Pannakapadur-as ti ammo dagiti ubbing babaen ti kompiuter, tumulong ti Microsoft

Kuna ti Microsoft itay nabiit a nakasaganada a tumulong iti Department of Education (DepEd) para iti ‘digital evolution’ wenno iti ad-adda pay a pannakapadur-as ti ammo dagiti ubbing babaen ti ilalaingda met nga agusar iti kompiuter.

Babaen ken ni Bertrand Launay, managing director ti Microsoft Philippines, ginutigot ti nasao a kompania ti DepEd nga agtinnulongda, babaen ti bileg ti teknolohia, tapno maipaayan amin nga istudiante, agraman dagiti addaan iti espesial a kasapulan, iti gundaway a mangpadur-as ti ammoda. Iti agdama, addaan ti DepEd iti nasurok a 25-milion nga istudiante iti babaen ti K-12 a kurikulum.

Maibatay iti kaudian a panagadal a napauluan iti “Microsoft Asia Digital Transformation Study,” 87 a porsiento kadagiti lider iti negosio iti pagilian ti mamati a masapul nga agturongen dagiti institusion ti edukasion iti ‘digital’ a wagas tapno masigurado a masungbatan dagiti kasapulan iti masakbayan.


(Naipablaak iti Bannawag, Septiembre 18, 2017 a bilang.)