December 30, 2014

Panaggabut iti Lasona



PANAGGABUT ITI LASONA. Ni Leilanie G. Adriano, Senior Reporter ti Ilocos Times, iti kalasonaan iti Brgy. Puritac, Pinili, Ilocos Norte. Mairaman ti Pinili kadagiti ili ti Ilocos Norte a paggapuan ti lasona-- ken bawang-- a dua kadagiti kangrunaan a produkto agrikultural ti probinsia. (Aileen R. Rambaud)

(Naipablaak iti Bannawag, Enero 5, 2015 a bilang.)



Manipud Kadagiti Editor: Ditay Liplipatan Dagiti Ubbing

Ni CLES B. RAMBAUD/Editor

ITI naminsan a panagawidko iti lugar a nakayanakak (Brgy. Puritac, Pinili, Ilocos Norte), adda nakasarsaritak nga ubing a kaanakak. (Kaanakak aminen nga ubbing idiay.)

“Is-istoriaandaka kadi da tatam ken nanam sakbay a maturogkayo iti rabii?” sinaludsodko iti daytoy ubing a babai nga adda iti Grade 3.

“Asino a tatak ken nanak, angkel?” sinaludsodna.

“Ay, da daddy ken mommy-m gayam,” kinunak. Hm, sabali gayamen ti awag dagiti ubbing kada tata (father) ken nanadan (mother). No saan a tatay ken nanay, papa ken mama.

“Saan, angkel,” kinunana.

“An’a ngarud ti ar-aramidenda?” sinaludsodko a medio makaunget ta apay a nagsapan a patayenda ti silawda? Idi dakami ngamin ti ubbing, sakbay a maturogkami, is-istoriaannakami ni tatak kadagiti nagkaadu nga istoria – a no nangal-alaanna, diak met sinalsaludsod idi. Kas koma iti daydi ubing a nalaing kano a mangan. Gapu iti kinalaingna a mangan ta maibusna ti sangakaldero nga innapuy idinto a lima laeng ti tawenna, ket umad-adu ti makanna iti panaglabas dagiti aldaw, madanagan da tata ken nanana ta amangan no maawanandanton iti kanen ket agbisin ken mataydanto amin. Isu nga iti laksid ti panangipatpategda iti ubing, nagtulagda nga agassawa a patayenda laengen ‘toy mannangan nga anakda. Ket kas nagtulaganda, intugot ti ama ti anakda idiay kabakiran. Nangpili iti ama iti nakadakdakkel a kayo, kas iti bagi ti nuang ti kadakkelna, sa pinukanna. Ket idi agtuangen, imbilinna iti ubing: “Isanggam dagiti imam iti kayo!” Ta ammona, sigurado a marim-it ti ubing. Ket idin ta nagtuang ‘diay kayo iti batog ti ubing, nagawid metten ti ama a napalalo ti ladingitna.

Ne, nalipatakon ‘tay kaanakak nga ubing. “Ania ngarud ti ar-aramiden da daddy-m ken mommy-m sakbay a maturogkayo?” daydiay ti sinaludsodko itay iti kaanakak.

“Agpe-Facebook-da, a, angkel,” kinuna ‘toy ubing.

“Hm,” indayamudomko. “Didakay is-istoriaan?”

“Ania nga is-istoriaan, angkel?”

“Ket uray ania ditan, a. Kas koma kadagitay istoria da…” Hm, awan met malagipko. “Kas koma, a, kadagitay istoria a para ubbing a mabasbasa iti Bannawag.”

“Ania ti Bannawag, angkel?” sinaludsodna manen ket dandani la ket ngarud narim-itkon ‘toy ubing. Nalagipko la ket ngarud ‘diay ama a napan nangpukan iti dakkel a kayo idiay bantay tapno marim-it ‘diay anakna a mannangan. Ngem sakbay met a malipatak daydiay nga istoria, wen, saan a narim-it ‘diay ubing. Ta anian a kigtot da tata ken nanana idi sumungad iti balayda a mangipukpukaw: “Tata, apay a pinanawannak?” Ta simmangpet ti ubing a baklayna ti kayo a kasla bagi ti nuang. Nga inaramidna a nakadakdakkel a tarampo idi agangay, a no aguddog, maginggined ti daga—a nagbutbutngan dagiti tulisan. (Ngem sabalinton nga istoria dayta.)

Ngem, ne, ammo man wenno saan ‘toy kaanakak ti Bannawag, nalagipko a nasayaat sa nga agpayso no saan a liplipatan ti Bannawag ti panagipablaakna latta kadagiti sarita a para ubbing a pakairamanan dagiti pabula kada mito ken leyenda (pasintawi) a nalaka a maawatan dagiti ubbing wenno mabalin a basaen dagiti nagannak sa istoriaendanto kadagiti babassit pay nga annakda.

Wenno nasaysayaat pay no dagiti mangisursuro a mismo ti mangistoria wenno mangipabasa kadagiti ubbing kadagitoy tangay gagangay met ad-addan sa nga isuda ti patpatien dagiti ubbing ngem da mommy ken daddy-da. Iti kasta, saan laeng a malinglingay dagiti ubbing, masursuroda pay ti agbasa. Ken babaen ti tulong ti mangisursuro, mayadal kadagiti ubbing dagiti napipintas nga ugali.

Ta akuentayo man wenno saan, no addan dagiti ubbing iti balbalayda, ti metten telebision ti mangag-agaw iti atensionda. Inton malpasda nga agbuya, agsapuldan kadagiti makan a napnapno iti taba a nakitada iti telebision. Wenno ar-arapaapenda ketdi ti innarem dagiti nauubing pay nga artista. Kayattayo ngarud a kasta lattan?

“Wen nga agpayso!” naisawang ti dilak ti napanunotko.

“Ania ti agpayso, angkel?” sinaludsod ‘toy kaanakak a langana ti nasdaaw.

“Makitamto!” kinunak a nangkuso iti buokna.

Isu nga adda ita daytoy nayon a mabalin a maibasa kadagiti ubbing wenno nayon a basaenda iti Bannawag malaksid iti “Dandaniw a Para Ubbing” (panid 48)— ti “Idi Un-unana a Panawen” (dita la bangir a panid).

Pangbusat met ti Bannawag iti tawen 2015 a karaman ti kari a di panangliplipat ti Bannawag kadagiti ubbing.

Ala, ngarud, naragsak a panagbasatayo amin!—O


(Naipablaak iti Bannawag, Enero 5, 2015 a bilang.)

Libro iti dandaniw ni Aragon, mayalnag iti “Tungtongan ti GMM”

Itultuloy ti GUMIL Metro Manila, ti gunglo dagiti mannurat nga Ilokano iti Kamanilaan, ti proyektona a serye ti lecture-workshop a maawagan iti “Tungtongan” para kadagiti kameng ti nasao a gunglo ken asino man a mannurat nga Ilokano nga interesado iti literatura ken lengguahe ken dadduma pay a pakainaigan ti arte ken kultura nga Ilokano.

Maiwayat ti “Tungtongan 3” inton Enero 24, 2015 (1-3 PM) (nayalud-od manipud iti Enero 17) babaen ti panangsangaili da agkaingungot a retirado a Bannawag Editor Dionisio S. Bulong ken agdama a Tesorera ti GF ken GMM, Eden Cachola-Bulong iti 14 Ayungin St., Cadaing Village, Talipapa, Novaliches, Quezon City. Da met Bannawag Literary Editor Juan Al. Asuncion ken Roy V. Aragon ti agsarita maipanggep iti ababa a sarita ken daniw, kas panagsaganadda.

Tampok met iti “Tungtongan 3” ti pannakayalnag ti Bagi, libro dagiti daniw ni Roy V. Aragon.


(Naipablaak iti Bannawag, Enero 5, 2015 a bilang.)

Bassit a sueldo dagiti nurse, kayat a pausig ni Miriam

Kiniddaw ni Sen. Miriam Defensor-Santiago ti panangusig ti Senado iti report a nabababba ti sueldo nga aw-awaten dagiti nurse iti pagilian ngem iti nailanad a minimum wage.

Iti panangipila ni Santiago iti Senate Resolution No. 1058, kinunana a nasken a mangiwayat ti Senado iti imbestigasion tapno ammuenna no apay nga iti laksid ti kaadda ti Philippine Nursing Act of 2002 wenno Akta Republika Blng. 9713, umaw-awat pay laeng dagiti nurse iti nababa a sueldo.

Innayonna a nasken a mapalutpot ti panggep ti Philippine Nurses Association (PNA) a mangbuangay iti union dagiti nurse tapno addaanda iti bileg a makinegosasion maipanggep iti nangatngato a benepisio kadagiti pagtrabahuanda nga ospital, iti man gobierno wenno sektor pribado.


(Naipablaak iti Bannawag, Enero 5, 2015 a bilang.)

ENERO 5, 2015



SARITA
6 Dagiti Mata ti Maladaga
   Efren A. Inocencio
12 Ni Kabo Timot ken Dagiti Agkallaysa
    Benjamin M. Pascual

NOBELA
26 Dagiti Kulalanti ti Arapaap (15)
     Juan S.P. Hidalgo, Jr.
30 Upa ken Kawitan (7)
     Estela A. Bisquera-Guerrero

DANIW
27 Alleluia
     Roy V. Aragon
48 Dandaniw a Para Ubbing
     Roselyn C. Campano/Ariel S. Tabag

SALAYSAY
10 Sursuruentayo Koma ti Dumngeg
     Fr. Melchor B. Palomares
14 No Kasano a Mapaamo ti Naimbag a Gasat
     Jim P. Domingo
40 Napitas Daytoy a Pagpakan iti Kalding
     Reynaldo E. Andres

KOMIKS
17 Gayang ni Lam-ang (66)
20 Aritosan (116)
22 Miks & Tiks

KOLUM
15 Saludsodem ken ni Apo Hues
16 Dear Doc
32 Okeyka, Apong
34 TIPS
37 Kastoy, Kapid, Ditoy Hawaii
38 Kosina Ilokana
42 Padasem Daytoy, Kailian
46 Haytek!

PAGLINGLINGAYAN
44 Showbiz
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
 2 Ti Makunami
 4 Tao, Lugar, Pasamak
 8 Manipud Kadagiti Editor
9 Idi Un-unana a Panawen
24 Naragsak a Maika-80 nga Anibersariom, Bannawag!
28 Siled ti Kararag
29 Nasken Met a Maawatam ti Ibagbaga ti Asom
31 Txtm8
33 Adda Kadi Autismo ti Anakmo?
35 Ti Gasatmo Ita a Lawas
36 Ammuem Pay Dagitoy
39 Adda Kadi Met Laeng Pagilistaam a Kuaderno?

December 23, 2014

Kuna ti IMF: Panagsuek ti presio ti langis, padur-asenna ti sangalubongan nga ekonomia

Patien dagiti opisial ti International Monetary Fund (IMF) a saan a pakdaar iti igiginad ti panagdur-as ti sangalubongan nga ekonomia ti panagsuek ti presio ti langis no di ket pagilasinan daytoy ti isasantak ti ekonomia, nangruna kadagiti pagilian nga agpampannuray iti gatgatangenda a langis kadagiti sabsabali a pagilian.

Kastoy met laeng ti kapanunotan dagiti opisial ti US Federal Reserve ken ti European Central Bank. Kunada a ti panagsuek ti presio ti langis, makapasayaat kadagiti konsiumer ken kadagiti agparpartuat.

Sakbayna, adda dagiti ekonomista a mamati a pagilasinan ti panagsuek ti ekonomia ti dandani 40 a porsiento a bimmabaan ti presio ti langis iti sangalubongan a merkado ta bumasbassiten ti panagkasapulan iti langis.

Mainaig daytoy a pammati iti panagbatbatay dagiti ekonomista kadagiti napalabas nga ilalaka ti presio ti langis iti igigiddan met ti panagsuek ti ekonomia ti lubong.

Ngem sabali ti agdama a mapaspasamak, kas kuna dagiti ekonomista, ta dimmur-asen ti teknolohia iti panagkulukol iti langis, malaksid nga immadu ti langis nga aggapu iti Libya, ken adda pay ti mapapati a panggep dagiti dadduma a pagilian iti Middle East a mangipalaka iti produktoda a langis tapno mapaksiatda iti merkado dagiti dadduma a pagilian a pagtataudan ti langis.

Idi Hunio 20 itoy a tawen, mapan a US$114.55 ti sangabariles a crude oil (Brent crude oil). Ngem itay Dis. 15, nagbalinen a US$62.53.


(Naipablaak iti Bannawag, Disiembre 29, 2014 a bilang.)

Paskuami Ditoy!



PASKUAMI DITOY! Naruay nga ubbing, agtutubo agraman nataengan ti agturturong iti sango ti kapitolio probinsial ti Ilocos Norte kalpasan a nasilawanti higante a Christmas tree ken ti ar-arakenda a kasla winterland a pagay-ayaman ken mabalin a pag-selfie-an dagiti aglabas. Kas nayon a pangawis kadagiti turista ken dadduma pay a bisita iti Ilocos Norte, kanayon nga agbaliw ti tema dagiti arkos iti sango ti kapitolio a mayataday iti selebrasion, kas ita a Paskua ken Baro a Tawen. (Leilanie G. Adriano)

(Naipablaak iti Bannawag, Disiembre 29, 2014 a bilang.)

Salip iti Daniw ti 13th RFAAFIL

Daniw a para ubbing ti mapagsasalipan iti 13th Reynald F. Antonio Awards for Ilokano Literature (2014-2015). Uray ania a tema ti trataren ngem nasken a maawatan dagiti ubbing nga agtawen manipud iti pito (7) agingga iti sangapulo ket dua (12).

Dagiti pagannurotan:

1. Silulukat ti salip kadagiti amin a mannaniw iti Ilokano (Iluko wenno Iloko).

2. Agatiddog ti daniw iti di ab-ababa ngem 20 a linia ken naikompiuter wenno naimakinilia iti maysa a panid ti bond paper. Mabalin a maysa wenno dua a daniw ti isalip ti tunggal mannaniw. Masapul nga orihinal ken di pay naipablaak iti uray ania a magasin, pagiwarnak wenno Internet ti isalip a daniw.

3. Nawaya ti mannaniw a mangsurat iti estilo wenno pannakasukog ti daniwna ngem nasken a para ubbing ti daniw a putarenna. Uray ania a tema ti trataren ngem nasken a maawatan dagiti ubbing nga agtawen manipud iti pito (7) agingga iti sangapulo ket dua (12).

4. Ti laeng parbo a nagan ti mannaniw ti agparang iti daniw. Nasken a mangusar iti agsabali a parbo a nagan no panggep ti mangisalip iti dua a daniw. Dua nga MS Word document files ti idatag babaen ti e-mail. Umuna: ti daniw a pakisalip. Maikadua: ti pudno ken parbo a nagan ken pakasaritaan ti biag ti autor.

5. Agbalin a kukua ti esponsor dagiti mangabak a daniw. Karbenganna pay ti mangedit ken mangipablaak iti Internet (www.rfaafil.com), magasin wenno periodikal a pilina, wenno mangilibro kadagitoy nga awan ti sungsungbatanna iti mannaniw. Agtalinaed ketdi ti copyright iti autor.

6. Dagiti gunggona: Umuna, P2,000.00 ken sertipiko; Maika-2, P1,500.00 ken sertipiko; Maika-3, P1,000.00 ken dua a consolation prize a sag-P500 ken sertipiko. Mabalin a mangabak ti mannaniw iti dua a premio. Mabalin pay a manayonan wenno maksayan dagiti gunggona depende iti pangngeddeng dagiti hurado. Maipaay met ti Reader’s Choice Award iti daniw a magustuan dagiti ubbing a readers.

7. Saan a mabalbaliwan ti pangngeddeng dagiti hurado malaksid no matakuatan kalpasanna a linabsingna ti Pagannurotan Bilang 2.

8. Mapadayawanto dagiti mangabak iti GUMIL Filipinas Annual Convention wenno iti pasken nga angayen ti RFAAFIL inton kalgaw ti 2015.

9. Ipatulod ti pakisalip babaen ti e-mail. Iturong iti admin@rfaafil.com ken rfaafil@hotmail.com.

10. Nasken a maipatulod babaen ti e-mail ti pakisalip iti di naladladaw ngem Enero 31, 2015. –O

Timpalak Uswag Darepdep ti KWF

Salip iti Literatura iti Ilokano Para Kadagiti Agtawen iti 12-17

Timpalak Uswag Darepdep ti KWF


Ipalagip ti Komisyon sa Wikang Filipino (KWF) ti agtultuloy a panagawatna kadagiti entry para iti Timpalak Uswag Darepdep, maysa a salip iti literatura iti Filipinas ti KWF a para kadagiti agtutubo manipud iti edad 12-17.

Nagtaud ti nagan ti salip manipud iti Cebuano nga “uswag” a kayatna a sawen, “itandudo” ken iti Ilokano a “darepdep.” Maysa a wagas ti KWF daytoy a pangpaadu pay iti putar iti literatura kadagiti rehion babaen ti pannakairugi kadagiti agtutubo ti panagsurat iti nakayanakanda a pagsasao.

Silulukat daytoy a salip manipud iti Agosto 1, 2014 agingga iti Marso 2, 2015 kadagiti agtutubo a Filipino manipud kadagiti nadumaduma a rehion iti pagilian nga agtawen iti 12-17 sakbay ti Marso 2, 2015.

Agbaliwbaliw iti tunggal tawen dagiti kategoria a pagsasalipan-- sarita, daniw, drama iti maysa-a-parang, ket salaysay— ken iti maituding nga uppat a nakayanakan a pagsasao iti pagilian.

Para iti umuna a tawen (2014-2015) ti Timpalak Uswag Darepdep, maluktan daytoy kadagiti kategoria iti sarita ken daniw iti Ilokano (Bikol, Cebuano ken Meranaw dagiti sabsabali). Mapalubosan ti tunggal makisalip a mangidatag iti maysa a pakisalipna iti sarita ken maysa iti daniw, wenno mabalinna ti makisalip iti maysa laeng a kategoria a maysa laeng met nga entry ti idatagna.

Para iti kategoria ti sarita, agatiddog ti pakisalip iti di nakurkurang ngem 10 a panid ngem saan a nasursurok ngem 25 a panid a makiniliado wenno naikompiuter ken nasken nga adda kakuyogna a maysa a panid a synopsis.

Para iti kategoria ti daniw, koleksion dagiti daniw ti isalip a buklen ti di nakurkurang ngem 10 a daniw ngem di nasursurok ngem 15 a daniw.

Saanen a mabalin nga isalip ti nangabaken iti ania man a salip sakbay ti Marso 2, 2015.

Ti tunggal entry ket nasken a naka-PDF, doble espasio ti pannakaikompiuterna (malaksid iti kategoria ti daniw) iti 8-1/2” x 11” a papel, ken addaan iti margin a maysa a pulgada iti aglawlaw ti panid. Nasken met nga agsasaruno ti bilang dagiti panid ken mailanad iti tengnga ti footer ti tunggal panid. Agusar laeng iti font nga Arial wenno Times New Roman iti kadakkel a 12 pt.

Nasken met a maikarga iti narikpan nga atiddog a brown envelope dagitoy sumaganad a dokumento: (1) tallo a hard copy wenno ti naimakinilia wenno ti nai-print nga entry; (2) maysa a CD a nakailaonan ti digital copy ti entry iti porma daytoy a PDF ; (3) pormulario ti pannakisalip (mai-download iti KWF website wenno iti KWF Facebook); (4) pormulario ti pammalubos ti nagannak; ken (5) sertipikasion manipud iti prinsipal ti pagadalan para kadagiti estudiante wenno sertipikasion manipud iti punong barangay para kadagiti out of school youth. Nasken a manotarioan dagiti pormulario ti pannakisalip ken ti pormulario ti pammalubos ti nagannak. Ti laeng paulo ti pakisalip ken ti kategoria daytoy ti isurat iti envelope. Ipatulod daytoy iti: Lupon sa Gawad, 2F Gusali Watson, 1610 Kalye J.P. Laurel, MalacaƱang Complex, San Miguel, Lungsod Maynila.

Nasken a  maawat ti KWF ti/dagiti pakisalip sakbay wenno iti Marso 2, 2015, iti alas singko iti malem.

Umawat dagiti mangabak iti tunggal rehion iti medalia manipud iti KWF ken kadagiti sumaganad a premio a kuarta: Umuna Gunggona, P10,000; Maikadua a Gunggona, P5,000; ken Maikatlo a Gunggona, P3,000.

Pinal ken di mabaliwan ti ania man a desision ti Hunta Dagiti Hurado. Saan met a maisubli dagiti entry, nangabak man wenno saan, kadagiti nakisalip. Karbengan ti KWF ken ti kasinnarayna (ti Bannawag iti lengguahe nga Ilokano) ti umuna a pannakaipablaak dagiti nangabak nga entry nga awan ti royalty ti autor.

Para iti pormulario: http://docdroid.net/h2ho

Para iti pammalubos ti nagannak: http://docdroid.net/h2hn

December 18, 2014

DISIEMBRE 29, 2014



SARITA
6 Ni Ikitko a Santa Klaws
   Leah D. Manzano
12 Angin, Danum, Tapok, ken Bulong
    Fredelito Lazo

NOBELA
26 Dagiti Kulalanti ti Arapaap (14)
     Juan S.P. Hidalgo, Jr.
30 Upa ken Kawitan (6)
     Estela A. Bisquera-Guerrero

DANIW
27 Kari(t)
     Daniel L. Nesperos
48 Dandaniw a Para Ubbing
     Jobert M. Pacnis/Derick Marcel F. Yabes

SALAYSAY
10 Komusta Met ti Panagubing ni Jesus?
     Fernando B. Sanchez
14 New7Wonders Cities of the World: Balligi ni Ilokano ti Balligi ti Vigan
     Jim P. Domingo
40 Adtoy ti Bayrus a Pangpaksiat Kadagiti Arabas
     Reynaldo E. Andres

KOMIKS
17 Gayang ni Lam-ang (65)
20 Aritosan (115)
22 Miks & Tiks

KOLUM
 9 Dear Doc
15 Saludsodem ken ni Apo Hues
32 Okeyka, Apong
34 TIPS
37 Kastoy, Kapid, Ditoy Hawaii
38 Kosina Ilokana
42 Padasem Daytoy, Kailian
46 Haytek!

PAGLINGLINGAYAN
44 Showbiz
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
 2 Ti Makunami
 4 Tao, Lugar, Pasamak
13 Salip iti Daniw a Para Ubbing ti 13th RFAAFIL
16 Ti Paskua a Diakto Malipatan
24 Iti Ilocos Norte: Nakipagrambak Met Dagiti Pagadalan iti Maika-80 nga Anibersario ti Bannawag
28 Siled ti Kararag
29 Apay nga Agtaul ti Aso?
31 Txtm8
33 Wanted: Nasayaat a Makipagili
35 Ti Gasatmo Ita a Lawas
36 Ammuem Pay Dagitoy
39 Panangpabanglo iti Uneg ti Balay
45 Salip iti Sarita ken Daniw ti Timpalak Uswag Darepdep

December 14, 2014

Addan Pagtungo!



ADDAN PAGTUNGO! Kalpasan ti aluyo a nangidaknir kadagiti runo ken kayo iti aplaya ti Brgy. Bulala Norte, Aparri, Cagayan, dakkel a pagyamyamanan dagiti agindeg ta addan madadaan a pangaywanda. No nagagetka, kas itoy nailadawan nga ama, makalibreka iti pagsungrod iti sumagmamano a bulan. Dakkel a katulongan daytoy gapu iti kinanginan ti gas a pagluto. Naynay nga urnongen lattan dagiti agindeg ti kayoda iti aplaya ket in-inutenda a yawid daytoy. Saanda a pagdanagan ta natalekda nga awan ti agala iti dina urnong a kayo. (Jobert M. Pacnis)

(Naipablaak iti Bannawag, Disiembre 22, 2014 a bilang.)

December 13, 2014

Siudad ti Vigan, nairaman iti ‘Seven Most Wonderful Cities’

Opisial a naideklara itay nabiit ti Siudad ti Vigan a kas maysa kadagiti ‘Seven Most Wonderful Cities’ iti sangalubongan wenno ‘New7Wonders Cities’ babaen ken ni Bernard Weber, pangulo ti New7WondersFoundation.

Indeklara ni Weber ti resulta ti Seven Wonder Cities campaign itay Dis. 9 kalpasan a nabilang ti 100-milion nga online votes.

Dagiti dadduma a siudad a nairaman iti listaan ti New7Wonders: Beirut iti Lebanon, Doha iti Qatar, Durban iti South Africa, Havana iti Cuba, Kuala Lumpur iti Malaysia, ken La Paz iti Bolivia.

Napili dagiti New7Wonders Cities manipud iti 1,200 a siudad manipud iti 220 a pagilian.

Am-ammo ti Vigan, malaksid pay kadagiti sabsabali, gapu kadagiti kalsadana a naaramid kadagiti nagkauna a cobblestone ken kadagiti balay ditoy a nabangon pay idi panawen dagiti Kastila.

Malaksid iti pannakairaman ti Siudad ti Vigan iti listan ti New7Wonders Cities, indeklara pay sakbayna ti United Nations Educational, Scientific and Cultural Organization (UNESCO) a kas World Heritage Site.

Maysa a non-profit organization ti New7Wonders Foundation nga agisaysayangkat iti online voting tapno makapili kadagiti naidumduma a banag iti lubong nga aramid ti tao ken ti nakaparsuaan a rumbeng laeng a masaluadan a kas napateg a paset ti pakasaritaan.


(Naipablaak iti Bannawag, Disiembre 22, 2014 a bilang.)

Libro dagiti sarita a para ubbing, nayalnag

Nayalnag ti libro a Dagiti Napili a Kapipintasan a Kabukbukodan a Sarita a Para Ubbing (Umuna a Libro) itay Disiembre 7, 2014 bayat ti maika-48 nga Anibersario ken Parambak iti Paskua ti GUMIL Metro Manila (GMM), gunglo dagiti mannurat nga Ilokano iti Kamanilaan.

Impablaak ti GUMIL Filipinas ken GMM, natipon iti daytoy a libro dagiti sarita a para ubbing dagiti kameng ti GMM a da Cles B. Rambaud, Martin T. Rochina, Anna Liza M. Gaspar, Godfrey T. Dancel ken Mighty C. Rasing. Da Bannawag Editor Rambaud ken Ariel S. Tabag ti nangedit.
Para kadagiti interesado a maaddaan iti kopia, kontaken ti 0921-602-1938 (AST) wenno 0905-212-0273 (MTR).

1st Saniata Prize

Panggep ti Saniata Prize ti agbalin a maysa kadagiti paratignay dagiti mannaniw nga Ilokano nga agparnuay kadagiti baro a langa ti daniw nga Ilokano kabayatan met ti panagbigbigda kadagiti kannawidan a porma ti daniw nga Ilokano.

Marugian iti 2015, agbalin a tinawen daytoy a pasalip. Maipaayan iti pammadayaw a Hall of Fame ti makayalat iti tallo nga Umuna a Gunggona.

Dagiti Pagalagadan:
1. Maysa a daniw laeng ti idatag. Saan a makedngan ti tema, porma wenno kaatiddog ti isalip a daniw.

2. Masapul nga orihinal, di pay naipablaak, ken nakasurat iti lengguahe nga Ilokano wenno saan a naipatarus manipud iti sabali a lengguahe ti isalip a daniw. No matakuatan a nabalusingsing daytoy a pagannurotan, maibabawi ti gunggona ket maparitanto metten a makisalip ti autor iti ania man a pasalip ti Saniata Prize.

3. Deadline ti panangidatag: Pebrero 27, 2015. Ipatulod babaen ti e-mail ti pakisalip iti asseng.tabag@gmail.com iti subject a “1st Saniata Prize”

4. Masapul nga agusar iti nagan iti pluma (pen name) ti mannaniw. Iraman ketdi iti e-mail ti kompleto a nagan, numero iti selpon, ken adres ti pagtaengan wenno opisina.

5. Dagiti premio: 1st Prize: Php2,000.00 ken tallo a libro nga Ilokano; 2nd Prize: Php 1,200 ken dua a libro nga Ilokano; 3rd Prize: Php1,000.00 ken maysa a libro nga Ilokano.

6. Mapadayawan dagiti mangabak inton Abril 17, 2015 bayat ti kombension ti GUMIL Filipinas.

7. Makipagtagikua ti Saniata Prize kadagiti mangabak a daniw ket awan sungsungbatanna kadagiti mannaniw no bilang usarenna dagitoy iti ania man a wagas kas iti pannakaipabuya, pannakaipablaak iti magasin wenno libro, ken pannaipaskil iti social media. Agtalinaed ketdi ti copyright iti autor wenno mannaniw.

December 12, 2014

DISIEMBRE 22, 2014



SARITA
6 Sumganton iti Idadateng ti Paskua
Marichel E. Suguitan
12 Ngayed iti Lubong Dagiti Munmunieka
Guillermo R. Andaya

NOBELA
26 Dagiti Kulalanti ti Arapaap (13)
Juan S.P. Hidalgo, Jr.
30 Upa ken Kawitan (5)
Estela A. Bisquera-Guerrero

DANIW
27 Iti Yuumaymo a Kasla Balikas ti Daniw
Arnold C. Baxa
48 Dandaniw a Para Ubbing
Jobert M. Pacnis/ Rolando A. Seguro, Jr.

SALAYSAY
10 Apay nga iti Bethlehem?
Fernando B. Sanchez
16 “Agragsakka Itan, Lubong…”
Fr. Melchor B. Palomares
40 Agmulatayo Met iti Kapaskapas ken Sugodsugod
Reynaldo E. Andres

KOMIKS
19 Gayang ni Lam-ang (64)
22 Aritosan (114)
24 Miks & Tiks

KOLUM
9 Dear Doc
14 Saludsodem ken ni Apo Hues
32 Okeyka, Apong
34 TIPS
37 Kastoy, Kapid, Ditoy Hawaii
38 Kosina Ilokana
42 Padasem Daytoy, Kailian
46 Haytek!

PAGLINGLINGAYAN
44 Showbiz
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
2 Ti Makunami
4 Tao, Lugar, Pasamak
15 Awan Met La iti Kas iti Tinubong, Bibingka, ken Patupat
18 Kayatko ti Agtaraken iti Aso, Kunam?
28 Siled ti Kararag
29 Kasanon No Nasadut ti Empleado?
31 Txtm8
33 Ket Nagkallaysa da Mhar ken Lecey
35 Ti Gasatmo Ita a Lawas
36 Ammuem Pay Dagitoy
37 Pagannurotan ti 1st Saniata Prize
39 Naragragsak ti Paskua No Awan Adu a Wara

December 6, 2014

Sabali Manen a Planta ti Angin



SABALI MANEN A PLANTA TI ANGIN ti nangrugi nga agandar itay laeng Nobiembre babaen ti North Luzon Renewable Energy Corporation a kadua met laeng ti kaunaan a naipasdek a wind farm iti kabangibang nga ili ti Bangui. Agbalor daytoy a pasdek iti US$200-M ket mabalin a makapataud daytoy iti 81 megawatts nga enerhia manipud iti angin babaen dagiti naikapet a duapulo ket pito (27) a turbina iti kabambantayan a paset ti Barangay Caparispisan (ngato). Sigud nga awan matatao iti daytoy a lugar ngem gapu iti pannakapasayaat dagiti kalsada ken napintas a buya iti likmut daytoy a planta, manamnama a mapagbalin pay daytoy a kas nayon nga eco-tourism destination iti Pagudpud. (Leilanie G. Adriano)


(Naipablaak iti Bannawag, Disiembre 15, 2014 a bilang.)

“Top 10” a nagturpos iti public high school, agbalin nga eskolar

Maikkan iti scholarship kadagiti unibersidad ken kolehio ti gobierno dagiti umuna a10 a kangatuan iti puesto kadagiti agturpos kadagiti amin a public high school iti pagilian, kas maibatay iti linteg a pinirmaan ni Presidente Aquino.

Sagudayen ti Akta Republika Blng. 10684 nga am-ammo pay a kas Iskolar ng Bayan Act of 2014, maikkan dagitoy nga estudiante iti makatawen nga scholarship iti pilida nga unibersidad ken kolehio ti gobierno, agbatay iti pagalagadan iti admission dagitoy nga eskuela.

Kalpasan ti makatawen, agawatton ti student iti tulong babaen dagiti regular a financial assistance ken scholarsip program ti Commission on Higher Education (CHED) no la ketdi kualipikado daytoy.


(Naipablaak iti Bannawag

Salip iti Sarita ti 17th AMMAFLA

Inkeddeng dagiti mangimaton iti AMMA Foundation Literary Awards (AMMAFLA) a maituloy met laeng ti panagpasalipda iti panagsurat iti sarita, malaksid iti proyektoda a panangilibro kadagiti nangabak a sarita iti AMMAFLA.

Adtoy ti kompleto a pagannurotan ti Salip iti Sarita ti Maika-17 nga AMMA Foundation Literary Awards (AMMAFLA) nga imatonan da Amado ken Gloria Yoro, Francisco ken Aurora Ponce, ken Alfredo ken Cherry Quibol (agpapada nga agindegen iti Hawaii) a nairanta nga agpaay kadagiti agdadamo a mannurat iti Ilokano a “kas pangaron iti reggetda a mangpatadem pay iti plumada”:

1. Aggibus ti salip iti Marso 15, 2015.

2. Agpaay laeng ti salip kadagiti agdadamo a mannurat iti Ilokano. Iti daytoy a pasalip, maibilang nga agdadamo ti mannurat no awan pay ti naipablaak a saritana iti Bannawag. No adda man, di koma nasursurok ngem tallo ti naipablaakna agingga iti Dis. 15, 2014 a bilang ti nasao a magasin.

3. Siwawayawaya ti autor a mangpili iti topiko ti isalipna a sarita.

4. Agatiddog ti sarita iti 10-15 a panid iti short bond paper, naimakinilia, wenno saan, naikompiuter iti doble espasio (Times Roman Medium 12 pts. iti computer), ken adda espasio wenno margin a maysa a pulgada iti amin nga igid ti papel.

5. Maysa laeng a sarita ti mabalin nga isalip ti tunggal autor.

6. Nasken nga orihinal, di pay naipablaak wenno naadaw iti ania man a sinurat ti isalip. Nasken met a saan a naipatarus ti pakisalip manipud iti sabali a lengguahe ken nasken a bukod a putar ti autor ti pakisalipna.

7. Ti parbo a nagan ti autor ti agparang a naganna a kas autor ti sarita. Ipatulod ti pakisalip iti uppat a nadalus a kopia ken pakuyogan iti narikpan a sobre a naglaon iti pudno ken parbo a nagan ti autor, paulo ti pakisalip, kaudian a ladawan ken ababa a pakasaritaan ti biag ti autor, adres ti agdama a pagnaedan, agraman e-mail address ken numero ti selpon wenno telepono a mabalin a pakakontakan iti autor. Iti rabaw ti sobre, isurat ti paulo ti sarita ken parbo a nagan ti autor.

8. Ipatulod ti pakisalip babaen ti koreo wenno personal nga idatag iti daytoy nga adres: Short Story Writing Contest, 17th AMMAFLA, c/o Bannawag, Manila Bulletin Publishing Corp., Muralla corner Recoletos Sts., Intramuros, 1002 Manila. Nasken a maawat ti Bannawag ti pakisalip iti di naladladaw ngem iti Marso 15, 2015. Saan a mairaman iti salip ti entry a maawat kalpasan dayta a petsa.

9. Dagiti gunggona: Umuna a Gunggona, P10,000.00; Maikadua, P8,500.00; ken Maikatlo, P7,000.00. Maipaayan pay dagiti mangabak iti sertipiko ti pammadayaw. Adda met karbengan dagiti hurado a mangkissay iti bilang dagiti mangabak no awan ti makapatar iti bukodda a pagbatayan dagiti mangabak. Mabalinda met ti mangparnuay iti sabali a gunggona, no kasapulan.

10. Mapakaammuanto dagiti mangabak no kaano ken sadino ti pakapadayawanda. No met matakuatan a sinalungasing ti mangabak ti Pagannurotan Blng. 2 ken/wenno 6, maibabawi ti premiona ken mapawilanton a makisalip iti ania man a pasalip ti AMMAFLA.


(Naipablaak iti Bannawag, Disiembre 15, 2014 a bilang.)

December 4, 2014

DISIEMBRE 15, 2014



SARITA
6 Niebe
   Reynald F. Antonio
12 Ipakpakaunakon ti Naragsak a Paskuam
     Gregorio T. Amano

NOBELA
26 Dagiti Kulalanti ti Arapaap (12)
     Juan S.P. Hidalgo, Jr.
30 Upa ken Kawitan (4)
     Estela A. Bisquera-Guerrero

DANIW
27 Maipasngayak a Sabali
      Jobert M. Pacnis
48 Dandaniw a Para Ubbing
     Ludilyn Ely F. Bravo/Rolando A. Seguro, Jr.

SALAYSAY
10 Apay Met a Kastoy ti Kinabaranan, Kunam?
     Virginia A. Duldulao, Ph.D.
24 “Tan-ok ni Ilokano,” Dayaw ti Kailokuan
      Leilanie G. Adriano
40 Baro a Wagas ti Panagabuno iti Papaya
     Reynaldo E. Andres

KOMIKS
17 Gayang ni Lam-ang (63)
20 Aritosan (113)
22 Miks & Tiks

KOLUM
 9 Dear Doc
14 Saludsodem ken ni Apo Hues
32 Okeyka, Apong
34 TIPS
37 Kastoy, Kapid, Ditoy Hawaii
38 Kosina Ilokana
42 Padasem Daytoy, Kailian
46 Haytek!

PAGLINGLINGAYAN
44 Showbiz
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
 2 Ti Makunami
 4 Tao, Lugar, Pasamak
15 Ti Karayan Cagayan ken Dagiti Ili ti Tanap
16 Salip iti Daniw a Para Ubbing ti 13th RFAAFIL
28 Siled ti Kararag
29 Tuladentayo Man ti Pusa
31 Txtm8
33 Ania Dagiti Rumbeng a Sapulem iti Maysa a Lider Estudiante?
35 Ti Gasatmo Ita a Lawas
36 Ammuem Pay Dagitoy
39 Tapno Dika Marigatan iti Panangdalus iti Banio

December 1, 2014

Ar-arusip!



AR-ARUSIP! Siraragsak da agkabsat a Jethro ken Jiemil Anne S. Pacnis ti Brgy. Ammubuan, Ballesteros, Cagayan nga agburburas iti bunga ti ar-arusip (arusip kadagiti dadduma) a mula ni tatangda a ni Jobert M. Pacnis, mannurat ti Bannawag, iti abay ti balayda. Kasla bugnay daytoy a babassit a nabaknang iti bitamina C ken antioxidants a napateg iti pannakatagiben ti salun-at. Paggugusto dagiti agkabsat a ma-blender ti nasao a prutas a malaokan iti mansanas ken/wenno ubas. (Pammadayaw ni JMP)


(Naipablaak iti Bannawag, Disiembre 8, 2014 a bilang.)

Eleksion ti SK, mabalin a maisanud iti Oktubre, 2016

Ad-adalen ita ti Kamara ti pannakaisanud manen ti eleksion ti Sangguniang Kabataan (SK) iti Oktubre, 2016 wenno sumagmamano a bulan kalpasan ti eleksion presidensial iti 2016.

Sakbayna, idi Oktubre 3, 2013, naipaulog ti Akta Republika Blng. 10632 a nangisanud iti eleksion ti SK a maangay koma iti Oktubre 28 iti dayta a tawen tapno maangay daytoy iti Pebrero 21, 2015.
Kinuna ni Capiz Fredenil Castro, chairman ti House committee pm Suffrage and Electoral Reforms, a nasken daytoy tapno maikkan ti Kongreso iti naan-anay a panawen a mangpanunot no ania dagiti enmienda nga iserrekda iti SK Law.

Nupay kasta, kuna met ni Kabataan Party-list Rep. Terry Ridon a ti Liberal Party ti adda iti likudan daytoy a panggep a pannakaisanud ti eleksion, kas paset ti panagsagsagana ti administrasion iti eleksion presidensial.

Innayon ni Ridon nga atapenna a ti pondo a para koma iti SK, mainayon laengen iti pondo a pagkampania ti Liberal Party.

Sagudayen ti Local Government Code, 10 porsiento iti total annual Internal Revenue Allotment (IRA) ti barangay ti automatiko a mapan iti SK.

Nupay ipawil ti RA 10632 ti pannakadutok dagiti baro nga opisial ti SK, sagudayen met ti Implementing Rules and Regulations ti paglintegan ti pannakabukel ti “Task Force on Youth Development” a kas sukat ti SK.

Ti met laeng Task Force, a dutokan ti konseho ti barangay, ti addaan iti karbengan a mangala iti 10 porsiento ti IRA ti barangay.


(Naipablaak iti Bannawag, Disiembre 8, 2014 a bilang.)

Dap-ayan 2015 dagiti mannurat nga Ilokano: Abril 17-19, 2015

GUMIL Apayao, mabangon

Angayen ti GUMIL Filipinas, ti gunglo dagiti mannurat nga Ilokano iti sangalubongan, ti Dap-ayan 2015: Ti Maika-47 a Nailian a Kombension ti gunglo inton Abril 17-19, 2015 iti maikeddeng a lugar iti uneg ti Kamanilaan, babaen ti panagsangaili ti GUMIL Metro Manila, ken iti pannakitinnulong ti sumagmamano nga institusion a pribado ken ti gobierno.

Daytoy ti napagnunumuan iti GF Board Meeting a naangay itay Nobiembre 23, 2014 a sinangaili ni GUMIL Pangasinan President Fernando B. Sanchez ken ti pamiliana iti San Nicolas, Pangasinan.
Kas kinuna ni GF President Arthur P. Urata, Jr., tampok iti daytoy a kombension ti pannakapadayaw kadagiti mannurat a nangab-abak kadagiti pasalip, pannakayalnag dagiti libro nga impablaak ti gunglo ken dagiti kamengna, panagsisinukat iti kapanunotan mainaig iti pannakaipatungpal dagiti panggep ti gunglo para kadagiti mannurat nga Ilokano ken iti Kurditan Ilokano. Ken maangay ti eleksion ti GF.

Kadagiti amin a kameng ti GF ken dagiti chapter-na, makiuman kadagiti chapter president para iti advance a reserbasion ken dadduma pay a detalye a mainaig iti kombension. Kadagiti saan met a kameng pay ti GUMIL nga interesado a dumar-ay iti nasao a kombension, makiuman ken ni Ariel S. Tabag, presidente ti GUMIL Metro Manila, babaen ti e-mail: asseng.tabag@gmail.com
Iti sabali a bangir, maipakaammo nga inaprobaran ti GF Board ti pannakabukel ti GUMIL Apayao babaen ti panangyendorso ni GUMIL Cagayan president Dr. Freddie Pa. Masuli.

Kabayatanna, ipakaammo ti GF Awards Committee nga agawaten kadagiti nominasion para iti Pedro Bucaneg Award, Leona Florentino Award, ken Don Cornelio Valdez Award. Aggibus ti nominasion iti Pebrero 27, 2015. Para iti kompleto a pagalagadan dagiti nasao nga awards, ag-e-mail iti rvaragon@gmail.com wenno bisitaen ti balikasniilokano.blogspot.com. (RVA)


(Naipablaak iti Bannawag, Disiembre 8, 2014 a bilang.)

Ti Makunami: Mayuna Koma Dagiti Agbasbasa

Ni NOEL C. LOPEZ
Cauayan City

MARAGRAGSAKANKAMI no adda aggibus a nobela iti Bannawag. Kayatna a sawen a maaddaankami manen iti baro a gundaway a makabasa iti baro a nobela a mangipaay kadakami kadagiti baro a pampanunot kabayatan ti panangpatpatugotmi kadagiti adbentura wenno pannakigasanggasat dagiti agakem.

Patienmi unay a saan a maikari dagiti  agbasbasa kadagiti atitiddog unay  a nobela. Iti agdama a taray ti panawen a kankanayon nga agkamkamakam  dagiti agbasbasa gapu kadagiti umad-adu a pakakumikomanda,  agmawmaw ti gagarda ken mapukaw metten dagiti suspense a kayat nga idasar ti nobelista no atiddog unay ti nobela.

Maysa ngarud a mangsuron, saan ketdi a manglinglingay, kadagiti agbasbasa dagiti atitiddog unay a nobela ket gapu iti daytoy a pannakasuron dagiti agbasbasa, isardengda metten a basaen dayta a nobela gapu iti pannakapukaw ti reggetda. Pagangayanna, kailala la unay ti panawen a binusbos dayta nga agbasbasa a nangirugi a nangbasa iti dayta a nobela.

Pagrebbengan ti mannurat ti panangipaayna kadagiti agbasbasa kadagiti makaguyugoy ken napnuan iti kaipapanan a babasaen. Dagiti koma agbasbasa ti kankanayon a pampanunoten dagiti mannurat, ania man a klase ti literatura,  saan a ti bukodda a pakalinglingayan. Dida koma aramaten ti panagsurat tapno laeng mapagustuan ti bukodda a pagduyosan.


(Naipablaak iti Bannawag, Disiembre 8, 2014 a bilang.)


Maikapat a Pasalip ALVIYA iti Sarita

Ipalagip ti Secretariat ti ALVIYA Literary Foundation nga agawaten kadagiti sarita para iti Maikapat a Pasalip ALVIYA a naluktan bayat ti Nasional a Komperensia ti GUMIL Filipinas sadiay Cabicungan Inn, Claveria, Cagayan babaen ken ni Alex Vicente Yadao, esponsor ti salip ken pangulo ti foundation.

Dagiti pagannurotan:

1. Naluktan ti salip idi Abril 20, 2014 ket aggibus iti Pebrero 28, 2015.

2. Silulukat ti pasalip kadagiti amin a mannurat a makapagsurat iti Ilokano.

3. Nawaya dagiti mannurat a mangpili iti kayatda a tema ti sarita nga isalipda.

4. Agatiddog ti pakisalip iti 15-25 a panid iti short bond paper, nai-computer (agusar iti Times New Roman, Font Size 12) iti doble espasio ken addaan iti maysa a pulgada a kalawa a margin iti amin nga igid ti bond paper.

5. Maysa laeng a sarita ti mabalin nga isalip ti mannurat a makisalip.

6. Nasken a bukod a putar ti autor ti maisalip, saan pay a naipablaak iti ania man a magasin, saan pay a nangabak iti ania man a kita ti pasalip, ken saan a naipatarus manipud iti ania man a lengguahe.

7. Ti laeng parbo a nagan ti autor ti agparang iti manuskrito a maisalip. Pakuyogan ketdi ti entry iti narikpan a sobre a nakailanadan dagitoy: paulo ti sarita, parbo ken pudno a nagan, ababa a kabibiag ti autor, ken cell phone number. Saanen nga ipatulod iti e-mail ti soft copy ti impormasion a mainaig iti autor (ti linaon ti narikpan a sobre).

8. Nasken a maipatulod ti sarita iti dua a porma: a.) hard copy/printed copy, uppat a nalawag a kopia a maipatulod itoy nga adres: PASALIP ALVIYA, c/o Dr. Freddie P. Masuli, Cagayan State University, Sanchez Mira, 3518 Cagayan; ken b.) soft copy a maipatulod babaen ti e-mail iti daytoy nga e-mail account: freddie.padua.masuli@gmail.com.

9. Nasken a maawat ti Secretariat dagiti dua a porma ti pakisalip (hard copy ken soft copy) iti di naladladaw ngem alas 11:59 ti rabii ti Pebrero 28,  2015 (oras iti Filipinas).

10. Agtalinaed ti ania man a pangngeddeng dagiti hurado ken maisubli ti gunggona ti mangabak no maduktalan kalpasanna a sinalungasingna ti Pagannurotan Bilang 6. Awanto metten ti karbengan ti autor a makisalip kadagiti sabsabali pay a pasalip ti ALVIYA.

11. Agbalin a makipagtagikua ti ALVIYA Foundation kadagiti mangabak a sarita. Ngarud, kas iti autor, maaddaan ti agpasalip iti karbengan a mangipablaak kadagitoy mangabak a sarita iti ania man a wagas a kayatna karamanen ti elektroniko ken tradisional a wagas ti panagipablaak. Dagiti gunggona : First Prize, P15,000.00; Second Prize, P10,000.00 ken Third Prize, P8,000.00 ken tallo a pangliwliwa a gunggona a sag-P2,000.00.  Addanto met sertipiko dagiti amin a mangabak.

12. Maipakaammo dagiti mangabak a sarita iti umuna a lawas ti Abril 2015 ken mayawat dagiti premio kadagiti mangabak nga autor bayat ti GUMIL Filipinas National Convention iti Kalgaw 2015.


(Naipablaak iti Bannawag, Disiembre 8, 2014 a bilang.)


Sarita a Para Ubbing, mapagsasalipan iti 13th RFAAFIL

Sarita a Para Ubbing ti mapagsasalipan iti 13th Reynald F. Antonio Awards for Iluko Literature (RFAAFIL). Uray ania a tema ti trataren ngem nasken a maawatan dagiti ubbing nga agtawen manipud iti pito (7) agingga iti sangapulo ket dua (12).

Dagiti pagannurotan:

1. Silulukat ti salip kadagiti amin a mannurat iti Ilokano (Iluko). Aggibus ti salip iti Enero 31, 2015.

2. Agatiddog ti sarita iti di nasursurok ngem 10 a panid. Maimakinilia wenno maikompiuter iti doble espasio iti regular bond paper size. Maysa laeng a sarita ti isalip ti tunggal mannurat.

3. Ti parbo a nagan ti maaramat iti manuskrito a pakisalip. Dua nga MS Word document files ti idatag babaen ti e-mail. Umuna: ti sarita a pakisalip. Maikadua: ti parbo ken pudno a nagan ken ti pakasaritaan ti biag ti autor, ken nasken a mangiragpin ti autor iti palawag no kasano, kaano ken no apay a nasuratna dayta a sarita. Saan ketdi a pagibatayan daytoy iti pannakapili ti saritana ngem mabalin a pakadiskualipikaanna.

4. Sarita a Para Ubbing ti suraten. Uray ania a tema ti trataren ngem nasken a maawatan dagiti ubbing nga agtawen manipud iti pito (7) agingga iti sangapulo ket dua (12).

5. Nasken nga orihinal, di pay naipablaak, di naadaw iti ania man a sinurat ken di pay nangabak iti ania man a salip iti panagsurat ti mabalin nga isalip.

6. Agbalin a kukua ti esponsor dagiti mangabak a sarita. Karbenganna pay ti mangedit ken mangipablaak iti Internet (www.rfaafil.com), magasin wenno periodikal a pilina, wenno mangilibro kadagitoy nga awan sungsungbatanna iti autor. Agtalinaed ketdi ti copyright iti autor.

7. Saan a mabalbaliwan ti desision dagiti hurado malaksid no matakuatan kalpasanna a linabsingna ti Pagannurotan Bilang 5. Iti kasta a panaglabsing, maibabawi ti gunggona ket saanto metten a mapalubosan ti autor a makisalip iti ania man a salip nga esponsoran ti RFAAFIL.

8. Dagiti gunggona: First Prize 5,000.00; Second Prize 4,000.00; Third Prize 3,000.00; Fourth Prize 2,000.00; Fifth Prize 1,000.00 ken mabalin a manayonan wenno maksayan dagiti gunggona depende iti pangngeddeng dagiti hurado. Addanto pay sertipiko a maited kadagiti mangabak. Maipaay met ti Reader’s Choice Award ken maysa a laptop computer iti sarita a magustuan dagiti ubbing a readers.

9. Mapadayawanto dagiti mangabak iti GUMIL Filipinas Annual Convention wenno iti pasken nga angayen ti RFAAFIL iti kalgaw ti 2015.

10. Ipatulod ti pakisalip babaen ti e-mail. Iturong iti admin@rfaafil.com ken rfaafil@hotmail.com.

11. Nasken a maipatulod babaen ti e-mail ti pakisalip iti di naladladaw ngem ti petsa a panaggibus ti salip.


(Naipablaak iti Bannawag, Disiembre 8, 2014 a bilang.)