MAIBILANG la ketdi daytoy iggemyo ita a bilang ti Bannawag (Hulio 1-15, 2019) a maysa kadagiti nakallalagip a bilang ti magasin; mabalin a maidilig iti umuna unay a bilang ti Bannawag a napetsaan iti Nobiembre 3, 1934, nasuroken a 84 a tawen ti napalabas.
Wen, ta no daydi bilang a napetsaan iti Nobiembre 3, 1934 ti nangipasngay iti magasin a naawagan idi agangay iti “Biblia ti Kailokuan” ken nangpadaras iti irarang-ay ti literatura dagiti Ilokano, daytoy met a bilang ita ti Bannawag ti mangirubuat kadagiti bilang ti magasin a rummuar mamindua itan iti makabulan.
Gagangay nga adda panagbalbaliw a mapaspasamak kadagiti magasin a pakairamanan ti Bannawag tapno maibagay dagitoy iti kasapulan ti panawen. No namin-ano metten a naiwayat dagiti panagbalbaliw iti Bannawag, pakairamananen ti ortograpia ti lengguahe nga ar-aramatenna. Ngem no adda ngatan maysa kadagiti kadakkelan a madlaw unay a panagbalbaliw a napasamak ita iti Bannawag, isu daytoy mamindua itan iti makabulan nga idadatengna iti pagtaengan ni Ilokano.
Saan a di narigat a pangngeddeng daytoy iti biang dagiti mangimatmaton iti magasin nangruna no panunoten a nairuamen kadagiti agbasbasa iti Bannawag ti linawas nga iruruarna. Ngem dagiti pagteng ita iti lubong ti komunikasion a mabalin a maibilang idi nga imposible, nasuroken a 80 a tawen ti napalabas, mapaspasamakdan. Ket dagitoy, dupirenda ti wagas ti panagiwarnak a nakairuamantayon.
Iti laksid ketdi dagiti adu a pakarikutan ita iti panamagtalinaed kadagiti maimaldit a babasaen, ipanamnama dagiti mangimatmaton iti Manila Bulletin Publishing Corp., mangipabpablaak iti Bannawag, ti naan-anay a suportada iti agtultuloy a pannakaidanon ti Bannawag iti pagtaengan dagiti Ilokano a kas met iti panangidanonna iti pagtaengan dagiti Bisaya iti Bisaya, kabsat a magasin ti Bannawag, ken iti Liwayway iti pagtaengan dagiti mangipatpateg met iti nasao a magasin. Dagitoy a magasin, iti panangiladawan ti maysa nga opisial ti Manila Bulletin, ti “kararua ti puli,” a rumbeng unay a masaluadan ken mapadur-as.
Mapaneknekan daytoy a suportada iti pannakaitultuloy ti pannakaipablaak dagitoy a magasin a pakairamananen ti Bannawag, pannakanayon ti panidda, ken iti manamnama a malaksid iti maiggamantayo a maimaldit a kopia dagitoy a magasin, mapapigsa met ti kaaddada iti internet babaen ti mapataudto a bukodda a website. Babaen daytoy, madanonda dagiti readers nga addan iti nadumaduma a paset ti lubong, nga iti agdama, adda rigrigatna a maidanon kadakuada ti kopiada gapu iti kinangina unayen ti pagbayad kadagiti maipatulod a kopia iti ganggannaet.
Pudno, di maliklikan dagiti panagbalbaliw. Ket dagitoy a panagbalbaliw, sineknanna ti Bannawag. Ngem no adda man di agbaliw iti Bannawag, isu ti panagtalinaedna, saan laeng a kas maysa kadagiti kangrunaan a mangsalsaluad iti kinasagrado ti lengguahe nga Ilokano, no di pay ket ti panangitultuloyna a mangidanon iti linglingay, impormasion, ken inspirasion kadakayo nga agbasbasa babaen dagiti sinurat dagiti maibilang ita a kangrunaan a mannurat nga Ilokano ken dagiti maibilang metten a klasiko a sinurat iti Ilokano.
Iti daytoy a pannakairubuat ti mamindua-iti-makabulan nga iruruar ti Bannawag, inkeddeng met dagiti editor ti magasin a masarabo daytoy a pagteng iti pannakayakkub ti maysa nga anak ti Kailokuan, ni Ensign Dionne Mae Apolog Umalla, a nangyeg iti dayaw iti bukodna a puli babaen ti panangidaulona iti Mabalasik Class of 2019 ti Philippine Military Academy. Patienmi ngamin nga isimbolo daytoy masirib nga agtutubo ti “baro a Bannawag” a namnamsek iti kired, “awan pagpatinggaan ti arapaapna ken di agbuteng a mangasak kadagiti dana a di pay nausatan.”
CLES B. RAMBAUD
| JUAN AL. ASUNCION | ARIEL S. TABAG
(Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
