October 27, 2016

Postal ID, usaren para iti naparpartak a transaksion iti gobierno

Naparpartak ti transaksion iti gobierno no postal ID ti mausar.

Maawaten ti napabaro a postal ID kadagiti remittance center. Balido metten daytoy a kas identification document iti panangala iti clearance iti National Bureau of Investigation (NBI), panagaplay iti pasaporte, ken iti pananglukat iti account iti banko.

Mismo a ti Bangko Sentral ng Pilipinas ti nangipaulog iti direktiba kadagiti amin a remittance center ken banko a mangibilbilin iti panangbigbigda iti postal ID.

Imet ti napabaro a postal ID ti biometric information, pirma ken dadduma pay nga impormasion ti card holder. Addaan met kadagiti security features.

Mabalin ti mangala iti postal ID iti amin a post office iti sibubukel a pagilian. Masapul laeng ti pammaneknek iti kinaasino (proof of identity) ken pammaneknek iti pagnaedan (proof of address).

Iti Metro Manila, maited ti baro a postal ID kadagiti aplikante iti uneg ti 15 nga aldaw; 20 nga aldaw met kadagiti sabsabali a lugar. Kadagiti isla ken kadagiti nasulinek a lugar iti Filipinas, ideliber ti PhilPost ti ID iti uneg ti 30 aldaw.


(Naipablaak iti Bannawag, Nobiembre 7, 2016 a bilang.)


10-bilion a pateg ti apit, dinadael ni Bagyo Lawin

Pattapattaen ti Department of Agriculture (DA) nga agpateg iti sumurok-kumurang a P10-bilion ti nadadael iti sektor ti agrikultura ken iti fisheries iti Amianan a Luzon iti panangbasnot ni super typhoon Lawin iti nasao a lugar idi Oktubre 19 ken 20.

Kinuna ni Agriculture Secretary Manny Pinol a maibatay daytoy iti immuna a panangamirisda iti dinidigra ti bagyo iti Rehion 2, Rehion 1 ken iti Cordillera Administrative Region.

Malaksid kadagiti nasao a rehion, binasnotan pay ti bagyo ti Central Luzon, CALABARZON, MIMAROPA ken Bicol region.


(Naipablaak iti Bannawag, Nobiembre 7, 2016 a bilang.)





Gapuanan ni Lawin



GAPUANAN NI LAWIN. Maysa a komunidad iti Cagayan a nalayus gapu iti ilalabas ni bagyo a Lawin (Haima ti internasional a naganna) idi Oktubre 19-20. Kangrunaan a dinidigra ni Lawin ti Amianan a Luzon nga iti umuna a gundaway, naibayog ti Signal Number 5 iti adu a lugar. (EPA/Brig. Gen. Paul Atal/ Manila Bulletin)

(Naipablaak iti Bannawag, Nobiembre 7, 2016 a bilang.)

October 26, 2016

NOBIEMBRE 7, 2016



SARITA
4 Natureden ni Terio
   Rolando A. Seguro, Jr.
8 Dagiti Nagawan
   Ernesto L. Bisquera

NOBELA
12 Baknangtan, Kayong! (17)
     D.S. Bulong
14 Ti Bastardo (32)
    Norberto D. Bumanglag, Jr.

DANIW
6 Lumabas Laeng ti Nobiembre
   Roselyn C. Campano
20 Dios ti Kumuyog Kenka
   Fred Quibol
47 Daniw a Para Ubbing
    Anna Liza Madayag Gaspar

SALAYSAY
16 Kastoy a Lagipek ti Ipatpategko a Simminan iti Biag
     Remedios S. Tabelisma-Aguillon
26 Ti Akem ti Calcium iti Mula
    Reynaldo E. Andres

KOMIKS
35 Sweet Jazmine (9)
38 Don Clavio de Ylocos (11)
41 Miks & Tiks

KOLUM
10 Saludsodem ken ni Apo Hues
21 Dear Doc
24 Padasem Daytoy, Kailian
29 Okeyka, Apong
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
9 Netizone
18 Sadino ti Kapintasan a Pagrepasuan Para iti Eksaminasion?
19 Siled ti Kararag
22 Ania ti Ipakpakanmo iti Asom?
23 Haytek!
28 Idi Un-unana a Panawen
32 Ammuem Pay Dagitoy
34 Umno a Panagaramat Dagiti Ubbing iti Selpon
43 Ti Gasatmo Ita a Lawas
46 Dagiti Pabula ni Aesop


October 23, 2016

Panagdonar iti Dara



DAGITI KAMENG TI PHILIPPINE ARMY manipud iti 17th Infantry Battalion iti Masin, Alcala, Cagayan nga imatmatonan ti Battalion Commander a ni Lt. Col. Rembert R. Baylosis  ken dagiti estudiante iti Reserve Officers’ Training Corps iti 2nd Regional Community Defense Group, ARESCOM manipud iti Cagayan State University bayat ti panangidonarda iti dara nga inasistiran dagiti personalidad manipud iti blood bank ti Cagayan Valley Medical Center. Ti panagidonar iti dara ti maysa kadagiti aktibidad ti 44th Founding Anniversary Celebration ti 17IB. (Ella Juan Rabanal Alibania)


(Naipablaak iti Bannawag, Oktubre 31, 2016 a bilang.)

Linteg a mangisanud iti eleksion ti barangay ken SK, napirmaan

Pinirmaan ni Presidente Rodrigo Duterte ti linteg a mangpaangay iti eleksion ti Barangay ken Sangguniang Kabataan inton umay a tawen, kas impakaammo ti Malakanyang itay nabiit.

Immun-unan nga inaprobaran ti Kamara ken ti Senado ti gakat a mangisanud manipud iti Oktubre 31, 2016 iti Oktubre 31, 2017 dagiti nasao nga eleksion. Ipaay daytoy makatawen a pannakayalud-od ti eleksion ti umdas a tiempo para iti pannakaipakat ti baro a linteg a managan iti SK Reform Act wenno Republic Act (RA) 10742.

Daytoy met a linteg a mangyalud-od iti eleksion ti makuna a kaunaan a linteg a napirmaan iti babaen ti administrasion ni Presidente Duterte.

Immun-unan nga insingasing ti Presidente daytoy a pannakayalud-od ta atapenna a mabalin a mausar ti kuarta manipud iti droga a para iti eleksion.

Iwaywayat ita ti gobierno ti gubat kontra iti negosio iti droga ket mapanen a 3,000 ti napapatay a maatap nga adda pakainaiganna iti droga iti man lehitimo nga operasion dagiti polis wenno linikidar dagiti vigilante nga am-ammo a kas extra-judicial killing (EJK).


(Naipablaak iti Bannawag, Oktubre 31, 2016 a bilang.)

15 a mannurat, napili a fellow iti Cordillera Creative Writing Workshop

Sangapulo ket lima a mannurat ti napili a Fellow iti 5th Cordillera Creative Writing Workshop (CCWW) a maangay itoy nga Oktubre 24-27, 2016 iti University of the Philippines Baguio, kas impakaammo ti College of Arts and Communication (CAC) ti nasao nga unibersidad a mangimaton iti nasao a workshop.

Manipud iti nasurok a 90 a nagaplay iti entero a pagilian, napili dagiti sumaganad.

Iti benneg ti daniw: Jean Ananayo (Baguio City), Rhea Rose Berroy (Abra), Paulino Cuison (Dagupan City), Ivan Emil Labayne (Quezon City) ken Jimsmar Paulino (Baguio City);

Iti Sarita: Van Ehrick Angeles (Cainta, Rizal), Estelito Mendoza (Baguio City), Lioba Asia Piluden (Baguio City), Rai Aldrin Salvador (Caguayan City) ken Aby Weygan (Baguio City);

Iti Daniw a Para Ubbing: Ching Kilakil (Bontoc, Mountain Province);

Iti Sarita a Para Ubbing: Emmanuel John Lofamia (Sanchez Mira, Cagayan) ken Aileen Piornato (Gonzaga, Cagayan); ken

Iti Creative Nonfiction: Ivan Layugan (Baguio City) ken Arnel Murga (Iloilo City). Karaman iti fellowship ti libre a makan ken akomodasion bayat ti workshop ken alawans a para iti transportasion.

Buklen met dagiti panel ti kritiko da Prof. Grace Celeste Subido, Frank Cimatu, Francis Macansantos, Dr. Victor Emmanuel Carmelo “Vim” Nadera ken Prof. Delfin Tolentino, Jr.

Iwanwan da Junley Lazaga (kas workshop director) ken Rachel Pitlongay (kas workshop coordinator), agpada a kameng ti faculty ti Department of Language, Literature and the Arts ti CAC ti UP Baguio, ti nasao a workshop.

Idauluan met ti CAC ti UP Baguio ken ti National Commission for Culture and the Arts (NCCA) ti pannakaangay ti 2016 CCWW iti pannakitinnulong ti Komisyon sa Wikang Filipino (KWF), Manila Bulletin Publishing Corp., Mt Cloud Bookshop, UP Baguio Cordillera Studies Center, University of the Philippines Press ken Office of the Chairman ti NCCA. (J.L.Lazaga)


(Naipablaak iti Bannawag, Oktubre 31, 2016  a bilang.)

October 20, 2016

OKTUBRE 31, 2016



SARITA
4 Sangabukel a Mansanas
    Juan Al. Asuncion
8 Siit
    Melchor B. Gasmen

NOBELA
12 Ti Bastardo (31)
    Norberto D. Bumanglag, Jr.
14 Baknangtan, Kayong! (16)
     D.S. Bulong

DANIW
6 Berkakan
   Roy V. Aragon
47 Daniw a Para Ubbing
     Marlyn G. Del Rosario

SALAYSAY
18 Ti Inaunaan ti Kalaingan; ti Inaudian ti Kalang-ayan?
     Virginia A. Duldulao, Ph.D.
26 Ad-adu ti Mayitlog ti Pato no Maikkan iti Bitamina C
    Reynaldo E. Andres

KOMIKS
35 Sweet Jazmine (8)
38 Don Clavio de Ylocos (10)
41 Miks & Tiks

KOLUM
10 Saludsodem ken ni Apo Hues
23 Dear Doc
24 Padasem Daytoy, Kailian
29 Okeyka, Apong
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
9 Netizone
16 Biag ni Ilokano
17 Siled ti Kararag
21 Dagiti Biddut iti Panagtaraken iti Pusa
22 Haytek!
28 Idi Un-unana a Panawen
32 Ammuem Pay Dagitoy
34 Umno a Panangaramat iti LPG a Paglutuan
43 Ti Gasatmo Ita a Lawas
46 Dagiti Pabula ni Aesop

October 17, 2016

Para Kadagiti Agdadamo a Mannurat: Salip iti Sarita ti 19th AMMAFLA

Agawaten ti Secretariat ti AMMA Foundation Literary Awards (AMMAFLA) kadagiti entry para iti Salip iti Sarita ti Maika-19 nga AMMAFLA. Aggibus ti salip iti Enero 31, 2017.

Nairanta ti pasalip ti AMMAFLA kadagiti agdadamo a mannurat iti Ilokano a “kas pangaron iti reggetda a mangpatadem pay iti plumada.”

Kas kadagiti sarita a nangabaken iti pasalip ti AMMAFLA, mairamanto met a mailibro dagiti sarita a mangabak iti daytoy nga edision ti AMMAFLA, kas kinuna dagiti mangimaton iti AMMAFLA a da Amado ken Gloria Yoro, Francisco ken Aurora Ponce, ken Alfredo ken Cherry Quibol (agpapada nga agindegen iti Hawaii).

Inruar ti AMMAFLA ti librona a Dagiti Premiado a Sarita (1997-2014) iti kombension ti GUMIL idi 2015. Naipalaon iti nasao nga antolohia dagiti nangabak a sarita iti AMMAFLA sipud narugian ti salip idi 1997 agingga iti 2014.

Dagiti pagannurotan ti maika-19 nga edision ti salip.

1. Aggibus ti salip iti Enero 31, 2017.

2. Agpaay laeng ti salip kadagiti agdadamo a mannurat iti Ilokano. Iti daytoy a salip, maibilang nga agdadamo ti mannurat no awan pay ti naipablaak a saritana iti Bannawag. No adda man, di koma nasursurok ngem tallo ti naipablaakna agingga iti Oktubre 24, 2016 a bilang ti nasao a magasin.

3. Siwawayawaya ti autor a mangpili iti topiko ti isalipna a sarita.

4. Agatiddog ti sarita iti 10-15 a panid iti short bond paper, naimakinilia, wenno saan, naikompiuter iti doble espasio (Times Roman Medium 12 pts. iti computer), ken adda espasio wenno margin a maysa a pulgada iti amin nga igid ti papel.

5. Maysa laeng a sarita ti mabalin nga isalip ti tunggal autor.

6. Nasken nga orihinal, di pay naipablaak wenno naadaw iti ania man a sinurat ti isalip. Nasken met a saan a naipatarus ti pakisalip manipud iti sabali a lengguahe ken nasken a bukod a putar ti autor ti pakisalipna.

7. Ti parbo a nagan ti autor ti agparang a naganna a kas autor ti sarita. Ipatulod ti pakisalip iti uppat a nadalus a kopia ken pakuyogan iti narikpan a sobre a naglaon iti pudno ken parbo a nagan ti autor, paulo ti pakisalip, kaudian a ladawan ken ababa a pakasaritaan ti biag ti autor, adres ti agdama a pagnaedan, agraman e-mail address ken numero ti selpon wenno telepono a mabalin a pakakontakan iti autor. Iti rabaw ti sobre, isurat ti paulo ti sarita ken parbo a nagan ti autor.

8. Ipatulod ti pakisalip babaen ti koreo wenno personal nga idatag iti daytoy nga adres: Short Story Writing Contest, 19th AMMAFLA, c/o Bannawag, Manila Bulletin Publishing Corp., Muralla corner Recoletos Sts., Intramuros, 1002 Manila. Nasken a maawat ti Bannawag ti pakisalip iti di naladladaw ngem iti Enero 31, 2017. Saan a mairaman iti salip ti entry a maawat kalpasan dayta a petsa.

9. Dagiti gunggona: Umuna a Gunggona, P10,000.00; Maikadua, P8,500.00; ken Maikatlo, P7,000.00. Maipaayan pay dagiti mangabak iti sertipiko ti pammadayaw. Adda met karbengan dagiti hurado a mangkissay iti bilang dagiti mangabak no awan ti makapatar iti bukodda a pagbatayan dagiti mangabak. Mabalinda met ti mangparnuay iti sabali a gunggona, no kasapulan.

10. Mapakaammuanto dagiti mangabak no kaano ken sadino ti pakapadayawanda. No met matakuatan a sinalungasing ti mangabak ti Pagannurotan Blng. 2 wenno ti Blng. 6, maibabawi ti premiona ken mapawilanton a makisalip iti ania man a pasalip ti AMMAFLA.


(Naipablaak iti Bannawag, Oktubre 24, 2016 a bilang.)

Mutia ti HRAB



MUTIA TI HRAB. Nakoronaan a Miss Hotel and Restaurant Association of Baguio 2016 ni Karen Marie Mabalo (tengnga) ti University of Baguio iti naangay a coronation night idi Huebes, Oktubre 6, iti Convention Center, kas paset ti tinawen a pannakarambak ti Hotel and Restaurant Tourism Week, ti kadakkelan a culinary event  iti Siudad ti Baguio. Nairaman kadagiti napadayawan da 2nd Runner-up Ma. Nerissa Shawyer ti UB, 1st Runner-up Cristine Pacleb ti Saint Louis University, 3rd Runner-up Maria Cristina Ortega ti SLU ken 4th Runner-up Maria Camille Dalmacio ti UB. (Zaldy Comanda)


(Naipablaak iti Bannawag, Oktubre 24, 2016 a bilang.)

Panangsaranget iti didigra, mapapigsa

Maysa ti Filipinas kadagiti innem a pagilian a pakaiwayatan ti programa a supsuportaran ti European Union a maawagan iti Partnership for Building Capacities in Humanitarian Action (PEACH).

Inwayat daytoy itay nabiit ti National Secretariat for Social Action (NASSA)/Caritas Philippines, ti social action arm ti Catholic Bishops’ Conference of the Philippines (CBCP), tapno mapapigsa ti kabaelan ti Simbaan Katoliko iti panagresponde kadagiti didigra iti 11 a diosesis iti Luzon ken Visayas.

Kuna ni NASSA/Caritas Philippines Executive Secretary Fr. Edwin Gariguez a yaaddang daytoy iti programa ti Simbaan para iti pagimbagan dagiti umili, iti pannakitinnulong dagiti nadumaduma a diosesis iti Filipinas.

Maiwayat ti PEACH agingga iti Marso 2018. Katinnulong iti programa ti Caritas Austria, Caritas Romania, Caritas Czechoslovakia ken ti opisina rehional ti Caritas Asia.

Iwaywayat met ti NASSA/Caritas Philippines ti climate change adaptation program a maawagan iti FARM-FIRST iti walo a probinsia tapno matulongan dagiti mannalon ken mangngalap a makibagay iti panagbaliw ti tiempo ken maipanamnama ti kaadda ti umdas a taraon ken ti panangaywan iti aglawlaw.

Malaksid iti Filipinas, maiwayat met ti programa iti India, Pakistan, Bangladesh, Myanmar ken Nepal.


(Naipablaak iti Bannawag, Oktubre 24, 2016 a bilang.)

October 15, 2016

OKTUBRE 24, 2016



SARITA
4 Iti Daan a Balay da Amang
    Estela A. Bisquera-Guerrero

NOBELA
8 Baknangtan, Kayong! (15)
     D.S. Bulong
12 Ti Bastardo (30)
    Norberto D. Bumanglag, Jr.

DANIW
6 Panagkalap iti Lenned
    Ronnie E. Aguinaldo
17 Dua a Daniw
     N.M.E. Valdez
47 Daniw a Para Ubbing
     Leona J. Corpuz

SALAYSAY
18 Wen, Nasamay nga Agas ti Agkabaw ti Lana ti Niog
     Remedios S. Tabelisma-Aguillon
26 Ti Puraw a Buot a Kas Pungisidio ken Pestisidio
    Reynaldo E. Andres

KOMIKS
35 Sweet Jazmine (7)
38 Don Clavio de Ylocos (9)
41 Miks & Tiks

KOLUM
10 Saludsodem ken ni Apo Hues
15 Dear Doc
24 Padasem Daytoy, Kailian
29 Okeyka, Apong
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
9 Netizone
14 Siled ti Kararag
16 Biag ni Ilokano
20 Nabanglo Met Laeng ti Sang-aw ti Asom?
22 Haytek!
23 Dagiti Pagannurotan ti 19th AMMAFLA
28 Idi Un-unana a Panawen
32 Ammuem Pay Dagitoy
34 Kasano a Maliklikan ti Panagaapa Dagiti Annak?
43 Ti Gasatmo Ita a Lawas
46 Dagiti Pabula ni Aesop

October 6, 2016

Panagibaut



PANAGIBAUT. Ibabaut ti agtutubo a ni Juanito Palor, Jr. ti ginapasda a pagay iti kataltalonan ti Caniugan, Sta.Teresita, Cagayan babaen ti tiako iti pagibautan. Nupay daan a teknolohia daytoy, adu ti agkuna a nasamsamay daytoy ngem ti depedal a thresher. Ken amang nga environmentally friendly ngem dagiti makinaria a kas iti reaper. (Roselyn C. Campano)

(Naipablaak iti Bannawag, Oktubre 17, 2016 a bilang.)

Pisos, mairaman kadagiti natalged a kuarta iti Asia – BSP

Maibatay iti Bangko Sentral ng Pilipinas (BSP), mairaman ti pisos kadagiti katatalgedan a kuarta iti rehion ti Asia iti laksid a nagsuek ti balorna itay napan a bulan a nakadanonanna pay iti kababaan a balorna iti uneg ti napalabas a pito a tawen.

Kuna ti Bangko Sentral a ti pisos ti maikatlo a kababaan ti panagbaliw ti balorna iti inaldaw iti 1.21% kontra kadagiti sabsabali a kuarta; sarunuenna ti rupee iti 0.86% ken ti yuan iti 1.11%.

Kimmapsut itay napan a bulan dagiti kuarta dagiti dumurdur-as a pagilian, a pakairamanan ti Filipinas, kontra iti doliar, nangruna kalpasan ti taripnong nga inangay ti Federal Reserve ti U.S. itay Septiembre 20-21, a nangiladawan iti “kinaawan ti natalged a merkado.”

Nagpatingga ti pisos iti P48.50 kontra iti doliar itay Septiembre 30, ti kababaan a nadanonna manipud idi nagsuek ti balorna iti P48.62 idi Septiembre 4, 2009.

Kakapsutan iti rehion ti yen nga addaan iti inaldaw a fluctuation average (panagbaba-panagpangato) iti 5.46%.

Iti bitlana itay nabiit, kiniddaw ni BSP Governor Amando M. Tetangco, Jr. kadagiti imbestor nga ibasarda koma ti pangngeddengda maibatay iti solido nga ekonomia ti pagilian a saan ket a kadagiti mapaspasamak iti politika.

Kinuna pay ni Tetangco nga adda iti umno a dana ti Filipinas tapno agtalinaed a sarikedked ti natibker a panagdur-as, iti laksid ti sangalubongan nga ikakapsut ti merkado (panaglilinnako-panaggiginnatang).


(Naipablaak iti Bannawag, Oktubre 17, 2016 a bilang.)


October 5, 2016

Umuna a Salip iti Sarita ti Albalos Awards

Maluktan iti daytoy nga Oktubre ti Umuna a Salip iti Sarita ti Mario Abinsay Albalos Foundation Literary Awards para kadagiti amin a mannurat iti Ilokano.

Nabangon ti literary foundation a naipanagan iti daydi Dios-ti-aluadna a mannurat ti Bannawag Mario A. Albalos, tubo iti Cabaroan Daya, Siudad ti Vigan, napadayawan a Pedro Bukaneg awardee ken umuna a Thomas Jefferson awardee iti Estado ti Hawaii a nagnanaedanna agingga iti pimmusay idi Marso 3, 1991 iti edadna a 40.

Agpaay met a mangimaton iti pasalip ti foundation dagiti gagayyem daydi MAA a da Amado I. Yoro, Jun Abinsay, Priscilla Dela Cruz (agnanaed iti Hawaii) ken Jenny Alcausin (agnanaed iti California) iti pannakitinnulong dagiti kameng ti Bannawag.

Ti kompleto a pagannurotan:

1. Marugian ti salip iti Oktubre 1, 2016 ken agpatingga iti Marso 3, 2017.

2. Silulukat ti salip kadagiti amin a mannurat iti Ilokano malaksid kadagiti mangimaton ken asideg a kakabagianda, ken kadagiti kameng ti Bannawag.

3. Maysa laeng a sarita ti mabalin nga isalip ti tunggal mannurat a makisalip.

4. Nasken a bukod a putar ti autor ti maisalip, saan pay a naipablaak iti ania man a magasin, ken saan a naipatarus manipud iti ania man a lengguahe.

5. Agatiddog ti pakisalip iti 12-20 a panid iti short bond paper, nai-computer (agusar iti Times New Roman, Font Size 12) iti doble espasio ken addaan iti maysa a pulgada a margin iti amin nga igid ti bondpaper. Masapul met nga agusar iti MS Word format.

6. Ti parbo a nagan ti autor ti agparang a naganna a kas autor ti sarita. Ipatulod ti pakisalip iti uppat a nadalus a kopia ken mapakuyogan iti narikpan a sobre a naglaon iti pudno ken parbo a nagan ti autor, paulo ti pakisalip, kaudian a ladawan ken ababa a pakasaritaan ti biag ti autor, adres ti agdama a pagnaedan, agraman e-mail address ken numero ti selpon wenno telepono a mabalin a pakakontakan iti autor. Iti rabaw ti sobre, isurat ti paulo ti sarita ken parbo a nagan ti autor.

7. Ipatulod ti pakisalip babaen ti koreo wenno personal nga idatag iti daytoy nga adres: 1st Short Story Writing Contest, Mario Abinsay Albalos Foundation Literary Awards c/o Bannawag, Manila Bulletin Publishing Corp., Muralla corner Recoletos Sts., Intramuros, 1002 Manila. Nasken a maawat ti Bannawag ti pakisalip iti di naladladaw ngem iti Marso 3, 2017. Saan a mairaman iti salip ti entry a maawat kalpasan dayta a petsa. Ipatulod met ti soft copy ti sarita iti daytoy nga e-mail address: albalosawards@gmail.com.

8. Dagiti gunggona: Umuna a Gunggona, P15,000.00; Maikadua, P12,00.00; ken Maikatlo, P10,000.00. Maipaayan pay dagiti mangabak iti sertipiko ti pammadayaw. Adda met karbengan dagiti hurado a mangkissay iti bilang dagiti mangabak no awan ti makapatar iti bukodda a pagbatayan dagiti mangabak. Mabalinda met ti mangparnuay iti nayon wenno sabali a gunggona, no kasapulan.

9. Saan a mabalusingsing ti pangngeddeng dagiti hurado malaksid no maduktalan a nasalungasing ti Pagannurotan Bilang 4. No kasta, mapukawto metten ti karbengan ti autor a makisalip pay kadagiti sumarsaruno a pasalip ti Albalos Awards.

10. Makipagtagikua ti Mario Abinsay Albalos Foundation Literary Awards kadagiti mangabak a sarita nupay adda latta karbengan dagiti autor iti copyright dagitoy. Maaddaan pay ti agpasalip iti karbengan a mangipablaak kadagiti mangabak a sarita iti ania man a wagas a kayatna nga aramaten.

11. Mapakaammuanto dagiti mangabak no kaano ken no sadino a maangay ti seremonia ti pammadayaw.


(Naipablaak iti Bannawag, Oktubre 17, 2016 a bilang.)

OKTUBRE 17, 2016



SARITA
4 “Cannot Be Reached”
   Ariel S. Tabag

NOBELA
 8 Ti Bastardo (29)
    Norberto D. Bumanglag, Jr.
12 Baknangtan, Kayong! (14)
     D.S. Bulong

DANIW
6 Baro
   Roy V. Aragon
47 Daniw a Para Ubbing
    Leonora R. Melchor

SALAYSAY
14 Maysa nga Aldaw, Ilokano ti Naginakbay
     Ric Agnes
26 Ti Aba a Kas Sulnit ti Mais a Ramen ti Komersial a Tuyo
    Reynaldo E. Andres

KOMIKS
35 Sweet Jazmine (6)
38 Don Clavio de Ylocos (8)
41 Miks & Tiks

KOLUM
10 Saludsodem ken ni Apo Hues
19 Dear Doc
24 Padasem Daytoy, Kailian
29 Okeyka, Apong
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
9 Netizone
16 Biag ni Ilokano
17 Siled ti Kararag
18 Ania ti Acid Rain?
20 Dimo Pakpakanen ti Tarakenmo a Tumatayab Kadagitoy a Taraon
22 Haytek!
23 Dagiti Pagannurotan ti 1st Albalos Awards
28 Idi Un-unana a Panawen
32 Ammuem Pay Dagitoy
34 Kinatalged ti Taraon iti Panawen ti Kalamidad
43 Ti Gasatmo Ita a Lawas
46 Dagiti Pabula ni Aesop

October 2, 2016

In-inut Manen a Nagsublida...



IN-INUT MANEN A NAGSUBLIDA ITI SIGUD A PAGSAPULANDA dagiti agindeg iti Isla Manicani, Eastern Samar kalpasan a dinuprak ida ti Bagyo Yolanda tallo a tawenen iti napalabas. Kas kadagiti taga-Tacloban,  nairaman met dagitoy a napakaruan iti didigra ket agingga kadagitoy, makita pay laeng ti lemma a gapuanan ti bagyo. Pagimbaganna, nakasursuron dagitoy nga agsagana no kasta nga adda dumteng a kalamidad. (Leilanie G. Adriano)

(Naipablaak iti Bannawag, Oktubre 10, 2016 a bilang.)

Dua nga antolohia dagiti sarita ti GF Tagnawa Series, maisagsagana

Maisagsaganan ti dua nga antolohia dagiti ababa a sarita iti Tagnawa Series a proyekto a panagipablaak ti GUMIL Filipinas nga iwardas ti Editorial Committee ti gunglo.

Umuna ti Tagnawa 3, antolohia dagiti speculative fiction nga Ilokano nga editen da Roy V. Aragon, direktor ti GF ken chairman ti nasao a komite, ken Ariel S. Tabag, poetry editor ti Bannawag ken sekretario-heneral ti GF; ken maikadua, ti Tagnawa 4, ti antolohia dagiti ababa a sarita nga Ilokano dagiti babbai a mannurat nga editen da Linda T. Lingbaoan-Bulong, Sherma E. Benosa, ken Rhea Rose D. Berroy.

Maikatlo ken maikapat dagitoy a libro, kas panagsaganadda, iti Tagnawa Series, a manamnama a mairuar iti umay a tawen, 2017.

Pagalagadan iti panagidatag iti Tagnawa 3:

1. Dua a sarita ti idatag. Nasaysayaat no di pay naipablaak ti idatag ngem mabalin met no naipablaaken iti magasin, wenno dadduma pay a babasaen wenno iti Internet. No naipablaaken, masapul nga adda notasion iti baba ti sinurat mainaig iti detalye ti pannakaipablaak daytoy. Maysa laeng ketdi a sarita ti mairaman, ken segun iti pangngeddeng dagiti editor. Karbengan dagiti editor ti di mangiraman kadagiti maidatag a sarita a di makapatar iti pagrukodanda, ken iti sabsabali pay a makaigapu.

2. Speculative fiction ti idatag a sarita. Kayatna a sawen, ania man a sarita maipanggep iti pantasia, di nakappapati ngem pudno, magic realism, science fiction, supernatural fiction, superhero fiction, ken alternate history.

3. Mapakuyogan dagiti sarita iti pakasaritaan ti biag ti autor, karaman dagiti contact information (adres, numero ti telepono/selpon, e-mail). Pakuyogan iti kaudian a retrato iti .jpeg a file format.

4. Ipatulod iti e-mail dagiti sarita, iti rvaragon@gmail.com wenno iti asseng.tabag@gmail.com.

5. Masapul a maawat dagiti sarita iti di naladladaw ngem Oktubre 31, 2016.

6. Agdalan dagiti sarita iti nainget a panagarisit dagiti editor. Mapakaammuan dagiti autor a mairaman iti libro makabulan kalpasan ti naituding a deadline.

7. Para iti dadduma pay a detalye, makiuman kadagiti editor babaen dagiti e-mail address iti ngato.

Pagalagadan iti panagidatag iti Tagnawa 4:

1. Silulukat ti antolohia iti amin a babbai a mannurat. Dua a sarita ti idatag. Nasaysayaat no di pay naipablaak ti idatag ngem mabalin met no naipablaaken iti magasin, wenno dadduma pay a babasaen wenno iti Internet. No naipablaaken, masapul nga adda notasion iti baba ti sinurat mainaig iti detalye ti pannakaipablaak daytoy. Maysa laeng ketdi a sarita ti mairaman iti antolohia, ken segun iti pangngeddeng dagiti editor. Karbengan dagiti editor ti di mangiraman kadagiti maidatag a sarita a di makapatar iti pagrukodanda.

2. Uray ania a sarita ti idatag, nawaya ti tema a suraten, ken iti tradisional man wenno eksperimental a wagas. Nupay kasta, maikkan iti importansia dagiti sarita a mangtratar iti pakaseknan ti babbai, gender issues kas iti gender equality ken gender sensitivity, kdp.

3. Mapakuyogan dagiti sarita iti pakasaritaan ti biag ti autor, karaman dagiti contact information (adres, numero ti telepono/selpon, e-mail). Pakuyogan iti kaudian a retrato iti .jpeg a file format.

4. Ipatulod iti e-mail dagiti sarita, iti matronatres@yahoo.com, sherma.benosa@gmail.com, wenno rhearoseberroy@gmail.com. Mabalin pay nga ited babaen ti private message iti Facebook account dagiti editor.

5. Masapul a maawat dagiti sarita iti di naladladaw ngem Oktubre 31, 2016.

6. Agdalan dagiti sarita iti nainget a panagarisit dagiti editor. Mapakaammuan dagiti autor a mairaman iti libro makabulan kalpasan ti naituding a deadline.

7. Para iti dadduma pay a detalye, makiuman kadagiti editor babaen dagiti e-mail address iti ngato.


(Naipablaak iti Bannawag, Oktubre 10, 2016 a bilang.)

October 1, 2016

OKTUBRE 10, 2016



SARITA
4 Dear Jim
   Norberto D. Bumanglag, Jr.

NOBELA
12 Ti Bastardo (28)
    Norberto D. Bumanglag, Jr.
14 Baknangtan, Kayong! (13)
     D.S. Bulong

DANIW
6 Salugsog
   Daniel L. Nesperos
23 Makitak ‘Toy Pusok Kadagita Matam
    Amado I. Yoro
47 Daniw a Para Ubbing
    Jeannette Diana C. Blanco

SALAYSAY
8 Daytoy nga Estasion ti Radio ti Rangtay ni Filipino iti Tangatang
  Ric Agnes
26 Nasustansia Dagitoy a Pagpakan iti Manok
   Reynaldo E. Andres

KOMIKS
35 Sweet Jazmine (5)
38 Don Clavio de Ylocos (7)
41 Miks & Tiks

KOLUM
10 Saludsodem ken ni Apo Hues
19 Dear Doc
24 Padasem Daytoy, Kailian
29 Okeyka, Apong
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
15 Netizone
16 Biag ni Ilokano
17 Siled ti Kararag
20 Ti Asom ken ti Beterinario
21 Ammom Met Laeng ti Pakasaritaan ti Bukodmo nga Ili?
22 Tao, Lugar, Pasamak
28 Idi Un-unana a Panawen
32 Ammuem Pay Dagitoy
34 Pannangan Dagiti Ubbing iti Restauran
43 Ti Gasatmo Ita a Lawas
46 Dagiti Pabula ni Aesop