Dinakamat ni POEA Administrator Hans Leo Cacdac ti sumagmamano kadagiti modus operandi dagiti illegal recruiter:
Panamalaybalay. Maikontra daytoy iti pagalagadan ti ahensia a kadagiti opisina laeng a mabalin nga agrekrut ti maysa nga employer.
Panagited iti kuarta. Dagiti lisensiado a recruiter, agpilida kadagiti maikari nga aplikante babaen ti kabaelan, ket saan a karaman ditoy ti panagpasuksok wenno panagited iti kuarta.
Panagsingir iti placement fee. Automatiko nga awan ti placement fee ti domestic helper ken seaman. Dina pay rebbeng a masingir dagiti skilled worker a mapan idiay US, United Kingdom, Ireland, Netherlands, New Zealand ken Canada. Kadagiti saan a nairaman kadagiti nadakamat nga exemptions, masapul a kaibatogan ti makabulan a sueldo ti mabalin a singiren a kas placement fee ken masapul nga adda opisial a resibo manipud iti Bureau of Internal Revenue (BIR).
Panangsisirap iti kinabaknang. Tapno makaawis dagiti illegal recruiter, agipakita daytoy iti adu a kuata, napipintas a lugan, titulo dagiti sanikua wenno retrato ti nasayaat a biag dagiti kunada a naipatuloddan iti abroad.
Panagited iti tiket iti eroplano. Us-usarenda ti panagited iti tiket iti eroplano tapno alaenda ti talek dagiti biktimaenda manipud iti probinsia a papanen ti illegal recruiter iti Manila wenno iti sabali a lugar.
Napartak a proseso. Inlawlawag ni Cacdac a kapartakanen ti 45-aldaw a legal a proseso. Agduaduaka ngaruden no naparpartak ngem iti daytoy ti ikarkari ti recruiter.
Mabalin a beripikaen no lisensiado ti job order iti www.poea.org.ph ken makiuman iti opisina ti POEA iti info@poea.gov.ph. Masirip dagiti lehitimo a bakante a trabaho iti website ti DOLE iti www.phil-jobnet.dole.gov.ph.
(Naipablaak iti Hunio 29, 2015 a bilang.)
No comments:
Post a Comment