Kuna ni Department of Trade and Industry (DTI) Secretary Ramon Lopez a mangnamnama ti Filipinas nga umadu ti produksionna iti manufacturing sector, ket ngarud, adda daytoy iti umno nga addang tapno magun-odna ti panggepna nga agbalin nga industrialisado.
Kas kuna ni Lopez, kadagiti immuna nga uppat a bulan ti tawen, ngimmato iti 7 a porsiento ti nasao a sektor, idinto a mapan a 1 agingga iti 3 a porsiento laeng ti dinur-asanna kadagiti napalabas a tawen.
Innayon ni Lopez a napasamak ti nasao a panagdur-as iti manufacturing sector gapu iti pannakaipamaysa dagiti gannuat iti pannakaipasdek dagiti industria a nangparnuay met kadagiti trabaho ken ad-adu pay nga oportunidad iti negosio.
Malaksid iti panagdur-as ti nasao nga industria, bimmales met ti sektor ti agrikultura babaen ti 6.9 a porsiento nga idudur-as manipud iti negatibo itay napan a tawen.
Innayon pay ni Lopez a ti 40 porsiento a panagdur-as iti Enero agingga iti Hulio 2017 kadagiti proyekto a nairehistro iti Board of Investments, yanninawna ti agtultuloy a panagtalek ti sektor ti negosio iti programa iti ekonomia ti administrasion ni Presidente Duterte.
Dinakamat pay ni Lopez a nakiumanen kadagiti grupo nga agpangpanggep a mangipatakder kadagiti planta ti yero ken landok babaen ti pannakaaramat dagiti baro a teknolohia. No agballigi daytoy, mabukel ti industria ti landok ket maimontar daytoy a a kas duri ti industrialisasion.
Mainaig iti daytoy, makitintinnulong metten ti DTI iti akademia a kas iti Commission on Higher Education (CHED) ken iti Philippine Association of State Universities and Colleges (PASUC) tapno mayataday ti kurikulum kadagiti kasapulan ti industria.
(Naipablaak iti Bannawag, Septiembre 11, 2017 a bilang.)
No comments:
Post a Comment