Kas pangrambak iti bicentennial wenno maika-200 a tawen ti pannakabangon ti probinsia ti Ilocos Norte, iwayat ti Samtoy Books ken dagiti mannurat nga Ilokano ti maysa a rabii ti panagdaniw iti daytoy Septiembre 9, 2017, manipud iti alas singko iti malem, iti 2nd Floor, La Tabacalera Lifestyle Center, Llanes St. Laoag City, Ilocos Norte.
Napauluan ti pasken iti “Ayat iti Panawen ti Bayakabak,” idauluan da Anna Liza M. Gaspar ken Joel B. Manuel dagiti agpabuya a mannaniw a pakairamanan da Remy Albano, Daniel Nesperos, Mario Tejada, Avelina Fe Carlos-Camacho, Eliseo B. Contillo, Aileen Rambaud, ken dadduma pay.
Mayalnag pay iti daytoy a pasken ti Antolohia Dagiti Daniw ni Ayat a nakatiponan dagiti Ilokano a dandaniw maipapan iti ayat nga impablaak ti GUMIL Filipinas. Magatang iti Samtoy Books ti nasao a libro iti sangagasut a pisos (PhP100).
Para kadagiti interesado nga agdaniw, agbuya ken gumatang iti libro, makiuman ken ni Anna Liza Madayag Gaspar bababen ti selpon (0925 552 5277) wenno email: annalizagaspar@gmail.com.
(Naipablaak iti Agosto 21, 2017 a bilang ti Bannawag.)
No comments:
Post a Comment