Australiano nga agsuksukisok, nakatakuat iti agas iti throat cancer

Kalpasan ti sumagmamano a tawen a panagsukisok, nakatakuaten dagiti Australiano nga agsuksukisok iti agas ti kanser iti karabukob, ket mamati dagitoy a daytoyen ti kadakkelan a takuatda iti napalabas a 30 a tawen.

Nagusar dagiti agsuksukisok manipud iti Peter MacCallum Cancer Center iti Melbourne iti maysa nga agas a naaramid iti Sweden ken maus-usar nga agas iti kanser iti obario ket pinadasda daytoy iti addaan iti sakit iti karabukob.

Nagbunga iti positibo a resulta ti medikasion ket simmardeng ti panagdakkel ti tumor iti karabukob ti pasiente, malaksid a simmayaat pay ti epekto ti chemotherapy, kas kuna ti pangulo dagiti agsuksukisok a ni Professor Wayne Phillips.

Mamati ni Phillips a ti natakuatanda ti kadakkelan a takuat iti tay-ak ti panagagas iti kanser iti napalabas a tallo a dekada.

Imbatad ti Australian Cancer Council a ti esophageal cáncer, a masansan a gapu iti panagsigarilio iti nabayag a tiempo ken panaginum iti arak, ti mangbikbiktima iti nasurok a 1,000 nga Australiano iti tinawen.

Innayon met ni Phillips a saan a basta maagasan ti nasao a kanser ken maibilang latta a delikado iti pasiente ti chemotherapy aglalo kadagiti agdalan iti remission.

Marugian ti pannakapadas ti nasao nga agas iti umay a tawen, ken mainayon iti dati a proseso ti panagagas.

(Naipablaak iti Bannawag, Septiembre 28, 2015 a bilang.)