Dagiti produkto a kasapulan a mismo ti pagilian ti ipangruna ti Department of Agriculture iti 2018, saan ket nga iturongna ti imatangna kadagiti ilako ti pagilian iti ballasiw-taaw.
Kinuna ni Agriculture Secretary Emmanuel Piñol a maysa a pagarigan ti produkto ti pagilian a kape. Kinunana a maitantandudo ti panagmula ti pagilian iti para eksport a kape idinto nga agang-angkat met ti pagilian iti kape.
“Dakkel ti merkado iti mismo a pagilian ket daytoy ti nalipatantayo,” kinuna ni Pinol, a kayatna a sawen, laklakuan ti Filipinas dagiti ganggannaet ngem nalipatanna a lakuan a mismo dagiti umilina.
Para iti 2018, kinuna ni Pinol nga iturong ti Department of Agriculture ti imatang daytoy iti produksion iti taraon, mekanisasion, programa iti panagpabulod ken iti 10-tawen a programa daytoy iti tay-ak ti dairy (gatas ti dingo).
Babaen daytoy, kinuna ni Piñol a manamnama a masungbatan ti dinakamat ni Presidente Duterte a mayuna koma a masupusopan dagiti masapsapul dagiti Filipino.
Mainaig pay itoy, kinuna ni Pinol nga itoy a tawen, maikabassit ti pannakipartisipar ti departamento kadagiti international marketing show.
Innayonna a no bilang adda sobra kadagiti produkto malaksid kadagiti kadawyan a mayek-eksport a kas iti saba, pinia, niog, ken mangga, isu pay laeng ti tiempo ti panaglako ti Filipinas iti ganggannaet.
(Naipablaak iti Enero 8, 2018 a bilang.)
No comments:
Post a Comment