MMSU, maikapat a Top Performing Nursing School iti Filipinas

Ti Mariano Marcos State University (MMSU) iti Siudad ti Batac ti mabigbig ita a maikapat a kangrunaan nga unibersidad ken kolehio iti sapasap pagilian iti benneg ti Nursing gapu iti nagun-odna a napintas a resulta iti Nurse Licensure Examination (NLE) a naangay idi Nobiembre ita a tawen.

Uppat kadagiti 96 a nag-test iti NLE ti nairaman iti listaan dagiti sangapulo a nakagun-od iti kangatuan (top 10) a grado iti nasao nga eksaminasion. Kadagiti 96 a nag-test, 94 ti nakaruar a nakagun-odan met ti unibersidad iti overall rating a 97.92 a porsiento, nangatngato nga amang ngem iti 45.65 a porsiento a national passing rate.

Dagiti uppat a topnotchers: Quenna May S. Galicinao, No. 5 iti rating-na a 87.60 a porsiento, Angelu Gabrielle E. Castro, No. 8, 87 a porsiento; ken da Louis R. Cascayan, ken Lyca Faith S. Pasion, agpada a No. 9, 86.80 a porsiento.

Kinuna ni Dr. Manolita S. Crisostomo, dekana ti MMSU College of Health Sciences (CHS), a saan ketdi nga ita laeng ti pannakagun-od ti MMSU iti kastoy a pammadayaw ta nagbalin pay a maikadua a kangangatuan nga eskuela iti Nursing iti sapasap a pagilian kadagiti kallabes a tawen.

Iti sabali a bangir, inyalat ni Hazel H. Achuela ti maikasiam a puesto (No. 9) iti naangay nga Agriculturist Licensure Examination idi Nobiembre met laeng gapu iti nagun-odna a rating a 85.67 a porsiento. Nagturpos ni Achuela iti kurso a Bachelor of Science in Agriculture (major in Animal Science) itay laeng napan a tawen.

Maysa ni Achuela a kameng dagiti nakurapay a pamilia a maik-ikkan iti pinansial a tulong ti gobierno babaen ti programa nga Expanded Students’ Grants-in-Aid Program for Poverty Alleviation (ESGP-PA), wenno ad-adda nga ammo a 4Ps.

Bayat a tultulongan ti gobierno iti panagbasana, inyalat ti pamiliana ti umuna a gunggona (national champion) iti naangay a 2015 Search for the Huwarang Pantawid Pamilya gapu iti kinasariritna iti pagadalan.

Bayat pay ti panagbasana, imbagian ni Achuela ti MMSU iti naangay nga Asian Association of Agricultural Colleges and Universities (AAACU) Study Tour idiay Tokyo, Japan. (Reynaldo E. Andres)

(Naipablaak iti Enero 8, 2018 a bilang.)