December 26, 2012

Kayatmo ti mapan agpasiar idiay Batanes?




Umas-asideg ti Batanes iti mainland Luzon iti panangrugi itay Disiembre 14 ti commercial flight ti SkyJet Airlines nga agpa-Basco, Batanes.

Addaan ti SkyJet iti regular flight a mapan iti Basco ken agsubli iti Manila iti kada Lunes, Mierkoles ken Biernes manipud iti Terminal 4 ti Manila Domestic Airport. Agluas ti eroplano ti SkyJet iti 5:30 a.m. iti Manila sa sumangpet iti Basco iti agarup 6:40 a.m. sa agsubli iti Manila iti 7:10 a.m.

Kinuna ni Dr. Joel Mendoza, Chief Executive Officer ken Presidente ti Magnum Air (SkyJet) Inc. nga iti panangrugi ti commercial flight-da, karamanen ti SkyJet ti “elite group” dagiti airline iti Filipinas babaen ti panagaramatda kadagiti 94-seater a Bae 146 jet a partuat ti British Aerospace (BAe) Systems, agar-aramid met kadagiti eroplano nga us-usaren ti British Royal Family, British Airlines, Lufthansa ken dadduma pay nga airline company iti Europa.


(Naipablaak iti Bannawag, Enero 17, 2013 a bilang. Nabulod ti ladawan iti romulusrueda.com.)

Kuarta, ammotayo koma a paaduen, kuna ni Angara


Kiniddaw ti chairman ti House committee on higher education and technical education iti gobierno Aquino ti panangitandudona koma iti “financial literacy” kadagiti Filipino.

Minaig iti daytoy, kidkiddawen ni Aurora Rep. Sonny Angara ti pannakaanamong koma ti House Bill 490 nga am-ammo pay a kas “Financial Literacy Act of 2012” a mangkidkiddaw met iti pannakapatan-ay dagiti programa iti financial literacy kadagiti eskuela ti gobierno ken pribado.

“Kaaduanna a Filipino ti awan ti ammoda no kasano ti umno a panangiggemda iti maurnongda a kuarta. Ammoda a bilangen ti kuartada ngem dida ammo a paaduen pay,” kinuna ni Angara idinto a kinunana a napateg unay ti pannakayadal kadagiti Filipino no kasano nga imatonanda ti kuartada ken ammoda ti agikeddeng maipanggep iti panguartaan.

Maibatay iti kaudian a tinawen a “Fin-Q Survey” babaen ti Citi, maysa nga international financial services, naartapan ti Filipinas, iti umuna a gudnaway, ti passing grade a 50 iti“financial quotient” iti pannakairekord ti 53.6 points iti 2011.

Sakbayna, adda iti kutit ti Filipinas kadagiti kakaarrubana a pagilian iti Asia.

“Makaparegta ti resulta ti surbey ngem nasken a manayonan koma ti pay ti ammo dagiti Filipino iti pannakaimaton ti kuartada,” kinuna ni Angra.


(Naipablaak iti Bannawag, Enero 7, 2013 a bilang.)

Miting ti GMM: Enero 6


Impakaammo ni Hues Vivencio S. Baclig, presidente ti GUMIL Metro Manila, a maangay ti miting dagiti opisial ken kameng itoy Enero 6, 2013 (alas onse iti bigat) iti 795 Sergio H. Loyola corner Maceda, Sampaloc, Manila babaen ti panangsangaili da Vincent Berroy ken kaingungotna.

Mapagsasaritaan iti nasao a miting dagiti nadumaduma a proyekto ti gunglo ken ti itatabuno daytoy iti maika-46 a Nailian a Kombension ti GUMIL Filipinas itoy nga Abril iti Gonzaga, Cagayan.

Manamnama pay a mayalnag iti miting ti Sukogan, libro ti dandaniw iti Ilokano ni Vincent Berroy, ken nakairamanan ti sumagmamano a daniw ti kabsatna a ni Simeon Berroy, agdama nga opisial ti GUMIL Metro Manila. (Maria Rosa A. Cabie)


(Naipablaak iti Bannawag, Enero 7, 2013 a bilang.)

Kablaawandaka, Ms. Janine!




2012 MISS UNIVERSE FIRST RUNNER-UP. Ni Janine Mari Tugonon a nangibagi iti Filipinas ti nangyalat iti 2012 Miss Universe First Runner-up a naangay iti Estados Unidos sakbay a nagngudo ti 2-2012 ken nagsasalipan ti 89 a babbalasang manipud iti nadumaduma a pagilian iti lubong. Tubo iti Bataan, nagturpos iti BS Pharmacy manipud iti Unibersidad ti Santo Tomas. Ni Olivia Culpo, Miss USA ti nabalangatan a 2012 Miss Universe.


(Naipablaak iti Bannawag, Enero 7, 2013 a bilang.)

ENERO 7, 2013




SARITA
8 Yeye
   Juan Al. Asuncion

NOBELA
26 Apo Baboy Partylist (11)
     Jose A. Bragado
30 Daga a Nakayanakan (38)
    Juan Cabreros Laya
34 Operation Medalla Cartel (23)
     Norberto D. Bumanglag, Jr.

DANIW
 4 Adtoy Baro a Saringit ti Panawen
    Jobert M. Pacnis
32 Baro a Kalendario
    Marichel E. Suguitan
48 Dandaniw a Para Ubbing

SALAYSAY
 6 Aramidem a Suerte Daytoy Tawen 2013
     Fernando B. Sanchez
12 Gapu Ta Daytoy ti Linteg (69)
    Hues Joven F. Costales (Ret.)
16 Ania, Naabak ni Pacquiao Gapu iti Relihion?
    Neyo Mario E. Valdez

KOMIKS
19 Tres Muchos (83)
22 Aritosan (10)
24 Miks & Tiks

KOLUM
14 Okeyka, Apong!
18 Dear Doc
39 Kastoy, Kapid, Ditoy Hawaii
40 Ading Kosinera
41 TIPS
42 Padasem Daytoy, Kailian

PAGLINGLINGAYAN
44 Showbiz
46 No Tisting, Kdp.
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
 2 Ti Makunami
10 Para Kadagiti Mannurat…
15 Tao, Lugar, Pasamak
28 Siled ti Kararag
29 Salaknibam ti Aglawlaw, Makasalimetmetka Pay
31 Txtm8
33 Managbabain Kadi ti Anakmo?
36 Di Kayat ti Anakmo ti Mapan Agbasa?
37 Ti Gasatmo Ita a Lawas
38 Ammuem Pay Dagitoy

December 20, 2012

Higante a Kayo ti Lawag



HIGANTE A KAYO TI LAWAG. Nakarungrungbo ti silnag ken ranga daytoy a higante a Christmas tree ken ti naitampok a sinanbituenna iti pannakagangatna a nangted iti rimat ken lawag iti paraangan ti pasdek ti Kapitolio ti Ilocos Norte iti Siudad ti Laoag, a literal a bimmassit gapu iti kaakaba ken katayag daytoy a tradisional a maarkosan a kayo ti Paskua a tinawen a maaramid ken maipatnga iti Kapitolio iti tunggal Disiembre. (Roy V. Aragon)


(Naipablaak iti Bannawag, Disiembre 31, 2012 a bilang.)

Filipinas, awanen iti listaan dagiti pakailaklakuan dagiti bogus a produkto ti US


Kalpasan ti 6 a tawen a kaadda ti Filipinas iti listaan dagiti pagilian a kakaruan a pakailaklakuan dagiti adu a bogus a produkto ti US, inikkaten ti US Trade Representatives (USTR) ti pagilian iti nasao a listaan.

Maibatay iti Out-of-Cycle Review of Notorious Markets a napetsaan iti Disiembre 13, 2012, awanen ti Filipinas iti watchlist kalpasan a nadalusan, no di man nakerrasan, kadagiti adu a pirata a produkto dagiti dadakkel a pagtagilakuan iti pagilian nangruna iti Quiapo Shopping District.

Malaksid iti Quiapo Shopping District, naitudo pay idi a pagrarairaan dagiti pirata a produkto dagiti pagtagilakuan iti Greenhills, Makati Cinema Square, Binondo, ken iti Baclaran.

Mainaig iti daytoy, impeksa ti Intellectual Property Office of the Philippines (IPOPHL), babaen ken ni Director General Ricardo Blancaflor, ti ragsakna iti pannakaikkaten ti pagilian iti nasao a watchlist.


(Naipablaak iti Bannawag, Disiembre 31, 2012 a bilang.)

Amanos, Mexico!



AMANOS, MEXICO! Kasla kastoy ti ibagbaga ni Nonito “The Filipino Flash” Donaire, Jr. kalpasan nga inudatalna ni Jorge Arce ti Mexico iti maikatlo a rikus iti panangdepensa daytoy iti titulona a WBO super bantamweight idi Disiembre 16 (oras iti Filipinas) iti Houston, Texas. Malaksid a dimmakkel ti gundaway ni Donaire a pakaipaayan ti pammadayaw a Fighter of the Year gapu ta daytoy ti maikapat a panangabakna iti uppat a labanna iti daytoy a tawen kadagiti dati ken agdama a kampeon iti boksing, pinaturogna ni Arce a kailian ken gayyem ni Juan Manuel Marquez a makalawas sakbayna, nangdaleb met ken ni Manny Pacquaio, ti ibilang dagiti Filipino a Pambansang Kamao.


(Naipablaak iti Bannawag, Disiembre 31, 2012 a bilang.)

Pammapatay iti eskuela iti Connecticut, dinto mapasamak iti Filipinas –PNP official


Ti kinapositibo iti panagkita dagiti Filipino iti biag iti laksid dagiti adu a pannubok ti maysa kadagiti rason no apay nga adayo a mapasamak iti Filipinas ti pammapatay a napasamak iti maysa nga eskuela iti Connecticut, USA idi Dis. 14, kas kinuna ti maysa nga opisial ti Philippine National Police.

Iti nasao a pammapatay, natay a napaltogan ti 20 nga ubbing nga agad-adal ken 6 a nataengan a pakairaman ti prinsipal ti Sandy Hook Elementary School. Kadagiti ubbing, 8 ti lallaki ken 12 ti babbai nga agtawen iti 6 ti kaubingan.

Naitudo a maysa nga Adam Lanza, agtawen iti 20, ti nangpaltog kadagiti biktima babaen ti high-powered rifle. Sa kalpasanna, pinatayna ti bagina. Sakbay ti iseserrek ni Lanza iti eskuela elementaria, pinaltogan ni Lanza ti inana a nakatayan met daytoy.

Kinuna ni Chief Supt. Raul Petrasanta, direktor ti PNP Firearms and Explosives Office (FEO) a nupay patienna a dinto mapasamak iti Filipinas ti kas iti napagteng iti Connecticut, itandudo ti PNP ti ad-adda pay a naig-iget a gun control, kas iti pannakaipataw ti nadagdagsen a pannusa kadagiti matiliwan nga addaan kadagiti saan a lisensiado nga armas.

Iti agdama, kuna ti PNP-FEO nga iti 1.1 a milion a nailista a lisensiado a paltog, kagudua ditoy ti saan a naipabaro ti lisensiada. Adda met di nakurkurang ngem 25,000 a naireport a saan a lisensiado a paltog iti pagilian.


(Naipablaak iti Bannawag, Disiembre 31, 2012 a bilang.)

DISIEMBRE 31, 2012



SARITA
4 “Merry Christmas, Mami, Dadi…”
    Efren A. Inocencio

NOBELA
24 Apo Baboy Partylist (10)
     Jose A. Bragado
28 Daga a Nakayanakan (37)
    Juan Cabreros Laya
32 Operation Medalla Cartel (22)
     Norberto D. Bumanglag, Jr.

DANIW
7 2 a Soneto
     Honor Blanco Cabie
30 Komusta ti Paskuam, Kabagis?
     Emerson M. Somera
48 Espiritu ti Paskua
     Agustin DC. Rubin

SALAYSAY
8 Gapu Ta Daytoy ti Linteg (68)
    Hues Joven F. Costales (Ret.)
12 Ti Paskua ken ti Aldaw ni Rizal
     Neyo Mario E. Valdez
40 Uray Ania a Panawen ti Panagmulam iti Haybrid a Kamatis ti MMSU
     Reynaldo E. Andres

KOMIKS
17 Tres Muchos (82)
20 Aritosan (9)
22 Miks & Tiks

KOLUM
14 Okeyka, Apong!
16 Dear Doc
37 Kastoy, Kapid, Ditoy Hawaii
38 Ading Kosinera
39 TIPS
42 Padasem Daytoy, Kailian

PAGLINGLINGAYAN
44 Showbiz
46 Tropelo, Kdp.
47 Sinniriban
47 Sapukas
47 Sudoku
47 Aggarakgaktayo

DADDUMA PAY
 2 Ti Makunami
 6 Para Kadagiti Mannurat…
10 Pagannurotan ti Salip iti Sarita ti AMMAFLA
15 Tao, Lugar, Pasamak
26 Siled ti Kararag
27 Wen, Awan ti Ubing ken Nataengan iti Pannakaipakat ti Disiplina
29 Txtm8
31 Wen, Mapagsidam Met ti Anakmo iti Nateng
34 Kayatmo nga Agbalin a Mannakigayyem ti Anakmo?
35 Ti Gasatmo Ita a Lawas
36 Ammuem Pay Dagitoy


December 17, 2012

Sin Tax Bill, naaprobaran


Kalpasan ti kalpasan ti 16 a tawen a pannakaipapaigidna iti Kamara, inanamongan ti bicameral conference itay Disiembre 11 ti pinal a bersion ti Sin Tax bill a manamnama a mangingato iti buis ti arak ken sigarilio.

Segun ken ni Sen. Franklin Drilon, masapul ti nayon a buis tapno marisut metten ti panagkasapulan iti dakkel a pundo a para iti salun-at.

Ni Drilon ti chairman ti Senate panel iti bicam a pakairamanan met dagiti senador a da Pia Cayetano, Sergio Osmeña III, Ralph Recto, Ferdinand ‘Bongbong’ Marcos Jr. ken Senate Minority Leader Alan Peter Cayetano.

Iti biang ti Kamara, saan a nakadar-ay ni Dip. Isidro Ungab, kas chairman, ket imbagian da diputado Jocelyn Limkachong, Eric Singson, Jannette Garin, Danilo Suarez, Luis Villafuerte, Arnulfo Fuentebella, Neptali Gonzales ken Henedina Abad.

Segun iti report ti bicam, makapataud ti nasao a sin tax bill iti P35.5-bilion iti umuna a tawen. Apaman a mapirmaan ni Presidente Benigno S. Aquino III, maparaburan met ti mapan a 5.2 a milion a pamilia a maiserrek iti Philippine Health Insurance Corporation (PhilHealth) iti 2013, ta mailasin ditoy ti pundo a P12.5 bilion para iti nasao a tawen, ken iti 2014, agbalin a P25-bilion ti pundo para iti daytoy. Aggapu amin dagitoy manipud iti buis a maukkon gapu iti baro a gakat.


(Naipablaak iti Bannawag, Disiembre 24, 2012 a bilang.)

Kombension ti GIN, nayalud-od iti Enero 19


Nayalud-od ti tinawen a kombension ti GUMIL Ilocos Norte, ti gunglo dagiti mannurat nga Ilokano iti Ilocos Norte, iti Enero 19, 2013 manipud iti dati a nayeskediul a pannakaangayna iti Dis. 22, 2012.

Kinuna ni Elizabeth M. Raquel a maangay met laeng ti kombension iti Division Office ti DepEd Ilocos Norte.
Iti nasao nga okasion a mapadayawanto dagiti mangabak iti pasalip ti gunglo iti panagsurat iti sarindaniw ken sarita a para ubbing. (Joel B. Manuel)


(Naipablaak iti Bannawag, Disiembre 24, 2012 a bilang.)

Iti Narvacan, I.S.: Napadayawan, mannurat iti Bannawag ken 10 pay a pagwadan nga annak ti ili


Pinadayawan ti ili a Narvacan, Ilocos Sur ti 11 a maipagpannakkel nga annakna a kas Outstanding Narvacaneos para itoy a tawen kas pangbigbig ti gobierno lokal iti balligi a nagun-odda iti tay-ak a pinilida ken iti dayaw a naipaayda iti Narvacan a tinaudanda.

Dagiti 2012 Outstanding Narvacaneos a napadayawan bayat ti panagpiesta ti ili itay nabiit:
Defense Secretary Voltaire Gazmin para iti tay-ak ti Military Service;

Jaime C. Laya, Ph.D., dati a Central Bank Governor, Education Secretary ken agpapaay iti agdama a chairman of the Board ti Philtrust Bank, Public Service;

Comelec Commissioner Armando Velasco, Law;

Dr. Josefino Comiso, agpapaay a senior scientist iti National Aeronautics Space Administration (NASA), Goddard Space Flight Center, Maryland, para iti tay-ak ti Science;

Eden Cachola-Bulong, mannurat iti Bannawag ken mangisursuro iti Journalism agingga iti panagretirona, Journalism;

Dr. Eunice Cabanilla Bucsit, nalatak a pediatrician, Medicine;

Dr. Perlita Quinto, Samuel Gomez, ken Dean Denis Cabotage, para iti tay-ak ti Edukasion;

Jemico Liberato Brioso, international cyclist ken 4th placer iti Tour of Germany, Sports; ken

Reden Aleson, mabigbig nga skilled worker iti pagilian iti panagab-abakna kadagiti Skills Olympics. (E.B. Contillo)


(Naipablaak iti Bannawag, Disiembre 24, 2012 a bilang.)

Mun. Health Center ti Sto. Domingo, I.S. nagbalin a 3-kadsaaran


Iti panangpadakkel ken panangkompleto ni Mayor Amado “Lito” Tadena iti Rural Health Center ti ilina a Sto. Domingo, Ilocos Sur, intultuloyna metten ti panangpatibkerna iti kampaniana maipanggep iti nasapa a panangipakita dagiti umili kadagiti nasakitda tapno maliklikan ti idedegdegda.

Kas kunana, “Dakdakkel a gastos ti kayat a sawen ti panangitungtungkua iti marikrikna; ket no nakurang ti gasat, kayatna met a sawen ti nasapa nga ipapatay.”

Saan ketdi a mapabasol ni Mayor Tadena ti kastoy nga ugali ti dadduma ta saan met a kompleto iti ramit ti health center wenno klinika ken gapu ta kasla ad-adda a maik-ikkan iti importansia ti “Saranay” a proyekto dagiti senior citizen wenno panangitedda iti tulongda iti pumusay a padada a senior citizen.

“Ti ngamin abuloy a maawatdanto inton matayda ti ad-adda nga isagsaganaanda iti kontribusion,” impalawag ni Mayor Tadena a dina mailinged ti reggetna nga agbaliw koman ti kastoy a kapanunotan dagiti dadduma a kakailianna.

Gapu met laeng iti daytoy, inaramidna a tallo a kadsaaran ti dati a bassit a municipal health center ti Sto. Domingo, pinaaddana dagiti kangrunaan a diagnostic equipment a para iti blood chemistry, ECG, X-ray, ultrasound, agraman pay ti indonar ti kabsatna a doktor nga electronic defibrillator a mausar para kadagiti pettat ti pannakaatakeda.

Babaen met iti bukod a pundo ti munisipio ken ti P3-milion nga intulong ni Congressman Ryan Singson iti umuna a distrito ti probinsia, nanayonan ti bilang dagiti ward ken katre a para kadagiti pasiente, kuarto para kadagiti dadduma a sakit a masapulna  ti espesialisasion wenno panangipangpangruna, kasapulan nga agas, nayon a dodoktor ken nars, ken dadduma pay a ramit a para iti nasapa a pannakaamiris ken pannakataming dagiti pasiente.

Kas maysa a nabayag a nagpresidente iti Glaxo Smith-Cleine, nalatak nga International Drug Company iti sangalubongan, nauneg dagiti padasna maipanggep iti healthcare.

Maysa ngarud kadagiti ipangpangruna ita ni Mayor Tadena ti dagus a pannakataripato dagiti masakit a kakailianna tapno saan laeng a maliklikan ti dakdakkel a mabusbos no kumaro ti sakitda no di pay ket tapno maliklikan ti kaadda dagiti mabalin a pumusay kadagiti tawen a kaproduktiboda ken dida pay pannakatun-oy kadagiti arapaapda para kadagiti pamiliada ken iti bukodda a biag.

“Ngarud, kayatko a nasalun-at dagiti kakailiak, ta pudno unay ‘tay pagsasao nga awan ngatan ti dakdakkel pay a kinabaknang nga ikut ti tao no di ti nasayaat a salun-atna,” kinuna ti mayor, nga ama mety ti baro programa iti salun-at iti Sto. Domingo. (C.M. Ilustre)


(Naipablaak iti Bannawag, Disiembre 24, 2012 a bilang.)

Nadaleb ni Pacquiao



NADALEB NI PACQUIAO. Nadaleb a naawanan puot ni Manny Pacquiao kalpasan a naipasubsob kenkuana ti kanawan ni Juan Manuel Marquez iti tartaraudi ti maikanem a rikus ti awan-titulona a labanda iti welterweight division idi Disiembre 9, 2012 (oras iti Filipinas) iti MGM Grand iti Las Vegas. Daytoy ti maikapat a panagsango da Pacquiao ken Marquez. Iti immuna, draw wenno tabla; iti maikadua, split decision a nangabakan ni Pacquiao; iti maikatlo, majority decision a nangabakan ni Pacquiao. (Rinetrato ni Chris Farina ti Top Rank)


(Naipablaak iti Bannawag, Disiembre 24, 2012 a bilang.)

December 14, 2012

DISIEMBRE 24, 2012




SARITA
4 Maysa a Paskua iti Sabali a Panawen
    Manuel S. Diaz

NOBELA
26 Apo Baboy Partylist (9)
     Jose A. Bragado
30 Daga a Nakayanakan (36)
    Juan Cabreros Laya
34 Operation Medalla Cartel (21)
     Norberto D. Bumanglag, Jr.

DANIW
32 Agriing ti Puso ket Agkanta Manen
     Djuna R. Alcantara
36 Kulluong iti Barukong
     Jobert M. Pacnis
48 Ita a Kasangaymo. Dawatek
     Arnold C. Baxa

SALAYSAY
7 Ania Ngata ti Ibagatayo ken ni Jesus Ita a Paskua?
   Fernando B. Sanchez
8 Gapu Ta Daytoy ti Linteg (67)
    Hues Joven F. Costales (Ret.)
12 Geohazard Map, Kunam, Atanud?
     Neyo Mario E. Valdez
16 Napanak Met iti Dayaw 2012!
     Leonardo S. Fagaragan

KOMIKS
19 Tres Muchos (81)
22 Aritosan (8)
24 Miks & Tiks

KOLUM
14 Okeyka, Apong!
18 Dear Doc
39 Kastoy, Kapid, Ditoy Hawaii
40 Ading Kosinera
41 TIPS
42 Padasem Daytoy, Kailian

PAGLINGLINGAYAN
44 Showbiz
46 Beuty Parlor, Kdp.
47 Sinniriban
47 Sapukas
47 Sudoku
47 Aggarakgaktayo

DADDUMA PAY
 2 Ti Makunami
10 Kasano a Mapairut ti Panagsisinninged Dagiti Annak?
15 Tao, Lugar, Pasamak
28 Siled ti Kararag
29 Ania ti Kayat a Sawen ti Insurat ni Ma’am iti Report Card?
31 Txtm8
33 Wen, Awan ti Ubing ken Nataengan iti Pannakaipakat ti Disiplina
37 Ti Gasatmo Ita a Lawas
38 Ammuem Pay Dagitoy

December 10, 2012

Naikulong a Higante



NAIKULONG A HIGANTE. Sitatangig pay laeng ti nakabambaneg a takder ti nalatak a lumlumned a naisina a kampanario ti Katedral ti St. William iti Siudad ti Laoag, iti laksid ti komersialisasion ken dagiti agdama a mall projects iti aglawlawna a kasla lallalo a nangisina ken nangikulong payen iti torre. (Roy V. Aragon)


(Naipablaak iti Bannawag, Disiembre 17, 2012 a bilang.)

Agannadkayo iti kosmetiko a pagpapudaw, kuna ti FDA

Imballaag ti Food and Drug Administration (FDA) ti panagan-annad dagiti umili iti panagusarda kadagiti kosmetiko a pagpudaw.

Mainaig daytoy a ballaag iti pannakanayon manen ti listaan dagiti maiparit a kosmetiko a pagpapudaw gapu iti imetda a mercury nga ad-adu nga amang ngem iti maipalubos.

Sakbayna, nangilista ti FDA iti 50 a brand dagiti kosmetiko a pagpapudaw; itay laeng lawasna, nagbalinen a 71 dagiti brand iti listaanna.

Iti ballaagna iti publiko, kuna ti FDA babaen iti Acting Director-na a ni Kenneth Hartigan-Go, a ti nangato a porsiento a mercury, mabalin nga ibunga ti pannakadadael ti kidney ken pannakadangran a mismo ti kudil a panggep a papudawen.


(Naipablaak iti Bannawag, Disiembre 17, 2012 a bilang.)

Tadek



NUPAY kaykayaten a kumpasan dagiti agtutubo iti agdama dagiti moderno a tokar a kas iti Gangnam Style, agtaltalinaed ti tadek a kas kangrunaan a sala kadagiti ili iti gingginget dagiti bantay iti Ilocos Sur a kas kadagitoy nga agtutubo manipud iti ili a Gregorio del Pilar. Babaen ti gangsa, mayat ti panaggigiddanda a mangilung-ay iti bagida. Paset daytoy ti pabuyada itay Disiembre 2 bayat ti pannakarambak ti maika-113 a panangilagipda iti Gubat iti Bessang Pass iti daytoy nga ili a nakapasagan ti ubing a heneral a ni Gregorio del Pilar. (Ladawan: Joey Culabat/ Teksto: Mancielito S. Tacadena)


(Naipablaak iti Bannawag, Disiembre 17, 2012 a bilang.)

Martin, 35

Pimmusay ni Lawrence Decena Martin, kameng ti GUMIL Isabela ken dati a mannurat iti Bannawag, iti tawenna a 35, idi Nobiembre 28 iti maipagarup nga atake iti puso.

Tubo ti Barangay Masaya Sur, San Agustin, Isabela, naipasngay ni Martin idi Enero 23, 1977 kada Salustiano Martin ken Anastacia Decena.

Sakbay a pimmusay, isu ti news editor ti Valley Times iti Ilagan City sipud pay idi Septiembre 2011.
Graduado ni Martin iti Bachelor of Science in Civil Engineering iti La Salette University ken Associate in Computer Science iti Vizcaya Institute of Computer Science. Nupay kasta, kinaykayatna ti nagsursurat ken nag-ilustrador.

Malaksid iti Bannawag, nagsursurat pay ni Martin iti Lailo Romances ken Dearest Romances idi dekada ‘90. (Villamor Visaya, Jr.)


(Naipablaak iti Bannawag, Disiembre 17, 2012 a bilang.)




December 9, 2012

Kasano a Mabayadan Dagiti Sinurat iti Bannawag?


Para Kadagiti Amin a Mannurat, Retratista ken Dibuhista iti Bannawag

Adtoy ti pakaammo manipud ken ni Gen. Proceso D. Almando (Ret.), VP-Administration Dept. ti Manila Bulletin Publishing Corp.:

MEMORANDUM
TO: ALL COLUMNISTS, CORRESPONDENTS, WRITERS, PHOTOGRAPHERS AND CARTOONISTS/ILLUSTRATORS and CONCERNED EDITORS

RE: PAYMENTS OF WRITE-UPS/WORKS THRU ATM BANK ACCOUNTS

Please be advised that effective January 2013, the company will no longer pay your published write-ups/works by means of check payments. Instead, your published write-ups/works will be paid thru your respective ATM bank accounts.

In view hereof, you are hereby instructed to open an ATM bank account on either the Land Bank of the Philippines or Philtrust Bank at any branch of your choice. Then, submit your ATM account number and the name of bank’s branch to Ms. Alicia M. Aldana, Assistant Treasurer, Treasury Department.

The last date for check payments shall be on December 31, 2012. This means that after this date, all payments due you shall be done by means of deposits to your ATM bank accounts.

Be guided accordingly.

Thank you very much.

(Sgd.) PROCESO D. ALMANDO
VP-Administration Department

(Kadagiti mannurat/retratista/dibuhista iti Bannawag, mabalinda nga ipatulod babaen ti e-mail ti Landbank wenno Philtrust Bank ATM Account Number ken Account Name-da iti bannawagmagazine.mb@gmail.com ngem nasken nga ilanadda iti Subject ti e-mail ti: ATTENTION: MS. ALICIA M. ALDANA, Asst. Treasurer, Treasury Dept. Kayatna met a sawen nga amin a mabayadan a sinurat ken retrato a maipablaak kadagiti amin a bilang ti Bannawag iti Disiembre 2012, sakupenen ti nasao a Memorandum.–Editor)

December 5, 2012

DISIEMBRE 17, 2012



SARITA
4 Ti Balay a Nagaponan ti Masakbayan
    Reynaldo A. Duque

NOBELA
24 Apo Baboy Partylist (8)
     Jose A. Bragado
28 Daga a Nakayanakan (35)
    Juan Cabreros Laya
32 Operation Medalla Cartel (20)
     Norberto D. Bumanglag, Jr.

DANIW
 7 Ti Naudi
     Rosalie V. Calpito
30 Sagut
     Marichel E. Suguitan
48 Kapanagan
     Donel Pacis

SALAYSAY
 8 Gapu Ta Daytoy ti Linteg (66)
    Hues Joven F. Costales (Ret.)
12 Emosional Unay Dagiti Filipino?
     Neyo Mario E. Valdez
40 Agaramidtayo Met iti Organiko a Ganagan a CaPhos ken FAA
     Reynaldo E. Andres

KOMIKS
17 Tres Muchos (80)
20 Aritosan (7)
22 Miks & Tiks

KOLUM
14 Okeyka, Apong!
16 Dear Doc
36 Ading Kosinera
37 TIPS
39 Kastoy, Kapid, Ditoy Hawaii
42 Padasem Daytoy, Kailian

PAGLINGLINGAYAN
44 Showbiz
46 Solution is Hear, Kdp.
47 Sinniriban
47 Sapukas
47 Sudoku
47 Aggarakgaktayo

DADDUMA PAY
 2 Ti Makunami
15 Tao, Lugar, Pasamak
26 Siled ti Kararag
27 Abusado nga Annak; Mailupitlupit a Nagannak
29 Txtm8
31 Komusta ti Anakko, Ma’am?
34 Hm, Amangan No ‘Ta Backpack ti Ayan ti Problema!
35 Ti Gasatmo Ita a Lawas
38 Ammuem Pay Dagitoy

December 3, 2012

Taga-Awaykami a Dumadamili




"TAGA-AWAYKAMI A DUMADAMILI..." Iplasplastar ni Manang Helen Damo, maysa a dumadamili iti Brgy. 24 Santa Monica (Nagrebcan), San Nicolas, Ilocos Norte, ti nagamulo a pila a padapan ti dinamilina a dalikan. Maysa a kangrunaan a pagsapulan dagiti taga-San Nicolas ti panagdamili iti banga, burnay, dalikan, lusob, paso, kdp. ket am-ammo ti ili a kas “Pottery Capital iti Ilocos Region.” (Roy V. Aragon)


(Naipablaak iti Bannawag, Disiembre 10, 2012 a bilang.)

December 2, 2012

PH, napimpintas a pagnegosioan ngem iti China ken India


Napimpintas ti agnegosio iti Filipinas ngem iti China ken India, kas maibatay iti kaudian a Forbes Best Countries for Business List.

Impakaammo ti Malakanyang daytoy itay lawasna idinto nga impadayawna ti kaudian a ranggo ti pagilian kadagiti kapipintas a pagilian a pagbangonan iti negosio idinto nga inkarina ti ad-adu pay a panangpasayaatna iti kasasaad ti pagilian tapno umad-adu dagiti umay agpuonan ditoy.

Kadagupan dagiti 141 a pagilian iti listaan ti Forbes, maika-87 ti Filipinas, un-unaanna ti China ken India, a maika-96 ken 97, kas panagsaganadda. Napagtalinaed ti Filipinas ti puestona kadagupan dagiti 130 a pagilian nga adda iti listaan ti Forbes itay napan a tawen.

Kinuna ni Deputy Presidential Spokesperson Abigail Valte a napintas a damag daytoy pannakapagtalinaed ti Filipinas iti puestona iti laksid nga ad-adu ita a pagilian ti nagpilian ti Forbes idinto a kinunana a nasken ti adu pay a panagbalbaliw tapno ad-adu pay ti maawis nga agnegosio iti pagilian.


(Naipablaak iti Bannawag, Disiembre 10, 2012 a bilang.)

Posthumous Award




POSTHUMOUS AWARD. Bayat ti pannakarambak ti maika-122 a kasangay daydi Presidente Elpidio Quirino, naipaay ti Pres. Elpidio Quirino Distinguish Medal of Public Service (posthumous award) iti mannursuro, kompositor ken mannurat a ni Natividad B. Buenavista. Karaman kadagiti putar ti sigud nga Asst. Schools Division Superintendent ti “Ilocos Sur Hymn,” “Region I March” ken “Elpidio Quirino March.” Inawat ti kabsatna a ni Judge Arturo Buenavista ti medalia  manipud kadagiti appoko daydi Apo Pidiong a da Cory ken Eduardo iti imatang dagiti opisial ti probinsia ken mangidaulo iti Knights of Columbus. (Ladawan: Dante Tacata/Teksto: Mancielito S. Tacadena)


(Naipablaak iti Bannawag, Disiembre 10, 2012 a bilang.)

Dua nga Ilokano a libro, napadayawan

Dagiti editor ti Nabalitokan a Tawid, agpakanawan:
Ariel S. Tabag, Juan Al. Asuncion ken Joel B. Manuel. 



Nangabak ti dua nga Ilokano a libro, ti Karapote: Antolohia ti 13 a Nasuerte a Sarita iti Ilokano ken ti Nabalitokan a Tawid: Antolohia Dagiti Napili a Sarita Dagiti Ilokano iti 2011 National Book Awards iti tay-ak ti Short Fiction, Ilokano ken Anthology, Ilokano, kas panagsaganadda, iti naangay a seremonia ti pammadayaw idi Nobiembre 17 iti National Museum, Manila.

Buklen ti sangapulo ket tallo a napili a sarita ni Bannawag Poetry Editor Ariel S. Tabag ti Karapote idinto ta nakatiponan dagiti sangapulo ket siam a napili a sarita dagiti Ilokano ti Nabalitokan a Tawid a nagpaayan nga editor da Bannawag Literary Editor Juan Al. Asuncion, Tabag, ken mannurat iti Bannawag Joel B. Manuel.

Imatonan ti National Book Development Board (NBDB) ken ti Manila Critics Circle (MCC), sigud a dagiti laeng naipablaak a libro iti Filipino ken English ti mapadpadayawan iti nasao nga award. Narugian a napadayawan dagiti kapipintasan a libro a nasurat kadagiti 12 kangrunaan a rehional a lengguahe iti Filipinas iti 2010 National Book Awards; nangrugi iti Cebuano (awan ti napili), sa iti 2011, naisublat met dagiti libro nga Ilokano; sabalinto manen dagiti libro iti sabali a rehional a lengguahe iti 2012 NBA. Iti sabali a pannao, no di mabaliwan ti pagalagadan, urayen manen dagiti mannurat nga Ilokano ti nasurok a 10 a tawen sa manen mabalin nga adda mapadayawan ti NBDB ken MCC a kapipintasan a libro iti Ilokano.


(Naipablaak iti Bannawag, Disiembre 10, 2012 a bilang.)