March 28, 2016

Miss Virginia Tobacco 2016



MISS VIRGINIA TOBACCO 2016. Agpakanawan: da Miss Philippine Tobacco Institute 2014 (1st Runner-Up) Cherise Katriel Deslippe (NTA La Union), Miss Virginia Tobacco 2016 Precious Camille Bucad (NTA Ilocos Norte) ken Miss National Tobacco Administration (2nd Runner-Up) Ma. Khrissa Jessica Parado (NTA Ilocos Norte) iti panagparetratoda apaman a nabalangatanda iti Search for Miss Virginia Tobacco 2016 a naangay iti Siudad ti Candon idi Marso 18. Tinawen a maang-angay ti salip a kas paset ti Tobacco Festival wenno panagpiesta ti Siudad. (NMEValdez)

(Naipablaak iti Bannawag, Abril 4, 2016 a bilang.)

Bulan ti Literatura ti Filipinas, marambakan iti daytoy nga Abril



Rambakan ti pagilian ti Bulan ti Literatura ti Filipinas (Buwan ng Panitikan ng Filipinas wenno National Literature Month) iti daytoy nga Abril.

Dagiti mangidaulo iti parambak: National Commission for Culture and the Arts (NCCA) nga idauluan da chairman Felipe M. de Leon Jr. ken OIC-executive director Adelina M. Suemith; ti Komisyon sa Wikang Filipino (KWF) nga idauluan ni National Artist Virgilio Almario a chairman; ken ti National Book Development Board, nga idauluan ni Chairperson Flor Marie Sta. Romana Cruz.

Nadumaduma a pasken mainaig iti literatura ken kultura ti maiwayat iti las-ud ti bulan ti Abril “tapno matignay ti panunot ken mapabaknang ti kararua.”

Mangrugi ti National Literature Month iti pannakarambak ti Francisco “Balagtas” Baltazar Day wenno Araw ni Francisco “Balagtas” Baltazar itoy nga Abril 2 babaen ti aggiddan a pannakairuknoy dagiti sabsabong kadagiti batonlagip ni Balagtas iti Pandacan (Manila), Balagtas (Bulacan), ken Orion (Bataan).

Maiwayat kalpasanna dagiti nadumaduma nga aktibidad a mainaig iti literatura a kas kadagiti komperensia, workshop, ken dadduma pay iti nadumaduma a paset ti pagilian a kas iti Metro Manila, Camarines Sur, Baguio City (Benguet), Pampanga, Laguna, Dapitan City (Zamboanga del Norte), Cebu City, Bacolod City (Negros Occidental).

Kamaudiananna, iwayat ti Unyon ng mga Manunulat sa Pilipinas (UMPIL) ti UMPIL Pambansang Kongreso ng mga Manunulat iti Ateneo de Manila University inton Abril 30.

Naideklarar ti Abril a kas Buwan ng Panitikang Filipino wenno National Literature Month babaen ti Proclamation No. 968 a pinirmaan ni Presidente Aquino idi Pebrero 10, 2015.

Naiwayat ti umuna a pannakarambak ti National Literature Month itay napan a tawen ket iti daytoy a tawen, impanamnama ti NCCA ken KWF ti narungrungbo a pannakarambak tapno maipaganetget ti napateg nga akem ti literatura iti kabibiag ken iti kinaasino ni Filipino.

Iti biang ti GUMIL Filipinas, rambakanna met ti Bulan ti Literatura Ilokana inton Abril 22-24 iti probinsia ti Apayao, kas pannakipasetna iti Bulan ti Literatura ti Filipinas.


(Naipablaak iti Bannawag, Abril 4, 2016 a bilang.)

March 27, 2016

Berroy, umuna iti Salip iti Sarita ti 18th AMMAFLA

Berroy
Inyalat ni Rhea Rose D. Berroy ti Manabo, Abra, ti Umuna a Gunggona iti Salip iti Sarita a Para Kadagiti Agdadamo a Mannurat ti 18th AMMA Foundation Literary Award babaen ti saritana a “Balud.”

Maipaay ken ni Berroy, nangabak payen iti Palanca Awards ken maysa a lisensiado a Medical Technologist, ti P10,000.00 a premio a kuarta ken sertipiko ti pammadayaw.

Inyalat met ni Remedios S. Tabelisma-Aguillon ti Maika-2 a Gunggona babaen ti saritana nga “Addanto Aldaw.” Maipaay met ti P8,500.00 ken sertipiko ti pammadayaw ken ni Aguillon, naipasngay iti Umingan, Pangasinan ngem dimmakkel iti South Cotabato a nagdappatan dagiti dadakkelna; ken agnaed itan iti Cagayan de Oro City.

Impangabak met ni Dexter M. Fabito ti Pamplona, Cagayan iti Maika-3 a Gunggona ti saritana a “Pammadayaw.” Maipaay ken ni Fabito, nagturpos iti BSIT iti CSU-Sanchez Mira,ti P7,000.00 a premio a gunggona ken sertipiko ti pammadayaw.

Kinuna dagiti mangimaton iti AMMAFLA a da Amado ken Gloria Yoro, Francisco ken Aurora Ponce, ken Alfredo ken Cherry Quibol (agpapada nga agindegen iti Hawaii) a mapadayawan dagitoy nangabak a mannurat bayat ti Maika-48 a Kombension Nasional ti GUMIL Filipinas inton Abril 22-24 iti probinsia ti Apayao iti panangsangaili ti GUMIL Apayao.

Dagiti naghurado: Juan Al. Asuncion, pangulo; Ariel S. Tabag, kameng; ken Aileen R. Rambaud, kameng.


(Naipablaak iti Bannawag, Abril 4, 2016 a bilang.)

ABRIL 4, 2016



SARITA
6 Inton Milionarioakon
    Efren A. Inocencio
14 Pasakalye ni Ayat
     Bienvenido C. Cabras

NOBELA
 8 Ti Bastardo (1)
      Norberto D. Bumanglag, Jr.
12 Ni Anti Maring ken ni Triple M (2)
     Estela Bisquera-Guerrero

DANIW
10 Karayan
     Ria Rebolledo
47 Daniw a Para Ubbing
     Jan Justin C. Rodriguez

SALAYSAY
16 Agpayso Kadi a ti Ayat, Aggapu iti Puso?
     Virginia A. Duldulao, Ph.D.
26 Sabali Laeng No EMAS ti Usarem iti Pinagayan
     Reynaldo E. Andres

KOMIKS
35 Kimar (19)
38 Gayang ni Lam-ang (129)
41 Miks & Tiks

KOLUM
19 Apo Hues
20 Dear Doc
23 Haytek!
24 Padasem Daytoy, Kailian
28 Okeyka, Apong
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
 2 Ti Makunami
4 Tao, Lugar, Pasamak
9 Netizone
18 Biag ni Ilokano
21 Siled ti Kararag
22 Panangtaripato iti Taraken a Billit
29 Idi Un-unana a Panawen
32 Ammuem Pay Dagitoy
34 Pagtalinaeden a Nadalus ti Angin iti Uneg ti Balay
43 Ti Gasatmo Ita a Lawas
46 Dagiti Pabula ni Aesop

Ni Bongbong ken Dua a Cagayano a Lider-Mannurat



NI BONGBONG KEN DUA A CAGAYANO A LIDER-MANNURAT. Intag-ay ni Senador Bongbong Marcos, kandidato a Bise-Presidente, ti ima da Board Member Vilmer V. Viloria (kanigid) ken Arthur P. Urata, Sr. (kanawan) iti naangay a Unity Caravan ni Senador Bongbong itay nabiit iti Lacambini, Tuao, Cagayan a sinangaili ni Bise-Gobernador Leonides 'Odi' Fausto a kandidato a gobernador iti nasao a probinsia. Agpada met da Viloria ken Urata a papili a Board Member iti Second District iti Cagayan.


(Naipablaak iti Bannawag, Marso 28, 2016 a bilang.)

Atty. Levi Baligod: “Stop Da Korap”



Ni Atty. Levi D. Baligod, tubo iti Tuao, Cagayan, ti kakaisuna a private complainant iti kaso ti PDAF scam kontra kadagiti adu nga agpampanday-linteg a nangibunga iti pannakaibalud ni Janet Napoles ken dagiti prominente a senador ken kongresista.

Kinasuan pay ni Atty. Levi Baligod dagiti mainaig iti Malampaya Fund scam, ACEF (Agriculture Competitiveness Enhancement Fund) scam, LEDP (Livestock Enhancement Development Program) scam, ken dadduma pay.

Kadagitoy a nadumaduma nga scam, indarum ni Atty. Baligod ti maysa a dati a presidente, 2 a dati a Senate president, maysa a dati nga Speaker, 4 a cabinet secretary, 45 a congressman, ken dadduma pay.

Kayat nga ituloy ni Atty. Levi Baligod, kas maysa a Senador, ti laban kontra iti korupsion tapno mausar a husto ti pondo a para iti edukasion, salun-at, agrikultura, ken pagbiagan a para kadagiti umili.


(Naipablaak iti Bannawag, Marso 28, 2016 a bilang.)

March 21, 2016

Panangtanggar iti Sabangan



PANAGTANGGAR ITI SABANGAN. Sakbay pay a lumnek ti init, agluganen dagitoy a mangngalap iti barangay tapno pagtitinnulonganda nga ipakat ti tanggarda (saplar) iti sabangan ti Caroan, Gonzaga, Cagayan. Ti tanggar ket iket nga addaan iti bubo a maigalut iti dua wenno ad-adu pay a tulos. Agpatpatnag daytoy a maipakat ngem maakas-akas met laeng iti mamitlo agingga iti maminlima a daras iti maysa a rabii agbatay iti kaadu ti maala. Babassit a rasa, wenno “rissing” ti al-alaen dagitoy nga ilakoda iti salapi wenno piso ti maysa depende iti kadakkelna. Maysa daytoy a pagsapulan dagiti mangngalap iti daytoy a lugar malaksid iti panagdaklis ken panaggaladgad iti baybay. Uray makapuyat a pagsapulan, kaykayat daytoy dagiti dadduma ta makalakoda iti rinibu iti agpatnag no nabuslon ti maala. (Roselyn C. Campano)

(Naipablaak iti Bannawag, Marso 28, 2016 a bilang.)

Bulan ti Literatura Ilokana, rambakan dagiti mannurat nga Ilokano

Ladawan iti Dap-ayan 2015.


Rambakan dagiti mannurat nga Ilokano ti Abril a kas Bulan ti Literatura Ilokana iti daytoy Abril 22-24, 2016 iti Apayao Agri-Tourism & Sports Complex, San Gregorio, Luna, Apayao.

Am-ammo a kas Dap-ayan 2016: ti Maika-48 a Nailian a Kombension ti GUMIL Filipinas, iwayat ti nasao a gunglo dagiti mannurat nga Ilokano ti panagrambak, iti pannakitinnulong ti National Commission for Culture and the Arts ken sangailien ti GUMIL Apayao nga idauluan ni Apayao Board Member Remy Albano.

Addaan iti tema a “Ni Gumiliano a kas Umili iti Lubong,” mayannurot ti nasao a panagrambak iti Proklamasion Bilang 26 ni dati a Presidente Gloria Macapagal-Arroyo idi Abril 2001 a nangideklarar iti Abril a kas Bulan ti Literatura Ilokana.

Aglektiur dagiti mabigbigbig a mannurat nga Ilokano a kas kada Bannawag Editor Cles B. Rambaud, Joel B. Manuel, Aileen R. Rambaud, Sherma E. Benosa, Anna Liza M. Gaspar, Cagayan Board Member Vilmer V. Viloria, BM Albano, Delfin P. Dumayas, Freddie G. Lazaro, Eliseo B. Contillo, Neyo Mario E. Valdez, Dr. Jaime G. Raras, Prof. Edna C. Nagtalon, Ariel S. Tabag, Virgilio D. Domaloy ken Leilanie G. Adriano.

Warwaren met ni GF President Arthur P. Urata, Sr. ti tema ti kombension idinto a trataren ni Dr. Rex Navarro ti Cagayan State University ti akem ti print media iti climate change.

Naawis met a mangipaay iti pammaregta a bitla da Apayao Governor Elias C. Bulut ken Apayao Cong. Eleanor C. Bulut-Begtang.

Mainaig iti daytoy, mayannurot pay daytoy nga okasion dagiti mannurat nga Ilokano iti Proklamasion Bilang 968 idi Pebrero 2015 a pinirmaan ni Presidente Noynoy Aquino a nangideklarar iti Abril a kas National Literature Month.

Para kadagiti interesado a dumar-ay iti nasao a kombension, makiuman iti 0928 607 3972. (AST)

(Naipablaak iti Bannawag, Marso 28, 2016 a bilang.)

‘Iskrabiloko winners’ ti L.U., napadayawan

Pinadayawan ti gobierno probinsial ti La Union dagiti nangabak iti Iskrabiloko 2016 iti seremonia a naangay iti Ortega Gymnasium iti Siudad ti San Fernando itay nabiit.

Naipaset daytoy nagkatlo a kategoria a torneo iti Iskrabiloko iti maika-6 nga Ayat Festival a kas pangpabursi iti selebrasion ti maika-166 nga Anibersario ti La Union ita a tawen.

Iti panglukat a programa ti nagmalem a torneo, impannakkel da Bokal Reynaldo Mosuela ken Ayat Festival Chairman Adamor Dagang a nabileg daytoy nga ay-ayam iti pannakatagiben ti tawid a pagsasao nga Iloko (Ilokano), kas ipaganetget ti Iloko Code of La Union.

Dagiti nangabak (Kategoria Elementaria): San Gabriel Central School iti San Gabriel, kampeon; Tubao Elem. School iti Tubao, 1st runner-up; Balaoan Central School iti Balaoan, 2nd; Cubal Elem. Sch. iti Agoo, 3rd ken Bilis Elem.Sch. iti Burgos, 4th.

Nagkampeon ti San Gabriel Vocational HS iti San Gabriel para iti kategoria sekundaria. Dagiti nainget a  kinabalubalna: San Juan NHS iti San Juan, 1st runner up; La Union NHS iti San Fernando, 2nd; Burgos NHS iti Burgos,3rd ken Rosario NHS iti Rosario, 4th.

Iti kategoria ti nataengan, nagkampeon ti Bagulin idinto a pimmuesto ti Luna a kas 1st runner up; Bangar, 2nd; Rosario, 3rd ken Burgos, 4th.

Inawat dagiti nangabak dagiti gunggonada a kuarta ken sertipiko manipud ken ni Bokal Nancy Bacurnay a binayabay da Engr. Cirilo Nuesca, Dr. Ed Angco ken Djuna R. Alcantara, daytoy  a mannurat nga agpapada a naghurado.


(Naipablaak iti Bannawag, Marso 28, 2016 a bilang.)

March 17, 2016

MARSO 28, 2016



SARITA
4 Dagiti Nagtawid
Joel B. Manuel
14 Katawa ti Kabalio
Juan B. Quimba

NOBELA
8 Ni Anti Maring ken ni Triple M (1)
   Estela Bisquera-Guerrero
12 Idi Agawid ni Uppong Idiay Rosales (6)
  Juan S.P. Hidalgo, Jr.

DANIW
 6 Panagungar
Leonardo D. Tejano
28 Kasarsaritak ti Angin-Kalgaw
Francisco T. Ponce
47 Daniw a Para Ubbing
Ludilyn Ely F. Bravo

SALAYSAY
16 Agbalinka Koma a Saka ken Ima ni Apo Jesus
Rev. Fr. Melchor B. Palomares

26 Tapno Di Madadael Dagiti Idulin a Bin-i
     Reynaldo E. Andres

KOMIKS
35 Kimar (18)
38 Gayang ni Lam-ang (128)
41 Miks & Tiks

KOLUM
10 Apo Hues
19 Dear Doc
20 Okeyka, Apong
23 Haytek!
24 Padasem Daytoy, Kailian
30 Tips
31 Ading Kosinera
33 Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
 2 Ti Makunami
3 Tao, Lugar, Pasamak
9 Netizone
18 Biag ni Ilokano
21 Siled ti Kararag
22 Agmamanok ti Asom
29 Idi Un-unana a Panawen
32 Ammuem Pay Dagitoy
34 No Apay a Napateg ti Recycling
43 Ti Gasatmo Ita a Lawas
46 Dagiti Pabula ni Aesop

March 13, 2016

Maika-4 a 'Tri Ilocos Norte'



MAIKA-4 A ‘TRI ILOCOS NORTE’. Maangay iti Ilocos Norte ti maikapat nga edision ti ‘Tri Ilocos Norte’ inton Marso 19 a kas paset ti pannakaitandudo ti “sports tourism” iti probinsia iti panangidaulo ni Gob. Imee Marcos. Maidiaya iti nasao a triathlon ti individual sprint (750-meter swim – 20-kilometer bike – 5-kilometer run), individual 51.5km (1.5km-40km-10km), individual 113km (2km- 90km- 21km) and 51.5km and 113km relay ken buklen ti sangapulo a kategoria a pakipartisiparan dagiti agtawen manipud iti 12 agingga iti 50 ken agpangato. Labsanto dagiti partisipante dagiti tourist spot ti probinsia a pakaibilangan ti Simbaan ti Paoay (ladawan iti ngato a naala iti ‘Tri Ilocos Norte’ itay napan a tawen). (Teksto: John Michael Mugas/ Retrato: Alaric A. Yanos)

(Naipablaak iti Bannawag, Marso 21, 2016 a bilang.)

Zika, di koma a pakadanagan dagiti masikog, kuna ti DoH

Di rumbeng a pakadanagan dagiti masikog iti Filipinas ti report a maysa nga Amerikano a turista a bimmisita iti Filipinas itay Enero ti natakuatan nga agsagsagaba iti Zika.

Kas kuna ni Health Spokesman Dr. Lyndon Lee Suy a saan met amin a masikog a kinapet ti Zika virus ket mabalin a maaddaan iti anak nga addaan iti microcephaly.

Nupay inakona nga adda posibilidad a maaddaan iti microcephaly ti maladaga a sikog ti kinapet ti Zika, inlawlawag ni Suy a nababa met laeng ti posibilidad daytoy.

Mainaig iti daytoy, binalakadan ni Suy dagiti masikog nga agbalinda koma a naan-annad, ken aywananda koma a nasayaat ti bagida ken ti sikogda.

Kuna ni Suy a no adda marikrikna ti maysa a tao nangruna no masikog, masapul nga agpakita daytoy iti doktor.

Pinatalgedan itay nabiit ti DoH a maysa nga Amerikana a dimteng iti pagilian itay Enero ken nagpaut iti makabulan ti addaan iti Zika virus.


(Naipablaak iti Bannawag, Marso 21, 2016 a bilang.)

Kayo a Pagtungo Manipud iti Baybay



KAYO A PAGTUNGO MANIPUD ITI BAYBAY. Maurnong ken maurnos a kasla mandala dagiti kayo a pagtungo kalpasan nga indaknir ida ti dalluyon iti aplaya iti Brgy. Bulala Norte, Aparri, Cagayan tapno mapair-iran ket daras a mamagaan. Main-inut a mabunag dagitoy a maipempen kadagiti pagtaengan dagiti nagaget nga aggabat nga usarenda a libre a pagtungo imbes nga agusarda iti gatangenda a gas a pagluto. (Jobert M. Pacnis)


(Naipablaak iti Bannawag, Marso 21, 2016 a bilang.)

21 a sarita, naisalip iti 18th AMMA Foundation Literary Awards

Duapulo ket maysa a sarita ti naawat ti Secretariat ti AMMA Foundation Literary Awards a para iti maika-18 nga edision ti salip iti panagsurat iti sarita a para kadagiti agdadamo a mannurat iti Ilokano.

Naggibus ti salip idi Enero 31, 2016.

Dagiti sarita ken parbo a nagan dagiti autor:

“Ti Ambision ni Mary Ann” ni Maria Tereza, “Ni Laeng Ragsak ti Inay-ayatko” ni Joey B. Cornel, “Addanto Aldaw” ni Rosal A. Nabanglo, “Ranggas” ni Leonemil Tobias Lanipa, “Ni Alilem ken ti Susay” ni Juan A. Marasiksik, “Rimat Kadagiti Dakulap” ni Whisper Angel;

“Impierno!” ni Baldo Vino Kulafu, “Bigat Manen” ni CL Sabado, “Salamagi” ni Kaks, “Sangagasot” ni Augustus Gabriella, “Pammadayaw” ni Pam A. Dayao;

“Balud” ni Bugsao Cayto, “Lua ti Maysa nga Anak” ni Maria Mercedes, “Ti Dung-aw iti Maysa a Periodista” ni Mara Jane T. Sta. Ana;

“Wayawaya” ni Perdonan, “Lagip ken ni Dulag” ni Macliing, “An-annong ken Baribari” ni Lucas Cumot, “Adda Langit, Anita” ni Harper Lee, “Idiay Bantay” ni Miss Turod, “Manang Biday” ni Pamulinawen ken “Anak ni Urduja” ni Lingayen.

Kinuna dagiti esponsor (Amado ken Gloria Yoro, Francisco ken Aurora Ponce, ken Alfredo ken Cherry Quibol, agpapada nga agindegen iti Hawaii) a mapadayawan dagiti mangabak bayat ti Maika-48 a Nailian a Kombension ti GF nga idauluan ni Arthur P. Urata.

Maangay ti kombension inton Abril 22-24, 2016 iti Apayao Agri-Tourism & Sports Complex, San Gregorio, Luna, Apayao iti panangsangaili ti GUMIL Apayao nga idauluan ni BM Remy Albano, presidente ti nasao a chapter ti GUMIL.

Dagiti gunggona: Umuna a Gunggona, P10,000.00; Maikadua, P8,500.00; ken Maikatlo, P7,000.00. Maipaayan pay dagiti mangabak iti sertipiko ti pammadayaw.


(Naipablaak iti Bannawag, Marso 21, 2016 a bilang.)

March 10, 2016

MARSO 21, 2016



SARITA
4 Agsapa
   Roselyn C. Campano
14 Boligen
    Guillermo B. Bandonill

NOBELA
8 Idi Agawid ni Uppong Idiay Rosales (5)
   Juan S.P. Hidalgo, Jr.
12 Siak ni Precious (54)
  Juan Al. Asuncion

DANIW
 6 Kangina ti Aldaw
    Ronnie E. Aguinaldo
47 Daniw a Para Ubbing
     Jimmy R. Agustin

SALAYSAY
16 Linnaingan Laeng iti Estratehia
Neyo Mario E. Valdez
24 Intayon Agdidigos Idiay Madongan!
     Leilanie G. Adriano
28 Ti Pudno Maipanggep iti Organiko a Ganagan
     Reynaldo E. Andres

KOMIKS
35 Kimar (17)
38 Gayang ni Lam-ang (127)
41 Miks & Tiks

KOLUM
10 Apo Hues
20 Okeyka, Apong
23 Haytek!
26 Padasem Daytoy, Kailian
30 Tips
31 Ading Kosinera
33 Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
 2 Ti Makunami
4 Tao, Lugar, Pasamak
9 Netizone
18 Biag ni Ilokano
19 Idi Un-unana a Panawen
21 Siled ti Kararag
22 Ania ti Ipakanmo iti Tarakenmo nga Aso?
32 Ammuem Pay Dagitoy
34 Panaginut iti Danum
43 Ti Gasatmo Ita a Lawas
46 Dagiti Pabula ni Aesop

March 7, 2016

Koleksion Dagiti Bato Manipud iti Ilocos Norte



KOLEKSION DAGITI BATO MANIPUD ITI ILOCOS NORTE. Pagliwliwaan ni Julius Pasion Domingsil ti Samtoy Bookstore and Archives, Ilocos Norte ti panagukkon kadagiti bato manipud kadagiti karayan, waig, dissuor ken bambantay iti entero nga Ilocos Norte, kas paset ti panangipakitana iti kinabaknang ti nakaparsuaan ti probinsia. Ita, nakadispleyn dagitoy nagduduma ti kortena a bato iti maysa a paset ti Tabacalera Building, Laoag City nga abay met laeng ti nasao a bookstore babaen ti suporta ni Gov. Imee R. Marcos. (Aileen R. Rambaud)

(Naipablaak iti Bannawag, Marso 14, 2016 a bilang.)

1.5-M a Filipino, nakabirok iti trabaho iti online

Agarup 1.5-milion a Filipino iti panaggibus ti 2015 ti nakabirok iti trabaho iti online, kas kuna ti Department of Science and Technology (DoST).

Iti panagraira ti trabaho iti online ken iti talento dagiti Filipino, mainayon pay ti libre a Wi-Fi Internet ti DoST iti sibubukel a pagilian, natalek ti Information and Communications Technology (ICT) office ti nasao a departamento nga agkuna nga ad-adu pay a Filipino ti makabirok iti trabaho iti online.

Dinakamat ti ICT office ti laing dagiti Filipino iti panagsurat, graphic ken web design, desktop publishing, audio ken video editing, software development, ken virtual office assistance.

Ti laeng kasapulan nga aramiden ti maysa nga online worker nga addaan kadagiti nadakamat a paglaingan ket kompiuter a nakakonektar iti Internet, segun iti departamento.

Dinakamat pay daytoy ti sumagmamano kadagiti job website wenno portal a pakasapulan kadagiti online job, kas iti UpWork.com, Freelancer.ph, ken OnlineJobs.ph. Innayonna a dagiti employer ket masansan nga small agingga iti medium-sized a kompania wenno dagiti indibidual iti sabali a pagilian nga ad-adda a kayatda ti makainut ken epektibo a maalada ti kayatda a resulta ti trabaho.

Dinakamat ni DoST Secretary Mario Go Montejo a “world class” ti kabaelan dagiti Filipino.

Segun ken ni Montejo, ti pannakaikonektar iti Internet ti tulbek iti trabaho iti online, nupay parikut kadagiti adda iti away. Adda ketdi sungbat ti DoST iti daytoy, ti “Juan Konek Free Wi-Fi Internet access in public places project.”

Dinakamat ti ICT office a maysa ket kagudua a milion a Filipino ti gumangganar iti mapan a 3 agingga iti 250 a doliar iti tunggal proyekto.


(Naipablaak iti Bannawag, Marso 14, 2016 a bilang.)

March 6, 2016

Lumagtokan!



LUMAGTOKAN! Naragsak nga aglilinnagtuan dagitoy nga ubbing iti igid ti baybay ti Centro 6 Minanga, Claveria, Cagayan. Iti laksid dagiti adu nga ay-ayam iti Internet ken impluensia ti baro a teknolohia, sibibiag pay laeng dagiti kakastoy nga ay-ayam iti nasao a lugar. (Raquelito B. Cenal)

(Naipablaak iti Bannawag, Marso 14, 2016 a bilang.)

Pannakarambak ti Bulan ti Literatura, mapagsasaritaan

Ti pannakarambak ti Nailian a Bulan ti Literatura ken Bulan ti Literatura Ilokana ti kangrunaan a mapagsasaritaan iti maikapat a board meeting ti GUMIL Filipinas, ti gunglo dagiti mannurat nga Ilokano, segun ken ni Arthur P. Urata, Sr., presidente ti gunglo. Sangailien daytoy da sigud nga Editor ti Bannawag Dionisio S. Bulong ken GF Treasurer Eden Cachola-Bulong iti pagtaenganda iti Ayungin Street, Talipapa, Novaliches, Quezon City inton Marso 13, 2016, 9AM

Kas pangrambak dagiti mannurat nga Ilokano iti Abril a kas Bulan ti Literatura Dagiti Ilokano ken Nailian a Bulan ti Literatura, angayen ti GUMIL Filipinas, iti pannakitinnulong ti National Commission for Culture and the Arts, ti “Dap-yan 2016: Ti Maika-48 a Nailian a Kombension” inton Abril 22-24, 2016 iti Apayao Agri-Tourism & Sports Complex, San Gregorio, Luna, Apayao iti panangsangaili ti GUMIL Apayao nga idauluan ni BM Remy Albano, presidente ti nasao a chapter ti GUMIL.

(Naipablaak iti Bannawag, Marso 14, 2016 a bilang.)

March 2, 2016

MARSO 14, 2016



SARITA
4 Ket Nagkandidato ni Uliteg Idding
    Rolando A. Seguro, Jr.
14 Tubeng
    Guillermo R. Andaya

NOBELA
8 Idi Agawid ni Uppong Idiay Rosales (4)
   Juan S.P. Hidalgo, Jr.
12 Siak ni Precious (53)
  Juan Al. Asuncion

DANIW
28 Amarilio
     Domay Solinggay
47 Daniw a Para Ubbing
     Roselyn C. Campano

SALAYSAY
16 Agannad iti Zika Virus
     Virginia A. Duldulao, Ph.D.
26 Bilunak: Ti Mula a Di Unay Ikankano Dagiti Ilokano
     Reynaldo E. Andres

KOMIKS
35 Kimar (16)
38 Gayang ni Lam-ang (126)
41 Miks & Tiks

KOLUM
10 Apo Hues
19 Dear Doc
20 Okeyka, Apong
23 Haytek!
24 Padasem Daytoy, Kailian
30 Tips
31 Ading Kosinera

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
 2 Ti Makunami
4 Tao, Lugar, Pasamak
9 Netizone
18 Biag ni Ilokano
21 Siled ti Kararag
22 Aglibas a Taraken a Kalapati?
29 Idi Un-unana a Panawen
32 Ammuem Pay Dagitoy
33 Kampeon Manen ti Pamuliwen Dancers
34 No Awanka, Kasanon Dagiti Mulam?
43 Ti Gasatmo Ita a Lawas
46 Dagiti Pabula ni Aesop