January 29, 2015

Butanding iti Laoag



BUTANDING ITI LAOAG. Maysa manen a Butanding wenno whale shark (Rhincodon typhus) ti nawayawayaan babaen ti tulong ti sumagmamano a mangngalap ken residente iti Barangay Navotas B iti Siudad ti Laoag kalpasan a naidaknir daytoy iti igid ti baybay. Segun ken ni Arthur Valente, Provincial Fishery Regulatory Officer iti probinsia, nga adda sumagmamano a mangngalap a mayat a mangkarne iti daytoy ngem napagnunumuan met laeng ti kaaduan a maparuk-atan daytoy iti laksid nga adu nga iket ti nadadael gapu iti pannakaisagudna. Maysa a higante nga ikan, naamo ti butanding kadagiti tattao. Kinapudnona, maysa daytoy a daydaywen dagiti turista iti Donsol, Sorsogon. Iti Ilocos Norte, kadawyan a makitkita daytoy a makiay-ayam kadagiti dadduma pay nga ikan iti adalem a paset ti baybay ngem no tiempo ti kaadu ti makalapan a munamon, umasideg dagitoy iti igid ti baybay. (Leilanie G. Adriano)


(Naipablaak iti Bannawag, Pebrero 2, 2015 a bilang.)

Panagligos iti Lasona



PANAGLIGOS ITI LASONA. Naragsak dagitoy nga agkakailian iti Pinili, Ilocos Norte bayat ti pannakiteggedda nga agligos iti lasona. No nagangon dagiti bulong dagiti nagabut a lasona, mabalinen nga urnosen dagitoy tapno mailako. Agdagup iti lima agingga iti sangapulo a bukel nga adda nagango nga ungkayna ti mailigos a kas iti panagsallapid iti buok sa mapagtitipon a kas sangkareppet. Sa kalpasanna, mapardo. Para kadakuada, ti ingel ti lasona, isu ti angot ti kuarta a mateggedanda nga igatangda kadagiti kasapulan iti inaldaw-aldaw. (Aileen R. Rambaud)


(Naipablaak iti Bannawag, Pebrero 2, 2015 a bilang.)

Kuna dagiti eksperto: Panagtalek dagiti imbestor iti Filipinas, naisubli iti ibibisita ni Pope Francis

Bimmanglo ti ekonomia ti pagilian iti ibibisita ni Pope Francis, segun kadagiti eksperto iti ekonomia.

Kas kuna dagiti nasao nga eksperto, saan a gapu iti panagadu ti kuarta no di ket ti pannakaisubli ti panagtalek dagiti imbestor tapno ipennekda ti iserrekda a negosio a kas bunga ti papal visit.

Kuna ti maysa nga stockbroker a nasayaat iti sangalubongan ti naballigi ken natalinaay nga ibibisita ti Santo Papa.

Kuna dagiti eksperto a naipakita ti Filipinas a maysa daytoy a moderno ken natalged a lugar.


(Naipablaak iti Bannawag, Pebrero 2, 2015 a bilang.)

January 27, 2015

47th National Convention ti GF, mapagsasaritaan

Kangrunaan a mapagsasaritaan iti maika-8 a regular board meeting ti GUMIL Filipinas inton Pebrero 1, 2015 ti pannakaangay ti 47th National Covention ‘toy gunglo dagiti mannurat nga Ilokano iti Filipinas ken iti ballasiw-taaw.

Maangay ti board meeting iti Provincial Capitol ti Cagayan iti Tuguegarao City, babaen ti panangsangaili ni  GF Director Vilmer V. Viloria, agpapaay pay a kameng ti Sangguniang Panlalawigan ti Cagayan a mangibagi iti maikadua a distrito ti probinsia.

Nayiskediul a maangay ti kombension ti GF inton Abril 17-19, 2015 iti Quezon City iti panangsangaili ti GUMIL Metro Manila.

Idauluan ni GF President Arthur P. Urata, Sr. dagiti agatendar nga opisial ti gunglo, a da Mario Tejada, bise-presidente; Roy V. Aragon, sekretario-heneral;  Eden C. Bulong, tesorera; Estela Bisquera-Guerrero, auditor; Benjamin P. Pacris, business manager; Reynaldo E. Andres, press relations officer; ken dagiti direktor: Sherma E. Benosa, Emy Amad Z. Bucaneg, Eliseo B. Contillo Sr., Freddie P. Masuli, Aileen R. Rambaud, Martin T. Rochina, Ariel S. Tabag, ken Vilmer V. Viloria.

Manamnama pay ti kaaddanto dagiti mamagbaga ti gunglo, da Juan S.P. Hidalgo Jr., Jose A. Bragado, Manuel S. Diaz, Baldovino A. Valdez, ken Cles B. Rambaud.

Manamnama met ti itatabuno dagiti presidente dagiti aktibo a sanga ti gunglo.

Para iti dadduma pay nga impormasion, kontaken dagitoy a numero ti selpon: 0927-792-7913 (APU), 0915-984-2149 (VVV), wenno ag-email iti rvaragon@gmail.com, wenno ag-message iti fb.com/rvaragon.


(Naipablaak iti Bannawag, Pebrero 2, 2015 a bilang.)

PEBRERO 2, 2015



SARITA
6 Dagiti Naamitan
   Reynaldo A. Duque

NOBELA
26 Dagiti Kulalanti ti Arapaap (19)
     Juan S.P. Hidalgo, Jr.
30 Upa ken Kawitan (11)
     Estela A. Bisquera-Guerrero

DANIW
27 Ngem Ita a Rabii
     Fernando B. Sanchez
48 Dandaniw a Para Ubbing
     Roselyn C. Campano/ Jobert M. Pacnis

SALAYSAY
12 “Pope Francis, We Love You!”
     Fr. Melchor B. Palomares
16 Ti Siudad a Di Nangiwaksi iti Napalabas
     Gregorio T. Amano
40 Nasalsalun-at Dagiti Bunubon No Agaramatka iti Inoculant
     Reynaldo E. Andres

KOMIKS
17 Gayang ni Lam-ang (70)
20 Aritosan (120)
22 Miks & Tiks

KOLUM
14 Saludsodem ken ni Apo Hues
15 Dear Doc
32 Okeyka, Apong
34 TIPS
37 Kastoy, Kapid, Ditoy Hawaii
38 Kosina Ilokana
42 Padasem Daytoy, Kailian
46 Haytek!

PAGLINGLINGAYAN
44 Showbiz
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
 2 Ti Makunami
 4 Tao, Lugar, Pasamak
10 Idi Un-unana a Panawen
28 Siled ti Kararag
29 Ket Inawagandak iti “Apo”
31 Txtm8
33 Amangan No Kasapulan ti Ubing ti “Special Education”
35 Ti Manok, Kasla Tao…
36 Ammuem Pay Dagitoy
39 Panagtagibalay Laeng, Dimo Koma Kunkuna
45 Ti Gasatmo Ita a Lawas

January 18, 2015

Nalaklaka a tagilako, namnamaen ti DTI

Mangnamnama ti Department of Trade and Industry a maipalaka dagiti tagilako ken serbisio ita a tawen gapu iti dakkel a limmakaan met ti presio dagiti produkto manipud iti petroleo.

Kinuna ni Trade and Industry Secretary Gregory L. Domingo a mangisingasing iti mabiit ti departamento iti baro a “suggested retail price” dagiti produkto a kas bunga met ti dandani kagudua a limmakaan ti presio ti lana sipud pay idi Agosto itay napan a tawen.\

Kuna ti DTI a mairaman kadagiti industria a naparaburan iti ilalaka ti lana dagiti industria ti semento, arina ken trucking.

Mangnamnama ti DTI a mapan a 3 agingga iti 10 a porsiento ti lakaan ti kaaduanna a tagilako gapu iti pannakaikabassit ti gastos iti koriente ken gastos iti delivery.


(Naipablaak iti Bannawag, Enero 26, 2015 a bilang.)

Super Suyod



SUPER SUYOD. Nupay adun dagiti moderno a ramit iti panagtalon, di pay laeng a maisukat daytoy a mannalon ti suyodna iti pananglimpiana iti paraepanna. Kinapudnona, kaaduan pay laeng a mannalon iti Cagayan ti agar-aramat iti suyod ta nasaysayaat pay laeng ti pannakapalanas ti talon no suyod ti usaren ngem ti kuliglig. (Johmar R. Alvarez)


(Naipablaak iti Bannawag, Enero 26, 2015 a bilang.)

Libro iti dandaniw ni Aragon, mayalnag

Mayalnag ti Bagi, libro ti dandaniw ni Roy V. Aragon, inton Enero 24, 2015 (nayalud-od manipud iti Enero 17) bayat ti “Tungtongan ti GUMIL Metro Manila” a sangailien da agkaingungot a retirado a Bannawag Editor Dionisio S. Bulong ken agdama a Tesorera ti GF ken GMM, Eden Cachola-Bulong iti 14 Ayungin St., Cadaing Village, Talipapa, Novaliches, Quezon City.

Impablaak ti Saniata Publications, buklen daytoy ti 47 a dandaniw.

Para kadagiti interesado a maaddaan iti kopia, makiuman ken ni RVA iti 0927 794 2327. (Ariel S. Tabag)


(Naipablaak iti Bannawag, Enero 26, 2015 a bilang.)

ENERO 26, 2015



SARITA
6 Dagiti Medalia ni Nanang
   Leah D. Manzano
12 Kamakamem ti Panagpipilipig
    Dionisio S. Bulong

NOBELA
26 Dagiti Kulalanti ti Arapaap (18)
     Juan S.P. Hidalgo, Jr.
30 Upa ken Kawitan (10)
     Estela A. Bisquera-Guerrero

DANIW
27 Alumamek
     Salome Fermin
48 Dandaniw a Para Ubbing
     Roselyn C. Campano/Jobert M. Pacnis

SALAYSAY
24 Kailiwko Met ti Zambales
     Virginia A. Duldulao, Ph.D.
40 Tapno Adda Latta Imulam nga F1 Haybrid a Kamatis
     Reynaldo E. Andres

KOMIKS
17 Gayang ni Lam-ang (69)
20 Aritosan (119)
22 Miks & Tiks

KOLUM
15 Saludsodem ken ni Apo Hues
16 Dear Doc
32 Okeyka, Apong
34 TIPS
37 Kastoy, Kapid, Ditoy Hawaii
38 Kosina Ilokana
42 Padasem Daytoy, Kailian
46 Haytek!

PAGLINGLINGAYAN
44 Showbiz
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
 2 Ti Makunami
 4 Tao, Lugar, Pasamak
10 Agmanoak Man, Lelong…
14 Idi Un-unana a Panawen
28 Siled ti Kararag
29 Padasem ti Agtaraken iti Baboy
31 Txtm8
33 Kasano nga Awisem ti Atension ti Ubing?
35 Nasamay a Panangidaulo
36 Ammuem Pay Dagitoy
39 Kasano ti Agaramid iti Listaan?
45 Horoscope

January 16, 2015

Kalpasan ti 25 a Tawen iti Musika Ilokana: Narimat Latta ti Bituen ni Vhen

NO Vhen Bautista, kunam, ay ket, wen, a.

Isuna ti am-ammo iti Kailokuan a Prince of Ilokano Songs.

Rambakannan ti maikaduapulo ket lima a tawenna iti musika. Ket babaen dayta kadagiti serye ti pabuya ken sumagmamano nga album.

Wen, saan laeng a maymaysa nga album.

Ta agasem met ngamin ti 25 a tawen iti industria ti musika?

Kasla kaano laeng a nadiskobre isuna daydi Alfonso “Ahi” Lao a nakatakuat met laeng kada Bobby Gutierrez, Dolly Manuel, Linda Lazo, Jerameel Perucho, Sheryll Ignacio, Danny Palabay ken dadduma pay.

Tubo iti Santiago, Claveria, Cagayan ni Vhen. Nagturpos iti Dental Tech iti Centro Escolar University iti Mendiola, Manila.

Ngem iti panagbakasionna iti balay ti kabsatna iti Laoag City, natignay a nakisalip iti kinnantaan kadagiti nadumaduma nga estasion ti radio, pakairamanan ti DWLW Budyong— iti “Bukros a Bukangkang” a programa ni Harry Corpuz, maysa a composer/singer/album producer/radio announcer. Nairamraman ni Vhen iti grupo dagiti Bukros singers a naaw-aris a nagpabuya kadagiti nadumaduma nga ili iti Kailokuan ken iti Tanap ti Cagayan.

Nagangayanna, immakar ni Vhen iti Bombo Radyo Laoag DZVR, iti “Bombo Variety Show” a programa ni Alex Dumlao.

Adu met laeng ti nagaw-awis ken ni Vhen tapno agpabuya. Agingga a nagsarakda ken Ahi Lao ket indiayaan daytoy iti kontrata tapno agirekord kadagiti kanta nga Ilokano.

Ragup wenno various artists dagiti immuna nga album a nakairamanan ni Vhen. Idi naruay ti request kadagiti kantana a “Sika Laeng” (a nag-duet-anda ken Linda Laza) ken “Diakton Agbiag,” naikkan iti gundaway ni Vhen para iti solo nga album. Nagsasaruno a nairuar dagiti albumna a Kastoy Gayam Ni Ayat, Lamina Ni Bobby Gutierrez, Musika ni Vhen Bautista Agpaay Kenka, ken ti immuna amin a 40 Non-Stop Ilocano Disco Medley with the LA Star Singers.

Saanen a naigawid ti itatayok ti nagan ni Vhen Bautista ket nakagteng payen iti ballasiw-taaw ti kinalatakna, nangruna iti estado ti Hawaii. Napasarunuan pay dagiti solo album-na.

Pinadas met ni Vhen ti gasatna iti Kamanilaan. Nagkankanta kadagiti nadumaduma a bar bayat nga intultuloyna met ti panagirekordna kadagiti Ilokano a kanta. Nagsarakda ken Boy Christopher a maysa a composer ket naipasngay dagiti dua a nagsaruno nga album ni Vhen a naglaon kadagiti kanta a Tagalog iti babaen ti Alpha Records. Babaen ti naganna a Chino Romero, napaglatak ni Vhen dagiti kanta a “Walang Ibang Mahal” ken “Maling Akala”  a nagbalin a paborito dagiti kumakanta iti videoke.

Apagapaman a naisardeng ti panaglatak ni Vhen iti tay-ak ti musika a Tagalog idi napan iti America iti sidong ti asawana a ni Rosario (Ross) a maysa a nars. Nagsaruno a naipasngay dagiti annakda a da Mikaela ken Keanu Ven. Inkeddeng dagitoy a pagbinnuliganda ti panangpadakkelda kadagiti annakda iti America.

Nupay kasta, iraprapin met latta ni Vhen ti panagkankantana. Nairamraman met latta kadagiti album a various artists ken nagtultuloy met latta ti pannakaawisna nga agpabuya— a kakaduana payen dagiti annakda ken Ross. Nagtultuloy latta ngarud a nangnangngeg ti nalamuyot a timekna kadagiti pagtaengan iti Kailokuan ken kadagiti komunidad dagiti Ilokano iti America.

Ket iti daytoy maika-25 a tawenna iti industria, rambakanna daytoy babaen dagiti baro nga album a Duapulo ket Lima a Tawen, Vol 1. Dakayo ken ti Aweng Pudno a Kaduak ken Vol 2, Bituen ti Amin a Panawen. Puro orihinal a kanta ti linaon dagitoy nga album.

Nakaay-ayat ta nabukel dagitoy nga album babaen ti panagtitinnulong dagiti gagayyem ni Vhen iti nadumaduma a paset ti lubong— pagyamanan ti tulong ti baro a teknolohia.

Mangngegan met ni Vhen kadagiti mini-concert-na kadagiti sumaganad: 97.9 Radyo Kalugaran Claveria, “Kantaanka Kalugaran,” tunggal Sabado iti 8-9 iti rabii; 93.7 FM Radyo Kailian Sta Maria, “Vhen Bautista & Kids Pinakbet Mini Concert,” tunggal Domingo, 7-8 iti bigat; DWRS Comando Radyo Vigan, “Rimat Dagiti Bituen” ni Freddie Boy Tan iti 9:30-10 iti bigat; KRM 97.9 FM, Internet The Pinoy Sounds a kukua ni Rey “Boboy P” Patao tunggal Mierkoles iti 6-7 iti rabii, oras ti Hawaii.

Rambakan pay ni Vhen ti maika-25 a tawenna iti industria babaen ti konsierto a napauluan iti “Ilocano Greatest Hits, Vhen Bautista & Friends” inton Enero 30 iti Filcom Center iti Waipahu. Makaduana iti daytoy a konsierto da Marie Prieto, Rosana Sarmiento, Jesabel Alonzo, Randy Valencia ken dagiti kumakanta iti Hawaii, ken dagiti dua nga annakda ken Ross, da Mikaela ken Keanu.

Iprodius ti JT Sounds a kukua ni Joel Toletino, tubo iti Badoc, Ilocos Norte ngem agnaeden iti Hawaii ti nasao a konsierto.

Ag-guest met da Vhen, Mikaela ken Keanu iti konsierto ni Reynaldo Ramos a napauluan iti “Affair of the Heart” iti Baldwin Auditorium iti Maui, Hawaii, inton Feb 6, 2015.

Kablaawandaka, Vhen! (Angelo “Eloy” Padua)


(Naipablaak iti Bannawag, Enero 19, 2015 a bilang.)

January 15, 2015

Lektiur iti Sirok ti Palapala



LEKTIUR ITI SIROK TI PALAPALA. Ibimbinsabinsa ni Mr. Larry Tabalno (tengnga), ti farming coordinator ti Bukig National Agricultural and Technical School, Aparri, Cagayan, kadagiti bimmisita a Grade 9 nga estudiante ti Aparri West National High School, no apay a nabitinan ti palapala dagiti tabungaw kadagiti tambubong a naaramid iti pagiwarnak. Maysa daytoy a wagas a pangkontrol iti panagdadael dagiti insekto kadagiti busel ta agserbi a kas “attractant” dagitoy a tambubong imbes a dagiti busel wenno bunga ti pagdissuan dagiti agdadael nga insekto. Imbisikna pay a daytoy a wagas ti sientipiko a palawag no apay a mabitbitinan kadagiti nagawangan a lata ken botelia ti palapala dagiti agkalatkat a mula a saan ketdi a tapno nabunga dagitoy. (Johmar R. Alvarez)


(Naipablaak iti Bannawag, Enero 19, 2015 a bilang.)

January 14, 2015

Ad-adu a suplay ti lana iti 2015, manamnama

Nagsuek ti presio ti lana iti US ket nagbalin laengen a nasursurok a 50 a doliar ti tunggal bariles itay lawasna— umuna iti uneg ti nasurok a lima a tawen— idinto nga ipakita dagiti pammaneknek ti kaadda ti ad-adu a suplay ti lana a mapataud ngem ti kasapulan dagiti industria iti entero a lubong.

Iti report ti Associated Press, agsusuek ti presio ti lana kadagiti napalabasen a sumagmamano a bulan gapu iti umad-adu a suplay ti lana nangruna iti US.

Idi Hunio 20, 2014, mapan a US$114.55 ti sangabariles a crude oil (Brent crude oil). Idi Dis. 15, 2014, nagbalinen a US$62.53, sa idi Enero 5 itoy a tawen, nagbalinen a US$50.40.

Innayon ti AP nga iti laksid a mabalin nga ikabassit dagiti kameng ti OPEC (Oil Producing and Exporting Countries) ti ilakoda a lana, saanda pay met nga inkeddeng a baliwan ti napagtutulagandan a kaadu ti produksionda.

Kaudian a panagsuek ti presio ti lana iti US idi Abril 29, 2009—a pannakailako ti sangabariles a lana iti US$50.


(Naipablaak iti Bannawag, Enero 19, 2015 a bilang.)

January 9, 2015

ENERO 19, 2015



SARITA
6 Ti Balay nga Arapaap ni Letty
   Leah D. Manzano
12 Sangkatedted a Ling-et
   Gregorio T. Amano

NOBELA
26 Dagiti Kulalanti ti Arapaap (17)
     Juan S.P. Hidalgo, Jr.
30 Upa ken Kawitan (9)
     Estela A. Bisquera-Guerrero

DANIW
27 Sao ti Makina
     Jake F. Ilac
48 Dandaniw a Para Ubbing
    Roselyn C. Campano/ Delfin P. Dumayas

SALAYSAY
10 Pope Francis: “Timek Dagiti Nakurapay”
     Fr. Melchor B. Palomares
24 Naipaay ken ni Roland ti Hall of Honor Award
     Ric Agnes
40 Kasano a Paksiatem Dagiti Sakit ti Paria?
     Reynaldo E. Andres

KOMIKS
17 Gayang ni Lam-ang (68)
20 Aritosan (118)
22 Miks & Tiks

KOLUM
15 Saludsodem ken ni Apo Hues
16 Dear Doc
32 Okeyka, Apong
34 TIPS
37 Kastoy, Kapid, Ditoy Hawaii
38 Kosina Ilokana
42 Padasem Daytoy, Kailian
46 Haytek!

PAGLINGLINGAYAN
44 Showbiz
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
 2 Ti Makunami
 4 Tao, Lugar, Pasamak
14 Idi Un-unana a Panawen
28 Siled ti Kararag
29 Apay nga Agkarkaramut ti Pusa?
31 Txtm8
33 Ket Nagpaipadlesak Met
35 Ti Gasatmo Ita a Lawas
36 Ammuem Pay Dagitoy
39 Kasano ti Nasamay a Panangikkat iti Mureng iti Kuelio?

January 4, 2015

Lengguahe nga Ilokano, mairaman iti pannakisango dagiti pamilia iti Santo Papa

Tapno maipanamnama ti awan sawsawirna a partisipasion dagiti napili a pamilia a makisangonto ken ni Pope Francis bayat ti “Meeting With Families” iti Mall of Asia Arena inton Enero 16, kuna dagiti nangbuangay iti aktibidad nga agbalin a multi-lingual ti aktibidad.

Kinuna ni Dennis Soriano, pangulo ti komite iti liturhia, maibasanto dagiti kararag iti pito a lengguahe, kas sumaganad: Tagalog, Cebuano, Ilokano, Kapampangan, Hiligaynon, Waray ken Bikolano.

Iti sabali a bangir, maysanto met laeng a multi-lingual mass ti maudi a misa nga annongen ti Santo Papa iti Quirino Grandstand iti Luneta, Manila inton Enero 18, kas kinuna ni Fr. Manoling Francisco, nangputar kadagiti amin nga orihinal a himno a maaramat iti misa.

Inlawlawagna a saan a Misa ti mapasamak iti MoA no di ket maysa a Celebration of the Word. Iti daytoy nga okasion a makasango ti Santo Papa dagiti pamilia manipud iti nadumaduma a paset ti pagilian— dagiti pamilia nga agsasabali ti kasasaadda iti biag ken agsasabali ti pakaseknanda.


(Naipablaak iti Bannawag, Enero 12, 2015 a bilang.)

“Streaming,” patayenna ti telebision, kuna ti panagadal

Iti 2015, posible nga ad-addan a mapadaras ti pannakatay ti telebision gapu iti umad-adu nga agduyos iti “streaming” wenno panagbuya iti TV/video babaen ti Internet.

Iti panagadal nga insayangkat ti Ericsson Consumer Lab, naammuan a mapanen a 22 a porsiento kadagiti agus-usar iti Internet iti Filipinas ti agkuna a kaykayatdan ti agbuya iti TV/video on-demand wenno babaen ti online idinto a 21 a porsiento met ti agkuna nga agbuybuyada pay laeng iti TV/video babaen ti TV channels.


(Naipablaak iti Bannawag, Enero 12, 2015 a bilang.)

January 1, 2015

Super Dudol



SUPER DUDOL. Naruay nga umili ken bisita ti nangarak iti kaatiddogan a panagluto iti dudol iti Vintar, Ilocos idi Disiembre 29 kas paset ti panagpiesta ti ili. Panggep ti nasao a panagluto iti dudol a yam-ammo kadagiti agtutubo ti panagluto iti naimas, nasustansia ken nakaisigudan a merienda ni Ilokano nga in-inuten a mapukpukaw gapu iti panagbalbaliw ti tiempo. Manipud iti sango ti munisipio, naintar dagiti nagduduma a 55 a grupo a nakisalip iti kaimasan ti luto, kapintasan iti presentasion ken kaalistuan a maibus gapu ta amin a tumabuno ket libre a makaraman. Idi un-unana a tiempo, kadawyan nga isagsagana dagiti Ilokano ti dudol kadagiti parambak a kas iti piesta, kasar wenno buniag. Iladawan daytoy a panagluto ti dudol ti kinaanus ni Ilokano a mangisagana kadagiti kangrunaan a kasapulan iti panagluto a kas iti sinublan, pagtungo, diket, bennal, ladek manipud iti getta ti niog ken ti agarup lima oras a panagkiwar sakbay a maluto ti dudol. (Leilanie G. Adriano)

(Naipablaak iti Bannawag, Enero 12, 2015 a bilang.)

ENERO 12, 2015



SARITA
6 Ni Anti Nelia
 Jobert M. Pacnis
12 No Magugoran ti Maysa a Bannuar
 Jose A. Bragado

NOBELA
26 Dagiti Kulalanti ti Arapaap (16)
 Juan S.P. Hidalgo, Jr.
30 Upa ken Kawitan (8)
 Estela A. Bisquera-Guerrero

DANIW
27 Agluposak Koma Met
 Ronnie E. Aguinaldo
48 Dandaniw a Para Ubbing
 Ryan A. Dulig/Jennielou G. Pigao

SALAYSAY
10 Ti Kapatgan iti Amin iti Baro a Tawen
 Fernando B. Sanchez
14 Ipategtayo Koma Dagiti Historikal a Lugar
 Jim P. Domingo
40 Nasamay ti Laya a Bitamina ti Manok
 Reynaldo E. Andres

KOMIKS
17 Gayang ni Lam-ang (67)
20 Aritosan (117)
22 Miks & Tiks

KOLUM
15 Saludsodem ken ni Apo Hues
16 Dear Doc
32 Okeyka, Apong
34 TIPS
37 Kastoy, Kapid, Ditoy Hawaii
38 Kosina Ilokana
42 Padasem Daytoy, Kailian
46 Haytek!

PAGLINGLINGAYAN
44 Showbiz
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
 2 Ti Makunami
 4 Tao, Lugar, Pasamak
9 Idi Un-unana a Panawen
24 Nagmulada Idiay Magat High Dam: Kas Pannakipagrambakda iti Maika-80 nga Anibersario ti Bannawag
28 Siled ti Kararag
29 Nakaro ti Panagtaultaul ti Asom?
31 Txtm8
33 Aniat’ Serbi ti Ad-adalenda?
35 Ti Gasatmo Ita a Lawas
36 Ammuem Pay Dagitoy
39 Adu ti Pakaaramatan ti Sabon a Paginnaw!