Kinuna ni Angara nga iti agdama a linteg, ti Akta Republika Blng. 10627 nga am-ammo pay nga Anti-Bullying Act of 2013, dagiti laeng estudiante a mapaneknekan a nang-bully kadagiti padada nga estudiante ti sakupen ti linteg.
Makuna a bullying ti maysa nga aramid, kas sagudayen ti RA 10627, no nakaro daytoy ken maulit-ulit a panangdangran, naisurat man wenno naisao, uray pay babaen ti elektroniko a wagas, wenno naaramid a pisikal, ken aktual a nangisaad iti estudiante tapno agbuteng gapu iti pisikal wenno mental a panangdangran, wenno panangdadael kadagiti alikamen wenno sanikua ti pagadalan a mangibunga iti di natalna nga aglawlaw iti pagadalan.
Iti babaen ti Department of Education (DepEd) Order No. 49, series of 2012, mabalin a maidarum iti kaso administratibo dagiti titser a mang-bully kadagiti estudianteda babaen ti panangpabainda kadagitoy, panangungetda kadakuada iti sango dagiti kaeskuelaanda, ken panangibilinda iti panagtakderda a mangsango iti diding.
Kuna ni Angara a panggep ti SB 2793 nga ipaayan iti ad-adu a ngipen ti DepEd order babaen ti panangdusana iti asino man a titser wenno empleado ti pagadalan nga agbasol iti bullying babaen ti pannakamultana iti di nakurkurang ngem P50,000 ngem di nasursurok ngem P100,000 ken/wenno pannakaibaludna manipud iti innem a bulan agingga iti makatawen.
(Naipablaak iti Bannawag, Hunio 22, 2015 a bilang.)
No comments:
Post a Comment