China, parikutnan ti maysa laeng nga anak

Impakaammo ti Communist Party, ti mayoridad a partido ti gobierno ti China, itay lawasna a panggep ti gobierno nga iwaksin ti “one-child policy” daytoy. Sakbay ketdi a maipatungpal daytoy, nasken ti panangaprobar ti parliamento iti daytoy, a manamnama a maaramid bayat ti tinawen a sesion daytoy a maangay inton Marso.

No matuloy, maipaluboston kadagiti naasawaan iti nasao a pagilian a maaddaan iti dua nga annak, a saan ketdi a maysa laeng, kas sagudayen ti paglinteganda.

Idi 1979, naipaulog ti maysa a paglintegan iti China a maysa laeng ti maipalubos nga anak ti maysa nga agassawa tapno maliklikan ti adu unay a populasion ti pagilian.

Iti umuna a 20 a tawen a pannakaipakat ti linteg, nakissayan ti populasion ti China iti 100 milion. Ngem iti adu a kaso, tapno maragpat ti kayat ti gobierno a kaadu ti populasion, napasamak dagiti naipapilit nga aborsion, esterilisasion, ken pannakapapatay dagiti maladaga. Nadusa met dagiti agassawa a saan a nagplano iti pamilia.

Iti agdama, makitan ti imbunga ti nasao a “one-child policy” babaen ti nabuntog nga idudur-as ti pagilian ken iti kaadun dagiti lallakay ken babbaket idinto a bimmassit dagiti makabael nga agtrabaho nga umili.

Gapu met laeng iti daytoy, naammuan a mabalin a mabaliwanen ti “one-child policy” ti nasao a pagilian ket maipaluboston a maaddaan ti maysa a naasawaan iti agingga iti dua nga annak.

(Naipablaak iti Bannawag, Nobiembre 16, 2015 a bilang.)