September 3, 2015

Napabaro a Rupa ti Saint Joseph Church iti Dingras



NAPABARO A RUPA TI SAINT JOSEPH CHURCH ITI DINGRAS. Maibilang kadagiti maysa a kadakkelan ken kaduogan a simbaan iti entero a Filipinas ti Saint Joseph Church iti Dingras, Ilocos Norte. Agatiddog iti 90 a kadapan ken agakaba iti 20 a kadapan. Iti laksid dagiti adu a didigra a naglabasanna sipud pay idi 1619 a nangdadael iti nasao a  simbaan gapu ti napigsa a ginggined, naipatakder met laeng babaen ti panagkikinnammayet dagiti umili ken ti Simbaan. Idi 1838, napuoran manen sa nakimat idi 1853. Kalpasan nga in-inut a naipatakder manen idi 1879-1893 babaen ti tulong da pasado nga Alkalde Mayor Camilo Milan ken Padre Ricardo Deza, naulit manen a naginggined ken napuoran daytoy idi 1913. Idi Agosto 20, 2010, napagnunumuan ti National Historical Commission of the Philippines, ti Simbaan Katoliko ken dagiti umili ti pannakasimpa dagiti rurogna ket maisubli met laeng iti sigud a langana. Ita, makitan ti dakkel a nagluposan ti parupa ti simbaan agraman ti pannakapapintas ti aglawlawna nga isu ita ti maysa a daydaywen dagiti turista. (Leilanie G. Adriano)

(Naipablaak iti Bannawag, Septiembre 14, 2015 a bilang.)

No comments:

Post a Comment