April 28, 2015

Panagkurkurang iti mangmangged, parikut dagiti industria

Agparparikut ita dagiti industria iti pagilian iti panagkurkurang dagiti mangmangged a kas kadagiti accountants, bookkeepers, dagiti agtrabaho kadagiti hotel ken uray pay iti konstruksion.

Maitudtudo a maigapu daytoy a panagkurkurang iti panangbangon ti adu kadagitoy iti bukodda a negosio imbes a simrekda nga empleado ken iti isyu iti skills mismatch wenno saan met a mainugot ti naturpos nga adal iti sapsapulen ti industria.

Impeksa daytoy ni Ambassador Alfredo Yao, president ti Philippine Chamber of Commerce and Industry (PCCI), kadagiti dimmar-ay iti pannakapirma ti memorandum of agreement (MOA) iti nagbaetan ti PCCI ken ti Departamento ti Edukasion (DepEd).

Tapno masungbatan ti parikut iti skills mismatch, manamnama a babaen ti PCCI-DepEd MOA, maala ti DepEd ti tulong dagiti 120 a lokal a sanga ti PCCI nga ayan dagiti eksperto tapno dagitoy nga eksperto a mismo ti mangisuro kadagiti bukodda a paglaingan kadagiti estudiante iti senior high school.

Kinuna ni Yao a babaen met itoy, manamnama a dagiti agturpos iti K to 12, nakasaganadan a sumrek nga agtrabaho, mangbangon iti bukodda a pagsapulan, ken sumrek iti nangatngato nga adal.

Iti sabali a bangir, kinuna ni Education Secretary Armin Luistro a mangnamnama a maipakat a mamimpinsan ti K to 12 education inton 2016 kalpasan ti lima a tawen a pannakaplano daytoy iti laksid dagiti nayuli a lima petision iti Korte Suprema para iti saan a pannakaituloy ti pannakaipakat daytoy.

(Naipablaak iti Bannawag, Mayo 4, 2015 a bilang.)

April 26, 2015

No Agsapsapulka iti Naidumduma nga Adventure



NO AGSAPSAPULKA ITI NAIDUMDUMA NGA ADVENTURE, padasem ti aglugan iti 4x4 (ngato) ket umkiska iti nakapegpegges a tarayna iti sumalog-sumang-at a kadaratan iti sand dunes iti Ilocos Norte nga ar-araken ita ti rinibu a turista agraman ganggannaet. Ket no kayatmo met iti agsubli iti kinaubingmo, padasem ti ag-sand boarding (baba) sa agpakuyaska iti dumerraas a paset ti kadaratan.  Idi un-unana a panawen, kasla lunod daytoy a disso para kadagiti mannalon ta awan pulos mabiag nga imula. Ngem ita, babaen ti kinamanagpartuat ni Ilokano, napagbalin daytoy a disso a maysa kadagiti kalalawaan a pagay-ayaman iti nadumaduma a klase ti sand sports, kas iti 4x4 ride, sand boarding, zorbing ken sand-castle making. Ket babaen ti panangitandudo ti gobierno probinsial ken dagiti masakupanna a gobierno lokal iti Siudad ti Laoag ken iti Paoay, nagbalin payen daytoy a nalatak a shooting venue iti panagaramid iti pelikula, music and arts installations ken dadduma pay. Ket iti daytoy a Mayo 1, maawis amin a dumar-ay iti maisayangkat manen a Himala sa Buhangin Festival ket makipagrambak iti panagpiesta ti probinsia ti Ilocos Norte babaen dagiti naisagana nga aktibidad. (Leilanie G. Adriano)

(Naipablaak iti Bannawag, Mayo 4, 2015 a bilang.)


April 25, 2015

Agsapata dagiti baro nga opisial ti GUMIL Filipinas itoy a Mayo 10

Agsapata dagiti nabotosan nga opisial ti GUMIL Filipinas (GF), nga idauluan ti nailayon a presidente, Arthur P. Urata, Sr., inton Mayo 10, 2015 iti pagtaengan dagiti Cachola iti San Antonio, Narvacan, Ilocos Sur.

Manamnama a ni Administrador Edgardo D. Zaragoza ti National Tobacco Administration (NTA) ti mamagsapata kadagiti opisial.

Idauluan ni Urata nga agsapata para iti baro a dua-a-tawen a termino 2015-2017 da Mario T. Tejada, bise-presidente; Ariel S. Tabag, sekretario-heneral; Eden Cachola-Bulong, tesorera; Estela Bisquera-Guerrero, auditor; Eliseo B. Contillo, manarawidwid; ken Neyo E. Valdez, para irakurak; ken dagiti kameng ti Board of Directors: Freddie Pa. Masuli, Vilmer V. Viloria, Roy V. Aragon, Anna Liza M. Gaspar, Remy N. Albano, Aileen R. Rambaud, Villamor C. Visaya Jr., ken Danilo A. Bautista.

Nabotosan dagiti baro nga opisial iti naangay nga eleksion iti Maika-47 a Nailian a Kombension ti GF iti Balay Expo Centro, Araneta Center, Cubao iti Siudad ti Quezon idi Abril 19. (NME Valdez)

(Naipablaak iti Bannawag, Mayo 4, 2015 a bilang.)

MAYO 4, 2015



SARITA
6 Ladawan
   Marichel E. Suguitan

NOBELA
12 Operation: Drop Venus (11)
     Norberto D. Bumanglag, Jr.
16 Siak ni Precious (8)
     Juan Al. Asuncion

DANIW
9 Saanen a Kas Idi Daytoy a Kalgaw
    Roselyn C. Campano
47 Dandaniw a Para Ubbing
      Jhon Christian B. Agtina/ Bryan Jaymark Ramones

SALAYSAY
10 Natalged Kadi Met Laeng ti Kankanem?
     Virginia A. Duldulao, Ph.D.
20 Napadasak Met ti Immuli iti Pakigubat a Bapor
      Boni A. Mendoza
40 Makapagmulaka Met iti Sayote iti Patad
     Reynaldo E. Andres

KOMIKS
27 Gayang ni Lam-ang (82)
30 Aritosan (132)
32 Miks & Tiks

KOLUM
14 Saludsodem ken ni Apo Hues
15 Dear Doc
22 Tips
23 Okeyka Apong
35 Kastoy, Kapid, Ditoy Hawaii
36 Kosina Ilokana
42 Padasem Daytoy, Kailian

PAGLINGLINGAYAN
44 Showbiz
48 Sinniriban
48 Sapukas
48 Sudoku
48 Agkatawa ti Mayat

DADDUMA PAY
 2 Ti Makunami
 4 Tao, Lugar, Pasamak
17 Txtm8
18 Siled ti Kararag
19 Adda Kadi Parikut ti Asom?
24 “Himala sa Buhangin,” Maipaay a Kas Pammadayaw ken ni Da King
26 Ti Gasatmo Ita a Lawas
34 Ammuem Pay Dagitoy
37 Tarumatim iti Kawes
38 Kabaelam Met ti Agbalin nga Epektibo a Mangisursuro
39 Nakaramankan iti Batac Empanada?
46 Idi Un-unana a Panawen

April 23, 2015

Daludal ti Laoag



DALUDAL TI LAOAG. Daldalusan daytoy a nagaget a tindera iti public market ti Laoag City ti lakona a nagdadakkel a daludal ti aba (sagibsib iti dadduma). Paksiw wenno pakbet ti maysa a naimas a luto ti daludal, maalseman iti suka-Iloko wenno iti pias, salamagi wenno naganus a mangga, mabugguongan ken marekaduan iti bawang, sibuyas ken laya sa mailuto a namaga. Sagpawan iti nadaing a kuros wenno natuno a lames. Naimas pay a magettaan. Naimas pay a madengdeng a kadua ti dadduma pay a natnateng. (ROY V. ARAGON)

(Naipablaak iti Bannawag, Abril 27, 2015 a bilang.)

Parteng



PARTENG! No kastoy a kalgaw a kalinak ti baybay, adu nga umili (kas kadagitoy dua nga amma ti Brgy. Ammubuan, Ballesteros, Cagayan) ti agpakat iti parteng (sigay) iti pagbangonan dagiti dalluyon a dida kasapulan ti barangay. Ilangoy dagitoy ti tulos (kayo) nga ipasok a pakaigalutan ti agsumbangir nga ungto ti sigay. Talibukno, bulong-unas, kugaw, balaki, ken biala dagiti maala. (JOBERT M. PACNIS)

(Naipablaak iti Bannawag, Abril 27, 2015 a bilang.)

Rumbeng nga agbuteng ti sangalubongan

Rumbeng nga agbuteng ti sangalubongan iti panagpangpanggep ti China a mangsakup iti adu a paset ti West Philippine Sea (South China Sea), ket posible pay a mapasamak ti panagsisinnangdo dagiti puersa militar gapu itoy.

Daytoy ti imballaag ni Presidente Aquino, iti interbiu kenkuana ti maysa a news agency (ti AFP) itay lawasna, a nagkunaan pay ti Presidente nga agngangabit ti saanton a pannakaipalubos dagiti dadduma a nasion a dumaliasat iti adu a paset ti nasao a taaw agraman ti pannakaipawilda nga agkalap ditoy.

Innayon ni Aquino a nupay dina patien a panggep ti China a karupak dagiti pagilian, a pakairamanan ti Filipinas, a karirririna maipanggep iti parikut iti teritorio iti South China Sea, posible a bumtak ti “military confict” iti daytoy a deppaar.

“Ti ikakaro ti parikut nga agtungpal iti saan a pannakakontrol daytoy ti rumbeng koma a pakarikutan dagiti amin a lider iti lubong,” kinuna ni Aquino.

(Naipablaak iti Bannawag, Abril 27, 2015 a bilang.)

April 22, 2015

Nangabak dagitoy a mannurat iti 17th AMMAFLA

Dagiti nangabak: Rhea D. Berroy (maikalima iti kanawan), Marichel E. Suguitan (imbagian ni Sherma E. Benosa, maikapat iti kanawan), ken Rolando D. Tubera (kakanawanan). Nairaman iti ladawan dagiti hurado: Juan Al. Asuncion (maikatlo iti kanawan), Aileen R. Rambaud (maikadua iti kanawan), ken Ariel S. Tabag (kakanigidan). Kasta met nga adda iti ladawan ti ni Fred Quibol (maikadua iti kanigid) a maysa kadagiti isponsor. (Rinetrato ni Virgilio D. Domaloy)


Adtoy dagiti nangabak iti Salip iti Sarita ti 17th AMMA Foundation Literary Awards a naggibus idi Marso 15, 2015:

Umuna a Gunggona, Rhea Berroy, babaen ti saritana a "Resureksion." Tubo iti Manabo, Abra; nagturpos iti Medical Technology iti Unibersidad ti Santo Tomas.

Maika-2 a Gunggona, Marichel E. Suguitan, babaen ti saritana a "Longboy," tubo iti Aggub, Solano, Nueva Vizcaya; agtrabaho iti Macau; nangabak-abak metten iti salip iti panagsurat a pakaibilangan ti AMMAFLA; ken

Maika-3 a Gunggona, Rolando D. Tubera, Maika-3 a Gunggona, "Nakurang ti Maris ti Bullalayaw," tubo iti Lading, Balioeg, Banna, Ilocos Norte; mangisursuro iti Banna National High School.

Dagiti naghurado: Juan Al. Asuncion (pangulo); Aileen R. Rambaud ken Ariel S. Tabag (agpada a kameng).

Tinawen nga esponsoran da Amado ken Gloria Yoro, Francisco ken Aurora Ponce, ken Alfredo ken Cherry Quibol (agpapada nga agindegen iti Hawaii) ti nasao a salip iti panagsurat iti sarita a kas “pangrubrob iti regget dagiti agdadamo a mannurat a mangasa pay iti plumada.”

Napadayawan dagiti nangabak itay Abril 18, 2015 bayat ti Dap-ayan 2015 ti GUMIL Filipinas a naangay iti Sala B, Balay Expo Centro, Araneta Center, Cubao, Q.C.


(Naipablaak iti Bannawag, Abril 27, 2015 a bilang.)

April 20, 2015

ABRIL 27, 2015



SARITA
6 Ni Tatang
   Ridel T. Cabulisan

NOBELA
12 Operation: Drop Venus (10)
     Norberto D. Bumanglag, Jr.
16 Siak ni Precious (7)
     Juan Al. Asuncion

DANIW
9 Vintariniana
   Don Pacis
47 Dandaniw a Para Ubbing
    Mariel N. Magat/ Mark Paul Vincent Esta

SALAYSAY
10 Nalalaingto Koma ti Estudiante Ngem ti Titserna
      Gregorio T. Amano
38 Kasanon No Awan Mayat nga Agtalon?
     Virginia A. Duldulao, Ph.D.
40 Panagabono iti Nasam-it a Bukakaw
     Reynaldo E. Andres

KOMIKS
27 Gayang ni Lam-ang (81)
30 Aritosan (131)
32 Miks & Tiks

KOLUM
14 Saludsodem ken ni Apo Hues
15 Dear Doc
20 Okeyka Apong
22 TIPS
23 Haytek!
35 Kastoy, Kapid, Ditoy Hawaii
36 Kosina Ilokana
42 Padasem Daytoy, Kailian

PAGLINGLINGAYAN
44 Showbiz
48 Sinniriban
48 Sapukas
48 Sudoku
48 Agkatawa ti Mayat

DADDUMA PAY
 2 Ti Makunami
 4 Tao, Lugar, Pasamak
17 Txtm8
18 Siled ti Kararag
19 Wen, Makaay-ayo Met ti Agtaraken iti Bullilising
21 Adda Met Peggad iti Panagiposposte
24 Naimulan iti Mountain Province ti Bannawag @ 80 Tree
26 Ti Gasatmo Ita a Lawas
34 Ammuem Pay Dagitoy
37 Panagugas iti Lunglongan Babaen ti Ima
46 Idi Un-unana a Panawen


April 15, 2015

Malabi ken Ungot



MALABI KEN UNGOT. Nasamsam-it ti danum manipud iti malabi nangruna no agusarka pay iti ungot wenno buyuboy (nakuskosan a kagudua ti sabut ti niog ken napalinis babaen ti napagango a bulong ti uplas). Ken nalamiis pay, saanen a nasken a mai-ref, segun ken ni Leynie Salviejo iti Pinili, Ilocos Norte (nailadawan) a saan a nangibelleng kadagiti malabina. Maar-aramat pay ti ling-et ti malabi nga agas ti agsakit a pus-ong; yapros laeng ti ling-et ti malabi iti pus-ong. (Aileen R. Rambaud)

(Naipablaak iti Bannawag, Abril 20, 2015 a bilang.)

April 10, 2015

Nailian a Bulan ti Literatura ken Bulan ti Literatura nga Ilokano, rambakan dagiti mannurat nga Ilokano

Rambakan dagiti mannurat nga Ilokano ti bulan ti Abril a kas Nailian a Bulan ti Literatura (National Literature Month wenno Buwan ng Panitikang Filipino), ken kas Bulan ti Literatura Dagiti Ilokano babaen ti Dap-ayan 2015, ti Maika-47 a Nailian a Kombension ti GUMIL Filipinas, ti kadakkelan a gunglo dagiti mannurat nga Ilokano iti Filipinas ken ballasiw-taaw.

Maiwayat ti nasao a kombension iti daytoy nga Abril 17-19, 2015 iti Sala B, Balay Expo Centro, Araneta Center, Cubao, Quezon City iti panangsangaili ti GUMIL Metro Manila, ken iti pannakitinnulong ti National Commission for Culture and the Arts, Manila Bulletin Publishing Corp., ken Gerry Roxas Foundation.

Mainaig daytoy a parambak iti pinirmaan ni Presidente Benigno S. Aquino III idi Pebrero 10, 2015 a Proklamasion Bilang 968 a nangideklara iti bulan ti Abril a kas Nailian a Bulan ti Literatura, ken iti pinirmaan ni Presidente Gloria Macapagal Arroyo idi Abril 16, 2001 a Proklamasion Bilang 26 a nangideklara iti bulan ti Abril a kas Bulan ti Literatura nga Ilokano.

Ni National Artist Virgilio S. Almario, agpapaay pay a pangulo ti Komisyon sa Wikang Filipino, ti kangrunaan nga agsarita.

Babaen ti tema a “Ti Akem ni Gumiliano iti Kagimongan Dagiti Ilokano,” agsarita met ni Pedro Bucaneg awardee ken Gawad Pambansang Alagad ni Balagtas Juan S.P. Hidalgo, Jr.

Manamnama a dar-ayan ti sumurok-kumurang a 180 a mannurat, mannursuro ken estudiante nga Ilokano, tamingen dagiti napusgan nga agsarita a pannakabagi dagiti nadumaduma a chapter ti GUMIL dagiti akem ken gapuanan ti GUMIL ken dagiti mannurat nga Ilokano kadagiti probinsia iti Ilokandia ken kadagiti lugar iti ballasiw-taaw a nagdappatan ni Ilokano.

Tampok pay iti kombension ti pannakayawat ti gunggona dagiti mannurat a nangabak kadagiti pasalip iti panagsuratan, pannakapadayaw dagiti mannurat a nakaibinglay iti naisangsangayan a kontribusion iti Literatura dagiti Ilokano, ken pannakaiwayat ti eleksion ti gunglo. (Roy V. Aragon)

(Naipablaak iti Bannawag, Abril 20, 2015 a bilang.)

April 8, 2015

ABRIL 20, 2015



SARITA
6 Tallo a Lallaki ken Maysa nga Aso
   Ariel S. Tabag

NOBELA
12 Operation: Drop Venus (9)
     Norberto D. Bumanglag, Jr.
16 Siak ni Precious (6)
     Juan Al. Asuncion

DANIW
9 Ganna
   Roy V. Aragon
47 Dandaniw a Para Ubbing
     Hannah Kaye Tolentino/ Kenneth John S. Tomas

SALAYSAY
10 Adda Kadi Magna a Matmaturog?
     Virginia A. Duldulao, Ph.D.
20 Adda Met Abel-Manabo!
     Rhea D. Berroy
38 Uray Agtudtudo, Makaaramiddan iti Asin
     Dexter M. Fabito
40 Kastoy Man ti Panagburo iti Pagpakan
     Reynaldo E. Andres

KOMIKS
27 Gayang ni Lam-ang (80)
30 Aritosan (130)
32 Miks & Tiks

KOLUM
14 Saludsodem ken ni Apo Hues
15 Okeyka, Apong
22 TIPS
35 Kastoy, Kapid, Ditoy Hawaii
36 Kosina Ilokana
42 Padasem Daytoy, Kailian

PAGLINGLINGAYAN
44 Showbiz
48 Sinniriban
48 Sapukas
48 Sudoku
48 Agkatawa ti Mayat

DADDUMA PAY
 2 Ti Makunami
 4 Tao, Lugar, Pasamak
17 Txtm8
18 Siled ti Kararag
19 Parikutmo Dagiti Kurarapnit Wenno Panniki iti Balayyo?
23 Ania ti Aramiden Kadagiti Paan-anawa nga Ubbing?
24 Asino Dagiti Bannuar ti Ilokandia?
26 Wen, Adda Koma Met GMRC iti Panggedan
34 Ammuem Pay Dagitoy
37 Agannad Kadagiti Kemikal a Pagdalus!
45 Ti Gasatmo Ita a Lawas
46 Idi Un-unana a Panawen

Produkto ti Pasuquin



PRODUKTO TI PASUQUIN. Maysa nga agsapa ti Sabado iti Laoag City, maidisdiskarga manipud iti dyipni dagiti nadumaduma a produkto a naibiahe manipud iti Pasuquin, Ilocos Norte a kas iti bawang, lasona, kamatis, karabasa ken dadduma pay, nga inangkat dagiti komersiante ti nateng iti merkado publiko ti Laoag. Ti Pasuquin ti maysa kadagiti kangrunaan nga ili a pakaap-apitan ti am-ammo a bawang-Ilokos, agramanen ti lasona, a nangruna a produkto ti Pasuquin, malaksid laeng ti asin. (Roy V. Aragon)

(Naipablaka iti Bannawag, Abril 13, 2015 a bilang.)

April 5, 2015

Nesperos, Umuna iti 1st Saniata Prize

Inyalat ni Daniel L. Nesperos ti Umuna a Gunggona iti Salip iti Daniw ti 1st Saniata Prize babaen ti daniwna a “Kasla iti Narpek a Rangaw Dagiti Maisko.” Premiado a mannaniw ken piksionista, agnaed ni DLN ken ti pamiliana iti Brgy. 19, San Lorenzo, San Nicolas, Ilocos Norte a puonna. Umawat iti P2,000a premio a kuarta, sertipiko ti pammadayaw, ken tallo a libro nga Ilokano.

Maika-2 a Gunggona ken ni Prodie Gar. Padios, tubo iti Simpatuyo, Santa Teresita, Cagayan ngem agnaeden iti Canada (“Atang-iti-Sarukang: Musa-ti-Kadkadua”).  Umawat ni PGP iti P1,200 a premio a kuarta, sertipiko ti pammadayaw, ken dua a libro nga Ilokano.

Maika-3 a ni Jobert M. Pacnis ti Ammubuan, Ballesteros, Cagayan (“Makikinkinnamatak”). Umawat ni JMP iti sangaribu a pisos (Php1,000) a premio a kuarta, sertipiko ti pammadayaw, ken maysa a libro nga Ilokano.

Mayawat dagiti premio inton Abril 18, 2015 bayat ti Dap-ayan 2015, ti Maika-47 a Nailian a Kombension ti GUMIL Filipinas iti Sala B, Balay Expo Centro, Araneta Center, Cubao, Quezon City.

Nagpaay a hurado da Cles B. Rambaud (pangulo), Roy V. Aragon (kameng), ken Ariel S. Tabag (kameng) iti daytoy nga umuna nga edision ti Saniata Prize.

Esponsoran ti Saniata Publications, panggep ti Saniata Prize ti agbalin a maysa kadagiti paratignay dagiti mannaniw nga Ilokano nga agparnuay kadagiti baro a langa ti daniw nga Ilokano kabayatan met ti panagbigbigda kadagiti kannawidan a porma ti daniw nga Ilokano. (AST)

(Naipablaak iti Bannawag, Abril 13, 2015 a bilang.)

Panagtabukol



PANAGTABUKOL. Tapno di pay nga isu a gatangen a mangkissay iti naisangrat a para kadagiti kasapulan iti pagtaengan, sipapasnek daytoy nga ama ti Brgy. Ammubuan, Ballesteros, Cagayan a mangisarsaruag iti tabukolna iti baybay iti dayta nga agsapa. Usuos, barraungan, babayo, ken purong dagiti kadawyan a maala iti panagtabukol. Mapmapno ti aplaya kadagiti agtabukol no kastoy a kalgaw a kalinakna. Adu pay dagiti agbantak a kas pagliwliwaanda aglalo kadagiti nagretiron iti trabahoda. (Jobert M. Pacnis)

(Naipablaak iti Bannawag, Abril 13, 2015 a bilang.)

18 a sarita, naisalip iti Salip iti Sarita ti 17th AMMAFLA

Sangapulo ket walo a sarita ti naisalip iti salip iti sarita a para kadagiti agdadamo a mannurat ti maika-17 nga AMMA Foundation Literary Awards a naggibus itay Marso 15, 2015, kas impakaammo ti AMMAFLA Secretariat.

Dagiti naisalip a sarita agraman parbo a nagan dagiti autor:

“Sarming” ni Amy Nan, “Addanto Panaglinak Dagiti Dawel” ni Pedro Calungsod, “Diskarte” ni Armenio C. Amores, “Agsubliakto, Marilag” ni Edilberto Ma. Brigante, “Rohanna” ni X;

“Singkuenta” ni Salapi, “Ti Idolok ken Siak” ni Maria Rosas T. Norte, “Lumboy” ni Pashupati Long Boy, “Nakurang ti Maris ti Bullalayaw” ni Amboy, “Ben” ni Amguid;

“Ti Orelis” ni Free T. Boy, “Resureksion” ni Sylvia Plath, “Sabidong Manipud iti Narasaw a Dila” ni Teegy P. Mangarap, “Dagiti Sirmata ni Bong” ni Mannakidaya T. Ilokos;

“Agpakadaakon” ni Dong Belong; “Bay-amon ti Napalabas” ni Crying Lady; “Bituen ti Caaludigan” ni Juan S.P. Tabag, Jr.; ken “Uyokan” ni Hanibi.

Mapadayawan dagiti mangabak bayat ti Maika-47 a Kombension Nasional ti GUMIL Filipinas a maangay inton Abril 17-10 iti Quezon City.

Imatonan da Amado ken Gloria Yoro, Francisco ken Aurora Ponce, ken Alfredo ken Cherry Quibol (agpapada nga agindegen iti Hawaii), panggep ti AMMAFLA nga “aronan ti regget dagiti agdadamo a mannurat iti lengguahe nga Ilokano a mangpatadem pay iti plumada.”


(Naipablaak iti Bannawag, Abril 13, 2015 a bilang.)

Pacis, Lingbaoan, mapadayawan iti Dap-ayan 2015

Mapadayawan ti dua a mabigbig a mannurat iti Ilokano, da Donel B. Pacis ti Vintar, Ilocos Norte ken Linda T. Lingbaoan ti PeƱarrubia, Abra, a kas 2015 Pedro Bucaneg Awardee ken 2015 Leona Florentino Awardee, kas panagsaganadda.

Ti Pedro Bucaneg Award (para lallaki) ken ti Leona Florentino Award (para babbai) ti kangatuan a pammadayaw a maipaay ti GUMIL Filipinas kadagiti agsursurat iti Ilokano a nakaipaay iti naisangsangayan a gapuanan— sinurat ken tignay--  iti pannakapadur-as ti Literatura Ilokana.

Mapadayawan ni Pacis “gapu kadagiti sarita ken daniwna a pakaanninawan iti naiduma a panaglagana kadagiti balikas ken nakayuritan iti nauneg a panangimutektekna iti biag; ken iti panangirusatna iti baro a langa ti sarita iti Ilokano, nangruna iti babaen ti premiado a saritana nga “Ikkis iti Barukong” a nagbalinen a muhon iti pakasaritaan ti ababa a sarita iti Ilokano.”

Mapadayawan met ni Lingbaoan “gapu kadagiti sarita ken daniwna a nakaibudian ti nasged a pammatina iti kaadda ti naan-anay a bileg dagiti babbai tapno makipasetda iti panagdur-as ken gapu iti panangarakupna iti lengguahe nga Ilokano tapno maipeksana dagiti dardarepdep ken an-anek-ek ti puli a nagtaudanna iti nalawlawa a gimong.”

Yawatto a mismo ti Presidente ti GUMIL Filipinas, ni Arthur P. Urata, Sr., kada Pacis ken Lingbaoan ti plake ti pammadayaw ken medallion dagitoy bayat ti Dap-ayan 2015, ti Maika-47 a Nailian a Kombension ti GUMIL Filipinas iti Sala B, Balay Expo Centro, Araneta Center, Cubao, Quezon City.


(Naipablaak iti Bannawag, Abril 13, 2015 a bilang.)

ABRIL 13, 2015



SARITA
6 Adios, Kayumanggi
   Donel B. Pacis
24 Ni Nano ken ti Bisikletana
   Elmer L. Lopez

NOBELA
12 Operation: Drop Venus (8)
     Norberto D. Bumanglag, Jr.
16 Siak ni Precious (5)
     Juan Al. Asuncion

DANIW
9 Panangpasangbay iti Kalgaw
    Ronnie E. Aguinaldo
47 Dandaniw a Para Ubbing
     Hannah Mae Lazaga/Josephine Paula C. Acedo

SALAYSAY
20 Apay a Siak?
     Linda T. Lingbaoan
38 Nakaramankan iti Polvorones de Marunggay?
      Gregorio T. Amano
40 Panagganagan iti Haybrid a Kamatis
     Reynaldo E. Andres

KOMIKS
27 Gayang ni Lam-ang (79)
30 Aritosan (129)
32 Miks & Tiks

KOLUM
10 Dear Doc
14 Saludsodem ken ni Apo Hues
15 Okeyka, Apong
22 TIPS
35 Kastoy, Kapid, Ditoy Hawaii
36 Kosina Ilokana
42 Padasem Daytoy, Kailian

PAGLINGLINGAYAN
44 Showbiz
48 Sinniriban
48 Sapukas
48 Sudoku
48 Agkatawa ti Mayat

DADDUMA PAY
 2 Ti Makunami
 4 Tao, Lugar, Pasamak
17 Txtm8
18 Siled ti Kararag
19 Kayatmo ti Agtaraken iti Beklat?
23 Tapno Maraem ti Maysa a Lider
26 Papigsaentayo Koma ti Physical Education
34 Ammuem Pay Dagitoy
37 Maipanggep iti Bleach
45 Ti Gasatmo Ita a Lawas
46 Idi Un-unana a Panawen