June 30, 2016

GUMIL Oahu, agpabuya inton Agosto 6 iti Waipahu

Agpabuya manen ti GUMIL Oahu nga idauluan ni Rizal O. Fernandez iti August Ahrens Elem. School, Waipahu, Hawaii inton Agosto 6 (Sabado), iti alas sais agingga iti alas nuebe iti sardam.

Maiparangh dagiti sala, kinnantaran, daniw ken bukanegan iti nasao a pabuya a kas pangselebrar ti maika-20 nga anibersario ti nasao a gunglo dagiti mannurat nga Ilokano a kaaduanna ti agindeg iti estado ti Hawaii.

Panggibus a pabuya ti Sarsuela Ilokana a napauluan iti “Biag ni Hawayano” a sinurat ni Ric Agnes, premiado a mannurat ken kolumnista ti Bannawag (“Kastoy, Kapid, Ditoy Hawaii”). Nangyalat iti umuna a premio iti Salip iti Panagsurat iti Drama nga inesponsoran ti GUMIL Greece idi 1997, ti nasao a sarsuela ket pakasaritaan ti tallo nga agkakapurokan a rinekrut ti Hawaii Sugarcane Planters Association iti Kailokuan nga immay nakitegged iti kaunasan iti Hawaii. Manipud Puerto ti Salomague, Cabugao, Ilocos Sur, nagrubuatda a naglugan iti SS Maunauili idi Abril 11, 1946. Makapakatawa, makapasangit ken makapasegga dagiti eksena a naibasar iti rigat, ragsak ken nam-ay a naglasatan dagiti tallo.

Iti met Agosto 7, maisayangkat ti “Seminar iti Panagsurat,” manipud alas nuebe iti bigat, agingga iti alas tres iti malem. Manamnama ti itatabuno ti sumagmamano a mannurat nga Ilokano a kameng ti GUMIL Filipinas.

Daytoy a panagpabuya ket pangparnuay iti pondo a mangitultuloy iti programa ti GUMIL Oahu nga “School in the Barrios,” a mangtulong kadagiti nakurapay a pagadalan iti Kailokuan. Addan sangapulo ket walo nga eskuela a natulongan ti GO.

Silulukat dagiti nasao a programa ken seminar kadagiti Ilokano iti Hawaii. (Avelino Beronilla Felicitas, Jr.)

(Naipablaak iti Bannawag, Hulio 11, 2016 a bilang.)

No comments:

Post a Comment