May 24, 2015

Libro ti dandaniw, nayalnag

Nayalnag itay Mayo 19, 2015 iti Conspiracy iti Quezon City ti Sa Ilalim ng Pilik a libro ti dandaniw ni Charles Bonoan Tuvilla, premiado a mannaniw a tubo iti Bangui, Ilocos Norte ken nagturpos iti Development Communication iti Mariano Marcos State University iti Siudad ti Batac.

Maysa daytoy kadagiti dua a libro nga impablaak ti Linangan sa Imahen, Retorika, at Anyo (LIRA). Ti Agua a koleksion met laeng iti dandaniw ni Enrique Villasis a kapada ni Tuvilla a kameng ti LIRA, ti maysa pay a nayalnag.

Sumagmamano kadagiti daniw iti agpada a libro ti nagunggonaan iti Maningning Miclat Foundation ken Don Carlos Palanca Memorial Awards for Literature.

Gunglo dagiti mannaniw a mangidurdur-as iti literatura ken lengguahe a Filipino ti LIRA. Ti Librong LIRA ti para pablaak a sanga ti gunglo.

Kadagiti interesado a maaddaan iti kopia dagiti nasao a libro, makiuman iti libronglira@gmail.com. (AST)

(Naipablaak iti Bannawag, Hunio 1, 2015 a bilang.)

No comments:

Post a Comment