B. Manuel.

Maiwayat pay iti Dap-ayan 2017 ti panagyalnag kadagiti libro nga Ilokano, pannakapadayaw dagiti mannurat a nangabak kadagiti salip iti panagsuratan, ken pannakaiparang dagiti kannawidan dagiti Ilokano a kas iti bukanegan, pangorona a daniw, dallot ken dadduma pay.

Para iti pre-registration ken dadduma pay a detalye maipapan iti idadar-ay, makiuman ken ni GUMIL La Union Secretary Teofilo Damoco iti 0939 968 7836. (Dap-ayan 2017 Secretariat)


(Naipablaak iti Bannawag, Pebrero 27, 2017 a bilang.)

Ilegal a sugal, rippuogen ti PNP

Pormal nga indeklarar ni Philippine National Police (PNP) chief Director General Ronald “Bato” Dela Rosa ti gubat kontra iti ilegal a sugal itay lawasna, kas mainugot iti Executive Order No. 13 a pinirmaan ni Presidente Rodrigo R. Duterte idi Peb. 2.

Ibilbilin ti EO 13 iti PNP, iti National Bureau of Investigation (NBI), ken dadduma pay nga ahensia a mangipatpatungpal kadagiti paglintegan a pabilegenda ti kampaniada kontra iti ilegal a sugal iti pannakitinnulong ti Department of Justice (DOJ), ti Department of the Interior and Local Government (DILG), ken ti Department of Information and Communications Technology (DICT).

Kinuna ni Dela Rosa a binilinen ti Director for Operations dagiti amin a Police Regional Offices nga ipatungpalda ti One-Time-Big-Time (OTBT) operations kontra iti ilegal a sugal kadagiti masakupanda a lugar.


(Naipablaak iti Bannawag, Pebrero 27, 2017 a bilang.)

Pinakbet Republic



PINAKBET REPUBLIC. Dagitoy replika ti higante a banga ken higante a nateng a naipuesto iti sango ti Kapitolio Probinsial ti Ilocos Norte ti kaay-ayo a pagpaalaan iti retrato dagiti adu a turista agraman dagiti lumugar iti Ilocos Norte ken kabangibangna a probinsia. Ipakita dagitoy a replika ti pannakaam-ammo ti Ilocos Norte a kas “Pinakbet Republic” wenno pakaramanan iti pudpudno a pinakbet ni Ilokano. (Leilanie G. Adriano)


(Naipablaak iti Bannawag, Pebrero 27, 2017 a bilang.)

February 17, 2017

PEBRERO 27, 2017



SARITA
4 Penelope
   Roy V. Aragon
12 Isasarungkar iti Rabii
   Jeremias A. Calixto

NOBELA
8 Oplan Maharlika (7)
     Norberto D. Bumanglag, Jr.
10 Kalinawa (9)
      Linda T. Lingbaoan

DANIW
6 Allon
   Roselyn C. Campano
22 Kas Sabong
    Francisco T. Ponce
47 Daniw a Para Ubbing
    Ben M. De Peralta

SALAYSAY
14 Nabileg Dagitoy nga Agas ti Dengue Fever
   Remedios S. Tabelisma-Aguillon
26 Padasen Daytoy Haybrid a Barayti ti Kabatiti
     Reynaldo E. Andres

KOMIKS
35 Sweet Jazmine (24)
38 Don Clavio de Ylocos (26)
41 Miks & Tiks

KOLUM
17 Kastoy, Kapid, Ditoy Hawaii
19 Saludsodem ken ni Apo Hues
21 Dear Doc
24 Padasem Daytoy, Kailian
28 Okeyka, Apong
30 Tips
31 Ading Kosinera

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
11 Netizone
16 Biag ni Ilokano
18 Siled ti Kararag
23 No Adda Taraken a Billit: Ammom Kadi No Ania ti Kayatna nga Ibaga?
29 Idi Un-unana a Panawen
32 Ammuem Pay Dagitoy
33 Haytek!
34 Nagwara ti Balay Ket, Ne, Umayen Dagiti Sangailim?
43 Ti Gasatmo Ita a Lawas
46 Dagiti Pabula ni Aesop




February 15, 2017

Iti Maika-199 a Tawen ti Pannakabangon ti Ilocos Norte



ITI MAIKA-199 A TAWEN TI PANNAKABANGON TI ILOCOS NORTE. Nadumaduma a produkto ken partuat ti Ilocos Norte ti naiparang iti sango ti Kapitolio Probinsial ken iti Dap-ayan a mangipakita iti kinabaknang ti rekursos naturales ti probinsia bayat ti pannakarambak ti maika-199 a tawen ti pannakabangon ti probinsia. Iti ladawan, makita dagiti laya ken bagas ti galiang (wild aba) a naapit manipud iti Integrated Social Forestry Project ti Environment and Natural Resources Office ti gobierno probinsial a kas pangipakita ti opisina kadagiti umili a mabalin met a pamastrekan dagitoy. Malaksid iti panagmula iti kayo, nasursuruan pay dagiti lumugar a nasakupan ti proyekto nga agmula kadagiti alisto a maapit a produkto iti nagbaetan dagiti kayo nga imulmulada tapno adda nayon a pamastrekanda malaksid iti itutulongda a mangbantay iti nakaparsuaan. (Leilanie G. Adriano)


(Naipablaak iti Bannawag, Pebrero 20, 2017 a bilang.)

February 13, 2017

UK, ad-adu ti problema iti droga ngem ti Filipinas

Maibatay iti populasion, ad-adu a Briton ti agus-usar iti droga ngem dagiti Filipino; ngarud, dakdakkel ti parikut ti United Kingdom ngem ti Filipinas no droga ti pagsasaritaan.

Daytoy ti impalgak ni British Ambassador to Manila Asif Ahmad itay lawasna, ken nangibagaanna met nga adda dagiti sabali a wagas a pangrisrisut ti UK iti nasao a problema a saan ket a babaen ti nadara a wagas.

Maibatay kadagiti panagadal, naammuan nga iti agdama, adda 15-milion a Briton, wenno agarup maysa iti tunggal tallo a nataengan a Briton, ti nakapadasen a nagusar iti maiparit nga agas ken makita a bayat ti panaglabas ti tawen, immadu dagiti nagusar iti droga.

Kinuna ni Ahmad a tamtamingen ti gobierno ti nasao a parikut a kas “parikut iti salun-at” ket ngarud, maipatpatulod dagiti maatap nga agus-usar iti droga kadagiti community-based treatment program a saan ket a kadagiti pagbaludan.

Kinuna ni Ahmad a maysa pay kadagiti nasamay a wagas a pangrisrisut ti UK iti panagsaknap ti droga ti panangsiputda iti paggapuan ken pagturongan ti kuarta tapno mapasardengda ti negosio iti droga.

Inlawlawagna nga iti UK, iti babaen ti lintegna iti anti-money laundering, maipalubos ti pannakaukag no mano ti kuarta nga imbanko ti asino man nga indibidual ket ngarud, maammuan no naggapuan ti kuarta a kas koma iti negosio iti droga.


(Naipablaak iti Bannawag, Pebrero 20, 2017 a bilang.)


Panagminas, di mabalin iti Filipinas

Natangken iti pangngeddengna ni Environment and Natural Resources Secretary Regina Lopez a dina baliwan ti desisionna a panangirikepna iti 23 kadagiti 41 a pagminasan ti Filipinas ta kas kunana, saan a mabalin ti panagminas iti pagilian.

Imbilin ni Lopez itay lawasna ti pannakaiserra dagiti nadakamat a pagminasan ken ti temporario a pannakaisardeng ti trabaho iti lima pay a sabsabali a pagminasan, banag a nagreklamuan dagiti kompania ti panagminas ken nagkunaanda a kuestionarenda ti desision ni Lopez ta ibunga daytoy ti pannakaawan ti panggedan ti 1.2-milion a katao.

Iti panangsalaknib ni Lopez iti pangngeddengna, kinunana a ti tunggal makali a pagminasan, mapaadda met dagiti lan-ak a mangdadael iti nakaparsuaan.

Innayonna a, “Nalawag a saan a maikanatad ti kaadda dagiti pagminasan iti Filipinas gapu ta maysatayo nga isla nga addaan iti klase ti nakaparsuaan a di masarakan iti sabsabali a paset ti lubong.”


(Naipablaak iti Bannawag, Pebrero 20, 2017 a bilang.)


Payyo iti Nueva Vizcaya



PAYYO ITI NUEVA VIZCAYA. Saan laeng nga iti Ifugao ti pakasarakan kadagiti  nalawa ken nangayed a payyo (rice terraces) wenno natukantukad a sinilong ti pagay kadagiti bakras ken sellang dagiti bantay.  Maawagan pay iti payyo wenno payaw, masarakan ti kaaduan ken kalawaan kadagitoy  iti Ammoweg (wenno Ammoeg), maysa kadagiti walo a barangay ti kabambantayan nga ili ti Ambaguio, Nueva Vizcaya. Nupay madanonen ti  para pasahero a lugan ti poblasion ti Ambaguio babaen ti sementado a kalsada nasional manipud iti ili ti Bayombong, masapul a lasaten manipud iti poblasion  dagiti pasang-at ken pasalog a desdes ken sumagmamano a nakabitin a rangtay (hanging bridge) tapno madanon ti Ammoeg. Kaaduanna a Kalanguya (maysa kadagiti tallo a kangrunaan  a tribu dagiti Ifugao, a pakaibilangan dagiti Tuwali ken Ayangan) ti agindeg iti Ambaguio.  Adda metten kakastoy ngem babassit a payyo kadagiti kabambantayan a paset ti ili ti Quezon a pagindegan metten ti adu nga Ifugao a mabigbig a nangirugi iti kastoy a kadaanan a teknolohia  iti kabambantayan ti Cordillera. (Bonifacio V. Ramos)


(Naipablaak iti Bannawag, Pebrero 20, 2017 a bilang.)


February 10, 2017

PEBRERO 20, 2017



SARITA
4 Ket Napagsangitko ni Amang
   Estela A. Bisquera-Guerrero
12 Sipapalay a Lagip
    John Nolar

NOBELA
8 Oplan Maharlika (6)
     Norberto D. Bumanglag, Jr.
10 Kalinawa (8)
      Linda T. Lingbaoan

DANIW
6 Paksiw
   Junley L. Lazaga
22 Mailiwak
      Eliseo B. Contillo
47 Daniw a Para Ubbing
      Edna C. Nagtalon

SALAYSAY
14 Nakadanonak Met Sadiay Nasulinek a Kili
   Rhea Rose D. Berroy
26 Awan ti Makaatiw iti Kababoyan ken Kamanokan
     Reynaldo E. Andres

KOMIKS
35 Sweet Jazmine (23)
38 Don Clavio de Ylocos (25)
41 Miks & Tiks

KOLUM
17 Kastoy, Kapid, Ditoy Hawaii
19 Saludsodem ken ni Apo Hues
24 Padasem Daytoy, Kailian
28 Okeyka, Apong
30 Tips
31 Ading Kosinera

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
11 Netizone
16 Biag ni Ilokano
18 Siled ti Kararag
21 Sabali Pay a Wagas: Tapno Di Agtaultaul ti Taraken nga Aso
23 Kasano nga Awisen ti Imatang Dagiti Ubbing?
29 Idi Un-unana a Panawen
32 Ammuem Pay Dagitoy
33 Haytek!
34 Naibusen ti Toothpaste, Kunam?
43 Ti Gasatmo Ita a Lawas
46 Dagiti Pabula ni Aesop


February 6, 2017

Panagtatabako Manen



PANAGTATABAKO MANEN. Iti laksid dagiti adu a parikut a sangsanguen ti industria ti tabako a pakairamanan ti nangato a buis ti sigarilio ken ti kumarkaro a kampania kontra iti panagsigarilio, mangnamnama latta dagiti agmulmula iti tabako a nanginanto latta ti paglakuanda kadagiti apitda a tabako a kas itoy mannalon iti Brgy. Casilagan, Sta. Cruz, Ilocos Sur  nga agan-anus a  mangtartaripato kadagiti mulana a tabako. (Zaldy Comanda)


(Naipablaak iti Pebrero 13, 2017 a bilang.)

February 5, 2017

Kondom iti pagadalan, saan a kayat ti DepEd

Imbasura ti Department of Education (DepEd) ti singasing ti Department of Health (DoH) a pannakaiwaras ti kondom kadagiti estudiante a kas addang tapno maliklikan ti panagsikog dagiti agtutubo a babbai ken marisut ti panagwaras ti impeksion iti HIV/AIDS.

Kinuna ni Education Secretary Leonor Briones a dida anamongan ti singasing ti DoH nga agiwarasda kadagiti kontraseptibo kadagiti menor de edad nga estudiante.

Impaganetget ni Briones a kangrunaan a papel ti DepEd ti mangrepaso ken mangpapigsa iti kurikulum iti basic education.

Kuna pay ni Briones a surotenda dagiti pagalagadan ti UNESCO (United Nations Educational, Scientific and Cultural Organzation) maipapan iti reproductive health, ken iti ibagbaga ti Konstitusion ken ti linteg.

Innayonna a saanda nga agiwaras kadagiti kontraseptibo ta adda metten dagiti health center nga akinbeddeng iti daytoy.

Kinuna pay ni Briones nga imbes nga agiwarasda kadagiti kontraseptibo, iturongda ketdi ti imatangda kadagiti dakes nga ibunga ti sex iti ruar ti kallaysa.

Naireport a nagsaritan da Briones ken Health Secretary Paulyn Jean Ubial maipanggep iti daytoy a banag.


(Naipablaak iti Bannawag, Pebrero 13, 2017 a bilang.)

Tulong Kadagiti Mangngalap



TULONG KADAGITI MANGNGALAP. Agarup P12-milion ti pategna a tulong manipud iti BFAR ti naibunong kadagiti mangngalap iti Ilocos Norte a naapektaran iti Bagyo Lawin a nangdidigra iti probinsia. Nadumaduma dagitoy a klase ti pagkalap a kas iti sigay, bilog, chest freezer, fish landing centers, pagsuoban (smoke house), ken agarup 20,500 nga an-annak ti tilapia. Kas kuna dagiti mangngalap,  ita pay laeng a makaawatda iti kastoy a grasia manipud iti gobierno ket mangnamnamada nga agtultuloy koma nga ipaay ti gobierno kadagiti tulong a kasapulanda, Mismo a ni USEC Eduardo Gongonan ti BFAR ti nangidanon kadagitoy a tulong a binayabay  dagiti nadumaduma nga opisial ti probinsia nga indauluan ni Bise-Gobernador Angelo Marcos Barba. (Leilanie G. Adriano)


(Naipablaak iti Pebrero 13, 2017 a bilang.)

Eksibit iti arte dagiti Ilokano a pintor, nalukatan



Nalukatan ti “Homage to the Masters” itay Enero 25, 2016 iti Legislative Building iti City Hall ti Vigan City. Maysa daytoy nga art exhibition ti 18 nga Ilokano a kontemporaneo a pintor, kas panagyaman ken pammadayawda kadagiti maestro ken nangimpluensia kadakuada iti arte.

Dagiti pintor: Brenn Angelo Marzan, Jester Sanglay, Gleeson Padios, Elpie Deo Flandez, Florimar Gonzalo, Juliemah Prades, Khervin John Gallendez, Cherilen Maneja, Kian Racel Sotelo, Emmerson Rabbon, Benedict Arquero, Rodel Dayoan, Florence Eduarte, Juan Elani Tulas, RV Rivera, Pablo Zinggapan, ken Roel Paz Salvatierra.

Agpaut ti eksibit agingga iti agtapos ti Pebrero.


(Naipablaak iti Bannawag, Pebrero 13, 2017 a bilang.)

February 2, 2017

PEBRERO 13, 2017



SARITA
4 Ni Manong Gino
   Jobert M. Pacnis
12 ’Imbag La Ketdin, Lakay!
    Feliciana J. Abril

NOBELA
8 Oplan Maharlika (5)
     Norberto D. Bumanglag, Jr.
10 Kalinawa (7)
      Linda T. Lingbaoan

DANIW
6 Tangatang
    Mighty C. Rasing
23 Sala Dagiti Kulibangbang
     Anna Liza Madayag Gaspar
47 Daniw a Para Ubbing
     Roselyn C. Campano

SALAYSAY
14 ‘Tay Napudno nga Agayat, Ammona ti Agpabus-oy
      Fernando B. Sanchez
26 Padasen Daytoy Baro a Barayti ti Pagay
     Reynaldo E. Andres

KOMIKS
35 Sweet Jazmine (22)
38 Don Clavio de Ylocos (24)
41 Miks & Tiks

KOLUM
17 Kastoy, Kapid, Ditoy Hawaii
19 Saludsodem ken ni Apo Hues
24 Padasem Daytoy, Kailian
28 Okeyka, Apong
30 Tips
31 Ading Kosinera

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
11 Netizone
16 Biag ni Ilokano
18 Siled ti Kararag
21 Hm, Agtaltaul Met Latta ti Asok, Kunam?
29 Idi Un-unana a Panawen
32 Ammuem Pay Dagitoy
33 Haytek!
34 Kasano ti Agikolada?
43 Ti Gasatmo Ita a Lawas
46 Dagiti Pabula ni Aesop