Generic drug, gatangenyo iti akreditado a botika--DoH

Ibalbalakad ti Department of Health (DoH) iti publiko a kadagiti laeng koma akreditado a botika ti gumatanganda iti generic nga agas.

Segun iti DoH, dagiti generic drug ket kas met laeng kadagiti branded nga agas ti bilegda ken epektiboda met laeng ngem nalaklaka ketdi dagitoy.

Ngem tapno masigurado ti kalidad, bileg ken kinatalgedda, kuna ti DoH a gumatang laeng kadagiti botika nga akreditado wenno rehistrado iti Food and Drug Administration.

Iti babaen ti Republic Act No. 6675, wenno Generics Act of 1988, napalubosan dagiti doktor nga agireseta kadagiti generic nga agas a kas pagpilian dagiti kayatna ti makagatang iti nalaklaka nga agas.

(Naipablaak iti Bannawag, Oktubre 5, 2015 a bilang.)