Pagalagadan iti pannakaiparit ti panagsigarilio iti publiko a lugar, mairuar iti daytoy a Hulio

Manamnama a mairuar dagiti pagalagadan iti pannakaipakat (IRR) ti Executive Order No. 26 a mangiparit iti panagsigarilio kadagiti publiko a lugar sakbay ti State of the Nation Address (SONA) ni Presidente Duterte, kas kuna ni Health Secretary Paulyn Ubial bayat ti presscon iti pannakarambak ti World No Tobacco Day 2017.

Kuna ni Ubial a saan ketdi a nasken nga urayen dagiti lokal a yunit ti gobierno daytoy IRR ta mabalindan ti mangipaulog kadagiti ordinansa a mangkontrol iti pannakausar ti sigarilio.

Innayon ni Ubial nga adda dagiti LGU a nais-istrikto pay dagiti ordinansada ngem ti EO no mainaig iti panangkontrol iti panagsigarilio ti pagsasaritaan.

Iti biang met dagiti awanan pay iti ordinansa, kinuna ni Ubial a mapilitandan a mangipaulog iti ordinansada gapu iti daytoy nga EO.

Kinuna ni Ubial a mabalin nga agbasar dagiti LGU iti Framework Convention on Tobacco Control (FCTC) para iti masangal nga ordinansa.

Ti nasao a Framework Convention on Tobacco Control ti internasional a katulagan maipanggep iti pannakakontrol ti panagsigarilio a nagpirmaan ti Filipinas. Daytoy met laeng FCTC ti nagbasaran dagiti dadduma nga LGU iti panangpandayda iti ordinansa kontra iti panagsigarilio.

Maipalagip a pinirmaan ni Presidente Duterte idi Mayo 16 iti daytoy a tawen ti EO No. 26 a mangipawil iti panagsigarilio kadagiti publiko a lugar iti sibubukel a pagilian.

Sagudayen ti EO, maiparit ti agsigarilio kadagiti eskuela, pagtrabahuan, pasilidad ti gobierno, establisimiento a mangididiaya iti makan ken mainum, akomodasion wenno pagdagusan, propesional a serbisio, dagiti lugar kas iti pagay-ayaman, sports center, arubayan ti simbaan, ospital, terminal ti transportasion, tiendaan, parke, resort, pagurayan a disso, pagnaan, elebeytor, lugar a nalaka a mauram, ken para iti publiko a transportasion.


(Naipablaak iti Bannawag, Hunio 19, 2017 a bilang.)