Kas kuna ni Health Secretary Paulyn Ubial, inkari ni Presidente Rodrigo Duterte a mangpirma iti executive order (EO) a mangipalubos a ti laeng DoH ti mangipaay iti agas kontra TB kadagiti pasiente.
Segun ken ni Ubial, kalikagumda a babaen ti EO, masigurado nga awan ti agas nga idiaya ti pribado a sektor ket ti laeng DoH ti makaipaay iti daytoy tapno manamnama a makita ti kaadu dagiti agsagsagaba iti daytoy ket masigurado a maipaayan amin dagitoy iti umno a pannakaagas.
Innayon ni Ubial a daytoy a wagas, a ti laeng gobierno ti makaipaay iti agas, ket impakat met ti DoH iti kukutel wenno pungpong (leprosy).
Kas iti agas kontra iti kukutel, libre met a maipaay ti agas kontra iti TB.
Ti EO ti maysa kadagiti sungbat ti administrasion ni Duterte iti resulta ti 2016 National Tuberculosis Prevalence Survey a nakaduktalan nga adda 554 a baro a kaso ti TB iti tunggal 100,000 a residente, a nangatngato ngem iti pattapatta ti World Health Organization (WHO) a kaadda ti 322 a baro a kaso iti tunggal 100,000 a residente idi 2015.
Kayat a sawen daytoy, kas kuna ni Ubial, a mapan a maysa a milion a Filipino ti addaan iti TB ket kaaduan kadagitoy ti di makaammo nga addaanda iti TB.
(Naipablaak iti Bannawag, Septiembre 25, 2017 a bilang.)
No comments:
Post a Comment