No awan dagiti umno a pagannurotan tapno makontrol ti ikakaro ti panagbaliw ti klima a mabalin a mangigubuay iti nakaro a tikag, nakaro a layus wenno yaadalem ti taaw, posible nga umad-adu dagiti agrigat a tattao iti sangalubongan iti nasurok a 1 a bilion inton tawen 2030 wenno 15 a tawen pay manipud ita, kas kuna ti World Bank.
Iti maysa a report, kuna ti nasao a banko a narigat a magibusan ti kinakurapay—maysa kadagiti 17 a baro a panggep ti United Nations a napasingkedan iti daytoy Septiembre— no ti global warming ken dagiti epekto daytoy iti kinakurapay ket saan a nairaman kadagiti maiwaywayat nga addang iti panagdur-as.
Kuna ti report a maikkan koma iti naan-anay nga atension dagiti gannuat a mamagtalinaed iti sangalubongan a temperatura iti di nasursurok ngem 2 degrees Celsius kasta met a matarabay dagiti nakurapay iti ania man a negatibo a bales ti nasao a panagbaliw ti klima.
Kuna ni World Bank President Jim Yong Kim a dagiti nakurapay ti ad-adda a biktima ti climate change ket karit ngarud kadagiti maseknan a masalakniban dagiti ginasut a milion a tattao.
Kuna ti banko a ti pannakaigibus ti kinakurapay ken panangrisut iti climate change dagiti karit a sangsanguen ti agdama a henerasion.
(Naipablaak iti Bannawag, Nobiembre 23, 2015 a bilang.)
No comments:
Post a Comment