Japan, agkasapulan iti 100,000 nga OFW

Nakasagana ti Japan nga agawat iti di nababbaba ngem 100,000 nga overseas Filipino workers (OFW) tapno masupusopan ti panagkurkurangna iti mangmangged ken ti tumataeng a populasionna.

Kas kuna dagiti dadaulo ti Philippine Overseas Employment Administration (POEA), nakiumandan kadagiti pannakabagi ti Ministry of Japan para iti pannakapirma ti baro a Memorandum of Understanding (MOU) iti daytoy Nobiembre a mangipalubos iti iseserrek ti ad-adu nga OFW iti Japan.

Maisupadi iti maipakpakat a Philippine-Japan Economic Partnership Agreement (PJEPA) a para laeng kadagiti Filipino a nursde ken caregiver, ti baro a MOU ti mangipalubos kadagiti Filipino nga adda iti sabsabali a propesion nga ‘skilled’ ken ‘semi-skilled’ nga agtrabaho iti Japan.

Kinuna ni Bernard Olalia, Labor undersecretary ken POEA officer-in-charge, ti MOU ket saanen a babaen ti katulagan iti nagbaetan ti dua a gobierno; ketdi, mapalubosan ti pannakiraman dagiti ahensia iti panagrekrut iti Filipinas. Kayatna a sawen a saan laeng a ti gobierno ti agawat kadagiti trabahador a mapan iti Japan no di pay ket dagiti pribado a kompania.


(Naipablaak iti Bannawag, Septiembre 25, 2017 a bilang.)