Ballaag, naipaulog kontra di rehistrado a pagpakuttong a kape ken agas

Binallaagan ti Food and Drug Administration (FDA) ti publiko itay lawasna a dida koma gumatgatang iti saan a rehistrado a pagpakuttong a produkto a kape ken walo nga agas a mailaklako ita iti pagilian.

Innaganan ti FDA ti slimmimg coffee product a kas Bavarian Brew Slimming Coffee a partuat ti Diamond Laboratories iti Quezon City.

Kuna ti FDA iti ballaagna a mabalin a makadangran ti nadakamat a produkto iti asino man nga agaramat, ken direkta a panaglabsing iti Akta Republika Blng. 9711 wenno iti Food and Drug Administration Act of 2009 ti panaglako iti daytoy.

Kuna ti FDA a para iti Bavarian Brew Coffee ti registration number nga adda iti etiketa ti produkto a saan ket a para iti slimming coffee.

Imbilin ti FDA kadagiti field regulatory operations officers daytoy a “samsamenda ti nadakamat a produkto a makitada a mailaklako.”

Imballaag pay ti FDA a madusa amin nga establesimiento ken outlets nga aglaklako iti nasao a produkto.

Imballaag pay ti FDA iti publiko ti dida panagusar iti walo a saan a rehistrado nga agas a mabalin a makadangran kadagiti agus-usar.

Innaganan ti FDA dagiti agas a kas Liversinl capsule, Albendazole tablet, Huang Lian Su tablet, Clobetasol Propionate cream, Trochisci Piperazini Phospatis tablet, Zhang Yan Ming Pian tablet, Intasin capsule ken Superior Fu Fang Qian Chao pill.

Innayon ti FDA a dagiti konsiumer, masapul nga aggatangda laeng kadagiti agas manipud kadagiti establesimiento a lisensiado ti FDA.


(Naipablaak iti Bannawag, Nobiembre 30, 2015 a bilang.)