Rambakan ti National Book Development Board (NBDB) ti Philippine International Literary Festival (PILF) a kas tampok ti Philippine Book Development Month a maramrambakan iti Nobiembre. Panggep ti nasao a festival nga itandudo ti panagipablaak babaen ti panagpapatang maipanggep kadagiti isyu a mainaig iti panagipablaak, iti panagsurat ken iti panagbasa.
Nainaw iti 2010, nagbalinen ti parambak a kangrunaan a mamagtitipon kadagiti autor, ilustrador, publisher, ken managayat iti literatura iti Filipinas ken iti ballasiw-taaw. Kadagiti napalabas a tawen, sinangaili ti Festival dagiti mabigbigbig iti tay-ak ti literatura ken eksperto iti publikasion a kas kada Chris Abani, FH Batacan, Robin Hemley, Christopher Cheng, Juliet Grames, Noelle de Jesus, David Parker, Vikas Swarup, Tim Tomlinson, da Bienvenido Lumbera ken Virgilio S. Almario nga agpada a National Artist for Literature, ken da Junot Diaz ken Edward P. Jones nga agpada a winner iti Pulitzer Prize.
Itoy a tawen, napauluan ti Festival iti “Laláng (likhâ): Writing in Place, Creating Your Place” ken maangay itoy Nobiembre 20-21, 2015 iti Davao City. Maitampok ditoy dagiti Filipino a mannurat nga aggapu pay iti ballasiw-taaw a kas kada Mia Alvar.
Karaman kadagiti aktibidad ti Festival dagiti sesion iti plenario ken panagsasarita maipapan iti “Writing in Place.” Maitampok met iti nasao a pasken ti rehional a literatura ken ti panagkakayammet dagiti nagduduma a literatura iti pagilian.
Mapagsasaritaan pay dagiti isyu iti kaadda wenno kaawan dagiti agbasbasa iti literatura, lengguahe ken panagipablaak. Adda pay maangay nga artistiko a pabuya, eksibit iti literatura ken book fair.
Iti biang ti Kurditan (Literatura) Ilokano, naawis da Ariel S. Tabag ti Bannawag ken Junley L. Lazaga ti UP Baguio nga agsarita maipapan iti literatura dagiti Ilokano.
(Naipablaak iti Bannawag, Nobiembre 16, 2015 a bilang.)
No comments:
Post a Comment