June 24, 2016

Pannangan iti tsitsiria, pakadanagan dagiti eksperto iti salun-at

Madanaganen dagiti eksperto iti salun-at gapu iti kinalaing dagiti Filipino a mangan iti junk food wenno tsitsiria.

Kuna ni Philippine College of Physicians (PCP) Foundation President Tony Leachon iti maysa nga innuman a kumarkaro ti pannangan dagiti tao iti junk food saan laeng nga iti Filipinas no di pay ket iti sangalubongan gapu iti panagbaliw ti kababalin iti pannangan ken wagas ti panagbiag gapu met laeng iti urbanisasion ken globalisasion.

Kas kuna ni Leachon, mabalin a makaipaay iti sakit ti sobra a pannangan iti junk food, kas koma iti chips ken sopdrink.

Segun iti panagadal dagiti eksperto iti medisina, kadawyan a sakit gapu iti sobra a pannangan iti junk food ti obesity, diabetes, hypertension, gall bladder stones, fatty liver ken dadduma pay a sakit a mainaig iti puso.

Gapu iti daytoy, sinuportaran ni Leachon ti plano ni nabotosan a Presidente Rodrigo Duterte a nayonanna ti buis dagiti junk food.

Maipalagip a sinuportaran met ni agtugaw a Finance Secretary Carlos Dominguez ti plano ni Dutete a manayonan ti buis ti tsitsiria.


(Naipablaak iti Bannawag, Hulio 4, 2016 a bilang.)

No comments:

Post a Comment