Imbilin itay nabiit ti Commission on Higher Education (CHED) kadagiti institusion a mangididiaya iti higher education (HEIs) a mangiwayatda iti inkapilitan a drug testing kadagiti estudiante iti kolehio ken kadagiti sumrek a kas estudiante.
Inaprobaran itay nabiit ni CHED Chairperson Patricia Licuanan ti CHED Memorandum Order Number 64, series of 2017.
Nailanad iti nasao a memo nga amin nga HEIs a mangipakat iti daytoy, masapul a mangiwayatda nga umuna iti konsultasion kadagiti estudiante. Confidential met dagiti drug test ket adda dusa dagiti opisial ken tao ti eskuela no adda bilang adda panaglabsing.
No maduktalan nga agar-aramat iti droga ti estudiante, masapul a mangyetnag ti HEI iti umisu a dusa, pannarabay ken rehabilitasion.
Sagudayen pay ti nasao a memo ti CHED a mangbukel dagiti HEI kadagiti komite a mangbukel met iti programa iti drug testing para iti bukodda nga institusion.
Karaman iti programa ti kampania maipapan iti droga, panangliklik ken pananglapped iti panagaramat iti droga.
Manamnama a makikoordinar dagitoy a komite kadagiti partner agencies tapno mayimplementar dagiti alagaden iti intervention, mamonitor dagiti estudiante, ken malapdan ti pannakainaig dagitoy iti illegal a droga.
(Naipablaak iti Agosto 21, 2017 a bilang ti Bannawag.)
No comments:
Post a Comment