Saanen a mairaman ti katayag (height) a kas pagrukodan iti pannakaawat nga agpaay iti Philippine National Police.
Impakaammo ni Napolcom Vice Chairman ken Executive Officer Atty. Rogelio T. Casurao itay nabiit nga epektibo daytoy manipud iti eksamen iti panagbalin a polis inton Abril 22, 2018.
Kinuna ni Casurao a nasken laeng a makipagili iti Filipinas, agtawen idi di nasursurok ngem 30, ken addaan iti bachelor’s degree ti 30 anios ti agpangpanggep nga agbalin a kameng ti PNP.
Impakaammo pay ni Casurao ti pannakalukaten ti On-Line Examination Application Scheduling System (OLEASS) iti www.napolcom.gov.ph ken www.napolcom-oleass.com a para iti PNP Entrance ken Promotional Examinations iti entero a pagilian.
Silulukat ti online application a para iti PNP Entrance exam manipud iti Enero 29, 2018 agingga iti Pebrero 2, 2018; iti Pebrero 5-9 para iti Police Officer (PO) exam; ken Pebrero 12-16 met para kadagiti eksamen a para iti Senior Police Officer (SPO), Inspector (INSP), ken Superintendent (SUPT).
Adtoy met dagiti bayadan, segun iti Napolcom: examination fee, P400 para iti PNP entrance exam ken Police Officer exam; P450 para iti Senior Police Officer exam; P500 para iti Police Inspector exam; ken P600 iti Police Superintendent exam.
(Naipablaak iti Bannawag, Pebrero 5, 2018 a bilang.)
No comments:
Post a Comment