June 3, 2016

Eleksion ti barangay, SK ken Con-Con, mapaggigiddan koma – Comelec chair

Insingasing ni Commission on Elections (Comelec) Chairman Andres Bautista a maisanud ti eleksion ti Barangay ken Sangguniang Kabataan (SK) tapno maigiddanto laengen iti eleksion dagiti kameng ti maisingsingasing a Constitutional Convention (Con-Con).

Nupay kasta, kinuna ni Bautista a dagiti met laeng ketdi agpampanday-linteg ti mabalin a makaikeddeng no maisanud wenno saan ti eleksion ti Barangay ken SK nangruna ket sakbayna, kinuna ni nabotosan a Presidente Rodrigo Duterte a saan a pabor iti pannakaisanud dagiti dua a naagapad nga eleksion.

Maibatay iti paglintegan, ti Akta Republika Blng. 9164, a maangay ti eleksion ti barangay iti maudi a Lunes ti Oktubre, sa kalpasanna, maangay iti tunggal tallo a tawen. Insanud met ti Akta Republika Blng. 10656 ti eleksion ti SK iti 2013 tapno maigiddan iti eleksion ti barangay iti maudi a Lunes ti Oktubre 2016.

Impeksa ni Comelec Chairman Bautista ti kapanunotanna maipanggep iti panaggigiddan la koman dagiti eleksion gapu ta mabalin nga ibunga ti sabali manen nga eleksion ti “pannakabannog dagiti tattao iti eleksion” kalpasan ti nabiit pay nga eleksion nasional idi Mayo 9. Malaksid iti daytoy, kinunana a nagastos ti manual nga eleksion a para iti nasurok a 42,000 a barangay.

Sakbayna, kinuna ni Duterte a panggepna ti mangpaangay iti Kombension Konstitusional a mangisingasing kadagiti enmienda ti Konstitusion, agraman ti pannakabaliw ti sistema ti gobierno tapno agbalin a pederal.


(Naipablaak iti Bannawag, Hunio 13, 2016 a bilang.)

No comments:

Post a Comment