June 14, 2017

Errado a libro iti MTB-MLE, tamingen ti DepEd-Region 1

Manamnama a tamingen ti Departamento ti Edukasion, Regional Office I dagiti errado a libro iti MTB-MLE-Ilokano.

Daytoy ti napagkaykaysaan iti pannakiuman dagiti pannakabagi dagiti maseknan iti pagsasao nga Ilokano ken ni DepEd-Region I Regional Director Alma Ruby C. Torio iti opisina daytoy idi Hunio 14.

Napagsasaritaan iti nasao a pannakipatang ti pannakaitandudo ti Tarabay iti Ortograpia ti Pagsasao nga Ilokano nga inruar ti KWF nga agserbi a kas reperensia iti panagaramid kadagiti textbook.

Napagnunumuan a maaramid ti pannakaparepaso ken pannakaatur dagiti libro babaen dagiti eksperto iti asignatura ken dagiti eksperto iti pagsasao nga Ilokano.

Nagkiddaw ni Direktor Torio iti listaan dagiti eksperto iti lengguahe nga Ilokano tapno agserbinto a kas language reviewers ken editors.

Inkari met Direktor Torio ti pannakipatangna kadagiti eksperto kadagiti asignatura ken kadagiti dadduma pay a maseknan iti Rehion tapno maayaban dagiti eksperto a mangtingiting iti kinaumisu dagiti linaon dagiti libro.

Imbatad ni Torio nga inikkanen ni Usec Dina Ocampo ti DepEd iti berbal a pammalubos tapno risutenna dagiti parikut a pinarnuay dagiti addaan riro a libro iti Ilokano.

Imbagian da Eugene Carmelo Cabanilla-Pedro, graduado iti UP-College of Law, ken Joel B. Manuel, presidente ti GUMIL Ilocos Norte ken agpapaay pay nga School Principal IV iti Bangui National High School dagiti stakeholder iti pagsasao nga Ilokano a nakipatang ken ni Direktor Torio.

Sakbay daytoy, nagwaras iti Facebook ti maipapan kadagiti errado a libro a nangibunga iti pormal a surat ti NAKEM Philippines, GUMIL Ilocos Norte, GUMIL Filipinas, TMI Philippines ken dadduma pay a gunglo dagiti Ilokano ken ni Sek. Leonor Briones, USec Dina Ocampo ken RD Torio.

Inyusuat met ti GUMIL Ilocos Norte ti maysa nga online petition iti change.org a mangkidkiddaw iti pannakakayumkom ken pannakaatur dagiti adda kamalina a libro.

Indanon ni Dr. Aurelio S. Agcaoili, convenor ti NAKEM International, dagiti surat ken isu metten ti nangurnos iti taripnong.


(Naipablaak iti Bannawag, Hunio 26, 2017 a bilang.)

No comments:

Post a Comment