Limitaran ti gobierno dagiti agad-adal a mabalin nga agbasa a libre iti kolehio, nupay segun ken ni Department of Budget and Management (DBM) Secretary Benjamin Diokno, uray dagiti nababaknang nga estudiante, mabalin a libre met ti matrikulada kadagiti state universities and colleges (SUCs), kas iti University of the Philippines.
Mainaig iti Universal Access to Quality Tertiary Education Act a pinirmaan ni Presidente Rodrigo Duterte itay nabiit, inlawlawag ni Secretary Diokno a saan met a nailanad iti nasao a linteg a maiparit kadagiti estudiante a nababaknang ti nagannak wenno kakabagianda a mangpabpabasa kadakuada ti agbasa a libre kadagiti SUCs.
Kas kuna ni Diokno, masapul laeng a makapasa iti eksamen ti estudiante sakbay nga agbalin a kualipikado iti libre a panagadal kadagiti SUCs, dagiti unibersidad ken kolehio iti lokalidad, ken kadagiti technical-vocational school ti TESDA.
Innayon ni Diokno a mangikeddengda iti pagpatinggaan ti bilang dagiti estudiate a mabalin nga agadal a libre iti kolehio.
Ni Sekretario Diokno ti mangaramid iti implementing rules and regulations (IRR) ti nasao a linteg ket panggep daytoy a malpas iti uneg laeng ti 15 nga aldaw.
Iti sabali a bangir, mangiwaywayat metten ti Commission on Higher Education (CHED) iti konsultasion kadagiti eskuela tapno maikeddeng dagiti wagas ti panagarisit iti kabaelan dagiti estudiante a makabayad iti matrikula ken dadduma pay a paggastuan.
(Naipablaak iti Agosto 21, 2017 a bilang ti Bannawag.)
No comments:
Post a Comment