June 9, 2016

Pannakaangay ti Dap-ayan 2017 GF, mapagsasaritaan iti miting

Ti pannakaangay ti Dap-ayan 2017 wenno ti kombension nasional ti GUMIL Filipinas, ti gunglo dagiti mannurat iti Filipinas ken iti ballasiw-taaw, ti kangrunaan a mapagsasaritaan iti maika-5 a board meeting ti GF, kas impakaammo ni GF President Arthur P. Urata, Sr.

Maangay ti board meeting inton Hunio 26, 2016 iti SP Kiosk, Capitol Compound, Tuguegarao City, Cagayan iti panangsangaili ni Cagayan Board Member Vilmer V. Viloria.

Mainaig itoy, makiddaw ti yaatendar dagiti amin a presidente dagiti chapter ti GUMIL Filipinas wenno pannakabagida, nangruna dagiti maki-bid iti pannakasangaili ti nasao a nailian a kombension.

Malaksid iti daytoy, agsagsagana metten ti GUMIL Filipinas iti pannakaiwayat ti 2nd Ilokano Book Fair ken ti Pasnaan 7.

Para iti detalye ti miting ken maipapan kadagiti programa ti GUMIL, makiuman iti 0921-6021-938 (GF SecGen Ariel S. Tabag) idinto a no maipapan iti venue, makiuman iti 0915-984-2149 (VVV). (NME Valdez)

(Naipablaak iti Bannawag, Hunio 20, 2016 a bilang.)


No comments:

Post a Comment