SINAMBONG TI NARVACAN. Patupat, kunada idiay La Union, Pangasinan, Isabela, ken Nueva Vizcaya. Sinambong kunada met iti Ilocos Sur kdp. a paset ti Kailokuan. Isu daytoy 'tay kankanen a diket a nakalti. Maipan ti apaglinay a diket iti nalagalaga a naganus a bulong ti niog sa maitabnaw iti malutluto a bennal (ti unas) wenno iti narunaw a tagapulot, no saan a tiempo panagdadapil. Nakapigpigket ken kasulit ti dadduma a kanen ngem nakaim-imas met ken nabanglo gapu iti nakabungonanna a bulong ti niog. Kastoy daytoy lako daytoy nasaldet nga ina iti tiendaan ti Narvacan, Ilocos Sur. Ilaklakona iti P35 ti dua (nagsinggalut) a pedaso. Adda lakona a naukisanen a sinambong tapno saanen a mapigketan ti ima ti mangan. (ROY V. ARAGON)
(Naipablaak iti Bannawag, Hunio 29, 2015 a bilang.)
No comments:
Post a Comment