Binallaagan ti Blas F. Ople Policy Center dagiti klinika ken ahensia iti panagrekrut kadagiti overseas Filipino workers (OFWs) a saanda koma a paallilaw iti ipakpakat ti Gulf Cooperation Council (GCC) Ministry of Health nga agsingsingir iti 10 a doliar a kas bayad iti online registration a para kadagiti aplikante nga OFW iti Middle East.
Kuna ni Susan Ople ti nasao a center a posible nga scam daytoy a mangbiktima kadagiti OFW.
Innayon ni Ople a no sumaren, gumanar daytoy GCC Ministry of Health iti di nababbaba ngem 222 a milion a pisos iti tinawen. Nangibaon ti Filipinas idi 2015 iti 333,671 a kabarbaro a mangmangged kadagiti pagilian a kameng ti GCC kas maibatay iti rekord ti Philippine Overseas Employment Administration (POEA).
Kuna pay ti Ople Center a dagiti OFW a mapan iti Middle East, masingirda iti nayon a 10 a doliara kas bayad iti online registration a para iti preemployment medical examination. Mapagduaduaan no agpayso a ti GCC Ministry of Health ti mangipakpakat iti daytoy a rekisito.
Segun iti Department of Health (DOH) ti Filipinas, maibatay iti circular a naipaulog idi Disiembre 22, 2018, daytoy a sistema ti online registration ket mabalin a sabali pay a kita ti panangmonopolia iti health examination services kadagiti mangmangged a Filipino.
Segun pay iti nasao a DOH circular a pinirmaan ni Health Undersecretary Rolando Enrique Domingo a binalakadannan ti publiko ken dagiti klinika a para kadagiti OFW nga akreditado iti DOH nga ireportda ti ania man nga aktibidad a mainaig iti daytoy nga online registration scheme.
Segun met ken ni Ople, saan pay a binigbig ti POEA nga adda kastoy a mapaspasamak nga scheme.
Ginutigot pay ni Ople ti Department of Foreign Affairs a kompirmaren daytoy kadagiti pagilian iti Gulf nga agaw-awat kadagiti mangmangged a Filipino no inikkanda iti pammalubos ti GCC Ministry of Health nga agkolektar iti nasao a bayad para kadagitoy a pagilian.
(Naipablaak iti Pebrero 12, 2018 a bilang.)
No comments:
Post a Comment