Inaprobaran ti Kamara (House of Representatives) itay lawasna iti maikatlo ken maudi a pannakaibasana ti gakat a mangipalubos kadagiti kompania ken empleado a mamagbalin iti regular a a panagtrabaho iti makalawas a di nakurkurang ngem 4 nga aldaw.
Palubosan ti House Bill 6152 dagiti empleado nga agtrabaho iti nasursurok ngem 8 oras ngem iti laeng 4 wenno 5 nga aldaw iti tunggal lawas. Apaman a nasursurok ngem 48 nga oras ti panagtrabaho ti empleado iti kada lawas, rumbeng a mabayadan iti overtime a panagtrabaho.
Saan ketdi nga inkapilitan kadagiti employer daytoy napakessen nga aldaw ti panagtrabaho.
Ti HB 5068 nga orihinal a gakat nga impila ni Diputado ti Baguio City Mark Go, amendaranna dagiti artikulo iti Labor Code maipapan iti normal nga oras ti panagtrabaho, overtime a panagtrabaho, ken aldaw ti panaginana. Iti agdama a Labor Code, innem ti kaaduan nga aldaw ti panagtrabaho iti kada lawas.
Inlawlawag pay ni Go a no kayat ti empleado ti agtrabaho iti 4 nga aldaw iti kada lawas, masapul nga agtrabaho daytoy iti 12 oras iti kada aldaw.
Ibilin pay ti gakat nga adda aldaw ti panaginana a di nababbaba ngem 48 oras agingga iti 72 oras, no bilang maaprobaran ti pannakaikabassit ti aldaw a panagtrabaho.
Segun pay ken ni Go, panggep ti gakat a mapalukay ti oras dagiti employer ken empleado tapno maibagay kadagiti kasapulan ti negosio ken iti balansiado a biag ti empleado a mabingbingay iti orasna iti trabaho ken iti pamilia wenno personal a biagna.
Iti innuman iti prensa, kinuna ni Go a maidatagen ti gakat iti Senado. Kasapulan ti nasao a gakat ti kapadana a gakat a maaprobaran iti Senado tapno agbalin daytoy a linteg.
(Naipablaak iti Bannawag, Oktubre 2, 2017 a bilang.)
No comments:
Post a Comment