Panggep ti Departamento ti Edukasion (DepEd) ti mangawat iti nasurok a 80,000 a baro a mannursuro ken mangipatakder iti agarup 47,000 a baro a siled-pagadalan iti 2018 tapno masigurado ti pannakayimplementar ti K to 12 Basic Education Program.
Iti maysa nga innuman maipapan iti singasing a badiet ti DepEd iti 2018, kinuna ni Education Secretary Leonor Briones a mailatang ti nasao a badiet iti kasapulan iti edukasion dagiti estudiante kadagiti eskuela a para publiko ken iti pannakaipaay ti makaay-ayo nga aglawlaw a para iti edukasion dagiti estudiante.
Para iti 2018, mapan a P585.22 a bilion ti singasing a badiet para iti DepEd.
Manipud iti dimmakkel met laeng a badyet ti ahensia a P567.1 billion iti 2017, kuna ni Briones nga agturturong ti DepEd iti pannakakissay ti kinaawan panagpapatas iti tay-ak ti edukasion.
Segun met ken ni DepEd Undersecretary Annalyn Sevilla, manipud iti singasing a badyet iti 2018, agawatda iti 81,100 a titser a 43,732 kadagitoy ti para iti Kinder/Elementaria; 1,944 para iti Special Education (SpEd); 35,192 a para iti Junior High School (JHS) ken 232 a para iti Senior High School (SHS).
Iti sabali a bangir, mapan a P2.99-bilion ti mailatang a para iti 46,988 a baro a klasrum.
Iti agdama, mapan a 27-milion nga estudiante ti pagserserbian ti DepEd ken manamnama nga adda 1.3-milion nga agturpos iti Senior High School iti daytoy school year (SY) 2017-2018.
(Naipablaak iti Bannawag, Septiembre 4, 2017 a bilang.)
No comments:
Post a Comment