November 30, 2012

Disiembre 10, 2012




SARITA
4 Anniniwan ti Angin
    Don Pacis

NOBELA
24 Apo Baboy Partylist (7)
     Jose A. Bragado
28 Daga a Nakayanakan (34)
    Juan Cabreros Laya
32 Operation Medalla Cartel (19)
     Norberto D. Bumanglag, Jr.

DANIW
 7 Maisublik La Koma ti Panawen
    Rachelle G. Garvida
30 Agsasaraktayto Manen
     Rolando U. Seguro, Jr.
48 Nayallatiw a Semilia
     Amado I. Yoro

SALAYSAY
 8 Gapu Ta Daytoy ti Linteg (65)
    Hues Joven F. Costales (Ret.)
12 Makapasangit Dagiti “Pyramid” iti Filipinas
     Neyo Mario E. Valdez
40 Kasla Mula ti Anghel ti Silit’ Sairo
     Reynaldo E. Andres

KOMIKS
17 Tres Muchos (80)
20 Aritosan (6)
22 Miks & Tiks

KOLUM
14 Okeyka, Apong!
16 Dear Doc
37 Kastoy, Kapid, Ditoy Hawaii
38 Ading Kosinera
39 TIPS
42 Padasem Daytoy, Kailian

PAGLINGLINGAYAN
44 Showbiz
46 We Downloads Songs, Kdp.
47 Sinniriban
47 Sapukas
47 Sudoku
47 Aggarakgaktayo

DADDUMA PAY
 2 Ti Makunami
10 “Agsursuratka Met?”
15 Tao, Lugar, Pasamak
26 Siled ti Kararag
27 Ay, Anakko, Dika Umul-uli iti Kayo!
29 Txtm8
31 Liningta a Saba Wenno French Fries?
34 Kayatmo nga Ipateg Koma ti Anakmo ti Panagbasabasa?
35 Ti Gasatmo Ita a Lawas
36 Ammuem Pay Dagitoy

November 24, 2012

Panagpadawi iti Pangaldaw



PANAGPADAWI ITI PANGALDAW. Naanus daytoy a mangngalap nga agliwliwliw iti baybay uray iti agtindek bayat a kaugotna iti Saoang, San Juan (Lapog), Ilocos Sur. (Roy V. Aragon)


(Naipablaak iti Bannawag, Disiembre 3, 2012 a bilang.)

Libro dagiti dandaniw a para ubbing, mayalnag


Mayalnag ti Bullalayaw, antolohia dagiti daniw a para ubbing ti Grupo Bullalayaw inton Dis. 8, 2012, 7:30-10 a.m. iti Ballesteros West Central School, Centro West, Ballesteros, Cagayan iti panangsangaili da Mario A. Rosario ken Dr. Silvino B. Siddayao, prinsipal ken district supervisor, kas panagsaganadda.

Nainaw ti nasao a proyekto iti panggep dagiti mannurat a Cagayano a makitinnulong iti panagrangpaya ti K to 12 Curriculum kangrunaanna iti MTB-MLE a programa ti Department of Education (DepEd), malaksid iti agtultuloy a pannakaparangpaya ti Literatura Ilokana ken ti pannakapatibker ti pannakausar ti nariingan a pagsasao kadagiti umun-una a grado iti pagadalan elementaria.

Buklen ti Grupo Bullalayaw dagiti kangrunaan a mannaniw iti Cagayan ken iti kabangibangna a Kalinga, a kaaduan kadagitoy ti kameng ti GUMIL Cagayan.

Nagpaay nga editor da Johmar R. Alvarez, Roy V. Aragon, Dexter M. Fabito, Freddie Pa. Masuli ken Ariel S. Tabag. Immaldit met ti Saniata Publications.

Paset ti nasao a panagyalnag iti Christmas Program ti GUMIL Cagayan nga idauluan da GC President Arthur Urata ken GF Vice President Vilmer Viloria a maangay inton Disiembre 7-8 iti Usita’s Beach Resthouse, Cabuloan East, Ballesteros, Cagayan iti panangsangaili ti pamilia da Board Member Jessie ken Lanie Usita ken iti pannakitinnulong da Engr. Rolando G. Torida ti DPWH ken Alex V. Yadao ti ALVIYA Literary Foundation.

Kadagiti interesado a tumabuno iti panagyalnag wenno gumatang iti kopia, mabalin a kontaken dagiti sumaganad a numero para iti reserbasion: 0948-986-4481 (F.P. Masuli), 0918-682-6330 (A.S. Tabag), 0906-967-0519 (D.M. Fabito), 0917-618-1377 (J.R. Alvarez) ken 0917-649-7154 (R.V. Aragon). (Freddie Pa. Masuli)


(Naipablaak iti Bannawag, Disiembre 3, 2012 a bilang.)

GF, agawaten iti nominasion para iti Pedro Bucaneg, Florentino ken Valdez award


Agawaten ti GUMIL Filipinas, babaen ti Awards Committee daytoy, kadagiti nominasion para iti 2013 Pedro Bucaneg Award, 2013 Leona Florentino Award, ken 2013 Cornelio Valdez Award.

Ti Pedro Bucaneg Award ti kangatuan a pammadayaw a maipaay ti GF, ti gunglo dagiti mannurat nga Ilokano iti Filipinas ken iti ballasiw-taaw, iti asino man a mannurat nga Ilokano a nakaipaay, babaen, kangrunaana, iti bagi ti sinuratna, iti di magatadan a tulong iti pannakaparangpaya ken pannakasaluad ti Literatura Ilokano.

Ti met Florentino Award ti bersion ti Bucaneg Award a para kadagiti mannurat nga Ilokana.

Maipaay met ti Cornelio Valdez Award iti asino man a kameng ti GF kadagiti kamengna “a nakaipaay iti naisangsangayan a gapuanan para iti isasantak ti gunglo.”

Dagiti laeng chapter ti GF wenno dagiti naipaayanen kadagiti naagapad a pammadayaw ti mabalin nga aginominar.

Deadline iti panagipatulod iti nominasion: Pebrero 28, 2013.

Para iti kompleto a pagannurotan, ag-e-mail iti Chair ti Awards Committee iti: clesbrambaud@gmail.com.
Mapadayawan dagiti mapili a mannurat bayat ti Maika-45 a Kombension Nasional ti GF iti Kalgaw 2013.


(Naipablaak iti Bannawag, Disiembre 3, 2012 a bilang.)

BANNAWAG -- Disiembre 3, 2012




SARITA
4 “Siak ti OIC Prinsipala!”
    Efren A. Inocencio

NOBELA
24 Apo Baboy Partylist (6)
     Jose A. Bragado
28 Daga a Nakayanakan (33)
    Juan Cabreros Laya
32 Operation Medalla Cartel (18)
     Norberto D. Bumanglag, Jr.

DANIW
 7 Panagur-uray
    Pearl Lovedyn A. Dacuag
30 Umas-asidegen ti Baybay
     Jobert M. Pacnis
48 Rinibu nga Addang
     Noli S. Dumlao

SALAYSAY
 8 Gapu Ta Daytoy ti Linteg (64)
    Hues Joven F. Costales (Ret.)
10 Ti Babai iti Nagsulian ti Central Avenue ken First Street
     Arnold C. Baxa
12 Agkandidato Isu nga Ita Laeng nga Agparang?
     Neyo Mario E. Valdez
40 Agaramidka iti Bukodmo a LABS
     Reynaldo E. Andres

KOMIKS
17 Tres Muchos (79)
20 Aritosan (5)
22 Miks & Tiks

KOLUM
14 Okeyka, Apong!
16 Dear Doc
37 Kastoy, Kapid, Ditoy Hawaii
38 Ading Kosinera
39 TIPS
42 Padasem Daytoy, Kailian

PAGLINGLINGAYAN
44 Showbiz
46 No Leftern, Kdp.
47 Sinniriban
47 Sapukas
47 Sudoku
47 Aggarakgaktayo

DADDUMA PAY
 2 Ti Makunami
15 Tao, Lugar, Pasamak
26 Siled ti Kararag
27 “Ma’am, Masakit ti Anakko…”
29 Txtm8
31 Kaano a Di Nasayaat ti Pannakibarbarkada?
34 Rumbeng Kadi a Tulongan Dagiti Nagannak Dagiti annakda Iti Asaynmentda?
35 Ti Gasatmo Ita a Lawas
36 Ammuem Pay Dagitoy

November 18, 2012

Ay, Nagadun a Leddeg




AY, NAGADUN A LEDDEG! Napan dinayo dagitoy a taga-Balingit, Pamplona, Cagayan ti nagala iti leddeg iti kataltalonan ti Barangay Nagattatan, kabangibangda a barangay, tapno adda sidaen ti pamiliada. Kaadu ti maala isu nga iti nakurang a kaguduat’ oras, nakaala ti maysa kadakuada iti nasurok a sangasalup. Malaksid a nasustansia ti leddeg, nakainutda payen iti kuarta ta libre daytoy. Naimas ti leddeg a magisar ken magettaan. (Dexter Marin Fabito)

(Naipablaak iti Bannawag, Nobiembre 26, 2012 a bilang.)

643 a nurse, maiwaras iti probinsia


Panggep ti Department of Health (DoH) ti mangibaon iti 643 a rehistrado a nurse iti daytoy umay a tawen iti Rehion 2 a kas paset ti maiwaywayat a Registered Nurses for Health Enhancement and Local Service Project (RNHeals).

Kinuna ni Ruth Padilla, consultant iti DoH, a maiwaras dagiti nurse kadagitoy a probinsia: 203 iti Cagayan, 255 iti Isabela, 101 iti Nueva Vizcaya, 42 iti Quirino ken 42 iti Batanes Island.

Innayon ni Padilla nga agaw-awatdan kadagiti aplikasion para iti screening, evaluation ken posible a pannakaiwaras dagiti kualipikado a nurse.

Kinuna pay ni Padilla nga agserbi dagiti 643 a rehistrado a nurse kadagiti Centers for Health Development (CHD), kadagiti ospital ti departamento, ken kadagiti rural health unit.

Daytoy a proyekto ket pangsungbat ti DoH iti panagkurkuran kadagiti nurse tapno maipaayan ti publiko iti nasayaat a serbisio a para iti salun-at.


(Naipablaak iti Bannawag, Nobiembre 26, 2012 a bilang.)

Coloma, sangaili dagiti Rotarian ken agiwarwarnak


Ni Presidential Communications Officer Herminio “Sonny” B. Coloma, Jr. ti nagbalin a kangrunaan a sangaili ti Rotary District 3790 Area 2 iti kaudian a mitingda iti Stadia Convention, Dagupan City.

Kiniddaw ni Coloma ti pannakikammayet  ken pannakitinnulong dagiti umili kadagiti gannuat ti gobierno  gapu ta makatulong daytoy iti dakkel iti nadalus ken nalinteg a panangituray a kas iti ilunglungalong ni Presidente Noynoy Aquino.

Dagiti dadaulo iti daytoy a pasken: Assistant Governor Alfredo T. Caguioa; Tony Manuel, Presidente ti Rotary Club Downtown Dagupan; George Perrera ti Dagupan East; Ernie Llanillo, Central Pangasinan; Melody Padilla, Uptown Dagupan; Bing Van Tooren, Central Pangasinan ken Belen Montesa, Uptown Dagupan.

Mairaman kadagiti nakipartisipar a lokal a gunglo ti Lingayen, Lingayen Gulf, San Fabian, Santa Barbara, Binmaley, Malasiqui, Mangaldan, Calasiao, San Carlos ken Urdaneta City.

Iti  isu met laeng nga aldaw, sinangaili ni Lyceum Northwestern University President Gonzalo Duque ni Coloma nga isu ti nangipatugaw kadagiti kabarbaro a kameng ti PEN wenno Poets, Essayists and Novelists, Pangasinan Chapter a pakairamanan da Sonny Villafania, Jun Velasco, Cezar Carpio, Al Mendoza ken Norma Llongoren.

Sigud a kolumnista iti Business World ni Coloma ken presidente ti Asian Institute of Management ken nagserserbi pay a District Governor ti Rotary iti Manila. (Cris M. Ilustre)


(Naipablaak iti Bannawag, Nobiembre 26, 2012 a bilang.)

“Wirawir ti Paskua,” rambakan ti GLU iti Dis. 2


Rambakan ti GUMIL La Union (GLU) ti maika-4 a “Wirawir ti Paskua” inton Disiembre 2, 2012 iti Function Hall ti Philippine Red Cross (PRC) La Union-San Fernando City Chapter a masarakan iti Widdoes St., Siudad ti San Fernando.

Itoy a panagtitipon ti pamilia GLU, mapadayawanto dagiti kameng ken development partner-na a dakkel ti naitulongda iti panagballigi dagiti proyekto ti gunglo iti napalabas a dua a tawen.

Pasetto ti ragragsak dagiti sumaganad: parlor games, paripa, dinnaniwan ken kinnantaan, ken dadduma pay. Ti GLU Youth Club ti napusgan a mangasikaso kadagitoy a paset ti programa.


(Naipablaak iti Bannawag, Nobiembre 26, 2012 a bilang.)

4th Pasnaan, agawaten iti manuskrito


Ipakaammo dagiti mangimaton iti Pasnaan, ti workshop iti panagsurat a para kadagiti agdadamo a mannurat nga Ilokano, nga agawaten kadagiti manuskrito para iti 4th Pasnaan Ilokano Writers Workshop a manamnama a maangay iti nasapa a paset ti 2013.

Sangapulo a fellow ti mapili ken maikkan iti gundaway a ma-workshop dagiti sinuratda: 2 a fellow iti sarita, 3 iti daniw, 1 iti sarita a para ubbing, 1 iti daniw a para ubbing, 1 iti sarilaysay (creative non-fiction), 1 iti bukanegan, ken 1 iti pangorona a daniw.

Maibilang nga agdadamo ti autor no saan pay a nakaipablaak iti Bannawag iti nasursurok ngem tallo a sinurat iti benneg a pakipasetanna.

Dagiti pagalagadan:

1. Nasken nga orihinal, di naipatarus manipud iti sabali a lengguahe, ken saan pay a naipablaak ti idatag a manuskrito.

2. Nawaya ti autor a mangpili iti topiko ti sinuratna.

3. Maimakinilia wenno mai-computer dagiti manuskrito para iti sarita ken sarilaysay a maidatag iti doble espasio a letter-size a coupon bond iti ania man kadagitoy a font: 12 points Roman Times Antiqua, wenno 12 points Book Antiqua. Single space laeng ti pannakaimakinilia dagiti maidatag a daniw, daniw a para ubbing, bukanegan, ken pangorona a daniw.

4. Sagdudua a gapuanan ti nasken nga idatag ti autor iti benneg ti sarita, sarilaysay, sarita a para ubbing, bukanegan, ken pangorona a daniw. Maysa laeng ketdi ti ma-workshop. Iti met benneg ti daniw, nasken a mangidatag ti autor iti uppat a gapuananna. Dua met kadagitoy ti ma-workshop.

5. Kaatiddog ti maidatag a gapuanan: Iti benneg ti sarita, 10-20 panid. Iti sarilaysay, masapul a personal essay ti maidatag nga agatiddog iti 6-10 a panid. Ti bukanegan, 6-10 panid. Iti sarita a para ubbing, 2-4 a panid. Iti daniw a para ubbing, agatiddog iti tallo nga estansa a tunggal estansa, addaan iti uppat a linia; ken addaan iti rukod ken rima dagiti linia. Saan a makedngan ti kaatiddog ti daniw ken ti daniw a pangorona.

6. Ti laeng parbo a nagan ti autor ti agparang iti manuskrito.

7. Ipatulod ti manuskrito iti daytoy nga email address: pasnaan.secretariat@gmail.com iti di naladladaw ngem Enero 31, 2013. Dua a file ti maipatulod: ti manuskrito ken ti dokumento a naglaon iti paulo ti manuskrito, parbo ken pudno a nagan ti autor, kompleto nga adres ti pagtaengan, pagtrabahuan wenno pagbasbasaan, agraman numero ti telepono wenno selpon, ken ababa a pakasaritaan ti autor.

Mapakaammuan dagiti autor dagiti mapili a gapuanan babaen ti e-mail ken/wenno awag iti telepono/selpon. (Pasnaan Secretariat)


(Naipablaak iti Bannawag, Nobiembre 26, 2012 a bilang.)

November 15, 2012

BANNAWAG -- Nobiembre 26, 2012




SARITA
4 Sagad
  Ariel S. Tabag

NOBELA
26 Apo Baboy Partylist (5)
     Jose A. Bragado
30 Daga a Nakayanakan (32)
    Juan Cabreros Laya
34 Operation Medalla Cartel (17)
     Norberto D. Bumanglag, Jr.

DANIW
 7 Suknal
    Ryan A. Dulig
28 Panaglaba
    Ronelyn B. Ramones
48 2 a Soneto
    Honor Blanco Cabie

SALAYSAY
 8 Gapu Ta Daytoy ti Linteg (63)
    Hues Joven F. Costales (Ret.)
12 Aniat’ Dakesna No Ngumina ti Sigarilio?
     Neyo Mario E. Valdez
16 Dangal ng Bayan Awardee ni Ma’am
     Virgilio D. Domaloy

KOMIKS
19 Tres Muchos (80)
22 Aritosan (4)
24 Miks & Tiks

KOLUM
14 Okeyka, Apong!
18 Dear Doc
39 Kastoy, Kapid, Ditoy Hawaii
40 Ading Kosinera
41 TIPS
42 Padasem Daytoy, Kailian

PAGLINGLINGAYAN
44 Showbiz
46 Pls. Keep Silence Gentlemen’s
47 Sinniriban
47 Sapukas
47 Sudoku
47 Aggarakgaktayo

DADDUMA PAY
 2 Ti Makunami
10 Mannurat iti Bannawag, pinadayawan ti UFCH
15 Tao, Lugar, Pasamak
29 Facebook Laeng, Dimo Kunkuna
31 Txtm8
32 Siled ti Kararag
33 Parikutmo ti Pannangan ti Anakmo?
36 Ania, Dika Agtalek ken ni Ma’am, Manang?
37 Ti Gasatmo Ita a Lawas
38 Ammuem Pay Dagitoy

Facebook Laeng, Dimo Kunkuna


Ni EDIVIR F. CASTILLO

Dimo ibaskag amin a kasal-itam iti Internet ta amangan no maaramatto dagitoy kontra kenka…

FACEBOOK? Twitter? Dua laeng dagitoy kadagiti adu a makunkuna a social networking sites. Babaen dagitoy, mabalin ti makilangen kadagiti sabsabali a tattao a pakaammuan kadagiti nagduduma nga impormasion, personal a mensahe, ladawan ken uray pay video.

Makalinglingay ti panagaramat kadagiti social networking sites isu a di mabilang ti kaadu dagiti agar-aramat. Gapu met iti daytoy, saan a maaluadan no dadduma nga adda maiposposte a nasken koma a sumagmamano kadatayo laeng koma ti makaammo ngem maammuan metten ti sangalubongan.

Kinapudnona, paneknekan dagiti pasamak nga awan ti mailimed iti Internet; mabalin nga addanto panawen a mastrek ti asino man ti account-mo ket amin a palimedmo, maibulgar.

Iti ngamin panaglatak dagitoy a social networking sites, immadu met dagiti hackers wenno saan nga autorisado a panagaramat dagiti sabali a tattao iti personal nga account dagiti agar-aramat, saan a maikanatad a mensahe nga iposte dagiti spammers, panangparnuay iti virus a mangdadael kadagiti linaon ti kompiuter, identify thieves ken dadduma pay a maibilang a kriminal nga aramid.

Iti pannakaibaskag kadagiti personal a palimed kadagiti social networking sites, kasapulan ngarud  nga annadan ken salakniban ti bukod a bagi. Manen, laglagipen a no ania ti naiserrek iti Internet, agtalinaedto lattan iti Internet.

Iti panagaramat kadagiti social networking sites, siguraduen nga awan ti peggad nga itdenna iti agdama ken iti masakbayan.
Iti ngamin Internet, awan ti makunkuna a pribado nga impormasion. Mabalin a maagaw, makopia wenno mai-save iti sabali a kompiuter amin a maiposte ti maysa nga agar-aramat iti Internet sa maiwaraston kadagiti sabsabali a tattao.

Saan ngarud nga ipalubos a maiserrek iti kompiuter dagiti pasamak, aktibidad ken ladawan a mabalin a mangipakaammo kadagiti personal a detalye. No makita pay ketdin dagitoy iti kompiuter, dagdagusen metten nga i-delete.

Maibalbalakad pay nga isina ti account ti pamilia ken dagiti trabaho iti panagaramat iti social networking site tapno masalakniban ti kaamaan. Mangiserrek iti maysa nga account para iti propesional ken publiko a biag, ken maysa iti personal a pakaseknan a mainaig laeng iti pamilia  ken kadagiti nasinged a gagayyem.  Saan pay a pagparangen dagiti nagan ti asawa, annak, kakabagian tapno masalaknibanda pay.

No iposte ti aldaw ti panagkasangay, saan nga iposposte ti tawen a pannakayanak. Ti laeng bulan ken petsa ti ikabil ta nalaklakan a maammuan ti identidad ti agar-aramat no iraman pay nga iposte daytoy.

Kanayon pay ketdi nga i-check dagiti defaults, panagsukat dagiti settings ti kompiuter ken dagiti networking sites ken siguraduen a dida iruar dagiti pribado nga impormasion.

Ipalawag kadagiti kameng ti pamilia a kasayaatan pay laeng ti pannakikomunikasion babaen ti pribado a mensahe wenno e-mail. Kadawyan ngamin nga adu  kadagiti nabiit pay laeng nga agar-aramat kadagiti social media ti saan a makaammo iti nagdudumaan ti publiko ken pribado a komunikasion iti online.

Saan nga agkitakit a mang-delete kadagiti personal a mensahe a kas iti panagpungpungtot wenno pannakiap-apa iti Internet. Nasaysayaat payen a tawagan iti telepono ti kayat a kasarita ngem ti panangiposte kadagiti makapasugkar a balikas babaen ti social media.

Pilien a nasayaat dagiti akseptaren a gagayyem iti social network. Adda dagitay mangted iti saan a pudno nga impormasion tapno makaallukoyda laeng a manggun-od kadagiti personal nga impormasion.

Iti panagsaknap ti social networking, napukpukaw metten ti kinapribado ti tunggal tao. Iti gagartayo a mangibinglay kadagiti impormasion, ditay’ mapupuotan a naidaslagtayo gayamen dagiti kasal-itantayo ken dadduma pay a banag a mamagpeggad iti kinatalged ken seguridadtayo.

Addan iti biagtayo dagitoy a social networking sites. Kas iti amin a banag, napeggad ti aglablabes a panangaramat kadagitoy. Awan kas iti agannad.—O


(Naipablaak iti Bannawag, Nobiembre 26, 2012 a bilang.)

November 12, 2012

Agamang



AGAMANG. Daytoy ti us-usaren dagiti  mannalon a pagidulinan iti apit nga irik manipud iti upland municipalities iti Ilocos Sur. Segun kadagiti agindeg, kuadrado ti sukog dagiti immuna nga agamang sa nabaliwan iti nagbukel ngem gapu ta masansan a serken ti bao dagitoy tapno kanenda dagiti naipempen nga irik, napanunotdan a kasla sukog imbudo daytoy tapno saanen a makalay-at ti bao. No napintas ti kamadana, mapan a 100 a sako ti malaon ti maysa nga agamang. (Mancielito S. Tacadena)


(Naipablaak iti Bannawag, Nobiembre 19, 2012 a bilang.)

Awan markana a produkto, diyo gatangen


Namallaag ti Food and Drugs Administration (FDA) iti publiko nga agannadda iti igagatangda kadagiti taraon ken dida koma gatangen dagiti produkto nga awanan iti marka (label) tapno makasigurado a natalged dagitoy.

Impaulog ni FDA Deputy Director Nazarita Tacandong ti ballaag mainaig iti umadani a Paskua nga adu ti aggatang kadagiti produkto a para iti Noche Buena.

Segun ken ni Tacandong, saan a rebbeng a gatangen dagiti taraon nga awanan iti marka, kas koma kadagiti delata.

Kuna ni Tacandong a delikado ti delata nga awanan iti marka wenno label gapu ta di ammo no ania ti nagyan daytoy.

Innayon pay daytoy a liklikan koma met ti publiko ti gumatang kadagiti produkto a nagpason ti “expiration date” dagitoy uray no addaan daytoy iti marka wenno label. No ngamin nagpason ti expiration date ti taraon, mabalin a saanen a natalged pay nga ipauneg.

Kasta met dagiti delata a nagkuppit wenno simmalto wenno bimsog ti kalubna, saanen a rebbengna a gatangen pay ta dakkel ti posibilidadna nga adda bassit nga abut daytoy a di makita ken mabalin a sinerrek ti mikrobio; ngarud, makadangran iti salun-at.


(Naipablaak iti Bannawag, Nobiembre 19, 2012 a bilang.)

Dua a libro ti GIS, maisagsagana


Dua a libro iti literatura ti isagsagana ita ti GUMIL Ilocos Sur (GIS) a manamnama a yalnagna inton 2014 a panangrambak ti gunglo iti nabalitokan nga anibersariona.

Kinuna ni Jerry B. A. Malamion, sekretario ti GIS, a maawagan dagitoy iti Lakasa, antolohia dagiti naisangayan a sarita dagiti mannurat a patanor ti Ilocos Sur, ken Kinanalmeng, antolohia dagiti napili a putar dagiti mararaem a mannaniw ti probinsia.

Napusgan da Arsenio B. Cortez, Benjamin P. Pacris, ken Dr. Ed H. Angco a kas editor dagiti dua a libro.
Mairaman iti listaan dagiti mannurat iti sarita a mayantolohia dagiti premiado a gapuanan da Jose A. Bragado, Reynaldo Duque, Fredelito Lazo, Danilo Antalan, Pelagio Alcantara, Antonio Encarnacion, Agustin D.C. Rubin, Crisostomo Ilustre, Bernardo Tabbada, Abraham Pasion, Solomon Benitez, Federico Ilac, Jr., Guillermo Concepcion, Jaime Raras, Jovito Amorin, Lorenzo Tabin, Benjamin Pacris, Arsenio Cortez, Virgilio Naungayan, Dr. Onofrecia Ibarra, Rodolfo Tabaco, Martin Rochina, Salvador Espejo, Danilo Bautista, Amor Cabaccang, kdp.

Iti libro ti dandaniw, umuna iti listaan da Dr. Godofredo Reyes, Leona Florentino, Leon Pichay, Dr. Marcelino Foronda, kdp. (Mercedes Tabbada-Llanes)


(Naipablaak iti Bannawag, Nobiembre 19, 2012 a bilang.)

November 8, 2012

BANNAWAG -- Nobiembre 19, 2012




SARITA
4 Katukad ti Maysa a Saem
  Manuel S. Diaz

NOBELA
24 Apo Baboy Partylist (4)
     Jose A. Bragado
28 Daga a Nakayanakan (31)
    Juan Cabreros Laya
32 Operation Medalla Cartel (16)
     Norberto D. Bumanglag, Jr.

DANIW
 7 Sudi ni Lipat
     Roland Al. Bueno, Sr.
30 Balungao
     Mila Delia C. Guran
48 Naimas Latta ti Idasarmo
     Jake F. Ilac

SALAYSAY
 8 Gapu Ta Daytoy ti Linteg (62)
    Hues Joven F. Costales (Ret.)
12 Kuankuansit Dagiti Party-List?
     Neyo Mario E. Valdez
40 Nasamay Daytoy nga Agas ti Tao, Mula ken Ayup
     Reynaldo E. Andres

KOMIKS
17 Tres Muchos (79)
20 Aritosan (3)
22 Miks & Tiks

KOLUM
14 Okeyka, Apong!
16 Dear Doc
37 Kastoy, Kapid, Ditoy Hawaii
38 Ading Kosinera
39 TIPS
42 Padasem Daytoy, Kailian

PAGLINGLINGAYAN
44 Showbiz
46 Export in Gas & Diesel, Kdp.
47 Sinniriban
47 Sapukas
47 Sudoku
47 Aggarakgaktayo

DADDUMA PAY
 2 Ti Makunami
10 Paginnawem ni Baby, Pagdalusem ni Boy
15 Tao, Lugar, Pasamak
26 Siled ti Kararag
27 Inagawen ti Kompiuter ti Anakmo?
29 Textm8
31 Apay a Napateg nga Agsasango a Mangan Dagiti Kameng ti Pamilia?
34 Bullying, Kunam?: Biktima Met Uray da Ma’am ken Sir
35 Ti Gasatmo Ita a Lawas
36 Ammuem Pay Dagitoy

November 3, 2012

Kaatiddogan a Zipline iti Amianan



KAATIDDOGAN A ZIPLINE ITI AMIANAN. Maysa ita kadagiti baro a pangawis ti Ilocos Sur kadagiti turista ti zipline iti Narvacan Tourism Complex a masarakan iti nagbaetan ti bantay ken baybay iti Brgy. Bulanos, Narvacan. Agatiddog iti 520 a metro, daytoy ti kaatiddogan iti Amianan a Luzon. Malaksid iti zipline, mabalin pay a padasen ti rock climbing ken kayaking no maisar-ong iti lugar. (Mancielito S. Tacadena)


(Naipablaak iti Bannawag, Nobiembre 12, 2012 a bilang.)

Most Outstanding HVC Farmer iti Region I daytoy a mannalon



Napili a kas Most Outstanding High Value Crop Farmer iti Rehion I ni Marcelo de Peralta manipud iti Banayoyo, Ilocos Sur bayat ti Gawad Saka Regional Awarding Ceremony a naangay iti NSCC Plaza, Caoayan, Ilocos Sur itoy nga ili idi Oktubre 30.

Kangrunaan a nakapilian ni de Peralta ti panagusarna iti papait ti nuang ken baka a kas organiko a pestisidio a pangpaksiatna kadagiti insekto dagiti nadumaduma a mulana a nateng, mangga ken saba. Ti payen pamiliana ti mismo a mangiproseso iti apitda a saba tapno agbalin a babana chips.

Kadua ni De Peralta a napadayawan dagitoy a mannalon:

Ricarte Corpuz ti Siudad ti Laoag, Most Outstanding Hybrid Rice Farmer;

Dominador Orpilla ti San Gabriel, La Union, Most Outstanding Integrated Rice-Based Farming Systems;

Francisco Alex Dani Pasion ti Marcos, Ilocos Norte, Most Outstanding Large Animal Raiser;

Ronnel Pascual ti Vintar, Ilocos Norte, Most Outstanding Small Animal Raiser;

Pedro Bartolome ti Siudad ti Laoag, Most Outstanding Corn Farmer, ken Emerson Tabios ti San Nicolas, Ilocos Norte kas Most Outstanding Young Farmer.

Dadduma pay a napadayawan:

Bacarra Zanjera Irrigators Multi-Purpose Cooperative a kas Most Outstanding Small Farmers/Fisherfolk Organization;

Sekder Tan Ilalo Farmers Cooperative (STIFAR) ti Siudad ti San Carlos a kas Most Outstanding Barangay Food Terminal;

Angelita Wagayen ti Siudad ti Candon, Most Outstanding Rural Woman Suksukit Rural Improvement Club ti Suksukit, Sto. Domingo, naipaayan iti citation;

Norma Lagmay ti Ilocos Norte, Most Outstanding Provincial Agriculturist;

Cornelio Balbesino ti Dingras, Ilocos Norte, Most Outstanding Municipal Agriculturist; ken

Emely Lucero ti Siudad ti Urdaneta, Most Outstanding Agricultural Extention Worker

Ni Assistant Sec. Edilberto De Luna ti nangyawat iti tropeo kadagiti napadayawan a mangibagi iti Rehion I iti nailian nga agpang ti salip a pakapilian dagiti kalalaingan a mannalon iti pagilian. (Mancielito S. Tacadena)


(Naipablaak iti Bannawag, Nobiembre 12, 2012 a bilang.)

GF Kombension 2013, mapagpapatangan


Kangrunaan a mapagsasaritaan ti pannakaisagana ti sumaruno a kombension nasional ti GUMIL Filipinas, ti Gunglo Dagiti Mannurat nga Ilokano iti Filipinas ken iti Ballasiw-Taaw iti panagtataripnong dagiti opisialna inton Nob. 18, 2012 iti Brgy. Saoang, San Juan, Ilocos Sur, kas impakaammo ni RTC Judge Vivencio S. Baclig (Ret.), presidente ti gunglo.

Iti nasao a miting, idatag ti GUMIL Cagayan (GC) ti singasingna a mangsangaili iti daytoy a pasken ti GF iti umay a kalgaw.

Impalagip ni Pres. Baclig a malaksid kadagiti opisial ti GF, maawis met dagiti presidente dagiti amin a GF chapters, agraman dagiti advisers ti Board. (Djuna R. Alcantara)


(Naipablaak iti Bannawag, Nobiembre 12, 2012 a bilang.)

Miting ti GUMIL Metro Manila: Nob. 10

Maangay ti miting ti GUMIL Metro Manila, ti Gunglo Dagiti Mannurat nga Ilokano iti Kamanilaan, itoy Nobiembre 10 babaen ti panagsangaili da agkaingungot a Martin ken Teresita Rochina iti Lot 5, Block 75, Blue Boz St., Rizal, Makati City, kas impakaammo ni RTC Judge Vivencio S. Baclig (Ret.), presidente ti gunglo.

Mapagpapatangan iti nasao a miting ti pannakarmabak ti maika-47 nga anibersario ti GMM inton Disiembre. (Sherilyn Viloria)


(Naipablaak iti Nobiembre 12, 2012 a bilang ti Bannawag.)