600-M nga ubbing, agpeggad gapu iti panagbaliw ti klima, kuna ti UNICEF

Mapan a 690 a milion manipud iti 2.3 a bilion nga ubbing iti sangalubongan nga agnanaed kadagiti lugar a dakkel ti posibilidadna a maapektaran iti panagbaliw ti klima ti manamnama nga agpeggad gapu iti ibabara ti lubong, kas kuna ti maysa a report ti UNICEF, ti ahensia ti United Nations a mangkitkita iti pagsayaatan dagiti ubbing.

Kuna ti UNICEF nga iti nasao a dagup dagiti ubbing, mapan a 530-milion nga ubbing ti agnanaed kadagiti lugar a nalaka a malayus, nangruna iti Asia, idinto a mapan a 160-milion nga ubbing ti agnanaed kadagiti lugar a posible nga agsagaba iti nakaro a tikag a kas iti Africa.

“Dagiti ubbing ti kakaruan a maapektaran gapu iti panagbaliw ti klima. Adu la ketdi kadakuada ti posible a matay ken agsagaba iti sakit gapu iti layus ken tikag,” kinuna ni Nicholas Rees, maysa a policy specialist iti UNICEF ken autor ti report ti UNICEF a napauluan iti “Unless We Act Now.”

Itoy a lawas, kadua da US President Barack Obama ken Xi Jinping ti China ti nasurok a 135 a lider dagiti pagilian para iti maysa nga internasional a komperensia nga agpanggep a mangileppas iti umuna a katulagan a mangleplep iti panagbaliw ti klima iti uneg ti 20 a tawen.

Kuna ti report ti UNICEF a gapu iti panagbaliw ti klima, posible a lalo nga agbalin a mammapatay dagiti sakit a kas iti malaria ken diarrhea. Ibunga met ti nakaro a pudot ti heatwave dagiti nakaro sakit iti kudil ken dehydration idinto nga agsagaba met ti sektor ti agrikultura. Gapu iti tikag, bumassit ti apit, ket ibungana met daytoy kinakurang ti taraon ti malnutrision ken undernutrition.


(Naipablaak iti Bannawag, Disiembre 7, 2015 a bilang.)