November 29, 2016

Dagiti Aramid ti Ima



DAGITI ARAMID TI IMA. Lepleppasen ni Perlita Flores, 60, ti San Jose, Gonzaga, Cagayan ti laglagaenna a bay-on. Maysa ni Manang Perlita kadagiti babbai iti lugarda a naikkan iti gundaway nga agsanay iti babaen ti programa ti Department of Trade and Industry (DTI) a mangtulong kadagiti babbai wenno inna a maaddaan iti pagsapulan babaen ti panangusar kadagiti materiales nga adda a mismo iti lugarda. Pandan Weaving ti panagsanay nga inatendaran ni Manang Perlita kaduana ti 25 pay a babbai manipud iti gungloda (RIC) iti lugarda. Malaksid iti bay-on, aglaglaga payen ni Manang Perlita iti fashion bag, pouch bag, ken payabyab nga adda artena nga amin ket naaramid manipud iti pandan nga al-alaenna laeng iti arubayanda. (Roselyn C. Campano)

(Naipablaak iti Bannawag, Disiembre 5, 2016 a bilang.)

November 28, 2016

Permit iti panagangkat iti produkto iti agrikultura, imbabawi ni Piñol

Pinaibabawi ni Department of Agriculture (DA) Secretary Emmanuel Piñol dagiti amin nga import permit dagiti produkto iti agrikultura gapu iti agtultuloy a panangres-recycle dagiti adu nga importer dagiti permit a naited a nangibunga met iti ilegal a pannakaiserrek dagiti apit iti pagilian.

Linawlawagan ketdi ni Piñol a saan a panggep ti DA a paisardeng ti panagangkat; panggepda laeng a mapugipog dagiti ismagler iti pagilian. Kuna ti Sekretario a masapul laeng a maibabawi amin a permit tapno malapan ti pannaka-recycle wenno pannakapagparang a baro a permit dagitoy.

Mainaig iti daytoy, kiniddaw ti Sekretario ti panangpabaro dagiti lehitimo a negosiante kadagiti permitda iti panagangkat iti Opisina Sentral ti DA.


(Naipablaak iti Bannawag, Disiembre 5, 2016 a bilang.)

Dap-ayan 2017, mapagsasaritaan iti GUMIL board meeting

Pasnaan 7, nayalud-od iti Enero 13-15

Ti Dap-ayan 20017, komperensia iti lengguahe ken literatura nga Ilokano ken maika-48 a nailian a kombension dagiti mannurat nga Ilokano, ti kangrunaan a mapagsasaritaan iti maika-6 a board meeting ti GUMIL Filipinas, ti gunglo dagiti mannurat nga Ilokano iti sangalubongan, inton Disiembre 11, 2016 (nayalud-od manipud Disiembre 4) iti Aberdeen Court iti Quezon Avenue, Quezon City iti panangsangaili ti GUMIL Metro Manila nga idauluan ni Eden Cachola-Bulong, kas impakaammo ni Arthur P. Urata, Sr., presidente ti GF.

Addaan iti tema a “Ni Mannurat nga Ilokano ken ti Nakaparsuaan,” manamnama a maangay ti Dap-ayan 2017 inton Abril 21-23 iti PhilPorts Authority Guest House, Poro, City of San Fernando, La Union iti panangsangaili ti GUMIL La Union nga idauluan ni Eddy Almodovar.

Mapagsasaritaan pay iti nasao a miting ti proyekto a panagilibro ti GUMIL nga am-ammo kas Tagnawa Series, ti pannakabuangay ti GUMIL Canada ken GUMIL Benguet, ken dadduma pay a pakaseknan ti gunglo.

Iti sabali a bangir, nayalud-od iti Enero 13-15, 2017 (manipud iti Disiembre 2-4) ti Pasnaan 7 a maysa pay a proyekto ti GUMIL Filipinas, a maangay iti Badipa Elementary School, Bayaoas-Dilan Paurido, Urdaneta City, Pangasinan.

Maangay ti Pasnaan 7 iti panangsangaili ti GUMIL DepEd Urdaneta (chapter ti GUMIL Pangasinan) nga idauluan ni DepEd Supervisor Dr. Edmund A. Bisquera, iti pannakitinnulong ti Urdaneta City Schools Division ken ti Office of City Vice Mayor Hon. Julio F. Parayno, ken iti pannarabay ti National Commission for Culture and the Arts ken ti Bannawag.


(Naipablaak iti Disiembre 5, 2016 a bilang.)

DISIEMBRE 5, 2016



SARITA
4 Andropause
   Norberto D. Bumanglag, Jr.

NOBELA
 8 Ni Manang Amor, ni Mama Nam, ni Papa J, ken Siak (1)
      Juan S.P. Hidalgo, Jr.
12 Baknangtan, Kayong! (21)
     D.S. Bulong

DANIW
6 Suob
    Ariel S. Tabag
18 3 a Soneto
      Honor Blanco Cabie
34 Idadanon
      Ryan A. Dulig
47 Daniw a Para Ubbing
     Rosie M. Castro

SALAYSAY
14 Ti Maudi a Pabuya ni Rudy
      Rene B. Ragunton
16 Ti “Marunggay King” iti Las Vegas
      Leilanie G. Adriano
26 Adu Dagiti Pagimbagan a Maited ti Laplapayag
    Reynaldo E. Andres

KOMIKS
35 Don Clavio de Ylocos (14)
38 Sweet Jazmine (12)
41 Miks & Tiks

KOLUM
10 Saludsodem ken ni Apo Hues
21 Dear Doc
24 Padasem Daytoy, Kailian
28 Okeyka, Apong
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
9 Netizone
17 Siled ti Kararag
19 Dagiti Pagannurotan ti 19th AMMAFLA
23 Haytek!
29 Idi Un-unana a Panawen
32 Ammuem Pay Dagitoy
43 Ti Gasatmo Ita a Lawas
46 Dagiti Pabula ni Aesop

November 20, 2016

'Carrot Girl'



‘CARROT GIRL’. No adda ni Carrot Man nga agmulmula, aggabgabut, agibakbaklay iti sinako a carrot manipud iti Mountain Province, adda met ni Carrot Girl iti Siudad ti Baguio a tumultulong a mangdaldalus kadagiti apit a carrot sakbay a mailako kadagiti merkado publiko. Iti sidiran ken ungto ti Baguio Public Market a pakaibagbagsakan dagiti sinaksako a carrot ken dadduma pay a natnateng manipud kadagiti nadumaduma nga ili ti Benguet ken Mountain Province ken dadduma pay a paset ti Cordillera, adda dagiti ‘carrot girl’ ken dadduma pay a lallaki ken babbai a ti obrada laeng iti agmalem ket mangimuri ken mangugas iti kagabgabut a carrot tapno nakadaldalusto a gatangen dagiti makitienda. (Roy V. Aragon)


(Naipablaak iti Bannawag, Nobiembre 28, 2016 a bilang.)

Duterte, OK iti katulagan iti Paris mainaig iti klima

Immannugot met laengen ni Presidente Rodrigo Duterte a yendorsona ti global climate agreement, kagiddan iti panangidagadagna iti dusa kadagiti pagilian a saan a sumurot kadagiti probision ti katulagan.

Nagbaliw ti panunot ti Presidente maipapan iti katuagan a yen-endorso ti United Nations (UN) a manggutgutigot kadagiti pagilian a limitaranda ti carbon emissions tapno mapengdan ti climate change, kalpasan ti pannakimitingna kadagiti kameng ti Gabinetena a nangpabor iti katulagan.

Sakbayna, saan a kayat ti Presidente a pirmaan ti nasao nga international climate agreement ta segun iti daytoy, malimitaran ti panagdur-as ti ekonomia ken industria ti pagilian.


(Naipablaak iti Bannawag, Nobiembre 28, 2016 a bilang.)

November 19, 2016

Maika-50 a tawenna, rambakan ti GUMIL Metro Manila

Rambakan ti sanga ti Gunglo Dagiti Mannurat nga Ilokano iti Filipinas iti Kamanilaan, ti GUMIL Metro Manila (GMM), ti maika-50 a tawenna babaen ti tema a “GMM Golden Memories/Nabalitokan a Pananglagip ti GMM” inton Disiembre 11, 2016, mangrugi iti alas singko iti malem agingga iti alas dies iti rabii iti Penthouse Hall ti Aberdeen Court iti Quezon Avenue, Quezon City.

Agpaay a kas naisangsangayan a sangaili ken agsarita iti pasken ni National Artist F. Sionil Jose, maysa nga Ilokano a nalatak a nobelista iti English ken nangsurat iti Rosales Saga a buklen ti 5 nobela a naitalimudok iti biag dagiti Ilokano iti Rosales, Pangasinan nga ili ni Jose.

Maangay met dagiti nadumaduma nga aktibidad a pangrambak iti nabalitokan a panagtawen ti gunglo a kas iti kultural a presentasion a pakaibilangan dagiti sala ken kanta nga Ilokano, dallot, kdp. Maiwayat pay ti maysa a raffle draw ket mairaman kadagiti premio ti maysa nga espesial ti pannakabukelna a narra a round table a dinesinio ni Simeon C. Berroy, kameng ti GMM.

Yaw-awis ti gunglo, babaen ti presidentena a ni Eden Cachola-Bulong, ti idadar-ay ti amin nangruna dagiti mannurat iti Kamanilaan ken iti asidegna ken dagiti kameng ti GUMIL. Manamnama met a tumabuno da GUMIL Filipinas President Arthur P. Urata Sr. ken Cagayan Board Member Vilmer V. Viloria ken dadduma pay nga opisial ti GF.

Para iti dadduma pay nga inpormasion, kontaken laeng dagitoy a numero ti telepono ken email address: 09178058013 (Eden Bulong), eden.bulong@yahoo.com, ken rhearoseberroy@gmail.com.


(Naipablaak iti Bannawag, Nobiembre 28, 2016 a bilang.)

November 18, 2016

Umuna a Salip iti Sarita ti Albalos Awards

Naluktan idi Oktubre ti Umuna a Salip iti Sarita ti Mario Abinsay Albalos Foundation Literary Awards para kadagiti amin a mannurat iti Ilokano.

Nabangon ti literary foundation a naipanagan iti daydi Dios-ti-aluadna a mannurat ti Bannawag Mario A. Albalos, tubo iti Cabaroan Daya, Siudad ti Vigan, napadayawan a Pedro Bukaneg awardee ken umuna a Thomas Jefferson awardee iti Estado ti Hawaii a nagnanaedanna agingga iti pimmusay idi Marso 3, 1991 iti edadna a 40.

Agpaay met a mangimaton iti pasalip ti foundation dagiti gagayyem daydi MAA a da Amado I. Yoro, Jun Abinsay, Priscilla Dela Cruz (agnanaed iti Hawaii) ken Jenny Alcausin (agnanaed iti California) iti pannakitinnulong dagiti kameng ti Bannawag.

Ti kompleto a pagannurotan:

1. Marugian ti salip iti Oktubre 1, 2016 ken agpatingga iti Marso 3, 2017.

2. Silulukat ti salip kadagiti amin a mannurat iti Ilokano malaksid kadagiti mangimaton ken asideg a kakabagianda, ken kadagiti kameng ti Bannawag.

3. Maysa laeng a sarita ti mabalin nga isalip ti tunggal mannurat a makisalip.

4. Nasken a bukod a putar ti autor ti maisalip, saan pay a naipablaak iti ania man a magasin, ken saan a naipatarus manipud iti ania man a lengguahe.

5. Agatiddog ti pakisalip iti 12-20 a panid iti short bond paper, nai-computer (agusar iti Times New Roman, Font Size 12) iti doble espasio ken addaan iti maysa a pulgada a margin iti amin nga igid ti bondpaper. Masapul met nga agusar iti MS Word format.

6. Ti parbo a nagan ti autor ti agparang a naganna a kas autor ti sarita. Ipatulod ti pakisalip iti uppat a nadalus a kopia ken mapakuyogan iti narikpan a sobre a naglaon iti pudno ken parbo a nagan ti autor, paulo ti pakisalip, kaudian a ladawan ken ababa a pakasaritaan ti biag ti autor, adres ti agdama a pagnaedan, agraman e-mail address ken numero ti selpon wenno telepono a mabalin a pakakontakan iti autor. Iti rabaw ti sobre, isurat ti paulo ti sarita ken parbo a nagan ti autor.

7. Ipatulod ti pakisalip babaen ti koreo wenno personal nga idatag iti daytoy nga adres: 1st Short Story Writing Contest, Mario Abinsay Albalos Foundation Literary Awards c/o Bannawag, Manila Bulletin Publishing Corp., Muralla corner Recoletos Sts., Intramuros, 1002 Manila. Nasken a maawat ti Bannawag ti pakisalip iti di naladladaw ngem iti Marso 3, 2017. Saan a mairaman iti salip ti entry a maawat kalpasan dayta a petsa. Ipatulod met ti soft copy ti sarita iti daytoy nga e-mail address: albalosawards@gmail.com.

8. Dagiti gunggona: Umuna a Gunggona, P15,000.00; Maikadua, P12,00.00; ken Maikatlo, P10,000.00. Maipaayan pay dagiti mangabak iti sertipiko ti pammadayaw. Adda met karbengan dagiti hurado a mangkissay iti bilang dagiti mangabak no awan ti makapatar iti bukodda a pagbatayan dagiti mangabak. Mabalinda met ti mangparnuay iti nayon wenno sabali a gunggona, no kasapulan.

9. Saan a mabalusingsing ti pangngeddeng dagiti hurado malaksid no maduktalan a nasalungasing ti Pagannurotan Bilang 4. No kasta, mapukawto metten ti karbengan ti autor a makisalip pay kadagiti sumarsaruno a pasalip ti Albalos Awards.

10. Makipagtagikua ti Mario Abinsay Albalos Foundation Literary Awards kadagiti mangabak a sarita nupay adda latta karbengan dagiti autor iti copyright dagitoy. Maaddaan pay ti agpasalip iti karbengan a mangipablaak kadagiti mangabak a sarita iti ania man a wagas a kayatna nga aramaten.

11. Mapakaammuanto dagiti mangabak no kaano ken no sadino a maangay ti seremonia ti pammadayaw.


(Naipablaak iti Bannawag, Nobiembre 28, 2016 a bilang.)

NOBIEMBRE 28, 2016



SARITA
4 Cynthia
   Arnold C. Baxa

NOBELA
 8 Ti Bastardo (35)
      Norberto D. Bumanglag, Jr.
12 Baknangtan, Kayong! (20)
     D.S. Bulong

DANIW
6 Ti Lidoken a Pait
    Jobert M. Pacnis
18 Maysaak Koma a Baybay
     Ronnie E. Aguinaldo
47 Daniw a Para Ubbing
     Marlyn G. Del Rosario

SALAYSAY
14 Adda Nalaka nga Agas ti Kanser
      Remedios S. Tabelisma-Aguillon
26 Nasam-it ti Lansones ti Isabela
    Reynaldo E. Andres

KOMIKS
35 Don Clavio de Ylocos (13)
38 Sweet Jazmine (11)
41 Miks & Tiks

KOLUM
10 Saludsodem ken ni Apo Hues
21 Dear Doc
24 Padasem Daytoy, Kailian
28 Okeyka, Apong
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
9 Netizone
16 Biag ni Ilokano
17 Siled ti Kararag
19 Dagiti Pagannurotan ti 1st Albalos Awards
22 Nalaing a Rumabaw ti Asom?
23 Haytek!
29 Idi Un-unana a Panawen
32 Ammuem Pay Dagitoy
34 Nagrigaten ti Masapa nga Agriing, Kunam?
43 Ti Gasatmo Ita a Lawas
46 Dagiti Pabula ni Aesop

November 14, 2016

Dap-ayan 2017, mapagsasaritaan iti GUMIL board meeting

Ti Dap-ayan 2017, komperensia iti lengguahe ken literatura nga Ilokano ken maika-48 a nailian a kombension dagiti mannurat nga Ilokano, ti kangrunaan a mapagsasaritaan iti maika-6 a board meeting ti GUMIL Filipinas, ti gunglo dagiti mannurat nga Ilokano iti sangalubongan, inton Disiembre 4, 2016 iti Badipa Elementary School, Bayaoas, Urdaneta City iti panangsangaili ni Dr. Edmundo A. Bisquera, presidente ti GUMIL DepEd Urdaneta (sanga ti GUMIL Pangasinan) ken superbisor ti DepEd Urdaneta, kas impakaammo ni Arthur P. Urata, Sr., presidente ti GF.

Addaan iti tema a “Ni Mannurat nga Ilokano ken ti Nakaparsuaan,” manamnama a maangay ti Dap-ayan 2017 inton Abril 21-23 iti PhilPorts Authority Guest House, Poro, City of San Fernando, La Union iti panangsangaili ti GUMIL La Union nga idauluan ni Eddy Almodovar.

Mapagsasaritaan pay iti nasao a miting ti proyekto a panagilibro ti GUMIL nga am-ammo a kas Tagnawa Series, ti pannakabuangay ti GUMIL Canada ken GUMIL Benguet, ken dadduma pay a pakaseknan ti gunglo.

Iti sabali a bangir, maiwayat inton Dis. 2-4 ti Pasnaan 7 a maysa pay a proyekto ti GF, iti panangsangaili met laeng ti GUMIL DepEd Urdaneta (chapter ti GUMIL Pangasinan), iti pannakitinnulong ti Urdaneta City Schools Division ken ti Office of City Vice Mayor Hon. Julio F. Parayno, ken iti pannarabay ti National Commission for Culture and the Arts ken ti Bannawag.


(Naipablaak iti Bannawag, Nobiembre 


Simple a pannakaitabon ti maysa a soldado --Imee

Ni Gob. Imee Marcos ti Ilocos Norte iti pananginterbiu
kenkuana dagiti agiwarwarnak kalpasan ti panangipalubos
ti Korte Suprema a maitabon ni dati a Presidente Marcos
iti Libingan ng mga Bayani. 
Kalpasan ti yaanamong ti Korte Suprema iti pannakaitabon ni dati a Presidente Ferdinand E. Marcos iti Libingan ng mga Bayani, impanamnama ti inaunaan nga anakna, ni agdama a Gobernador ti Ilocos Norte Imee R. Marcos nga awan panggep ti pamiliana a mangangay iti narungbo nga ‘state funeral.’

“Wala nang bonggang-bongga. Total, hindi naman state funeral, kundi libing lang ng isang kawal, ng isang sundalo, ang minimithi ng ama ko," kinuna daytoy iti maysa nga interbiu.

Maibatay iti military service record ti dati a presidente nagpaay daytoy a gerilia iti  United States Army Forces in the Far East (USAFFE)  ket daytoy ti gapuna a nairaman iti Bataan Death March idi 1942, ken kameng ti United States Army Forces in the Philippines━Northern Luzon (USAFP-NL).

"Inalay niya naman ang buhay niya… nakailang beses naman siyang nasa kritikong kalagayan, at talagang suicidal pa nga ang tawag sa kanya doon sa Medal of Valor," kinuna ni Gobernador Marcos iti immun-una a pakaammo daytoy.

Sagudayen ti AFP Regulations G 161-373, karbengan ni Marcos ti maitabon iti Libingan ng mga Bayani kas maibatay kadagiti sumaganad a kualipikasion: Medal of Valor awardee, Presidente, secretary of National Defense, ken beterano iti Maika-2 a Gubat.

Kas pammatalgedna iti mapangpanggep a pannakaitabon ni dati a Presidente Marcos, kinuna ni Gobernador Marcos:"Mailibing siya sa Libingan, simple, at katulad nga ng pangkaraniwang sundalo."


(Naipablaak iti Bannawag, Nobiembre 21, 2016 a bilang.)

Trump, maika-45 a presidente ti US

Ginibusan ni Donald Trump ti 8 a tawen a panagari dagiti Demokrata iti gobierno ti Estados Unidos ti Amerika iti panangabakna a kas maika-45 a presidente ti kabilegan a pagilian iti lubong iti eleksion ti Amerika a naangay idi Nobiembre 8.

Inlugesna iti eleksion presidensial ni Hillary Clinton, asawa ni dati a Presidente ti Amerika Bill Clinton, a nangipakita met a di pay nakasagana ti Amerika a maaddaan iti babai a presidente.

Inkari ni Trump, kalpasan ti panangabakna, nga agbalin isuna a presidente dagiti amin nga Amerikano ket kiniddawna kadagiti amin nga Amerikano nga agkaykaykaysada koma ken lipatendan dagiti pinnasakit bayat ti kampania.

Malagip met a bayat ti kampania, inkari ni Trump a mangaramid iti pader iti nagbedngan ti Amerika ken Mexico tapno malapdan ti ilegal nga ibaballasiw dagiti Mehikano iti US ket dagiti met laeng Mehikano ti agbayad iti magastos iti pannakaaramid ti alad. Innayonna a daytoy ti umuna nga asikasuenna iti umuna met nga aldawna iti White House.

Inkarina pay a papanawenna amin a saan a dokumentado nga imigrante iti America ken dina pastreken dagiti Muslim iti beddeng ti Amerika “agingga iti ditay ammo ti mapaspasamak”—a kayatna a sawen, gapu kadagiti riribuk nga ar-aramidem ti ISIS iti Amerika.

Iti biang ti Filipinas, kinablaawan ni Presidente Duterte ni Trump. Kinuna ni Duterte iti mensahena a mangnamnama a mapasayaatda ti relasion iti nagbaetan ti Filipinas ken Amerika.

Sakbayna, naidildilig ni Duterte ken ni Trump gapu iti awan sawsawir ti dila ni Duterte nga agsao a kas met laeng ken ni Trump.


(Naipablaak iti Bannawag, Nobiembre 21, 2016 a bilang.)

November 12, 2016

NOBIEMBRE 21, 2016



SARITA
4 Ti Comedy Queen
   Aileen R. Rambaud
8 Ti Naalsa
    Mauro F. Guico

NOBELA
12 Baknangtan, Kayong! (19)
     D.S. Bulong
14 Ti Bastardo (34)
      Norberto D. Bumanglag, Jr.

DANIW
6 Anglem
   Daniel L. Nesperos
47 Daniw a Para Ubbing
     Anabelle M. Palagud

SALAYSAY
18 Nasamay Kadi ti Tongtong Dagiti Kalanguya?
      Bonifacio V. Ramos ken Luis J. Tindaan
26 Agannad Kadagitoy a Peste Dagiti Utong
    Reynaldo E. Andres

KOMIKS
35 Sweet Jazmine (11)
38 Don Clavio de Ylocos (13)
41 Miks & Tiks

KOLUM
10 Saludsodem ken ni Apo Hues
21 Dear Doc
24 Padasem Daytoy, Kailian
28 Okeyka, Apong
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
9 Netizone
16 Biag ni Ilokano
17 Siled ti Kararag
22 Ay, ni Pusa, Ammona ti Agimon!
23 Haytek!
29 Idi Un-unana a Panawen
32 Ammuem Pay Dagitoy
34 Suka ken Baking Soda a Kas Pagdalus iti Pagayusan ti Danum
43 Ti Gasatmo Ita a Lawas
46 Dagiti Pabula ni Aesop

November 8, 2016

Pederalismo, kasapulan ti PH, kuna ni Duterte

Inulit ni Presidente Duterte ti kinapateg ti panagbalin a pederal ti porma ti gobierno ti Filipinas ta kas kunana, daytoy ti mangitunda iti irarang-ay ti pagilian, nangruna iti Mindanao.

Inulitna met  a sisasagana a mangpanaw iti puestona uray pay sakbay nga agpaso ti takemna a kas presidente iti kanito nga agbalinen a pederal ti porma ti gobierno.

Kas kuna ti Presidente, no maaprobaran ti pederalismo iti uneg ti sumaruno a tallo a tawen, mabalinnanton nga isuko ti kinapresidentena.

“Ikarik, no nakasaganan ti amin, aglusulosak tapno nawaya ti pannakapili ti baro a presidente. Awanen ti rumbeng pay a pakariribukanyo,” kinuna ti Presidente bayat ti panagsaritana iti pannakayalnag ti Comprehensive Reform and Development Agenda para iti ARRM ken dadduma pay a lugar a maap-apektaran gapu iti riribuk iti Mindanao iti Kabunsuan Cultural Complex iti Cotabato City.

Idi pay nga ikamkampania ni Duterte ti pederalismo ta patienna nga ibunga daytoy ti kappia iti Mindanao.

Iti umuna nga State of the Nation Address (SONA) ti Presidente, kinunana a sisasagana a mangpaangay iti eleksion presidensial iti sumaruno nga aldaw wenno lawas kalpasan nga aprobaran ti Kongreso dagiti enmienda ti Konstitusion.


(Naipablaak iti Bannawag, Nobiembre 14, 2016 a bilang.)

November 6, 2016

10 a mannurat nga Ilokano, fellows iti Pasnaan 7

Napili ti 10 a mannurat nga Ilokano a kas fellow iti Pasnaan 7, ti maikapito a bansada ti workshop a para kadagiti mannurat nga Ilokano.

Dagiti fellow iti Ababa a Sarita: Derick Añonuevo Tong-alan ti Balidbid, Salcedo Ilocos Sur; Eunice Bisquera-Madriaga ti Casantiagoan, Manaoag, Pangasinan; Fidel Sambaoa ti Matue, Gregorio del Pilar, Ilocos Sur; ken Rhea Anne Dominno ti Kaliwakiw, Salcedo, Ilocos Sur.

Dagiti fellow iti Daniw: Alma Dela Cruz ti Allacapan, Cagayan; Julius P. Gajonera ti Brgy. 1, Barbaquezo, Carasi, Ilocos Norte; Josefa B. Agtarap ti Brgy. 62-A Navotas, Laoag City (Ilocos Norte) ken Riaflor Bulatao Rebolledo ti Happy Homes, Old Lucban, Baguio City.

Dagiti fellow iti Daniw a Para Ubbing: Rudelyn M. Javar ti Mabanogbog, Urdaneta City ken Leona Joaquin Corpuz ti Urdaneta City, Pangasinan.

Agtugaw a kas panelist dagiti mannurat ken editor nga Ilokano a da Cles B. Rambaud, Juan Al. Asuncion, Joel B. Manuel, Daniel L. Nesperos, Neyo Mario E. Valdez, John B. Buhay. Estela A. Bisquera-Guerrero, Sherma E. Benosa, Junley L. Lazaga ken Roy V. Aragon.

Malaksid iti itutulongda iti pannaka-workshop dagiti sinurat dagiti fellow, mangipaay met dagiti panelist iti ababa a lektiur maipapan iti ortograpia ti lengguahe nga Ilokano, daniw, ababa a sarita, daniw a para ubbing, ken ababa a sarita a para ubbing.

Agatendar met a kas observer iti workshop dagiti mannursuro manipud iti Urdaneta City Schools Division nangruna dagiti MTB-MLE Coordinators.

Mabigbig a bugbugtong a workshop a para kadagiti mannurat nga Ilokano ken mannurat iti Amianan a makasurat iti Ilokano, maysa ti Pasnaan kadagiti tinawen a kangrunaan a proyekto ti GUMIL Filipinas a pagtitinnulongan a supsuportaran dagiti managayat iti literatura ken dagiti mannurat a mismo.

Iti daytoy maikapito nga edision, sangailien ti GUMIL DepEd Urdaneta (sanga ti GUMIL Pangasinan) nga idauluan ni DepEd Urdaneta District Supervisor Dr. Edmundo Bisquera, iti pannakitinnulong ti Urdaneta City Schools Division ken ti Office Of City Vice-Mayor Hon. Julio F. Parayno. Manamnama met ti pannarabay manipud iti National Commission for Culture and the Arts (NCCA) ken ti Bannawag magazine.

Agserbi a kameng ti secretariat ti Pasnaan 7 da Ariel S. Tabag, Dr. Freddie Pa. Masuli, Roy V. Aragon, Anna Liza M. Gaspar ken Rhea Rose D. Berroy. Da GF President Arthur P. Urata, Sr., ken Dr. Edmundo Bisquera ti consultant.

Maiwayat ti Pasnaan 7 inton Disiembre 2-4, 2016 (nayalud-od manipud Nobiembre 18-20 nga immun-una a naipakaammo) iti Badipa Elementary School, Bayaos, Urdaneta City. (Pasnaan 7 Secretariat)


(Naipablaak iti Bannawag, Nobiembre 14, 2016 a bilang.)

NOBIEMBRE 14, 2016



SARITA
4 Uged
Linda T. Lingbaoan
8 Sabali Pay a Rupa ni Judas
Bienvenido C. Cabras

NOBELA
12 Ti Bastardo (33)
Norberto D. Bumanglag, Jr.
14 Baknangtan, Kayong! (18)
D.S. Bulong

DANIW
6 Bisin
Roy V. Aragon
18 Gapu Kenka
Leilanie G. Adriano
20 3 a Soneto
Honor Blanco Cabie
34 Pasgedanta ti Parbangon
Dexter M. Fabito
47 Daniw a Para Ubbing
Jimmy R. Agustin

SALAYSAY
16 Ania Ngamin, Aya, ti Seks?
Virginia A. Duldulao, Ph.D.
26 Agbiag Met ti Celery iti Patad
Reynaldo E. Andres

KOMIKS
35 Sweet Jazmine (10)
38 Don Clavio de Ylocos (12)
41 Miks & Tiks

KOLUM
10 Saludsodem ken ni Apo Hues
21 Dear Doc
24 Padasem Daytoy, Kailian
29 Okeyka, Apong
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
9 Netizone
19 Siled ti Kararag
23 Haytek!
28 Idi Un-unana a Panawen
32 Ammuem Pay Dagitoy
43 Ti Gasatmo Ita a Lawas
46 Dagiti Pabula ni Aesop