June 12, 2016

Filipinas, maikatlo a kaaduan iti plastik a basura iti baybay

Kadagupan dagiti pagilian iti lubong, ti Filipinas ti maikatlo a kaaduan iti plastik nga ibasbasurana iti baybayna; umuna ti China idinto a maikadua ti Indonesia, kas naammuan iti Journal Science.

Iti rekord ti Journal Science, umabot iti 4.8-milion agingga iti 12.7-milion a tonelada metrika dagiti basura iti baybay.

Iti pannakarambak ti World Ocean Day itay lawasna, kinuna ni Sen. Loren Legarda a madiddidigra dagiti nabiag iti baybay gapu iti basura, iti napartak a panagdakkel iti populasion, iti di umno nga aramid a kas iti sobra a panagkalap, panagipaanud iti lana iti baybay, ken dadduma pay.

Kuna ni Legarda, Chair ti Senate Committee on Climate Change, a doble ti maipaay a didigra dagiti plastik a basura kadagiti kinabaknang iti baybay gapu ta makan dagitoy dagiti ikan ken makadadael kadagiti kadilian.

Innayon daytoy a masapul nga epektibo ti pannakaisayangkat ti Ecological Solid Waste Management (ESWM) tapno masalbar dagiti kinabaknang iti baybay.


(Naipablaak iti Bannawag, Hunio 20, 2016 a bilang.)



No comments:

Post a Comment