May 14, 2015

Alvarez, Umuna iti Pasalip ALVIYA

Ni Johmar Rosario Alvarez, maysa a mannursuro ken agnaed iti Mabuttal East, Ballesteros, Cagayan  ti nangyawid iti Umuna a Premio ti Maikapat a Pasalip ALVIYA iti Sarita nga es-esponsoran ni Alex Vicente Yadao, pilantropo a tuboti Libertad, Abulug, Cagayan ken agnanaed iti New York City. Impangabak ni Alvarez  ti saritana nga “Atap nga Orkidia”.

Dagiti dadduma pay a nangabak: Maikadua a Gunggona ni Roy Vadil Aragon,  premiado a mannurat, freelance editor, agipatpatarus ken blogger para iti putarna a “DagitiSuni”;

Maikatlo a Gunggona, Vilmer V. Viloria, dati a broadcaster-journalist, agdama a Board Member ti Probinsia ti Cagayan ken tubo iti Tamboli, Allacapan, Cagayan babaen ti saritana a “Ni Martin”;

Umuna a Pangliwliwa a Gunggona met ni Errol L. Abrew, maysa nga editor ken taga-Caba, La Union babaen ti saritana nga “Angkuan Naunawan, iti Negosio ti Rebolusion”;

Maikadua a Pangliwliwa a Gunggona, Fernando B. Sanchez, retirado a Superbisor ti DepEd ken residente ti San Nicolas,  Pangasinan para iti sarita nga “Earthbound”; ken,

Maikatlo a Pangliwliwa a Gunggona, Benjamin P. Pacris, Provincial Manager ti PIA-Ilocos Sur ken agnanaed iti Vigan City para itisaritana nga “Anniniwan ti Rehas.”

Napadayawan dagiti nangabak a mannurat idi Abril 18, 2015 BAYAT ti Maika-47 a Nailian a Kombension ti GUMIL Filipinas iti Sala B, Balay Expo Centro, Araneta Center, Cubao, Quezon City.

Ti Pasalip ALVIYA iti Sarita ket tinawen a pasalip iti panagsurat iti sarita para kadagiti amin nga agsursurat iti Ilokano ken nairanta a makitinnulong kadagiti dadduma pay a gannuat iti pannakasaluad ken pannakapapigsa pay ti lengguahe ken literatura ni Ilokano. Tartarawidwidan daytoy ni Dr. Freddie Pa. Masuli, maysa met laeng a mannurat ken edukador iti Cagayan State University ken tubo iti Libertad, Abulug, Cagayan.

(Naipablaak iti Bannawag, Mayo 25, 2015 a bilang.)

No comments:

Post a Comment