Iti nasurok a lima a milion a turista manipud iti nadumaduma a suli ti lubong a bimmisita iti Filipinas manipud iti Enero agingga iti Oktubre 2016, kaaduan kadagitoy ti naggapu iti South Korea.
Iti rekord ti Department of Tourism (DOT), iti 5,474,310 a turista a simmangpet iti nasao a tiempo, 1,332,141 wenno 24.33 porsiento kadagitoy ti naggapu iti South Korea. Sumarsaruno dagiti Intsik iti bilangda a 810,807.
Ipakita pay ti rekord nga immadu iti 11.54 porsiento ti simmarungkar a turista iti pagilian no idilig iti isu met laeng a tiempo itay napan a tawen.
Kinuna ni Tourism Secretary Wanda Corazon Teo nga agtultuloy ti agresibo a panagitandudo ti departamento iti turismo.
Itay nabiit, inyalnag ti DOT ti “It’s More Fun in the Philippine Farms” ken ti panangbiagda ti “Bring Home a Friend” a programa a kas paset ti estratehia a manggun-od iti target a 12-milion a sumangpet a turista iti kada tawen inton 2022.
(Naipablaak iti Enero 8, 2018 a bilang.)
No comments:
Post a Comment