Ginutigot ti Departamento ti Salun-at (DOH) ti publiko nga agan-annad kalpasan ti panagraira ti avian flu iti probinsia ti Pampanga.
Kuna ni Health Secretary Paulyn Ubial a takkaban ti ngiwat ken agong no agbaeng wenno aguyek; kanayon nga agbuggo iti ima; uminum iti adu a danum ken tubbog ti prutas (juice), aginana a nasayaat ken saan nga umas-asideg kadagiti atap a tumatayab wenno saan a mapmapan iti talon a yan dagiti manok, patok, itik ken kapadada.
No adda dagiti sintoma ti trangkaso nga agpaut iti tallo nga aldaw wenno marikna ti panagkakapsut, agpakita iti doktor wenno mapan iti ospital tapno matsek-ap no daytoy ket bird flu.
Segun ken ni Ubial, manmano ti pannakayakar ti avian wenno bird flu manipud iti tao a mapan iti sabali a tao, nupay makapapatay.
Nadakamat ni Ubial a pakadanaganda no agraira daytoy kadagiti tao nangruna ket awan pay ti bakuna kontra iti daytoy a kita ti bayrus.
Kinunana ketdi nga ar-aramiden ti DOH dagiti maitutop a tignay karaman ti pannakapapatay ken pannakapuor dagiti nakontaminaran a billit ken manok.
Inkeddeng ti Departamento ti Agrikultura (DA) a mapapatay ti sumurok-kumurang a 400,000 a manok tapno mapengdan ti panagwaras ti angol.
Innayon ti DOH a pinaigetda ti panangsiputda kadagiti sakit a mainaig iti trangkaso gapu iti naireport a panagraira ti trangkaso wenno influenza iti Hong Kong ken India sumagmamano a bulan pay laeng ti napalabas.
Kuna ni Ubial nga adda suplay ti DOH kadagiti agas ken masapsapul kontra iti trangkaso no masapul dagiti ospital ken opisina ti DOH kadagiti rehion.
Kabayatanna, kinuna ni Ubial nga igetan koma dagiti doktor ti agobserbar kadagiti sakit wenno sintoma a mainaig iti trangkaso.
Iti laksid ti panagraira ti bird flu iti Pampanga, natalged pay laeng ti agsida iti manok no la ketdi nasayaat ti pannakalutona, kas kuna ni Ubial.
(Naipablaak iti Bannawag, Agosto 28, 2017 a bilang.)
No comments:
Post a Comment