May 2, 2015

PH, umuna iti rehion a talken dagiti negosiante

Kadagupan dagiti pagilian a kameng ti Association of Southeast Asian Nations (ASEAN), ti Filipinas ti umuna iti listaan a talken dagiti negosiante ken patienda a pagrukbosan dagiti negosio kadagiti masungad a bulan.

Mainaig daytoy iti resulta ti sangalubongan a surbey a nakipartisiparan ti nasurok a 2,600 a lider iti negosio.

Naitampok ti resulta ti surbey iti Grant Thornton International Business Report (IBR), maysa nga agtinawen a panagadal a pakaammuan iti manamnama a masakbayan ti nasurok a 10,000 a negosio iti 36 a pagilian.

Nairuar ti resulta itay lawasna babaen ti audit, tax, advisory ken outsourcing services firm Punongbayan & Araullo (P&A), kameng ti Grant Thorton iti Filipinas.

Nadakamat pay iti surbey a 86 a porsiento kadagiti lider ti negosio iti Filipinas, 2 a porsiento ti bimmabaanna no maidilig itay napan a tawen, ti mangnamnama iti isasayaat ti ekonomia ti Filipinas iti masungad a 12 a bulan.

Daytoy nangato a grado nga inted dagiti negosiante a Filipino, iti laksid ti 2 a porsiento a bimmabaanna, ti nangitan-ok iti Filipinas a kas numero uno kadagiti amin a pagilian a kameng ti ASEAN no panagtalek dagiti negosiante ti pagsasaritaan.

Nupay kasta, inagapad ketdi ti mapan a 37 a porsiento kadagiti negosiante ti panagkurkurang ti skilled workforce a mabalin a mangtungday iti idudur-as ti ekonomia.

(Naipablaak iti Bannawag, Mayo 11, 2015 a bilang.)


No comments:

Post a Comment